Ke Alaula, Volume VI, Number 11, 1 February 1872 — Page 44
44 KE ALAULA.
I LEI ROSE MAIKAI.
Leo: "WE'LL CROWN THEM WITH ROSES."--Silver Songs
Ma-nao nu-i e i na u-i oo-nei E u-la-na i lei no la-kou. Mai hoo-kui me ia lei i na lau a-wa e; I lei ro-se mai-kai wa-le no. Lei ro----se Lei ro----se Lei ro-se mai-kai wa-le no. Lei ro---se, le-i ro---se, Lei ro-se mai-kai wa-le no. Lei ro-se, lei ro-se, Lei ro-se, lei ro-se, Lei ro-se mai-kai wa-le no. Lei ro-se, lei ro-se, Lei ro-se, lei ro-se,
2. E kii a kai e! na kamalii nei
I kahi omao a maemae;
I na kula maikai kahi e loaa mai ai
O na lua uli e no ka lei.
Hui--Lei rose, lei rose,
Lei rose maikai wale no,
Lei rose, lei rose,
Lei rose maikai wale no.
3. E kii a hoolei i na wai e ona'i
Na kini opio oonei;
O ka wai maoli no e hanai ia lakou,
I mau hua wai hau no ka lei.
4. Mai kii a kapae i na pokii maikai
Mai ke ala e malu mai ai;
Kii a ao i paa ae ko ke Akua kanawai
I ke apo no ia no ka lei.
Hui--Lei rose, lei rose &c.
5. E hoopuai mai no na ui oonei,
Na punawai hoomaemae e;
A e hoolako ae i na home maikai,
O ke gula no ia no ka lei.
6. Na oli maikai koonei kamalii,
E ulana i lei no lakou;
A i paa, lawe no, a hoolei ia lakou
I lei rose maikai wale no.
Hui--Lei rose, lei rose, &c.
IULIA, KE KAIKAMAHINE PEGANA.
HELU 2.
E aha ana o Iulia kakou i haalele ai iaia? E hoomaka ana e noonoo, ea, i ke ano o na mea i ao ia aku iaia, e pili ana i kona uhane, i ke ola ma o Iesu la.
He mau malama wale no i hala iloko o ke kula, a loaa ka manao paa ia Iulia e huli mai ma ka pono, ae haawi aku i kona naau ia Iesu. A hoopuka oia i kona manao i ke kumu. E ke kumu, ua haawi aku au i ko'u naau a pau ia Iesu. Nui loa kuu aloha ia Iesu. Makemake au e lilo i haumana nana. Pehea; pono paha ia'u ke bapetizoia a hookomoia iloko o ka ekalesia? Ae, pono no ke mihi i ka hewa, a paulele nui ia Iesu, a malama pono iaia. Ko'u makemake no ia, aole o'u kanalua, paa ko'u manao ia Iesu.
Pela io no ma ka nana aku, o ke kumu nui o kona aloha ia Iesu, hele pinepine oia ma kahi mehameha e pule, a e launa pu me Iesu. Ke ano ia o na keiki huli io mai. Pela anei oukou, e na kaikamahine heluhelu i ke ALAULA a e ae ana e huli mai? Ka hoailona ia no ka huli io mai.
A, i kekahi la, hele o Iulia i ke keena o kona kumu, a olelo aku me ka waimaka, e ke kumu, nui loa ka hewa o kuu naau, aole hiki ia'u ke pule, o ka noho me ka uwe wale aku ka'u.
Pane oluolu aku ke kumu, pela no paha ua hewa ka naau, a hewa pinepine no, aka, ua lohe oe, he aloha ke Akua, a makaukau oia e kala i na hewa ma o Iesu la, ke mihi io oe.
Maloo koke ihola ko Iulia mau waimaka, a olelo ae, ua ike au he hiki i ke koko o Iesu ke hoomaemae a hoopau i na hewa a pau. Ua ike au e kala ana oia i kuu hewa. A mahope iho, maha kona naau a hele aku i kona wahi mehameha e pule hou no. No ke aha keia mihi, keia pule pinepine ana a Iulia, e na keiki aloha? No kona aloha nui no ia Iesu.
Mahope iho ua loohia o Iulia i ka mai nui a manao ke kumu he mai make paha keia nona, aole paha oia e ola. A ninau oia iaia, e Iulia, nui kou mai, manao anei oe e ola? Pane mai oia; aia ia i ko ke Akua makemake; ina makemake oia e ola au, ko'u makemake no ia; ina aole i makemake oia e ola au, aole o'u makemake e ola.
