Ke Alaula, Volume VI, Number 10, 1 January 1872 — Page 39
KE ALAULA. 39
BENI LIILII.
E kaka wahie ana o Wilika ka elemakule iloko o kona pa, a puka mai o Beni liilii mailoko mai o ka hale, e holoholo olioli ana maluna o kahi laau liilii loloa, a puni pinepine ka pa, me ke kapa ana i kahi laau loloa o kona lio ia. Hooho oia i ka elemakule "aloha oe, e Uneka Wilika."
"Eo, o oe ka ia e Beni, aloha hoi oe; pehea la oe i ike ai, eia au ma ke kihi o ka pa nei? Aloha, e ke kanaka liilii."
"Ka, ua lohe au i ka walaau o kau pahi-olo, a holo mai nei au i ike oe i kuu holo paani lio ana."
"Ae, maikai kou lio, he lio laau kupono i ke keiki liilii e like me oe, aole hoolele ino ia oe."
"Nani io keia wahi lio laau o'u," wahi a Beni, "aka, mamuli, aia a nunui iki ae au loaa ana he lio maoli maikai a he kaa liilii maikai hoi, alaila e lawe pu au ia oe maluna o ke kaa, a e hooholo aku ia oe i o, i anei, i uka, i kai, nani wale, ea."
"Ae, maikai no ia ke hiki aku oe i ka wa oo, a loaa ia mau mea. Aka, owau, ea, aole paha au e noho ana maanei ia wa, e Beni. Aia paha au ma o, ma kahi i makemake ole ia'i na lio a me na kaa."
"E hele ana ka oe, e Uneka Wilika i kahi e? Ihea la hoi ia?"
"Ae, e hele aku ana au i kahi aina maikai loa, i ka hale alii o ko'u Makua, kahi e komo ole ai ka mai, a me ka luuluu, kahi e maha mau ai ka poe luhi."
"Ka lani paha ia," wahi a Beni, "aole paha oe e make koke ana, a hele i ka lani? Malama he mau makahiki i koe e noho olioli pu ai kaua."
"Aole akaka ia ia kaua," wahi a Wilika. "Owau paha ka mea e hele koke ana, o oe paha; e make ana no nae kaua a elua. He elemakule au, ua kokoke mai ko'u hopena. Ke lana nei nae kuu manao, aole o'u makau, kuu makemake no ia e ku a hele i kuu home ma ka lani, a ke kali nei au ma ke kae o ka make i ke kii ana mai o ka anela e kaikai aku ia'u ilaila. Pehea hoi oe e Beni liilii? Make e no na keiki liilii i kekahi manawa mamua o ka poe elemakule! Ua makemake anei oe e hele i ka lani ke kii mai ka make ia oe?"
"Ae paha; he wahi maikai no ia, ea? a e hiki no anei i na keiki liilii me a'u nei ke komo ilaila? He mau keena liilii anei ma ka hale alii o kou Makua e kupono ana i na keiki uuku?"
"Ae, he mau keena liilii no a lako i na mea maikai he nui wale. A o ka makemake nui no ia o ko'u Makua e hele na keiki liilii ilaila. Ua hele e Iesu malaila e hoomakaukau i mau keena no na keiki pono."
"Aole anei Iesu e kipaku i na keiki liilii ke hele aku lakou io na la?" wahi a Beni.
"Aole. E hoopaa oe i keia pauku, Luka 18:16. 'Aka, kahea mai la Iesu ia lakou, e hele mai, i mai la, e ae aku i na kamalii e hele mai ia'u nei, mai hoole aku ia lakou, no ka mea, no ka poe me neia ke aupuni o ke Akua.'"
He mau la mahope iho a loohia o Beni i ka mai ikaika a make iho. Uwe nui o Wilika ka elemakula no ka make ana o Beni liilii, a hele pinepine oia e hoohelelei i kona mau waimaka maluna iho o kona luakupapau.
IULIA, KE KAIKAMAHINE PEGANA.
He wahi moolelo maikai keia no kekahi kaikamahine i hanauia ma ka aina hoomanakii. He mau makua hoomanakii no kona, aole laua i malama iaia. Ua waiho wale ia aku no oia, a auwana wale oia io i anei, iaia i hiki ai ke hele. Aloha ino ea. Aohe mea nana e malama, e hanai pono, e kuhikuhi pono i ka olelo a Iesu, aole i hookomoia iloko o ke kula Sabati. Aole i lohe iki i kekahi hua no Iesu, no ke Akua oiaio, no na akua kii lapuwale wale no kona lohe ana.
