Ke Alaula, Volume VII, Number 5, 1 August 1872 — Page 19

KE ALAULA. 19

ma ka palena akau o Palesetine, oia hoi o Kan ana.
                Owai ka inoa i keia wa? Libano.
                Ehia mahele? Elua. Libano, Aneti Libano. Elua piko, he awawa mawaena.
                Owai ka Lebanona o ka Baibala ? Libano, ka piko komohana ia e nana ana i ke Kaiwaenahonua.
                Pehea ke kiekie?10,000 paha kapuai a oi.
                Ua like anei me Maunakea ?
                Heaha ke ano o ka huaolelo Lebanona ? Keokeo.
                Ua keokeo anei ka piko? Ae, keokeo i ka hau kekahi keokeo i ka pohaku kekahi, no ka mea he puna ka pohaku.
                Heaha ka olelo mele Arabia no keia mauna ?
                                "Ke kau nei ka hooilo ma kona poo,
                                Ka wa kupu ma kona poohiwi,
                                Ka wa haule lau ma kona poli,
                                Ke hiamoe nei ke kau ma kona wawae."
                Paanaau ka ke mele Arabia ia oukou,
                Heaha o Lebanona ke ku kekahi ma ke kai a a nana aku?
                He nani loa, he hoailona nui no ia aina, he hoike paa mau no ka oiaio o ka Baibala.
                Akamai oukou.
                Mele-"Joyful evermore." Buke Himeni 347.
                Na keikikane--Owai ka poe i noho ma Lebanona? Lunakanwai 3:3.
                Owai ko Hebi ? Ehia tausani kanaka a Solomona i hoouna aku ai i Lebanona? 1 Na Lii 5:14.
                No ke aha? E kalai laau no ka luakini.
                Kukulu io Solomona i aha ma Lebanona? 1 Na Lii 7:2.
                Hai paanaau mai 2 Na Lii 14:9.
                Na kaikamahine--E hai paanaau mai Halelu 29:5. 6; Mele a Solomona 5:15; 7:4; Isaia 10:34; 29:17.
                Na makua--Hai paanaau mai Isaia 35:2; 40:16; 60;13; Ieremia 18:14; Hosea 14:5,6,7; Zek.11:1.
                Na pokii— Helu mai i na mauna Ararata, Moria Horeba, Sinai, Hora, Pirega a me Lebanona. Mele pokii--"Ala, ala.
                Manao paipai.
                Mele--"Pii'na."
                Pule.

Ka Emepera me kana Kumu.

                Alekanedero keia Emepera, oia hoi ka moi o Rusia. Iaia i hele ai ke kula, o La Hape kana kumu. Nui ke aloha o ke lii i kana kumu, me he aloha keiki ponoi la no.
                A i kekahi la me kona ano maa, manao ke lii e hele e ike i kana kumu. Ua hele no ia, oia hookahi wale no, aohe koa kiai i hele pu. A o ke kiai puko o ke kumu, he kanaka hou ia, aole oia i ike i ke lii. Ku iho la ke lii ma ka puka lo ka hale o ke kumu, a kikeke ; wehe ke kiai puka i ka puka, a ninau i kona inoa, owai kou inoa ? Alekanedero au. Alakai oia iaia i ke keena kuke, a hoonoho iaia malaila, me ka olelo, ua paa ke kumu i kona keena huli palapala, aole hiki i kekahi ke ike iaia, a pau kona hora huli palapala.
                A i ka makaukau ana o ka aina, kono ke kiai puka i ka malihini, ia Alekanedero, e noho a ai pu me ia, me na kauwa. Ai pu no ke lii me ka oluolu, a olioli, a maona pono no. A pau ka aina, a me ka hora huli palupalu o ke kumu hai aku la ke kiai puka iaia, he malihini maanei i makemake e ike ia oe, o Alekanedero kona inoa, loihi kona kali ana nou. Auhea ia? e alakai iaia maloko nei, wahi a ke kumu La Hape. O ke kii no ia o ke kiai puka i ka malihini, a alakai iaia mai ke keena kuke a i ke keena huli palapala o ke kumu. Nana mai la ke kumu, aia hoi, o Alekanedero ke lii ka ia.
                Pihoihoi iho la ke kumu, a e hoomaka ana e noi i ke lii e kala mai i kona hewa, a pela aku. Papa ke lii, aole, aole, aole ou hewa e mihi ai, e kuu kumu aloha nui ia, mai olelo mai oe. Hookahi  hola ou ua like ia me ka la hookahi o'u. A ua ai pu hoi au me na kauwa au, a maona maikai. He pomaikai ia i loaa ole ia'u, ina ua ike koke au ia oe ia'u i puka mua mai ai.
                Nani hoi ka pihoihoi o ke kiai puka no kona lalau, hoole nae ke lii me ka mino aka, aole ou hewa, he kauwa maikai oe, a malama pono i kou haku, nui ko'u mahalo ia oe, i mea e ike ai oe I ka oiaio o ko'u mahalo ana ia oe, eia na dala he hookahi haneri, he makana nou.
                Pono no e aloha na haumana, haumana makaainana, haumana alii, i ka lakou mau kumu. Ina e noho ana ma kahi hookahi e hele pinepine no e ike, e kuka pu, e hoohauoli, e hoolana i ka manao, e kokua hoi ke pilikia na kumu.
                E hoopaanaau i keia mau pauku no na Sabati pakahi o Augate.
                SABATI MUA—" He kauoha hou ka'u e haawi aku nei ia oukou, e aloha aku oukou kekahi i kekahi." Ioane l3:14.
                SABATI ELUA—" O ka mea e malama ana i kana olelo, ua hemolele ke aloha o ke Akua iloko ona." 1 Ioane 2:5.
                SABATI EKOLU—" He poe haumana oukou na'u ke aloha oukou kekahi i kekahi." Ioane 13:35.
                SABATI EHA—"O ke aloha, ua hoomanawanui; a ua lokomaikai; aole paonioni ke aloha, aole haanui ke aloha, aole haakei," 1 Korineto 13:4.

