Ke Alaula, Volume VII, Number 8, 1 November 1872 — Page 31
KE ALAULA 31
Hiki anei ke ana i ka hohonu, i ka laula, i ke kiekie o ko ke Akua aloha, i ka haawi ana mai i kona Keiki Hiwahiwa e make ma Kalevari no kakou ? Pehea hoi kakou e aloha aku ai iaia ?
Me ka naau a pau, a me ka lawe io ana ia Iesu i kalahala no kakou.
Mele - "Ma ka puu o Kalevari," Himeni 449, elua pauku.
Na keikikane - Aia mahea o Kalevari ?
Aia ma ke komohana akau o Ierusalema, mawaho iki o ke ko kulanakauhale.
Mahea i maopopo ai aia ia mawaho, aole maloko o ke kulanakauhale ?
Ma Hebera 13: 11, 12, 13.
Owai kekahi inoa o Kalevari?
Gologota. Mat. 27:33; Maseko 15:22. Kaiwipoo ma Ioane 19: 17. Ke ano hoi ia o Gologold.
No hea ia ano, iwi poo?
No ka like paha o ia puu me ka iwi poo, he wahi kiekie iki.
Ua hoomanaoia anei keia puu kahi i make ai o Iesu, a me ke ana kahi i kanuia'i oia ?
Ae.
Pehea ka hoomanao ana ?
Mahope iho o ko Iesu make ana, ma ke keneturi mua a elua no hoi, ua imiia e ka poe i kapaia he Karistiano kahi i make ai a i kanuia'i Iesu, ko lakou Poo a loaa no, a hele huakai nui lakou ilaila i kela a i keia manawa e hoomanao ai ia Iesu.
He luakini anei kekahi i kukuluia ma kahi i kanuia'i o Iesu?
Ae.
Nawai i kukulu ?
Na Helena, ka makuahine o Konekanikina, ka Emepera o Roma. Ua huli oia mamuli o Iesu, a kukulu i luakini nui a nani malaila.
Ma ka makahiki ehia i paa ai a hooliloia'i ka luakini?
Makahiki 335. Nui wale ka poe i hele e ike i ka hoolilo ana.
Pehea oukou ? Ke hoomanao nei anei ia Kalevari?
Mele - "Make Iesu no'u."
Na makua - Owai kekahi i make pu me Iesu ma Kalevari? He mana; anei ko laua make e like me ko Iesu ? He make aha ka make ma ke kea?
He make mainoino loa; pili i ka poe lawehala loa.
He lawehala anei o Iesu ? He mau lawehala maoli anei na mea elua i make pu me Iesu? Ua like pu anei i ko laua! manao hooino ia Iesu? Owai o laua ka i hoopomaikaiia? No ke aha? Heaha ka i kukuluia i mea e hoomanao ai i ko Iesu make ana ma Kalevari ? O ka hoomanao ana ia Kalevari ma ka hele kino ana ilaila, he mea anei ia e ola'i? O ka hele kino ana i ka Ahaaina a ka; Haku, he mea anei ia e ola'i ke ole ka hana maikai ?
Na pokii mauna kahi i make ai o Iesu ? Make anei o Iesu no na pokii ? E hoopaanaau i keia himeni:
1. Kei ka puu o Kalevari!
Puu aloha! puu uwe!
Ku ke kea ma kou piko,
Make Iesu maluna'e.
Kei ke aloha ! kei ke aloha!
Ke aloha e ola'i.
2. Make Iesu ma ke kea,
Make no ka poe liilii;
Nana oia a kahea,
Hele mai, e na pokii."
Kii ke aloha ! kei ke aloha!
Ke aloha e ola'i.
Kau aha anei o Iesu ia oukou e hapai a e halihali i kona kea?
Ae.
Heaha ke kea a oukou e hapai a halihali aku? O ke kea laau anei?
Aole.
O ke kea kii ke'eawe anei lei nei kekahi poe?
Aole no.
Heaha la ?
Eia, kana mau kauoha ke kea, o ka hapai a halihali aku, oia ka malama ana i kana mau kauoha.
Ae, pela, maikai.
Hiki anei ia oukou ke hapai a halihali i ke kea? Makau paha, hilahila paha?
Mele na pokii - "Aole o'u makau."
Ke kulu a pau - Heaha na mea e hoopuni ana ia Ierusalema ? Halelu 125:2.
He hoailona ia no ke aha ?
No ko ke Akua hoomalu ana i kona poe kanaka.
