Ke Alaula, Volume VI, Number 11, 1 February 1872 — Page 43
KE ALAULA. 43
KOKUA KA BAIBALA I KA PUALIINUWAI.
1. Ia Kohala Akau. Mahea i olelo a'i he mea henehene ka waina? Ma Solomooa 20:1. E hai mai i ka pauku a pau. "He mea henehene ka waina. He walaau nui hoi ka mea e ona ai; o na mea a pau i puni malaila, aole i naauao."
2. Ia Kohala Komohana. Mahea i kakauia'i he auwe e kau ana maluna o ka poe inu i ka mea awaawa, a me ka waina? Ma Isaia 5:11, 22. penei "Auwe ka poe e ala ana i kakahiaka nui, e inu i ka mea awaawa, a kakali hou a molehulehu, i wela ai lakou i ka waina!
Auwe ka poe ikaika i ka inu waina, a me na kanaka ikaika i ke kawili i ka wai awaawa e inu ai."
3. Ia Kohala Hema. Heaha ka mea i kakau ia no na mea ona ma Eperaima? Penei ma Isaia 28:1, 3 "Auwe ka lei hookiekie o na mea ona ma Eperaima, ka pua mae wale o kona nani maikai, ka mea ma ke poo o ka papu momona o na mea i ona i ka waina!
Aia hoi ka mea ikaika, ka mea i hooikaika ia e ka Haku, nana no e hoohiolo ia lakou ilalo i ka lepo me kona lima, e like me ka hua hekili e haule ana e like hoi me ka ino nui e make ai, a me ka wai kahe he nui e holo moku ana.
Malalo o na wawae a hahiia'i na lei hookiekie o na mea ona ma Eperaima."
4. Ia Waianae. Owai ka i kunewanewa, a hikaka no ka inu ana i ka mea awaawa a me ka waina? Hai mai ma Isaia 29:7. "Ua kunewanewa lakou nei no ka waina, ua hikaka lakou no ka inu awaawa, ua kunewanewa ke kuhunapule, a me ke kaula no ka inu awaawa, ua oki loa lakou i ka waina, ua hikaka lakou no ka inu awaawa; ua kunewanewa lakou ma ka hihio; ua kulanalana ko lakou hooponopono ana."
5. Ia Kekaha, Kona Akau. Ua papa ia anei na alii aole make e inu i ka waina a me ka mea ikaika? Ae, pela ma Sol. 31:4, 5, penei: "Aole na na alii e Lemuela e, aole na na alii e inu i ka waina, aole hoi na ka poe aialo e inu i ka mea ikaika.
O inu lakou a hoopoina i ke kanawa; a kapae i ka pono o ka poe pilikia."
6. I na kula a pau. E hoopaanaau a hai mai ia Daniela 5:1, 4, 5, 25, 28. Penei: "Hana iho la o Belehazara ke alii i ahaaina nui no ka poe alii hookahi tausani, a inu oia i ka waina imua o ua tausani la.
Inu iho la lakou i ka waina a hoomaikai lakou i ka waina, a hoomaikai lakou i na akua gula, o ke dala, o ke keleawe, o ka hao, o ka pohaku.
Ia hora no, puka mai la na manamana lima kanaka, a kakau iho la maluna ae o ka ipukukui ma ka puna o ka paia o ko ke alii hale; a ike aku la ke alii i ka hapa o ka lima e kakau ana.
Eia ka palapala i kakauia: Mene, mene, Tekela, Uparesina.
Eia ke ano oia mea: Mene; ua helu mai ke Akua i kou aupuni ana, a ua hoopauia hoi.
Tekela; ua kaupaonaia oe ma ka mea kaupaona, a ua ikeia kou mama ana.
Perese; ua maheleia kou aupuni, a ua haawiia aku, no ka poe Media a me ka poe Peresia."
7. Heaha ka i kakauia ma Oihanak. 10:8, 9, no ka waina? "A olelo mai la o Iehova ia Aarona, i mai la, Mai inu i ka waina a me ka mea ona, o oe a me kau mau keiki me oe, i ka wa e hele ai oukou iloko o ka halelewa, o ke anaina, o make oukou; he kanawai mau no ia i na hanauna o oukou."
8. Heaha ke kanawai kahiko no ka Nazareta? Nahelu 6:3, 4. "E hookaawale iaia iho i ka waina, a me ka mea ona, aole ia e inu i ka vinega o ka waina, aole hoi i ka vinega o ka mea ona, aole hoi ia e inu i ka wai i kohu i ka huawaina, aole hoi ia e ai i na hua-waina maka, aole hoi i na huawaina maloo.
Ina la a pau o kona kaawale ana no Iehova, aole ia e ai i kekahi mea o ke kumuwaina, aole i na anoano, aole hoi i ka ili."
9. Pehea i hanaia ai ka waina ma na mohai kahiko? Nahelu 28:7. "A o ka mohai inu oia mea, he hapa o ka hina no kekahi keiki hipa; ma kahi hoano kau e ninini iho ai i ka waina no Iehova i mohai inu."
10. Heaha ka hoopai ana i na keiki hookuli a lilo i ka ona? Kanawailua 21:20, 21. "A e olelo aku i na lunakahiko o kona kulanakauhale, Ua hewa, uwa paakiki keia keiki a maua, aole ia i hoolohe i ko maua leo, ua pakela ai a ua pakela ona."
