Ke Alaula, Volume VII, Number 4, 1 July 1872 — Page 15
KE ALAULA 15.
Aia maluna ma ke ao,
He aina e maha'i,
Malaila no e noho mau
Ka Iesu poe hanai.
E mau kolaila kau maikai
Na pua kamahao;
Aala mai na kihapai,
A uliuli mau.
Na manao paipai.
Mele— "Mauna Pirega," ma ka buke himeni hou a i ole "Huipu anei ma ka muliwai." Hae Hoonani.
Pule a ka Haku, a hookuu.
PALAPALA MAI IAPANA MAI- Helu 7.
KOBE, IAPANA, Feb. 24, 1872.
KE ALAULA ; Aloha oe:
Ua hai mua aku au i ka hoomaauia ana o na haumana Katolika Roma ma Nagasaki, e keia aupuni pegana. Eha tausani kanaka i hopuia a hahaoia iloko o na halepaahao i ka malama o Dekemaba 1868. Ua laweia lakou mai ko lakou kulanakauhale, a mai ko lakou mau aina aku, i na wahi mamao loa aku ; a ua hoomau a ko lakou hooluhiia ana ma na halepaahao a me ka hoohana oolea ia, a hiki i keia wa. Iloko o kela Dekemaba i kaahope ae nei, ua hopu houia ma ia wahi hookahi no, he 65 kanaka;—he mau kanaka kuonoono, a he mau ponohana lakou a pau—a ua lawe pio ia lakou a hoonohoia lakou e hana me he mau kauwa kuapaa la iloko o kekahi lua eli nanahu. Aloha ino na wahine ame na ohana keiki makua ole oia poe kanaka i hopu hala ole ia; o ka hoomana Kristiano wale no ko lakou hewa.
Hai mua aku hoi au ia oe no ka'u haumana no Yeinoski, i hopuia i ka po no kona malama ana i ka pono, a lawe loa ia aku oia ma kahi mamao loa aku e hoopaahaoia ai. Aole makou i lohe he mea iki nona iloko o keia mau mahina he nui; eia wale no, he lono i pae wale mai ua make oia iloko o ka halepaahao; aole nae makou i hooiaio loa ia i lohe. He oiaio paha aole paha.
O ka makou hana nui e hooikaika nei, oia no ke ao i ka olelo o keia aina. Ke ao nei hoi au i kekahi mau haumana i kela la keia la. Ua loaa i kekahi o lakou ka heluhelu ma ka olelo Beretania, a ua kuai oia he Baibala Beretania, a me ka Baibala Pake, a ke heluhelu malu nei oia ma kona hale, no ka makau i na luna aupuni o hopu ia mai.
Makau loa na kanaka o keia wahi i ka huhu o ke aupuni i ka hoomana Kristiano; aka, ke lohe nei makou ma Yokohama a me Yedo, kahi e noho nei ke poo o ke aupuni, malaila he mahuahua na kanaka e hele nei e hoolohe i ke ao ana a na misionari; a ke hui nei kekahi lehulehu o na haumana Iapana ma na halawai haipule a lakou. Nolaila ke lana nei ko makou manao e kokoke mai ana ka la e noa ai ka hoomana Kristiano mai o a o o keia lahui nui, nona na milion kanaka he kanakolukumamaha.
Aia a wehe aku ke aupuni i na kapu e kau nei maluna o ka hoomana Kristiano, alaila e huli mai auanei keia lahui. No ka mea he lahui hikiwawe loa keia i ka apo mai i na mea hou. He eleu a he makaala. Eia hoi kekahi: No ka papa ikaika loaa ia o ka Baibala a me ka hoomana Kristiano, nolaila ua nui, ka hoohuoi o aku kanaka i keia mea i papa loa ia, a he lehulehu loa na kanaka opio e imi nei e ike a e heluhelu i ka Baibala.
Aia a hiki aku i ka la e hoonoaia'i keia hoohoomana, e nui auanei ka hauoli o ka lahui, a e lelele ka oili o na misionari, alaila e huro lakou, huro, huro. Me ke aloha, na'u na
O. H. KULIKA.
HOKU AO.
Nani ka holo ana o ko kakou moku o Hoku Ao. I Fatuhiwa oia a hoi mai ma ka la elua o Mei.
Inahea kona haalele ana ia Honolulu? Ehia la mai Honolulu aku a Fatuhiwa a hoi mai nei? Ehia hoi mile o kona holo ana, ke hui pu o ka holo ana aku a me ka hoi ana mai ? E huli a loaa e hoike mai. Mahea o Fatuhiwa mai anei aku ? Ehia moku i noho ai na misionari? Owai ka moku i oi? Ehia misionari ilaila i keia wa? Owai ? Owai ka elele i holo aku ma Hoku Ao e ike i na misionari ? Owai ka misionari i hoi pu mai? O Rev J. W. Kaiwi me kana wahine me na keiki eha.