Owai ka poe e like ana me Mauna Ziona? Halelu 125:1.
Ma ke aha ka like ana?
Heaha ka mea i hoohalikeia me na kuahiwi o ke Akua? Halelu 36: 6.
Mai hea mai ke kokua ana o ka poe pono? Halelu 121:1, 2.
Heaha na mea i nani wale ma na mauna? Isaia 52: 7.
E hai paa naau mai i keia mau pauku a pau.
Na kaikamahine — Hai paa naau mai i keia mele:
Hoomaikai i ke Akua,
Ka makua o kakou,
No ka ikaika o na mauna,
No ka paa a paa mau no.
Oia hoi ka Puuhonua.
No na kini hoahanau,
Me na mauna nauwe ole,
Hoomaikai a mau, a mau.
Mele - "Pii i ka mauna ia Pisega." Himeni 369.
Pule me ka hookuu aku.
KE ALOHA IO O KE KEIKI.
He wahi kaikamahine maikai e paina i kona maka, me ka olelo, e papa, heaha ka'u e hana aku ai nou i keia la ? Pane ka makua, a, no ke aha la oe e makemake nei e hana i kekahi mea no'u, no papa, ke kanaka nui ? No ka nui o kuu aloha ia oe, wahi a ke kaikamahine. Maikai oe, e Lu liilii. Ke ano no ia o ke aloha io, o ka makemake o hana i kekahi mea e maopopo ai ke aloha. Aole hiki ke paa a hunaia iloko o ka naau. Aole i paa ka pua iloko o ka omuo, wehe a mohala mai no. Aole paa ka ohia iloko o ka pua ohia, hoea mai no ma ka ano hua. Aole paa ke kulina ma ka puu lepo, kupu mai no, a ulu ae, a ikeia ka pepeiao kulina. Pela ke aloha, ea, e Iuliana, ina he aloha io maloko ou i kou hoa, i kou mama, a papa, a kaikaina, a kaikuaana, a kaikunane, e puka mai no ia iwaho, a ikeia ma na hana maikai au e hana 'ku ai ia lakou. E na keiki, e hoopaa pono i na pauku 4, 5, 6 o Korineto I, mokuna 13. "O ke aloha, ua hoomanawanui, a ua lokomaikai; aole paonioni ke aloha ; aole haanui, aole haakei, aole hoohiehie, aole imi i kona mea iho; aole hikiwawe ka huhu, aole noonoo ino, aole i hauoli i ka hewa, aka, ua hauoli i ka pono." No hua keia o ke aloha io o kekahi i kekahi. A, o ka hua o ke aloha io ia Iesu, oia ka malama i kana mau kauoha. E hoopaa oe, e kuu pokii, ia Ioane 14:15. "Ina e aloha mai oukou ia'u, e malama oukou i ka'u mau kauoha."
KELA MEA, KEIA MEA.
Ke Kula Ao Kumu ma Waimea, Hawaii, ma na la 26, 27, 28 o Sepetemaba, akoakoa na kumu mai Hamakua Hikina a Kohala Akau ; kanakolu a oi. Laiana ka Lunahoomalu. Maikai no ke kula, naauao na kumu, ikaika hoi i ke ao.
Hoike Kula ma Waimea, la 20 o Sepetemaba. Ekolu kula i hui ma ka Hale Hookolokolo-elua kula aupuni, hookahi kula haole a Laiana wahine. Maikai ka hoike, nani na mele.
Ke mahuahua nei na haumana o ke kula Sabati ma Imiola, Waimea, Hawaii. Ke komo mai nei kekahi poe i hihiu mamua aku nei; akahi no a komo mai.
Ke uwe a hoohalahala ia ke Kakauolelo o ka Papa Hawaii no ka hoololohi o na Luna ALAULA i ka hookaa ana i na hapaha o ke ALAULA. E make anei ke ALAULA no ka pololi? E ala na Luna a hooili aku i ka uku o ke ALAULA ia Rev. J. F. Pogue, ke Kakauolelo o ka Papa Hawaii, a i ole iaia, ia'u no hoi, ka Luna Hooponopono. Mai pepehi kakou i keia keiki makamae. A i make ia, mahea e loaa ai ka ai uhane i kupono i na keiki?
E na pokii, ua haule ko oukou Haawina ma ke ALAULA o Sepetemaba, no ka piha paha o ka pepa i na mea e. Ua paiia paha ma ke ALAULA. o Okatoba. Aloha ino ke haule hou!