Ka Enemi nui o Keo.

                Owai la ia enemi nui"? O ka diabolo paha, wahi a kekahi keiki. Ko kakou enemi nui no ia e holoholo ana me he liona uwo la, e aha?
                E Mele, e huli a hoopaanaau ma 1 Petero 5:8. Aka, aole oia o ua enemi nei o Keo. He enemi kahiko no nae, e like me ke diabolo, he keiki hoi nana. Ina huli oukou ma Kinohi mokuna 4, loaa paha ka inoa o ia enemi.
                Nawai? O Kaina? O Abela? Aole. O Huhu palia? Ae, oia. Ka huhu ka enemi i hookonokono ia Kaina e pepehi ia Abela kona kaikaina.
                He enemi nui ia iwaena o na i kamalii i keia wa, ma ka hale, ma ke alanui, ma ka hale kula, ma ke kula ana, ma ka paani ana, ma ka paina ana, ma ka hana pu ana.
                Ko'u enemi nui keia e kuu makuwahine, ko'u huhu hikiwawe wahi a Keo. Ke uumi nei no au, a hu mai no nae, a uumi hou, a hu mai nae a nui loa aku. A iaia e paupauaho ana, ninau oia i kona mama, e, heaha la ka'u e hana ai i holo loa aku keia enemi nui o'u ?
                E kiai, a pule, e kuu keiki makamae, e hoao e kinai, a hoao hou, a hoao hou, mai paupauahoi ka hoao ana. Mai kuhihewa oe he mea hiki ole ke kinai ia enemi a lanakila oe maluna ona, wahi a ka makuwahine, a hoopili mai i ke poo kalakala o Keo i kona poli, a honi i kona papalina i pulu i na kulu waimaka, a mahuahua loa ae ko Keo uwe ana.
                Aole oe i ike, aole e loaa ia oe ke imi, i ka nui o ke ino o keia enemi o'u, wahi a Keo. Aia a uluhia loa au i keia enemi, i ka huhu, aole o'u makau iki i ka hana ino loa aku, i ka hoeha wale aku i kuu hoa, me ka olioli nui o kuu naau ke eha nui oia. Makau au o hana au i kekahi hewa nui e awahia ai kuu ola ana, a lilo kela me keia i mea hoowahawaha loa mai ia'u. E kuu mama, kokua, e kokua mai oe ia'u.
                Ae, ae, e kokua no au ia oe, mai uwe nui oe. E hoomanao oe, a e hoohiki ma keia la me kou naau a pau e kinai i keia enemi. Ko'u enemi nui ia mamua kela hookahi me ko'u, ka huhu.
                He huhu ka anei kou, E kuu mama ? Aole au ike i kou huhu, wahi a Keo.
                He huhu no ko'u mamua, wahi a ka makuwahine, a ua kanaha na makahiki o ko'u hooikaika ana e kinai. Aole i pau ; huhu no au i kela a i keia la, aka ma ka hoao ana, uumi no au ia iloko aole hoopuka iwaho, Kuu makemake nui ia e make loa ia enemi. E make loa ana paha ke hooikaika au i mau makahiki hou he kanaha.
                Hanu iki o Keo a lana iki kona manao e hoao hou no, a hoao mau e kinai i kona enemi, i ka huhu, e kiai, e pule, e noi aku i ka Haku, ia Iesu e kokua, a e hoolanakila loa iaia maluna o kona enemi nui.
                E hoohalike oukou na kamalii i loohia pinepineia e i ka huhu, me Keo, e hooikaika e uumi e kinai.
                                "Iesu e ke Kahuhipa,
                                Kahuhipa maikai e,
                                Nau e alakai malie,
                                Ia makou na pokii nei,
                                E aloha, e aloha,
                                E hiipoi a hanai mai."

                "O Iehohava ko'u Kahuhipa,
                Aole o'u mea e nele ai." Halelu 23:1.

KE ALAULA,
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki no ka pepa hookahi; 20 kenetapakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
L. LAIANA Luna Hoopuka.