Mahuahua no ka mai a ninau hou ia, pehea oe? kokoke paha kou hopena, ke makemake nei anei oe e make? Ua makemake anei oe? aloha nui anei oe ia Iesu? Pane mai oia, ke ae nei au i ko ke Akua makemake, no ke ola, no ka make. Aole o'u makau i ka make. Ina make au e hele au e noho pu me Iesu ma ka lani, a pau kuu hewa, aole au e hana hewa hou aku. He kaikamahine hewa loa au, aka, ua kala mai Iesu i kuu mau hewa a pau. A ninau ke kumu makemake anei oe e pule au nou? Ae, e pule oe no'u, e pule i ke Akua e kala i ko'u mau hewa a pau, a e lawe aku ia'u i ka lani e noho pu me ia.
Mahuahua loa kona mai a kokoke loa ka hopena, a ninau oia, auhea ko'u mau hoakula? e kii aku e hele mai. Ua kii ia aku, a puka koke mai no lakou a ku poai i kona wahi moe me ka uwe nui ana. Olelo oia, mai uwe oukou no'u, e aloha aku ia Iesu, mai hoeha hou iaia ma ka aua ana i ko oukou mau naau. E haawi koke aku i ko oukou naau iaia. E lilo ano i poe haumana nana. Nui na olelo paipai e ae a Iulia. A liuliu iki, hoalaia ae la oia maluna o kona uluna, a olelo nani kuu olioli, ke make nei au, aloha oukou e na hoa, ke hele aku la au e noho pu me Iesu.
E na kaikamahine a me na keikikane e heluhelu ana i keia moolelo no Iulia ke kaikamahine pegana i huli a make iloko o ka pono. E hoohalike oukou me ia, e huli mai i ko oukou wa kamalii no, alaila ina make oukou ma ko oukou wa kamalii, e hele no i ka lani a noho pu me Iulia a me Iesu.
NA NINAU BAIBALA.
1—Owai ka mauna mua i oleloia ma ka Baibala? Kinohi 8:4.
2—Heaha ka hoailona i ike ia ma kona piko? Kinohi 9:13.
3—He hoailona ia no ke aha? Kinohi 9:14, 16.
4—He mauna ma ka hikina o kekahi kulanakauhale ma Ezekiela, owai ia mauna a me ia kulanakauhale? Ezekiela 11:23; Mataio 23:37; Luka 19:37.
5—Heaha ka wanana no keia mauna? Zakaria 14:4.
6—Mahea Iesu i hookipa maikaiia? Ioane 11:1.
7—Mahea o Betania?
8—Mai ka mauna hea i pii aku ai o Iesu i ka lani? Oliveta.
9—Mahea ka himeni hope ana o Iesu me kana mau haumana, a hele aku i keia mauna?
10—Heaha kekahi mau mea e ae no Oliveta? Mataio 26:30.
MA KE AHA E LANAKILA AI?
He poe kaua anei na kamalii? Ae he poe kaua no. Aole anei oukou i hoopaa a himeni i na mele kaua he nui wale? me keia, "Hamau e na koa, ua kani ka pu," &c., "Paio, paio, no a mau," "Oli au e ku a paio," &c. Owai la na enemi e kaua ai? Na Perusia anei? Na Farani, na Rukini anei? Aole paha o lakou; aole make e hele ia Perusia, ia Farani, ia Rukini, i loaa na enemi; eia no lakou maloko o ka naau, a ma ka waha hoi.
Ma kekahi Sabati, ninau o Kale i kona mama, ea, e mama, heaha ke kumu olelo a ke kahunapule i keia kakahiaka? Pane ka makua oia no ia, "Maikai ke ahonui mamua o ka ikaika; a o ka mea hoomalu i kona uhane mamua o ka hoopio ana i ke kulanakauhale." Sol. 16:32. Ae, ua lohe iki au i kekahi mau hua no ka hoomalu ana i ka uhane. Mai pau no ia oe wahi a ka makua, ina aole oe i lilo i ke kolohe i kekahi manawa. Olelo ke kahuna penei, ina ua nui na keiki i ao ia ma ko lakou wa uuku e malama, e hoomalu pono i ko lakou uhane, Ina ua emi mai ka poe ukiuki wale, huhu koke, paupauaho, nuku ino iloko o keia ao.
Maikai no ia wahi a Kale, a he oiaio hoi, aka, aole paha i ike ke kahuna he mea paakiki loa, a ane hiki ole i na keiki ke hoomalu pono i ko lakou uhane, a uumi i ka huhu, ke hoonaukiuki wale ia mai.
Kahaha! manao anei oe ua naaupo ke kahunapule? a ike ole i ke ano o kana mau olelo i hai mai ai? Ua ike lea oia, he keiki oia mamua a le e mai keia enemi ka huhu maluna ona a ua aa oia e kaua aku, e pale aku, e hakoko me ia he lima he lima, a ua ike hoi oia i ka pahikaua e lanakila ai.
Ua lanakila anei oia maluna o kona huhu? wahi a Kale. Aole i pau.
KE ALAULA,
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.
25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
L. LAIANA, Luna Hoopuka.