Ke Alaula, Volume VII, Number 1, 1 April 1872 — Page 4
4 KE ALAULA.
A IKE MAKA'E.
Leo: "WHAT MUST IT BE TO BE THERE."---The Pearl.
1 Ua ha-ina, ua lo-he ka-kou, He ai-na lae-lae ma-lu nae; A o-li, hau-o-li, hau-o-li pu no, A a-ke e i-ke ma-kae o-li e, o-li e, A i-ke ma-kae, o-li e; E o-li a mau, Ma ka la-ni me Ie-su; A i-ke makae, o-li e.
inoino malu na'e; A oli, hauoli pu
2 Ua haina he kauhale e,
Ua paa i ke gula maemae;
He pa kiekie aulii,
He ala mabala aiai.
HUI---A ike maka'e, oli e,
A ike maka'e oli e,
E oli a mau,
Ma ka lani me Iesu;
A ike maka'e, oli e.
3 Ua haina he lako ma o,
He nani ko luna waiwai,
Makena na mea kamahao,
A ake e ike maka'e.
4 Ua haina he maha ma o,
Ua pau ae ka luhi, ka uwe,
Na hewa, na mea onou,
A ake e ike maka'e,
HUI--A ike maka'e, oli e &c.
5 Ua haina he malu ma o,
He aloha a noho maikai,
He lole a lei gula no,
A ake e ike maka'e.
6 Ua haina a hiki ma o,
E pa ma na lira maikai,
A e ku me na anela pu,
A mele a hookani ae.
HUI- A ike maka'e, oli e, &c.
KA HINAI UALA.
Ehia oukou na kamalii heluhelu ALAULA i makemake e lohe i ke kaao? Ke ole au e kuhihewa e makemake like ana oukou, a he oiaio ka mea a'u e hai aku ai, e hoike ana i ka malama aloha ana o ko kakou Makua ma ka lani i ka poe e hilinai ana Iaia.
He mau makahiki i kaa hope ae nei ua komo kekahi moku kalepa o Enelani ma ke awa o Jamestown ma St. Helena, mahope o ka holo loihi ana a loaa i na ino ma ka moana. Mai Inia mai lakou a e holo ana i Livapula ma Enelani, me ka ukana, he ko, he kope a me ka pia.
I ke ahiahi o kekahi o na la hope o Mei, he wa malie, e haule ana na kukuna gula o ka la e kokoke i kona napoo ana ma na piko aa o ka mokupuni, a e puhi oluolu mai ana ka makani o uka, ua ikeia na ohua luhi e noho ana maluna o ka moku e holo la ma ka moana.
He poe misionari keia mau ohua, i haalele i ko lakou home me na hoahanau ma Amerika he mau makahiki mamua ae, e hele e hai i na pegana i ke aloha o Iesu; ka Hoola o kanaka. Ua loohia kekahi i ka mai no ka ikaika ma ka hana a no ko noho ana ma ia poai wela, a e hoi ana lakou i ke one hanau. Ua pilikia pinepine lakou no ka nui o ka hana, aka he kumu okoa i keia wa no ke kaumaha ana o lakou.
Oiai no Amerika Huipuia lakou, maanei ka haalele ana i keia moku o Beretania a ee ma ka moku e holo pololei ana ke looa ia; aka aole keia ka wa e komo ana na moku e hoi ana i Amerika ma keia awa i loaa ka ai me ka wai. Nolaila e loihi auanei lakou maanei, he mau hebedoma paha, a hiki mai he moku e hoi ana, a e nui ka lilo a me ka pilikia no lakou. Ua hana nae lakou e like me ka poe i aloha ke Akua i hana mau ai, ua hahai aku lakou i na pilikia Iaia me ke nonoi Iaia e kokua mai, a ina aole i ku i Kona manao e hooko e hiki ia lakou e ae i Kona manao. A ua kali lakou me ka hoomanawanui.
Aole liuliu a ku ka Albion ma ke awa; holo koke aku ke Kanikela o Amerika e noho ana ma St. Helen's, a kau ma ka moku. Hai koke ia i ka makemake o kela poe pono e hoomau i ko lakou holo ana i Amerika i hikiwawe i na home o lakou.
Kuhikuhi ke Kanikela me kona lima i kekahi moku e welo ana kona hae nani o Amerika Huipuia, e puka ana iwaho o ke awa me ka i ana, "minamina no au, ina hookahi hora mamua aku nei ko oukou ku ana, malia ua ae mai ke Kapena oia moku e kali no oukou a e hoihoi ia oukou i Bosetona; eia nae ua pau ka manawa."
Aole i hiki mai ko ke Akua manawa; e hoomanawanui e paulele i ke Akua a e kali hou. Elua hora mahope iho a kahaha nui ka poe e noho malie ana maluna o ka moku, i ka ike ana i kahi moku e huli hou ana kona heleuma ma ia kaikuono, a holo ka waapa i uka. Ua holo aku ke Kanikela ma kona waapa e halawai me ko ka moku; aole i hala ka hora a ua hui ke kapena me na ohua misionari ma ka Albion. O ka hope o keia halawai ana, ua ae ke Kapena e kali elua la no lakou, e hoomaha iki malaila i pau ke poniuniu a me ke poluea o ka holo loihi ana ma ka moku, a nana e hoihoi ia lakou i Bosetona.
