Ke Alaula, Volume VI, Number 12, 1 March 1872 — Page 45

KE ALAULA.
BUKE VI. HONOLULU, MARAKI, 1872. HELU 12

E NANA I KEIA!

                E NA KAHU KULA SABATI, ME NA KUMU A ME NA HAUMANA; Aloha oukou.
                I mea e waiwai ai ke ALAULA a me na kula Sabati, ua manao ka Lunahooponopono e hoopiha i kekahi aoao o ke ALAULA ma keia hope aku i na haawina hui no na hoike malama o na kula Sabati, ke makemake kekahi mau kahu e hoike malama.
                I mea e maopopo ai ke ano o ka haawina hui ke pai ia nei kekahi haawina ma keia ALAULA helu 12. Ka helu hope keia o ka makahiki. Ke makemake nei ka Lunahooponopono e hoomauia ke ALAULA a e hoomahuahua nui ia ka poe lawe ma keia makahiki hou. He hapaha wale no kona uku makahiki. He mea aha ia? He mea loaa wale, nawai e hoole? Hana aloha no ka Lunahooponopono, aole i ukuia. Aloha hoi ka Papa Hawaii a hookaa i kekahi hapa o na koina.
                E palapala koke mai na kahu ekalesia me ka hai mai i ka nui o na pepa e lawe pakahi ana oukou, me ka manao no hoi e hookaa mai i ka uku.
                A ina e mau ana ke ALAULA, alaila e ike oukou i keia hana hou, oia hoi ka haawina hui i haiia maluna. E paiia no ma kela a me keia helu. Okoa ka haawina i kela a i keia malama. He hana nui keia ma na kula Sabati ma Amerika, a ma kekahi mau kula paha ma keia pae aina. Ua lohe au aia ma Hilo kekahi. A ua mahalo nui ia. Okoa na haawina kula Sabati e paiia nei, a e paiia ana ma ke Kuokoa. No kela a no keia Sabati ia. No ka malama keia. A he la noa e hoikeia ai keia haawina hui malama.
                Manao Hoakaka.—Aia loaa ke ALAULA e haawi koke aku na kahu i na kumu me na haumana. Ae haawi na kahu i manawa e hoomakaukau ai no ka hoike malama. I elua paha pule e hoomakaukau ai. E ala mai na kumu e hoomakaukau i na haumana, i paanaau na pauku, na himeni, na leo mele. A ma ka Sabati, ma ka halawai nui e hai aku na kahu i ka manawa e hoike ai i lohe lakou a hele mai ka poe makemake e lohe a ike maka. Aia no i na kahu ka manawa a lakou i manao ai he kupono, a he kaawale, he pilikia ole. No ka mea ma kekahi la noa keia hoike, ma ke ahiahi Poakolu paha, ma ke ahiahi Poaono paha. E hui ana na haumana keiki me ka haumana makua.
NA KA LUNAHOOPONOPONO.

KA HOOHULIHULI AE.

                Ua i mai kekahi luwahine pono, "O ka malama ana o haunaele ka haipule a hai kekahi hapa o kuu hoomana." A ke manao nei makou ina ua makaala like ke anaina a pau, ua oi aku ka pono no lakou a no hai hoi kekahi.
                He nui na mea e hoohaunaele ai i ka halawai, ka holoholo ana iwaho, ka hawanawana, ka akaaka, a o ka huli ana ihope e nana i ka mea e komo mai ana.
                Penei ka hana a kekahi kahunapule i mea e hoike ai i ka lapuwale, a i mea hoi e hoopau ai i ka hana naaupo a ke anaina kahi ana i haiolelo ai, o ka huli e nana i kela me keia mea e komo mai ana.
                I kekahi auwina la, kakali oia iwaena o kana haiolelo me ka i ana, "Ea! e hamau, a hoolohe ia'u a na'u e hai pakahi aku ia oukou i ka poe e komo mai ana."
                Hoomau aku oia ma kana haiolelo, a hoea mai he keonimana, a me ka leo nui ua hai aku ke kahunapule "o Mr. A. ka mea nona ka hale hana ma kela aoao o ke alanui." Aole liuliu a komo hou mai kekahi, a hai aku no ia i kona inoa me kahi ana i noho ai, me kana oihana. Pela kana hana mau ana a hoea mai he malihini; "he kanaka wiwi, poupou, me ke kuka ahinahina, a he papale kahiko aole i loaa ia'u kona inoa, e huli ae a e nana no oukou iho." wahi ana.
                Ua haalele lakou ia hana no ka hoomaopopo he naaupo, a he mea e haunaele ai ka haiolelo. "E malama oe i kou wawae i kou hele ana i ka hale o ke Akua." Kek. 5:1. E hoopaa a pau.

PALAPALA MAI IAPANA MAI—Helu 7.

Aloha oe ke ALAULA:

Hoolewa Kupapau ma Iapana.

                E oluolu paha oe e lohe i ke ano o koonei hoolewa kupapau ana. Loaa ia'u ma ke alanui kekahi huakai hoolewa, a hahai pu aku au a ike. Hele mua ma ka huakai he mau keiki liilii e paa ana me na ipukukui hele po, e paa ana iluna ma ka piko o na ohe loloa. I ke ao no nae keia hoolewa ana. Mahope aku o keia mau keiki he mau kanaka ui e halihali ana maluna o kekahi pa laau he mea like me he laau e ulu ana e pua mai ana i na pua me he loke la. He ko paha keia mea i hanaia me he laau e pua mai ana; ua hooluuia me na lau i na wai hooluu, ulaula kekahi lau, melemele kekahi, omaomao kekahi, a pela aku. Mahope mai o keia kai hele mai na kahunapule elua o ka aoao hoomana pegana o Buda. Ua aahu ia laua me na kapa o ke kahuna, he keokeo a he eleele. O ke poo ua kahiia me ka pahi-umiumi; waiho olohelohe a nemonemo ka puniu. Mahope mai o na kahunapule ua amoia mai ke kupapau e na kanaka eha. Ua hooia ke kupapau iloko o ka