Ke Alaula, Volume VII, Number 9, 1 December 1872 — Page 33
KE ALAULA.
BUKE VII. HONOLULU, DEKEMABA, 1872. HELU 9.
HEAHA kela kii maluna? He kii maikai no, hookahi nae mea i iho ai, oia ka ipu ma ka waha o ke kupunakane. He wahi keiki liilii keia, he keikikane paha, ke kaikamahine paha i ua kolo, a kolo, a kolo he mau mau malama, a ke hoao nei e ku iluna, hina wale nae, a nolaila ke kokua nei ke kupunakane ma ka hoopaa iki a hoohele malie, a kokua hoi kekahi keikikane ma ka hoopaa ana me kahi manamanalima, a e o ana na lima o ka makuwahine e paipai ana e hele mai. E ku ana ke kupunawahine e nana ana me ka makau paha o hina a eha, me ka makaukau paha e hooho oli ke lanakila ke keiki.
He wahi ilio uuku paha kela mea ma ka aoao o ka noho nui o ke kupunakane, a nana olioli pu ana i ke keiki uuku. Ina aole ia he ilio, heaha la?
Mawaena konu o ke keena, he papa kaukau e ku ana, maluna iho he pika waiu me kahi bola a me ke puana iloko me he la ua hanai maikaiia ke keiki mamua kona hoao ana e hele.
Ua mahaloia ke kupunakane no kekahi alakai ana i ka moopuna liilii, malaila e hoohalikeia'i, aka ma kekahi alakai ana ma kela mea iloko o kona waha, aole pono ke mahaloia, mai hoohalike ma ia mea.
Aloha ino na keiki, na moopuna, ke alakai hewaia e na makua me na kupuna.
ALOHA INO KE OWAU MISIONARI.
I ka holo ana o kekahi mau misionari Beritania, he kane me kana wahine, i kekahi mokupuni ma ka moana Pakipika, lawe pu laua i kekahi popoki i kapaia o Toma. I ka pae pu ana o lakou ma uka makau ka popoki i ke ano e, ano hihiu; ano hana ino paha o kanaka, a holo iloko o ka ululaau. Ilaila oia i noho ai a loihi, a lilo na misionari i ke ao o na kanaka e haalele, a e puhi i na Akua kii i ke ahi, a e hoomana ia Iehova, ke Akua oiaio, ko kakou makua ma ka lani.
He kahunapule, o Tiakaa kona inoa, ua haalele i ka hoomanakii, ua ao ia ma na hua palapala haole A, B, C, D, E, F, G, &c, a o kona hale, ua kokoke ia i ka ululaau kahi i holo ai o ia popoki nei. E moe ana oia i kekahi po me ka nalo ana ma na mea kupanaha ana misionari i ao mai ai, a i ka nana ana iluna, oia hoi, he mau maka poepoe elua, me he mau poka ahi la, e nana mai ana, a he leo ano e akahi no a loheia, o ka makau loa iho la no ia o Tiaka, a hoala oia i ka wahine, a ike hoi oia i na maka elua, a ninau ke kane. "Heaha keia?" pane mai ka wahine, "E ala a pule oe." O na hua i paanaau iaia, oia o A, B, C, D, E, &b., a oia wale iho la no kana pule i pule ai me ka leo nui. Kuhi paha ola he pule akaka keia i keia mea kupanaha.
O Toma popoki ka keia, a i kona lohe ana i keia pule A, B, C, nalo hou aku la oia iloko o ka ululaau.
Mahope iho puka hou mai o Toma mailoko mai o ka ululaau a komo iloko o kahi heiau kahi e mau ana ka hoomanakii. I kona moe ana iloko komo kekahi poe e hoomana, o ke ala a owau mai no ia o Toma; a loohiaia kanaka i ka makau loa, aole lakou i ike i kekahi popoki mamua. Holo lakou me ka hooho ana, "He mea kupanaha mai ke kai mai! He mea kupanaha mai ke kai mai." Kii lakou i ka lakou mau newa, mau, ihe, a hoi mai e pepehi i ua mea kupanaha nei. Ua holo aku nae o Toma i kekahi la ae nae, ua hoi mai ua popoki nei iloko o ka heiau, a iaia hoi e himoe nanea loa ana, komo kekahi kanaka me kana newa a pepehi iaia a make. Ka hopena no ia o Toma, Akoakoa na kanaka, a olioli loa no ka luku loa ana i keia mea kupanaha ino loa mai ko lakou mokupuni aku. Aloha ino o ua owau misionari nei! No ko lakou ike ole i kona ano ko lakou pepehi ana. Ua ike nae oukou e na keiki Hawaii, i kona ano, mai hana ino aku.
Hoopaa o Ane i keia mele:
Holoholo ka popoki,
A paani lea no,
Me ka iole a popo kaula,
Holo a paani pu,
Hana olu, mai pepehi
Lawe no a hii maikai,
Hanai pono ke pololi,
Pela Iesu i ao mai.