Manao anei oukou he mea ole ko lakou noonoo ana ia po, ko lakou paulele ana i ke Akua? Ua oiaio Kana olelo hoolana, "E hookaa aku i kou aoao ia Iehova, e hilinai aku Iaia, a Nana no hoi e hana." Ninau mai paha oukou i ke kumu o ka hui hou ana o ka moku Amerika i ke awa. Eia, ua kuapo ke Kapena i ka hinai uala me ke Kanikela a ua hewa ka hana a kana kaawa, aole nae ike ia a mahope o ka haalele ana i ke awa.
He kanaka oiaio hana pololei o Kapena B., aole makemake e hana pono ole ma kahi mea uuku e like me ia, a ua manao ia e huli koke a hooponopono i ka lalau; a nolaila lilo ia i elele na ke Akua e kokua ana i kona poe kauwa.
Aole anei keia he hoike no ko ke Akua aloha maikai? Pinepine piha ko oukou hilinai ole ana Iaia; a loohia i ke kaumaha e hoomanao oukou e ku ana o Iesu me he kaikuaana aloha la i makaukau e kokua ia oukou.
HOKU AO, MAIKONISISA, NUUHIWA.
Hoku Ao, heaha ia? Owai ke keiki i ike? Owau o Keoni nei. Ae, ae, hoike mai oe a lilo oe i keu. Ka moku misionari no ia. Ekolu moku i kapa ia Hoku Ao. Owai? Owai?
Ka Hoku Ao mua, ua hanaia ma Bosetona i ka makahiki 1856, a ku ma Honolulu ma Aperila 1857. A holoholo oia i Nuuhiwa, a i Maikonisia, a halihali ana i na misionari a me ko lakou ukana, na mea e po o ai ko lakou ola. A pela no i holo kike ai ia Hoku Ao a pau kona pono, a kuaiia aku a lilo i na haole, hana hou ia a holo aku i Kina paha, a o ka nalowale loa aku no ia aole i lohe hou ia nona. Aloha ino.
Nohea na dala i pau ai ka Hoku Ao ana? No na kula Sabati ma Amerika a me Hawaii nei no hoi. Ikaika na keiki i ke kokua. Wela ko lakou aloha. A owai ka lua o na Hoku Ao? O ke pani no o ka Hoku Ao mua. Ua hana hou ia he moku hou i like me Hoku Ao mua, ma Bosetona, a o Hoku Ao no kona ino. Ua kokua no na kula Sabati i ka hana hou ana me ka lakou mau hapawalu. Ua holo mai no ia a ku ma Honolulu, a holo aku Nuuhiwa a hoi mai, a holo aku i Maikonisia, a ili a nahaha liilii a nalo loa aku. Pakole ane na misionari. Aloha ino. Emole kona make ana.
A owai ke kolu o na Hoku Ao? O ke nani o Hoku Ao elua, ua hanaia no ma Bosetona, ma ka makahiki 1870 na na kula Sabati no i kokua i ke dala, a holo mai a ku ma Honolulu ma Iulai 1871. A ma Iulai 22, ua holo aku la i Maikonisia e lawe i na Misionari me ka ukana, me ke ola no na kino. A hoi hou mai i Honolulu ma ka la 17 o Ianuari nei. A ua hoi hou aku la i Nuuhiwa i ka la 12 o Maraki.
I kona hoi ana mai Maikonisia mai ua hoi pu mai kekahi mau misionari a me na keiki. E ike paha au nei kakou ia lakou. O Aea, Kanoa, Kapali, na kane. Ma ko lakou hai ana mai ua holo no na hana ma kauwahi, a holo ole ma kau wahi. Aia a hui pu mai lakou hai ana mai ua lohe maopopo ko kakou mau pepeiao i ka holo, a holo ole o ka lakou mau hana.
Ke hele nei lakou e imi i na misionari hou e hoi pu me lakou i Maikonisia. Owai na haumana kane, a wahine o na kula Sabati mai Waiohinu a Waioli e ae ana e hoi pu a kokua i ke ao ana i ka poe naaupo ma Maikonisia.
NA KANAWAI UMI.
1 Aole akua e ae imua o ko'u alo.
2 I na kii kalaiia mai kulou ilalo.
3 Kona inoa aole e hoohiki ino.
4 Kona la hoano e malama aole e hana ino.
5 Na makua ou e hoolohe pono oe.
6 A mai pepehi kanaka e.
7 Aole hoi e moekolohe.
8 I ka hai mai aihue oe.
9 Mai wahahee oe e hewa ai kou hoalauna.
10 A mai kuko hoi i na mea a kou hoalauna.