A, i kekahi la, e hele ana kekahi misionari ma ke alanui, a ike oia i ua kaikamahine nei e holo wale ana me ka lole ole, me ka lepo loa, e uwe ana no ka pololi, no ka hina wale ana a eha no ka nawaliwali o ke kino. "Aloha oe, ea, e ke kaikamahine auwana wale; aole anei oe i makemake e hele pu me a'u?" wahi a ka misionari. Makau ke kaikamahine mamua, a holo, aka, ma na huaolelo oluolu ana, ae oia mahope, a hele pu me ia. Alakai malie ka misionari iaia a hiki i kona hale. Malaila i hoauauia ai oia, a hoaahuia i ka lole maikai a hanaiia i ka ai a maona, a oluolu oia.
A, mahope lawe ka misionari iaia a hookomo iaia iloko o ke kula kaikamahine hanai a na misionari. Ua umi na makahiki ona ia wa, e like me kou e Maukaa, a ua kapaia kona inoa o Iulia, a nalo aku kona inoa Pegana. He wahi hou keia iaia. Akahi no a komo iloko o ke kula; nui na mea hou ana i ike, na kaikamahine i kahikoia i ka lole kalakoa onionio, e noho malie ana, e paa ana i na palapala, e nana ana, e ao ana, e heluhelu ana, e kakaulima ana, e himeni ana. Ke komo koke no ia o ka makemake iloko ona e hoohalike ia me lakou.
Aole oia i ike i ka hua hookahi mamua. He mea aha la na hua A E I O U a pela aku, iaia. He mea ano ole ma ka nana a lohe ana. Aka, ua paa kona manao e imi a loaa, a ike, a heluhelu e like me kona mau hoa. Ka himeni kona makemake nui e like me na kaikamahine Hawaii.
Aloha no ke kumu iaia, a hooikaika e ao iaia i ike. Aole nae oia i kali a ike o Iulia i ka heluhelu, mamua o ke ao ana aku iaia i ka Iesu olelo. Hoomaka koke no ke kumu e ao aku iaia i kona ano, he kaikamahine hewa, he uhane kona, e make ana ke mihi ole; ua aloha Iesu iaia, ua hele mai oia mai ka lani mai, ua kaulia ma ke kea e make i kalahala e ola'i.
A kuhikuhi aku oia ia Iulia i ka mea e ola'i oia. Ke makemake nei Iesu, wahi ana, e huli mai oe, e lilo i kaikamahine pono, i haumana nana. Ua hele e oia mamua i ka lani, i ka hale o kona Makua e hoomakaukau i wahi keena maikai nou; a ina lilo oe i keiki maikai, e kii mai ana oia ia oe mahope aku a e lawe a hookomo iloko o ua keena nei. Ua lawa keia.
KOKUA KA BAIBALA I KA PUALIINUWAI.
E na haumana kula Sabati mai Hawaii a Niihau; Aloha ouukou:
Ke make nei paha na Pualiinuwai ma Hawaii nei. Paapu wale Hawaii ia mau puali mamua. Nui na halawai, na ahaaina, na huakai, na mele mamua e pili ana i na Pualiinuwai. E hoala hou.
Penei kekahi mele kahiko i loaa ia'u i keia mau la: nawai i haku?
1 La hauoli maikai nei
No ka Pualiinuwai;
La makahiki ano hou,
La hoike no kakou;
Hele memele oli mai,
E ka Pualiinuwai.
2 La ahaaina maikai nei
No ka Pualiinuwai,
Kane, wahine, kamalii,
Akoakoa pu maanei;
Kau na kahili, me na hae
No ka Pualiinuwai.
3 Kakou no ka poe kupaa,
Aole hele hikaka,
Aole launa me kakou
Na mea ona no a pau,
Paka puhi, paka nau,
Moo niho awa o ke ao.
4 Hele pela lakou nei,
Na hoapili ino e,
Rama, awa, paka, mu,
Pepa, hula, oli pu,
Aole oukou komo mai
I ka Pualiinuwai.
5 Aloha ino no lakou,
Na inu rama naaupo,
Inu, ona, hakaka,
Kunewanewa, hikaka,
Kui aku, kui mai,
Lilo hewa ka waiwai.
6 Pupule, uu, uwauwa,
Eha, pehu, hoopaapaa,
Mai hoolauna pu kakou,
Hoopailua, kupaa mau;
Hanohano a maemae
Ka Pualiinuwai.
7 Wai wewela, ahi mau,
Wai mimilo, lua pa'u;
Weliweli a maka'u;
Hoopakele ia makou:
Puuhonua maikai e,
Ka Pualiinuwai.
8 Ipupaka, lau pilau,
Omole rama ino mau,
Kane, wahine, kamalii,
Kii, wawahi, a hoolei.
Lanakila, pomaikai
Ka Pualiinuwai.
Nani wale keia mele Pualiinuwai. E hoopaaia e na kula Sabati a pau. Ma ke poo maluna, ua oleloia, ua kokua ka Baibala i ka Pualiinuwai.
E haawi ana au i kekahi mau ninau i kela a i keia Kula Sabati ma ka pakahi ana. E hoomaka ana ma Hawaii paha. Aole i pau.