Ke Alaula, Volume VII, Number 7, 1 October 1872 — Page 26
26 KE ALAULA.
KE KOHO ANA.
Aia ma Ladana kekahi elemakule waiwai nui. Ma kona la hanau, ua kukulu oia i ka ahaaina no kona poe ohua, oia hoi kana mau kauwa. A mahope iho haawi aku la oia i kekahi makana ia lakou pakahi a pau. Hoike mai la oia he Baibala, a me iwakalua dala; ninau aku la ia i ke kahu lio, "Mahea oe e koho ai, ma ka buke ma ke dala paha? Pane mai la kela, "Aole au i ike i ka heluhelu, nolaila e lawe au ma ke dala." Ninau oia i ka mea malama pa, "Mahea oe e koho ai?" I mai la kela "Ua mai loa kuu wahine, i dala ka'u." Ninau oia i ke kuke, "I aha kau?" I mai ke kuke "Aole o'u wa kaawale e heluhelu ai i ka Baibala, i dala ka'u." Ninau oia i ka wahine pulumi hale "Mahea kau?" I mai la kela, "He Baibala no ka'u, ma ke dala au." Ninau ka elemakule i ka mea hope loa, he wahi keiki holoholo ia nona, he ilihune, he makua ole, "Mahea kou makemake?" I mai la kela, "Ua ao kuu makuawahine ia'u, ua oi aku ke kanawai o Iehova mamua o na tausani dala gula a me ke dala maoli, ina oluolu oe e lawe au i ka Baibala." Pane mai la ua elemakule nei, "pomaikai oe e ke keiki, e ike ana oe i ka waiwai o keia;" a haawi aku la ia i ka Baibala, aia hoi i kona wehe ana, ua paapu loa o loko i na apana gula a me na bila waiwai mawaena o na aoao o ka buke! Ike iho la na kauwa e ae, ua hooneleia lakou no ko lakou manao alunu.
Mai noho a alunu i ka waiwai. Mai kuko i ka waiwai.
HOIHOIIA I KA LANI.
E uwe ana kekahi kahuhipa no ka make ana o kana keiki punahele. I kona kumakena ana me ka paumako ana o kona naau, me ka manao kue no ka make ana o ua keiki la, ka mea i aloha nui ia. Aia hoi, ku koke mai la kekahi malihini ma kona aoao, peahi mai la iaia e hahai mahope ona a hiki aku iloko o ke kula. He po ua ia a laua i hele ai, aole no hoi i pane aku kekahi i kekahi. O ko laua hele mumule no ia a hiki i ka pa hipa. I aku la ka malihini: "Ina e koho oe i kekahi keiki hipa no loko ae o keia ohana hipa, e nana ana oe i ka mea oi loa o ka maikai a lawe oe ia nau. A no ke aha hoi oe e ohumu nei i kuu kii ana mai i kuu kii ana mai i ka hipa keiki oi loa o ka maikai a lawe mai loko aku o ka ohana au i hanai ai na'u, oiai owau ke Kahuhipa Maikai."
Nalowale iho la ka malihini ia wa, a oluolu iho la ka naau o ka makuakane.
"Ma ka ulu wehiwehi,
Ma ka ilina pua mau
Kahi e haalou ai ua wilou
Ma na lua kupapau,
Kahi e mele ai na manu,
A pa mai na ahe po,
Kahi e kani ai na bele,
Moe ia Kama o kakou."
Eia ka mea hilu loa, ma
"Kahi nae o na anela
I memele halelu,
A hauoli na haipule
I ka nani o Iesu,
Kahi o ke oli kani,
Kahi pua oia mau,
E loaa'i ia kama aloha
Ma ke ao pau ole no."
HAAWINA HUI NO KA HOIKE MALAMA O NA KULA SABATI NO OKATOBA.
Mele - "Nauwe e," ALAULA no Augate.
Heluhelu like - Halelu 47.
Pule like me keia - "E ko makou Makua maikai, e Iehova, nani kou aloha ia makou iloko o keia malama i hala aku la, ua hoomau Oe i ke ola o ke kahu, o ke kahunapule, a o na haumana; na haumana makua me na haumana keiki. Ua haawi mai Oe i na mea e pono ai ke kino a me ka uhane. Aole makou i pilikia, aole mai, aole pololi, aole makewai. Ua mau na halawai, na kula la, na kula Sabati. A ke hui pu hou nei makou ma keia hoike kula Sabati no ka mau ana o Kou lokomaikai. O Oe pu no me makou; e kokua i ke kahu, i na kumu, i na haumana ma na hana a pau. E hoolilo i na keikikane, i na kaikamahine, na pokii, i mau haumana maikai na ka Haku, na Iesu, a e hoola mai ia makou a pau ma o Iesu Kristo la. Amene."
Mele na pokii - "Hea Iesu." ALAULA.
E hele anei oukou io Iesu la ano?
Owai o Iesu? Hea anei oia ia oukou e hele io na la? E hele io na la no ke aha?
Makemake anei Iesu e ola oukou?
Makemake anei oukou e ola? Mahea ke ola?
He wahi aha ka lani? Pehea oukou e hiki aku ai ia wahi maikai loa? Ma ka haalele i na mea ino, a hana i na mea maikai a hoopili aku ia Iesu me ka naau a pau a mau loa aku.
