Ke Alaula, Volume VII, Number 3, 1 June 1872 — Page 10
10 KE ALAULA
ka Uhane Hemolele. Ua huli anei i ke Akua? Ua manaoio anei ia Iesu Kristo ? Ua pule anei oia i loaa mai ka Uhane Hemolele iaia ? Ua lana ko'u manao nona, a ina ua paulele ia Iesu, ua ola ia. W.
NA OLELO-AO A KE KUENAWAHINE
O IOANE NO KE PANI PAA I NA PUKA.
Mai huhu oe, e Ioane, ke kahea au ia oe e hoi mai e hoopaa i ka puka; pa mai ka makani anu o ka hooilo ke hamama ka puka, a anuanu kou kupunawahine. A eia hou, pono e aoia ke pani ana i na puka i keia wa, no ka mea, o a kekahi hana au ma keia ola ana.
E kala mai oe ia'u, e ko'u kupunawahine. Hilahila au no ko'u ano huhu ia oe. Aka, heaha ke ano o kau mau olelo ? E hele ana au i ke kula nui, a e lilo ana i loio akamai.
Ae, pela io no; aka, ina e lilo ana o Mr. Ioane K - , Esq., i kanaka nui, hanohano, a kaulana he nui na puka e pono iaia e malama, e kiai, a pani paa.
Heaha ke ano oia mau puka ? E oluolu paha oe e hai mai ia'u.
E noho iho, a e hai aku no au. Eia ka mua, ka puka o kuu pepeiao. Pono e pani paa loa ia, i ole komo na olelo-ino a me na olelo kolohe, kupono ole, o na keiki kula a me na kanaka ui e halawai ana me oe ma ke kula nui, i ole haule oe i hope, a eo ia hai. Ina lilo ia puka ia lakou, aole he lana iki ko'u manao no ka hone o na hana a Mr. Ioane K-.
O ka puka o na maka e pani ia, i ole e lilo i na buke ino, na kaao lapuwale a me na nupepa piha i na mea hewa a haumia, a haaleleia kou mau haawina, a lilo oe i kanaka palaualelo, hupo a noho wale. E pani no hoi i na maka, i ole e ikeia na mea nani i hoikeikeia ma na hale kuai. Ke ole e hiki ke pani paa i na maka no ia mau mea, aole no e maa ana oe i ka malama i kou kala ; aole no e koe ana kekahi hapawalu i mea manawalea e kokua ia hai.
O kekahi mea nui, e pani i na puka o na lehelehe,
no ka mea ke kiai nei laua i kekahi lala i hoolaka ole ia e hoohana aku ana i na mea i launa mai ma na puka o na maka me na pepeiao. Pinepine ka hoohamamaia ana o keia puka a ke ole malama loa ia, e puka mai ana na olelo hoonaukiuki, huhu, lapuwale, a haumia paha.
Ina ku hamama a loihi keia mau puka, e lilo ana ma ka holoholo olelo, a oi ka pilikia mamua o ke ku hamama ana o keia puka o ka hale nei, a komo mai ke ea anu, a haukeke kakou. O kou pono e pani paa i keia puka a nui kou ike, a piha kou waihona i ka naauao, a wehe ae no ka hoopuka ana i kekahi manao maikai a waiwai.
E pani paa loa i ka puka o kou naau, i komo ole na hoowalewale no ka mea he nanea ke kiai puka, ka luna-ike-bala, i kahi wa ke hoolohe ole ia kona kahea, a pauhia i ka hiamoe, a manao iho la e hana pono ana, e holo ana imua, oiai e hele maua ana ma ke ala laula.
Ina e kiai pono i na puka o waho, o na "maka, na pepeiao, na lehelehe," e pale aku ana auanei i kekahi mau hewa nui, mamua o ke komo, loa ana iloko.
E ike auanei oe, e Ioane, he hana nui, ke "pani paa ana i na puka," ke manao oe e hele imua a holo pono na hana maanei, a me ka makaukau ana no hoi no ka noho ana ma kela ao aku. W.
KE KEIKI O FARANI.
HELU 3.
Ninau mai oia i kekahi la, ua ike mai anei o papa a me mama ia'u i keia wa?
Aole maopopo ia'u, aka ua haiia mai ma ka Baibala, he poe anela e kiai mau mai ana ia kakou me ka malama a me ke aloha, a e haka mau mai ana na maka o ke Akua Malia paha ua aeia i ka poe i haalele mai ia kakou, a hele e noho pu me ke Akua, e kiai ia kakou.
Ke manao nei au, ina e hiki i na anela ke nana a kiai mai ia kakou, ua hiki no i na makua o'u, wahi a Pele.
He manao hoohauoli no ia.
Ae, a ua paipai mai ia ia'u e hooikaika ma ka huli palapala a me na hana e ae. Ke hoomanao pinepine nei au ia olelo o kuu papa, "E hooikaika oe, a na ke Akua e kokua mai, a manao au e hoao me he la e ike mau mai ana ia'u.
