Ke Alaula, Volume VII, Number 4, 1 July 1872 — Page 16
16 KE ALAULA.
OWAI NO IESU?
Leo: "WHO'LL NE FOR JESUS,"-- Silver Song.
A-la a ho-lo pai-pai Ie-su. O-wai ke ae e hu-i pu? O-wai ke a-la a ho-lo no. A i-mi i na o-li mau? HUI. Ku, ku no Ie-su, ku, ku, no Ie-su Ku, ku a kai i ko-na hae. Ku, ku no Ie-su, ku, ku no Ie-su, Ku, ku a kai i ko-na hae.
2 Ala a holo, e heihei pu,
Hana ikaika, ao a mau,
A kau na ino e nauwe no,
E nauwe ma ka oli pu.
HUI- Ku, ku no Iesu, &c.
3 Ala a holo, he uku paa,
Hana oukou a pau ka wa,
Lei o ke ola maluna'e
HUI- Ku, ku no Iesu, &c.
4 Ala a holo, e na pokii,
Owai ke ae e hui mai?
Ka a kaawale ma ka akau.
Ku a hoohiki e holo mau.
HUI- Ku, ku no Iesu &c.
5. Ano ka wa, ka wa kamalii,
Owai ke ae e huli mai!
Owai la ma ko Iesu aoao!
E ku a nauwe nona mau.
HUI- Ku, ku no Iesu, &c.
E HULI A OKI.
E hele na kekahi keonimana ma ke alanui o kekahi kulanakauhale; a lohe ia me ka ehaeha o kona naau i ka hoohiki ino ana o kekahi kamalii, aole paha i oi aku i na makahiki umikumamalua. Elua laua, a e hai ana ua kamalii hailiili nei i kekahi wahi moolelo me ka hookomo pinepine ana i na huaolelo pono ole.
Papa aku ua keonimana nei i ke keiki me ke ao aku iaia e like me ko ke Akua kanawai, "Mai hoohiki ino oe i ka inoa o Iehova ,o kou Akua"
Pane mai ua keiki la, "No kuu maa loa ma ia mea, aole hiki ia'u ke oki aku ia hana ; puka wale mai na huaolelo me ka noonoo ole."
Minamina ua kanaka la, a ao oluolu aku iaia, e imi ana e hoomalamalama iaia, a hele aku la ma kana hana, me ka haohao i ua keiki liilii nei o waiwai ole kana ao ana iaia.
A hala nae he mau pule, e hele hou ana ua keonimana la ma ia wahi no, a halawai me ua wahi keiki nei; e haliu mai ana iaia.
"Ua malama au i kau ao ana; ua pau kuu hoohiki ino ana."
I aku la ua kanaka nei, "Olioli au i kau hai ana mai pela. Aole anei he paakiki ka hooko ana?"
"Ae, he paakiki no i kinohou, no ka mea ua maa loa au ma ia mea, a ane hiki ole ia'u ke hoomaopopo i kuu olelo. Aka, i kuu ae ana ia oe aole e hailiili hou aku, i iho'la au ia'u iho, e Ioane e, e huli koke a oki, Aole hoi i puka hou aku mai kuu waha aku na huaolelo hailiili, a ua pau aole e hana hou. O oe ka mea mua i ao mai la'u ka hewa oia mau huaolelo. O kuu makuakane he kanaka hailiili, a pela no ka nui o na mea e noho nei ma kuu wahi e noho nei."
Mahalo aku la ua keonimana nei i ua keiki naau koa nei, a pane aku la, "Maikai e kuu wahi kanaka koa, ke mahalo nei au, i kou hoomanawanui ana e hooko i kau mea i ae ai. Nui na kanaka e haawi ana i ka hapalua o ko lakou waiwai ina e hiki ia lakou e hoopau i kekahi mea hewa a lakou i maa ai, a oki loa. Kakaikahi nae nae na mea naau koa ana e like me oe."
Pela no e na pokii, ina ua ike oukou i kekahi hewa a oukou i maa ai, mai kali mai kanalua. aka e noi aku ia Iesu e kokua mai. E huli koke oe a oki aku i ua hewa la i maa, me ka hoomanawanui a me ke kiai loa a, me ka manaoio ia Iesu.
KE KAULA I LOAA MA KE ALANUI.
He mau keiki elua i aahuia me na lole weluwelu. O Kai ka inoa o kekahi a o Keaka ka inoa o kekahi, e hele pu ana laua a loaa like ma ke alanui he wahi kaula, a lilo laua i ka hoopaapaa ikaika loa, olelo kekahi na'u ke kaula; owau ka ike mua, hoole kekahi, aole nau , na'u no, owau ka ike mua. A hoopaapaa, a pane aku a pane mai, a nonoke, a lalau kekahi i kekahi piko a o kekahi ma kekahi piko, a huki aku a huki mai, a loihi, a ma ka huki ikaika ana moku ke kaula mawaena, a haule laua a elua iloko o ka lepo a paumaele loa.