He alii anei Iesu? Ae, he alii nui ma ka lani a ma ka honu nei.
No kona aupuni anei oukou? Ae, ina he poe maikai makou.
A, he maikai ole oukou, no ke alii hea oukou?
He mana anei ko Iesu? Ae, nana no i hana i na mauna he nui.
Hai mai i na mauna i paanaau ia oukou? Arerata, o - o -
Owai hoi? O Moria, Sinai, Hosea, Pirega, Lebanona a me Tabora.
E hoohui ma keia mele,
Arerata me Moria,
Sinai wela, eehia,
O Horeba me Pirega,
Lebanona, a me Hora,
Hui oe e Tabora.
Mele - "Aole o'u makau." Hae Hoonani.
Na kaikamahine - Owai ka mauna kahi i hele pinepine ai Iesu? Luka 22:39.
Owai ka i hele pu? Mahea lakou mamua a hele aku i ka mauna Oliveta? Luka 22:14, 15, heluhelu.
Ka ahaaina aha keia? Ka Ahaaina Moliaola oia hoi ka ahaaina berena hu ole, a o ka Pakoa kekahi inoa. A pau ia kukulu o Iesu i ka No ke aha ko Iesu hele ana i ka mauna o Oliveta? E pule. Heluhelu Luka 22:40, 42.
No ke aha ka pule ana? Ua pilikia, e hopu ia'na, e make ana i na enemi.
E make ana oia nowai? I aha?
He wahi mehameha, he mauna, he puu, he awawa, he ululaau anei ka oukou e pule ai?
Aole anei he pono ia oukou ke pule o lilo i ka hoowalewaleia?
A, e pili oukou ia wai i ole e lilo i ka hoowalewaleia?
Na keikikane - Heaha ka Iesu mau hana mamua iho o kona hele ana i Oliveta? Mataio 26:30. Hele no i ka pilikia me ka himeni, ea.
Aole anei he pono ke himeni iloko o ka pilikia? Pela no o Paulo ma. Oihana 16:25. E heluhelu.
Heaha malalo ma ke kumu o Oliveta? He wahi mala. Ioane 18:1.
Owai ka inoa? Getesemane. Mataio 26:36.
Owai ke kahawai e pili ana ilaila? Ioane 18:1.
He wahi aha o Getesemane? He wahi mehameha i hele pinepine ai Iesu me kana mau haumana e hoomaha a e pule.
Mahea ko oukou wahi mehameha e pule ai?
Pehea ke ano o ka Iesu pule hope ana ma ia mala? Me ka ikaika a kahe ka hou me he kulu koko la. Luka. 22:44. Heluhelu.
Mele - "O oe Kederona." Himeni 439; Leo: Hoohuli ana.
Na makua - Mahea i kakau mua ia ai mauna Oliveta? Ma 2 Samuela 15:30.
Owai ka i pii ae malaila? No ke aha ko Davida pii uwe ana? E holo ana i pakele i ka make ia Abesoloma kana keiki kipi.
Owai kai kipi iwaena o na haumana a Iesu? Like pu ka Iuda Isekariota, ka haumana ponoi a Iesu, me Abesoloma, ke keiki ponoi a Davida. Imi o Abesoloma e pepehi i kona makua, imi o Iuda e pepehi i kona Haku.
Aole anei i like kekahi mau keiki a haumana paha i keia wa me laua?
Ua make anei o Davida ia Abesoloma? Aole, ua make e o Abesoloma.
Owai ka i make e, o Iuda Isekariota, ke kumakaia, o Iesu anei ka mea i kumakaiaia?
Make Iuda ia wai? Make Iesu mahea?
A ala hou mai Iesu mai ka make mai, ma ka mauna hea oia i pii aku ai i ka lani? Oliveta. Luka 24:50, 51; Oihana 1:9, 12.
Mele na pokii - "Hahai ia Iesu," Hae Hoonani.
Owai keia mauna i hoikeia iho nei? Oliveta.
He mauna maikai anei ia? Ae, he mauna momona.
Heaha ka momona? Na laau oliva.
Heaha ka laau oliva? He laau aila, nona mai ka aila i kapaia, he aila oliva: he aila mea ai, a mea lapaau kekahi.
Heaha na laau aila o Hawaii nei? O ke kukui, a o ke kaapeha.
Owai ka i pii pinepine i ka mauna o Oliveta e pule? O Iesu. Iesu wale no i kekahi manawa, oia pu me na haumana i kekahi manawa.
Ae, e pii oukou i ko oukou Oliveta e pule penei: "E Iesu, e ka mea i pii pinepine i ka mauna o Oliveta e pule no na kanaka, e aloha mai Oe ia makou na pokii, a e uwao Oe no makou i kalaia ko makou mau hewa, a i hoolaia makou me Oe ma ka lani me ke aloha o Iesu. Amene."
Na keikikane me na kaikamahine - Ma ka aoao hea o Ierusalema ka mauna o Oliveta? Ma ka hikina.
Pehea ka loihi mai Ierusalema aku? Oihana 1:12.
Pehea ka loihi o ko ka la Sabati hele ana? Hookahi paha mile. Heaha ka mea mawaena o Ierusalema a me Oliveta? Ke awawa o Iehosepata a me kahawai o Kederona.
Na makua - Heaha ka wanana ma Zekaria