Ke Alaula, Volume VII, Number 2, 1 May 1872 — Page 5

KE ALAULA.
BUKE VII. HONOLULU, MEI, 1872. HELU 2.

KA HEWA, HEAHA IA?

                He wahi hua uuku ia ke hoopuka mai, aka o kona ano, he mea nui ia. E like me kekahi kiaha, he mea liilii ia i ka nana aku, aka ina ua piha ia i ke gula, he mea nui ia.
                Lohe pinepine oukou i keia huaolelo, "hewa," hewa oe e ke keiki, mai hana hewa oe, ka uku o ka hewa he make la; pau kanaka i ka hana hewa; hewa hoi na kamalii a pau; aohe mea hewa ole. Ua make Iesu no na hewa o kanaka. E mihi i ka hewa; e pau ka hewa i ke koko o Iesu.
                Ua maa ka pepeiao i ka lohe; ua maa ke alelo i ka hoopuka mai i keia huaolelo, "hewa;" aka, o ke ano, ua ike anei, a ua noonoo anei oukou i ke ano oia hua? He mea liilii ka huna ahi hookahi, aka, i kekahi manawa he mea ia e pau ai ke kulanakauhale okoa i ke ahi. Pela ka hewa, he mea liilii ka hua, aka kona ano, kona hope, he mea nui loa.
                Ka hewa hookahi ke kumu o na hewa a pau: na pilikia a pau, na make a pau, ka make o ke kino, ka make o ka uhane i ke ahi pio ole.
                E Iulia e hai mai oe i ke ano o ka huaolelo "hewa." Ka hana ino paha. Mahea ka hewa mua? Ma ka mala o Edena paha. Heaha ia hewa? Ka hookuli paha. Ae, he hookuli i ka ke Akua olelo. Papa ke Akua ia Adamu a me Ewa, mai ai olua i ka hua o kekahi laau. Hookuli nae laua, ai no laua a elua. Oia ka hoomaka mua ana o ka hewa. A hoahewa koke ke Akua ia laua, a hookukeia aku iwaho o Edena. E h omanao oukou e na keiki, o ka hookuli, ka hoolohe ole i ka ke Akua olelo, oia ke ano o ka hua "hewa."
                Pili ka hookuli i na mea ekolu, i ka manao, i ka olelo i ka hana. E paanaau ia. E Ioane, ehia au hookuli ana ma keia mau mea ekolu? Aole piha hiki ia'u ke helu no ka nui loa. Ua tausani paha, aole paha. Aole laua iki iho ma laila. Ua hookuli oe i ka ke Akua, i ka ka makua, i ka na kumu, huhu no ia oe, a hahau i kou lima me ka laau no kou hookuli, a uwe nui oe no ka eha.
                A pehea ke Akua? Aole anei oia e hoopai ia oe ke hookuli oe i kana? Pela no paha, akahi no au a manao ia mea. Ae, e hoopai ana ke Akua ia oe, a i na kamalii a pau no ka hookuli i kana. E nana i kana mau papa, ame ko oukou hookuli ana. Mai aihue oe, ua aihue no nao oe, a pahia? Mai wahahee oe, a ua wahahee hoi oe a pa miliona. Mai kuko oe i ka hai, lehulehu wale nae kou kuko hewa ana. Mai olelo ino oe, owai ke hiki ke helu i kau mau olelo ino? Mai pepehi kanaka oe, kinikini wale nae ko oukou kui ana o kekahi me kekahi. Ae, oiaio, nui loa ko makou hookuli ana. Pehea la makou e pakele ai i ko ke Akua hoopai ana mai? E noonoo oukou i ka mea e pakele ai. E wiki o hoopai e ia i ka make mau loa.

KE KEIKI O FARANI.
HELU 2.

                I ke ahiahi mahope o ka make ana o ka makuwahine o Pele, i ka pau ana o ka aina ahiahi ua hele mai oia ia'u me ka i ana, "Nui ko'u aloha ia oe no kau mau hana lokomaikai ia'u. Oluolu anei oe e hai mai ia'u ina e hele ana au mai anei aku i keia wa. Makemake au e noho iho ma kahi i make ai kuu mama aloha, a hiki ia'u e hele e ike i kahi i kanu ia oia a me papa hoi. Hiki anei ia'u e noho maanei?"
                "Ae, e noho oe maanei e ke keiki ilihune."
                "Heaha ka men hiki ia'u, he hana anei no'u?"
                "Ae, e haawi no makou i hana nau ma ka hale a i keia hooilo e hele no oe i ke kula. Ku anei ia i kou makemake e ao i ka olelo Beretania, a huli i na palapala i oi kou makaukau e malama ia oe iho ma keia hope aku?"
                "Ae, ae, makemake nui au ia mea. Thank you, he tausani thanks."
                He mea olioli mau ka ike ana i ka makaukau o keia keiki Farani makua ole e hoopaa i na mea a pau i ao ia iaia. Ma ka nana ana i ka hana a hai ka loaa nui ana o ka makaukau iaia. Ua hiki ke holoi a kawele a maloo i na pa, no ka ike ana i ke kuke e hana ana, ua emi nae ka walaau ma kana hana. Ina ike oia i kahi lepo ma ka moena, ua kii no i ka pulumi, e hoopau aku me ka olelo ole ia. I kela la i keia la ua lawe mai o Pele i ka wahie i kuu keena kakau, a ua hoonoho maikai iloko o ka pahu, aole haalele i kekahi apana uuku ma ka papa-hele, a ua hoihoiia ka upa a me ke o ahi ma ko laua wahi ponoi. Aia a hooponoponoia keia mau mea ua huli hou no ia ina he wahi hana i koe ma ke keena, aole nae hoopilikia mai ia'u me na ninau waiwai ole.
                Makaukau mau oia e kokua ia hai, e hooikaika ana no hoi nona iho. No kona makaukau ma ke kula, a no ka noho pono ana, aole i liuliu