A ua hoao no, Mahalo mai kanaka i kona wiwo ole a me kona hoomanawanui, a ua aloha lakou iaia no kona ano maikai. Nui na mea i hoomanao iaia i ka la Karisimasa. A hala kahi wa pokole, ninau mai kanaka, heaha kau e hana ai me keia keiki Farani, i loaa ia oe ma ke alanui?
E hana no oia nona iho, ina e loaa iaia kahi e hana, a e malama no oia iaia iho.
I ko makou manao he mea uuku ka haawi ana i ai nana, a me na kala no ka hele ana i ke kula, oiai he keiki maikai, makaukau, a ua papaluaia ka uku no makou ma kona aloha mai, a me ka makemake e hana pono.
Holo oia imua ma ka olelo Beretania; a apo ikaika ma na haawina aku ma ke kakau kii kona oi ana. Malama loa oia i na keiki i hoonohoia me ia nana e kiai.
I kekahi la e kinipopo ana kamalii, a ninau au iaia no kona paani ole me lakou. I mai oia no kona makemake e hoopau i kekahi kii ana e kakau ana, a e hoopaa i kana mau haawina.
Aole anei ou makemake e paani kinipopo?
Ae, aka ua oi ka makemake ma na mea e ae
Elima makahiki ka noho ana o Pele me makou.
He umi kumamalima ona makahiki ia wa a ua i mai oia ua hiki ke malama iaia iho. Kaumaha makou i kona haalele ana ia makou, aka oia ka mea pono nona. Ua koho oia e lilo i mea kahakaha kii, aole no i aoia ma ia kaona. Hoomakaukauia kona pahu,a ua haaleleia makou e hele i Bosetona, e hahai ana i na olelo maikai a makou, a me ka hoopomaikaiia e ke Akua; no ka mea, aole ae oia e lawe i kekahi mea e ae, he mau lole wale no.
Eha makahiki ia mahope iho nei, a ua hele mau mai oia e ike ia makou i kela me keia makahiki. I mai ka poe ike e lilo ana i mea akamai mai ma kana oihana.
Hali pu oia ma kona ano ia olelo ana i hoopuka ai ma kapa alanui na'u i lohe ai i kona wa e noho makamaka ole ana, a make i ka pololi me kona makuahine ilihune, e nana ana kona naau paulele i ke Akua. He loihi no ka wa mai ka hooko ana i kana olelo e hana i kia hoomanao no kona makuahine.
Ua ike na keiki e ae i kona manao ikaika, kona wiwo ole, a ua hoao e hoohalike, a lilo i poe makaainana i mahaloia.
He mato maikai keia no oukou a pau, na keiki heluhelu ALAULA, "E hooikaika oukou, a na ke Akua e kokua mai." He mau, he kupaa ke Akua ; e hoomau, e kupaa oukou a e loaa no ke kokua ia mai, mai luna mai; a pau ka hana ma ka honua nei e loaa ka lani, he uku maikai no oukou.
COME TO THE SAVIOR.
1 Hele io Iesu, maikale ae;
Nana e hai na hua e ola'i.
Eia no ia ke hea maikai,
"E hele mai ano."
HUI- Oli, oli ma ka hui pu;
Pau ka hewa, maemae na naau;
Hui me Iesu, a oli pu
Ma kela home mau.
2 Hea no Iesu i na pokii,
Hoolohe pono, a oli e.
Paa kona lima, apo maikai –
Ku a hahai ano.
HUI - Oli, oli ma ka hui pu, &c.
3 Na mea auwana, a hune no,
A makua ole, nee mai oukou,
Hea no Iesu, a aloha pu,
Ku a hahai ano.
HUI - Oli, oli ma ka hui pu, &c. W.
HE HAAWINA HUI NO KA HOIKE MALAMA O NA KULA SABATI, NO IUNE. NO NA MAUNA O KA BAIBALA.
Mele - "Eia no makou e Iesu." Hae Hoonani. Heluhelu kike.: Hal. 136. Pule ke kahu, a i ole, kekahi kumu.
Papa pokii - Ehia mauna i hai e ia mamua ? Ekolu : Arerata, Moria, Horeba. E hai like mai i kela mele no lakou:
Arerata kiekie,
Halelana, kau malie
Ma kou piko hiehie,
Ma ka mauna o Moria
Ilaila i kukuluia.
Ka luakini eehia.
Nohi Mose ma Horeba.
Haoai pono i na hipa.
Ikeia ka lapalapa,
Ahi a a kupanaha.
Nawai i kukulu i ka luakini ma, Moria ? Na Solomona.
Mele - "Hele io Iesu la ano." Hae Hoonani.
Papa keiki kane - Hai mai i ka himeni no Horeba, i paiia ma Mei.
"Ma ka Mauna, o Horeba," ka lalani mua.
Ma ka mauna hea i haawiia mai ai na kanawai he umi ? Ma Mauna Sinai.
"Iho mai la o Iehova maluna o ka Mauna o Sinai, ma ke poo o ka mauna, a hea mai la o Iehova ia Mose e pii aku i ke poo o ka mauna; a