Olelo kekahi kanaka e maalo ana,"ka hope ia o ka hakaka, hakaka na mea elua no kekahi kumu liilii loa, a huhu aku a huhu mai, a e nana i ka hope. Uhiia i ia heneheneia me ka hilahila imua o na maka a kanaka, e like me olua e ku nei imua o'u, me ka paapu i ka lepo me ke kelekele. E imi e noho oluolu a kuikahi, no ka mea he nui na ino i puka mai noloko mai e ka kue me ka hakaka."
He lesena maikai keia e pili ana i na keiki Hawaii.
U'oki ea mai hakaka,
Mea ino ke nana!
I na ilio ka huhu,
Ka hakaka a hina pu.
Noho olu na pokii,
Kuikahi , maikai e.
HEAHA KA KA BELE E OLELO NEI?
He leo ka ko ka bele? Ae, he leo no. He wahi keiki i hele mau mamua i ke kula Sabati a ala mai la ka makau i kia hewa me ka make, a manao oia e huli mai ma ka pono. A i kekahi manawa, hui oia me kekahi mau keiki kolohe, a auwaha wale, a haalele liilii oia i kekala Sabati, a olelo ua nui au a hilahila ke hoi hou i ke kula Sabati. O ka hele loa no ia mai kekahi hewa ai kekahi hewa e ae; a lilo i kanaka hewa loa.
A i kekaki kakahiaka Sabati, hoomaka oia me kekahi mau hoa hewa ona, e hele e hoopau i ka Sabati, ma ka lealea. A i ke kokoke ana i ka luakini kahi i hele pinepine ai ua keiki lalau nei mamua ii ke kula Sabati, kani mai la ka bele o na luakini. Puiwa oiai ka lohe, me he leo kanaka la no ua leo bele nei e kahea ana iaia hele mai, hele mai, hele mai. Hele aku nae oia aka, mau no ka leo o ka bele, hele mai, hele mai ano. A oki ke kani ana o ka bele, huli oia a olelo i kona mau hoa, aole au e hele pu ana me oukou i keia la, e hele ana au i ka halawai. Aka henehene mai lakou iaia, a hoao e keakea i kona hele ana. Aka, hele no oia i ka luakini Ku no ke kahunapule a heluhelu, "E hele mai oukou a pau loa io'u nei, e ka poe luhi a me ka poe kaumaha, &c. Mat. 11:28. O kona huli koke no ia,a lilo i haipule ikaika loa no Iesu. E hoolohe i ka bele e olelo nei, hele mai, hele mai ano.
HE NANE.
E na pokii, he nane keia malalo iho a na oukou e koho e kuailo, a hooili mai i ka haina ia'u i paiia ma ke ALAULA ke pololei. He huaolelo no, ekolu ona mau lala, oia hoi ekolu no hua iloko.
Ko'u mua, he mea paakiki,
Ko'u lua, aia no ia iloko o huli, aole nae iloko o uli.
Ko'u kolu, aia iloko o imi aole iloko o emo.
Ko'u mua me ke kolu, he mea maikai ia, a make kakou ke loaa ole.
Ko'u kolu me ka mua, he mea ono iloko o ke kai,
Ko'u lua, me ka mua, me ke kolu, he mea puka mailoko mai o ka waha.
Ko'u lua, kolu mua ; he mea pili i ka naau.
Ko'u lua me ke kolu, he inoa ia o kekahi mai.
Ko'u lua me ka mua, he mea maikai no a kakou e hana mau, nei, a make no ke hana ole.
A o ko'u huina, he mea makau ke haule iloko.
NA NINAU BAIBALA.
1- Owai ka i make mua?
2- Heaha ka mea i make ai oia ?
3- Owai ka mua o ka poe i holo a pee?
4- No ke aha ka pee ana?
5- Ua nalo anei kekahi i ka maka o ke Akua ?
6- Heaha ka mua o na mea i papaia ?
7- Ua hooloheia anei ka papa ana ?
8- Heaha ka hope o ka hookuli?
9- Nawai i hoowalewale e hookuli?
10- Owai ka nahesa ?
11- Ua mau anei kona ano hoowalewale ?
Hai paanaau mai i keia mele :
Ua nahaha ka puka,
Ua hanee hoi ka pa,
A ai na mea hihiu,
Haehae a hakaka,
Na tiga, bea, liona.
Na moo kahiko e,
Ka deragona ula,
Ke kaula wahahee.