Aloha ino o Kaiwi, ua hoi mai oia no ka maimai, no ka nawaliwali, no ka hiki ole ke hapai hou i ka oihana misionari. E pule nona i ola, i hiki ke hoi hou a ao hou aku i ka poe naaupo o Fatuhiwa. Owai ka poe e ae e hele ilaila e kokua ia Kekela mai? Ekolu kane, ekolu wahine i makemakeia e holo ilaila ma keia hope aku ke holo hou aku ka Hoku Ao. A ehiku, ewalu kane me na wahine i makemakeia e holo i Maikonisia iloko o Iulai paha, e lawelawe i ka oihana misionari malaila. E loaa ana anei keia mau misionari hou?
Ke ninau mai nei paha oukou; heaha ka nu hou maikai no Nuuhiwa mai ? Ke mau la no ka ikaika o na misionari, o Rev. J. Kekela, Rev. S. Kauwealoha, Rev. Z. Hapuku me na wahine a lakou ; ke mau la ka lakou hana, na halawai, na kula. Maikai no ke kula hanai kaikamahine a Rev. S. Kauwealoha. Ua hooholoia o ka $20 ka palena no ke ola o ke kaikamahine hookahi ma ka makahiki.
Owai ke kula Sabati e ae ana e kokua i ka $20 no ke kaikamahine hookahi no ia kula? Owai ka lua? Owai ke kolu ?
O ke kula hanai keikikane a Rev. J. Kekela, ua make ia mamua aku nei, e hoalaia ana nae ma keia hope aku.
Na kula la ua pono iki no, aole pono loa. E hookumuia ana kekahi mau kamaaina olaila. Ua makaukau kekahi i aoia i keia mau makahiki e lilo i kumu.
Aole au i lohe i ka nui o na hoahanau,a o ka poe huli mai i keia wa. Aia a lohe au, e hai aku no i lohe oukou. Uuku nae lakou hui na mea keakea. E pule kakou i pau na mea keakea, i pau na kanaka, na lii, na kamalii, i ka huli mai ma ka pono. Ua ola ka wahine a Rev. J. W. Kanoa ma Hilo, a ke manao nei laua e hoi hou i Butaritari ke holo aku ka Hoku Ao. Manao hoi o Rev. H. Aea e mare hou i wahine nana a hoi pu aku i Maikonisia me Kanoa ma, aka aole pela ka manao o kona Makua, ua kii mai no ia a lawe aku e noho mau me ia, i kahi maha mau loa.
KE KAPIKI MISIONARI.
Aia ke ku la ma ka puka he wahi keiki, a ke ninau mai nei oia, ke makemake nei anei oe e kuai i kapiki misionari ?
Aohe o'u makemake nui i ke kapiki, aka o keia kapiki he kapiki okoa paha, he kapiki misionari, malia ua oi aku paha kona maikai mamua o na kapiki e ae, a nolaila paha ua pono ,e kuaiia.
Hele au i ka puka e nana i ke ano o keia kapiki, aia hoi he kapiki ano e no, ekolu mea maikai e pili ana iaia.
Akahi, o ka mea nana i kanu, a waele, a malama a oo, a lawe mai he wahi keiki kula Sabati, he keiki oopa; he keiki liilii hoi.
Elua, o ke kumu o kona kanu, a malama ana i keia kapiki, oia kona aloha ia Iesu a me kona makemake e hana i kekahi mea e hoolahaia aku ai ko Iesu aupuni ma ka honua nei.
Ekolu, ka loihi mai kahi i ulu ai ua kapiki nei a hiki i ko'u hale, hookahi no mile, a ua laweia mai ia ma ka poohiwi o ua keiki oopa nei.
Ua kuai au i keia kapiki misionari, a haawi aku i mea ai na kekahi wahine ilihune me ana mau keiki eha. Lawe ke keiki oopa i ka hapawalu no ke kapiki me na huaolelo aloha a hoomaikai, a hookomo ia iloko o kona poki liilii, oia hoi kona waihona dala kokua misionari. Nolaila kona kanu, e malama, a kuai ana i keia kapiki, i mea e loaa ai ka hapawalu kokua mahina hou.
Ea, e na keiki kula Sabati o Hawaii nei, e hoomanao oukou i keia keiki oopa, e hoohalike me ia. E kanu i kapiki misionari, uala misionari, i ipu misionari, papapa, kulina misionari, i mea kuai a loaa ka hapawalu i mea kokua mahina hou. Nui wale na mea kupono ia oukou ke hana i loaa ke kokua misionari.
E nalo aku ia pane ke hiki mai ka la kokua, aole loaa. No ke aha ka loaa ole ? Aia a loaa ke aloha ia Iesu, a i kona aupuni, e like me keia keiki oopa, alaila ike koke ia na kumu he nui e loaa ai na hapawalu kokua.
Aloha i na keiki
Ma Fatuhiwa e,
Na keiki hoi ma Kobe
Ka poe hoomanakii.
Homai na hapawalu,
E pule no lakou,
I huli ma ka pono,
A huli pu oukou.
KE ALAULA.
He Nupepa Hoikeike Kii.
Hoopuka mau ia ma Honolul, i kela malama keia malama e ka PAPA HAWAII, no na Kamalii Hawaii.
25 keneta ka uku no ka makahiki no ka pepa hookahi; 20 keneta pakahi ka uku no na papa he iwakalua a oi aku paha ma ke ope hookahi, ME KA HOOKAA MUA IA MAI.
L. LAIANA Luna Hoopuka.