Ke Alaula, Volume VII, Number 8, 1 November 1872 — Page 30
30 KE ALAULA
HE MAKUA NO.
I kuu hele ana ma ke alanui i kekahi la, he leo uwe nui ka'u i lohe ai. Hele au a kokoke loa i kahi i pa mai ai ia leo uwe, aia hoi he wahi keiki kane liilii e uwe nui ana; a ninau aku au, e kuu pokii, e uwe nui ana oe no ke aha? Ua haule anei oe a eha? Ua pepehi mai anei kekahi keiki ia oe? Ua kaili aku anei kekahi i kau mea ono?"
"Aole, ke uwe nei au no ka make ana o kuu makuakane, a nele loa au i ka makuakane ole Makemake au e loaa ka makuakane make ole, i ole au e noho mehameha owau hookahi wale no."
Ua make anei kou makuwahine ?
"Ae, ua make oia mamua aku nei, owau wale no i koe."
Ninau aku la au, ea, e kuu keiki makua ole, makemake io anei oe ia makua make ole ?
"Ae, mahea la nae e loaa ai? Make wale na makua a pau ma keia ao. Ua ike au i ka make ana o kekahi mau makua e like me ko'u, a ua like na keiki me a'u nei, aohe makua."
E hoolohe oe e kuu keiki e uwe nui nei, a e hai aku au i kekahi makua make ole.
"Ae, ae, e hai mai oe, he makua kokoke mai paha, a loaa ia'u, he makua mamao loa aku paha a loaa ole ia'u. Owai la ia makua?"
Eia ke Akua no, e like me ka pule, "E ko makou Makua iloko oka lani."
Ae, ua lohe au ia Makua, aka aia no ia ma kela e nana mai ia'u, a malama a ai ia'u, a noho pu, a moe pu, a paani pu me a'u."
Alia kuhihewa paha oe, e kuu pokii; aole ma ka lani wale no keia Makua, eia no oia maanei me oe no, ke hele, ke paani, ke noho, ke moe; he makua maikai, aloha, lokomaikai. Ua ike oia ia oe, i kou inoa, a manao nui ia oe, a malama pono ia oe, e like me ka makua ponoi, a oi aku ka maikai o ka malama ana.
He Makua make ole keia, he makua mai ka wa kahiko loa mai, aole ona kumu; i ka wa aole he keiki, aole he makua, aole he holoholona, aole ilio, a pipi, a kao, a manu, e ola ana no. Nui ke aloha o keia Makua ia oe, a i na keiki a pau. Nona mai ke ola, a me ko kakou mau pono a pau.
"Maikai io keia Makua," wahi a keia keiki, "e lawe au iaia i Makua no'u, He hale maikai anei kona e like me ka hale o ko'u makuakane ?"
Ae, he hale maikai loa, a nui na keena maloko a ina he keiki maikai oe, a hoolohe, a malama i kana mau olelo, alaila e kii no kela ia oe, i kekahi manawa, a lawe aku iluna, a hookipaia oe iloko o kekahi keena maikai loa ;i hoolakoia i na mea maikai he nui wale.
E na keiki nui e hoopaanaau ia Ioane 14: 2, 3. "Ma ka hale o ko'u Makua he nui loa na wahi e noho ai, ke hele aku nei au e hoomakaukau i wahi no oukou, a e hoi hou mai no au, a e lawe ia oukou io'u la, i noho ai oukou kekahi ma ko'u wahi e noho ai."
Iloko o na la i kaa hope ae nei, ua ike pinepineia na mano nui iloko o ke awa o Honolulu, makai iho o Ulakoheo; nolaila, e na keiki, ina e papaia kekahi o oukou e na makua aole e hele i ka auau kai mai hoopaakiki a hookuli, aka e hoolohe pono i na leo papa, i pilikia ole oukou.
KA MEA A ANE I HAI AKU AI IA IESU.
He kaikamahine uuku o Ane, a ua hele mai kekahi hoa o Lida e paani pu me ia kekahi la, Nui na mea hoikeike a Ane, he mau kii keiki kona, he mau ipu maikai a kiaha maikai, a buke kii, a laau paani. I ka paani pu ana, aole maikai ka hana a Lida, lawe oia i na mea maikai loa nona iho; a ina he mea ino, he mea nahaha, he mea i haehaeia, waiho oia ia mau mea na Ane. Kaumaha o Ane, noho ona oluolu a olioli ia Lida, hoomanawanui nae ia, aole i hoopuka i kona kaumaha, a ukiuki; a no ka nui loa o ka hana kolohe a Lida, nalo aku o Ane i kekahi wa. Aole liuliu hoi mai oia me ka maka oluolu no, a paani hou me ke ano oluolu no e like me ka paani mua.
A ninau mai o Lida, "no ke aha kou nalo ana aku ? no ke kii hou aku anei i na mea paani?"
"Aole, aohe a'u mea paani i koe."
"No ka hai aku anei i kou mama no ko'u kolohe ana ?"