11. O ka inu waina a me ka mea ona he mea anei ia e waiwai ai? "Sol. 21:17. "O ka mea makemake i ka lealea, e ilihune auanei ia, o ka mea makemake i ka waina a me ka aila, aole ia e waiwai."
Sol. 23:20, 21. "Mai noho pu oe me ka poe inu waina; me ka poe hoopalupalu i ko lakou kino iho.
No ka mea, o ka mea ona a me ka mea pakela ai e ilihune auanei oia; a no ka palaualelo e komo kekahi i na weluwelu."
Heaha ka olelo ao ma ke Kauoha Hou? Luka 21:34. "E malama hoi oukou ia oukou iho, o kaumaha auanei ko oukou mau naau i ka uhauha ana, a me ka ona ana, a me ka manao ana ma keia ao, o kau mai hoi ua la la maluna o oukou me ka manao ole ia aku."
13. Heaha na hope o ka inu ana i na mea ona? Sol. 23:29, 30. "Ia wai la ka uwe ana? Ia wai la ka poino? Ia wai la ka hakaka? Ia wai la ka nuku wale ana? Ia wai la na pala pu loaa wale? Ia wai la na maka ulaula?
I ka poe e hoomau ana ma ka waina, i ka poe e hele ana e imi i ka waina i kawiliia."
14. Pehea la o pakele ai ia mau hope? Sol. 23:51, 32. "Mai nana oe i ka waina i kona ulaula ana, i kona aleale ana ma ke kiaha, i kona hu ana a maikai.
Mahope iho e nahu mai ia me he nahesa la, a e pa mai ia me he moonihoawa la."
15. Heaha ke ao ana no ka launa pu me ka poe ona? 1 Kor. 5:11. "Ke palapala aku nei au ia oukou, ina i kapaia aku kekahi, he hoahanau, a ua moekolohe ia, a ua makee, a ua hoomanakii, a ua ahiahi, a ua ona, ua alunu; mai hoolauna aku oukou, aole hoi e ai pu me ka poe i hana pela."
ALOHA KAMALII.
Ma kekahi kauhale Tureke, he mau hoolepope e noho ana ilaila. Ua heuhelu kekahi wahine i ka moolelo o Samuela i kekahi poe kamalii. Komo mai kekahi kaikamahine Aramenia, eiwa kona mau makahiki; akahi no a lohe oia i kekahi moolelo no loko o ka Baibala. Ua imi koke oia he wahi palapala (Primer.) Ua heluhelu ia ia, a hoomaopopo i kona ano; alaila makemake oia e kuai i ka Baibala. Hoole mai kona makuakane me ka olelo ana, "Heaha kou makemake i ka Baibala?" I aku la oia, "Makemake au e ao e heluhelu, i hiki pono ia'u ke hele i ke kula o na kaikamahine ma Harpoot." I mai la ka makuakane, me ka huhu, "E hookomo au i kou poo iloko o ke ahi, mamua o kou hele ana ilaila." I aku la ke kaikamahine, "E ka makua, e hiki ia oe ke hoao i ko'u kino wale no; no ka mea e hele aku ko'u uhane io Iesu la!"
I ka lohe ana o na kaikamahine ma Harpoot i keia, ua kokua mai lakou i kekahi mau dala, a kuai i ka Baibala a me ka Himeni, a hoouna aku iaia me keia palapala:
"KO MAKOU KAIKAINA ILOKO O KA HAKU IESU KRISTO, O MIRIAMA:—Ua hauoli nui makou i ka lohe ana i kou moolelo. I ko makou palapala ana ia oe, ke hoike nei makou i ko makou makemake ia oe, e kupaa iloko o ke alohe o Kristo; a makemake makou e lohe hou ia oe. He nui ko makou aloha ia oe, aole nae makou i ike maka ia oe. Ke haawi aloha aku nei makou i keia Buke Hemolele ia oe, i mahuahua kou aloha ia Kristo, i kou heluhelu ana i kana olelo. Ua lohe makou ua pilikia no oe, no kou aloha ia Iesu. Aka, e hoomanawanui iloko o keia mau popilikia, no ka mea ma ka lani, e hauoli no oe no kou ehaeha ana no Kristo; no ka mea Oia ka mea i hoomanawanui iloko o na ehaeha loa ma ke kea, i mea e ola'i kakou. O Paulo kekahi i ehaeha nui no Kristo; aka aole o kana mai kona hauoli i keia wa. E heluhelu ma Korineto II., mokuna 11, a e ike oe i ka nui o kona mau pilikia. Kou mau hoaaloha oiaio,
NA KAIKAMAHINE O KE KULA HANAI MA HARPOOT"
"E kiai oe i kou naau me ka malama loa, no ka mea no loko o laila ka hana ana i ka wa e ola'i."—SOLOMONA 4:24.
"Heaha ke kumu e pomaikai ai,
A pau ka huhu me ka enemi mai?
Ka rula e pono ke hoopaaia e,
E pai no ke ino i honi maikai."
Tema, e hoopaa oe i keia pauku ma Mataio 5:39, "Mai hoopai oe i ke ino;" a heaha ke koena o ka pauku?
He aloha ko Iesu
I na keiki liilii no;
Nona no ka poe liilii,
Nona wau ka pokii nei.
"He mea nani i ke Akua ke huna i kekahi mea. He mea nani hoi i na 'lii ke imi aku."
"O ka lani he kiekie, o ka honua he hohonu. A o ka naau o na 'lii he mea ike ole ia."
SOLOMONA 25:3, 4.