"Aole, aole au i hai aku i kuu mama, aka, ua hai aku au ia Iesu i kuu makemake e lilo i kaikamahine maikai; aka komo mai no ka mea ino, ka manao ino, ka ukiuki iloko o'u; a noi aku au ia Iesu e kipaku loa aku i keia mea ino mai io'u aku i ole e hoi hou mai iloko o'u."
“Pane mai anei Iesu ia oe?" wahi a Lida me ka hoomaopopo ole i keia mau huaolelo a Ane.
"Ae," wahi a Ane, "ua pane mai no, a ua lohe au i kona leo, he leo hawanawana iloko loa o'u, e olelo ana, E hoao ikaika loa oe, e Ane, ina e hoi hou mai ka mea ino, e olelo oe, e hele pela aku oe, a e haalele no ia ia oe. A ua haalele io no ia ia'u. A hiki ia oe ke lawe i ko'u mau mea paani a pau loa, ke makemake oe ia."
Ke oki no ia o ka paani kolohe ana o Lida.
HAAWINA HUI NO KA HOIKE MALAMA O NA KULA SABATI NO NOVEMABA.
Mele - "Nauwe e," ALAULA no Augate, 1872.
Heluhelu kike, ke ahu me na haumana Halelu 125.
Pule, ku iluna, pa i na lima, moe na maka.
Penei e pule ai: "E Iehova, ka Makua nui, nui kau mau hana kupanaha, ma ka lani a ma ka honua nei; nau no i hana i na mauna a makou e ao nei, me na mea maluna iho - ka weuweu, na laau nui, na laau liilii, na ululaau, na puu, na lua, na pua me na hua ; a na kou mana e hoopaa a hoomau i na mea a pau. E haawi mai oe ia makou i naau mahalo i kau mau hana me ka hoomaikai aku ia oe. A, i kou malama ana i na mea nui, i na mauna kiekie; e hoomanao oe ia makou, ka poe liilii; Ua oi nae makou mamua o na mauna, no ka mea he mau uhane ko makou - a ua make hoi Iesu no makou. Kokua mai ia makou ma keia hoike kula Sabati; hoolilo ia makou a pau i poe maemae i ke koko o Iesu, a e hoola mai hoi ia makou ma ka lokomaikai o Iesu. Amene."
Na pokii - Heaha ka oukou i hoopaa naau ai i keia mau malama i hala?
Na mauna Baibala.
Hiki anei ia oukou ke helu pakahi mai?
Hiki ke hoao. Arerata, akahi; Moria, elua; Horeba, ekolu; Sinai, eha; a - o - mea; nalowale ka. Noonoo, a hoao hou.
Hai mai i ke mele no na mauna i paiia ma ke ALAULA o Okatoba.
He mea aha na mauna?
He mea hoike i ka mana o ke Akua, i ka nani o ke Akua, i ka lokomaikai o ke Akua.
Heaha ko ke Akua lokomaikai i ka hana ana i na mauna?
No na mauna mai ka wai huihui, ka makani oluolu, na laau nui a maikai, na pua nani, na hua ono - a - alia.
Heaha na mea holoholo ma na ma mauna?
Na pipi, na lio, na puaa, na hipa, na kao, na manu, a - .
Nowai keia mau mea a pau?
Hai paa naau mai i keia mau pauku ma Halelu 50:10, 11: "No ka mea na'u no na holoholona a pau o ka ululaau, a me na holoholona laka maluna a na puu he tausani. Ua ike au i na manu a pau o na mauna; no'u no hoi na holoholona o ke kula."
Owai ka ona nui o na holoholona? Ke alii anei? na bao'e? na kanaka maoli ?
Aole no - he poe hanai a malama lakou.
Owai la ka ona ponoi ?
Ke Akua no, ka mea nana i hana.
Ae, e hoomanao ia, a e aloha a malama i ke Akua.
Mele na pokii - "A wehe ke alaula." ALAULA no Sepetemaba.
Na kaikamahine - Ua hele kakou mai ka mauna akahi a hiki i ka mauna ehia ? Owai ka mauna i haiia ma Okatoba ? Owai ka i pii ae ka lani mai Oliveta aku? Mai ka mauna hea ko Iesu iho ana mai a i keia ao ?
Ka Mauna o ke Aloha.
Ka Mauna Aloha anei o Sinai?
Aole, ka Mauna Make ia; nolaila mai ka leo hoahewa mai e make.
Ma ka lani ka Mauna o ke Aloha, ma Arabia ka Mauna o ka Make, mahea ka Mauna o ke Ola?
Mawaho iki ae o Ierusalema.
Owai ka inoa?
Kalevari.
Owai ka i kaulia ma ke kea a make ilaila? Heluhelu Luka 23:33.
Make o Iesu malaila i aha?
I mohai kalahala e ola'i kakou.
He mauna nui anei o Kalevari ?
Aole, he wahi puu uuku no.
Heaha ka mea i lilo ai ka puu uuku i mea nu a oi aku i na mauna e ae a pau ?
No ka make ana o Iesu, ke Keikihipa a ke Akua, malaila, i kalahala no ke ao nei.
Mawaho o Ierusalema ke kumu o keia mauna aia mahea ka piko?
Aia ma ka lani.