Ke Alaula, Volume VII, Number 9, 1 December 1872 — Page 35
KE ALAULA. 35
Na keikikane—Mahea i poniia ai ka Iehova Alii? Halelu 2:6.
Owai ia alii? Iesu. Owai ia mauna? Ziona.
Owai ia Ziona? Ka ekalesia.
Heaha ke kauoha ma Halelu 48:12? Heaha na hale kaua, na pakaua, na hale alii o Ziona? Na kahunapule, na luna ekalesia, na luakini, na Baibala, na aha halawai, na kula Sabati, na anela, &c.
O oukou anei kekahi pakaua? Ae, ke lilo makou i poe pono.
Heaha ke kauoha ma Halelu 48:11? "E hauoli, mauna Ziona, a olioli pu na kaikamahine a Iuda."
Mele—" Beautiful Zion." Himeni 581.
Na makua—E hai mai ma Halelu 51:18. "E hana maikai oe ia Ziona."
Owai keia Ziona? Na puka pa o Ziona ka i makemake nui ia e wai? Halelu 86:2.
Owai ia mau puka pa? Owai ka puka e komo ai iloko o Ziona hou?
He mau puka anei na ekalesia? Ae, lakou na puka ma keia ao.
Heahha ke kauoha ma Halelu 149:2? Owai na keiki Ziona? Ka poe pono.
Kekahi papa— E haipualu mai Isaia 33:20; kekahi papa e ma Isaia: 40:9; kekahi papa e ma Isaia 51:3, 11, 16; kekahi papa e ma Isaia 52:1, 2,7,8; kekahi papa e ma Isaia 70:14.
Ke kula a pau—E haipualu mai, Hebera 12: 28---24.
Mele---Hoano ko Ziona puu." Himeni 456.
Papa 1. He hoailona o Aramia no ke aha? No ka hoomaha ana o ka poe pono.
Papa 2. Moria, he hoailona ia no ke aha? No Kalevari, kahi i make ai Iesu."
Papa 3. Sinai me Horeba, he mau aka laua no ke aha? No ke ahi o ko ke Akua inaina e hoopau ana i ka poe hewa.
Papa 4. Mauna Pisega, e kuhikuhi ana ia i ka aina hea? I ke Kanaana hou ma ka lani.
Papa 5. Oliveta me Kalevari, e ao mai ana laua i ke aha? I ke aloha o Iesu, i ke ala hoi e hiki ai i ka lani.
Papa 6. Tabora e hoike mai ana ia i ke aha? I ke kino nani e hiki mai ai Iesu, a e ku ai hoi oia ma ka mauna o Ziona me ka poe haipule he lehulehu wale e ku poai ana iaia.
Ziona hea ia? Ziona lani.
Ke kula a pau---Pualu mai i na mauna mai Arerata a Ziona.
Ma ka helu pakahi ana ehia? Owai ka i oi ma ke kiekie?
Owai ka i oi ke heluia na pono i haawiia mai maluna?
Ma ka mauna hea i haawiia mai ai na kanawai?
Ma ka mauna hea i haawiia mai ka lokomaikai e kalaia ai na hewa?
Ma ka mauna hea i pii aku ai Iesu ke kalahala i ka lani?
Ma ka mauna hea e akoakoa ai na haipule a pau a poai ia Iesu a mele pu aku iaia a mau loa aku?
Na kaikamahine---E hai mai ma Hoikeana 14:1,3. "Nana aku la au oia hoi, ku mai la ke Keikihipa ma ma ka mauna o Ziona, a me ia pu hookahi haneri me kanahakumamaha tausani.
"Mele iho la lakou i ke mele hou imua o ka noho alii; aole hiki i kekahi ke ao ia mele, o ka poe haneri kanahakumamaha tausani wale no, ka poe i kuai hoolaia'e mai ka honua aku."
Hai mai ma Isaia 24:23; 28: 16.
Na pokii—E hiki anei ia ou oukou ke pii aku a ku pu, a mele pu me kela poe ma ka mauna o Ziona ma ka lani? Hiki no ke pili aku makou ia Iesu.
Hai paanaau mai i ka Himeni 431.
E mele aku ia Iesu,
Na kamalii oonei,
Me kamalii maikai ma o,
I ku a mele e,
Mele, nani, nani,
Nani, haleluia.
Pehea lakou i hiki ai
I kela ao maikai?
Nawai lakou la i kaikai
Ia wahi e mele ai?
Mele, nani, nani,
Nani, haleluia.
Ua hele mai la no Iesu,
A make no lakou,
A nona mai ka makaukau
E mele pu ma o.
Mele, nani, nani,
Nani, haleluia.
Mele na pokii i keia himeni no. Leo: Children in heaven." Golden Chain.
I wahi manao pai ai pokole no ka pau ana o ka makahiki.
Pule me ka hookuu aku.
HE UHANE KANAKA ANEI KO I NA ILIO!
He wahi kii ilio keia, he ilio maikai no ma ka nana aku, he ilio kokua paha i ka lawe ano kekahi mea ma kona waha.
He mau hana kokua a aloha no ka kekahi mau ilio. E hoolohe, oukou a na'u e hai aku i kekahi mau hana.
He ilio nui ma kauwahi, ua hele oia i kekahi hale, a ma ka puka o ke keena kuke ua haawiia he iwi bipi me kahi io bipi no. Ai oia i kekahi hapa, a hoi aku i kona wahi. A ma ia la ae, hele hou oia i kahi i loaa ai ka iwi bipi, me kekahi ilio uuku loa, e waiho ana no ka io bipi, aole kela ai, kali oia a ai ka ilio uuku a maona ia, alaila ai oia i ke koena. Lokomaikai, e, kahi ilio nui.
He kanaka i hele i kahi o na Ilikini, he kanaka koa ia, a ua kiia oia i ka pu e na Ilikini, a ua eha loa. He ilio aloha no kana; i ka ike ana o ka ilio i kona kahu e moe aha iloko o ka eha me ka uwe nui, uwe pu ka ilio me ka aoa nui me ka lele ana iluna, ilalo, me he la ua kaumaha nui oia, a makemake e kokua nui i kona haku. Olelo ke kahu, "ina he aloha kou ia'u e kii oe i ka poe ma kahi e, e hele mai e kokua." O ka holo kiki no ia o kahi ilio i ka papu kaua, kahi o na koa, a ma ka aoa a huki ikaika ana, onou oia i kekahi poe e hele pu a nana i ke ano o kona aoa uwe ana. A i ka puka ana i kahi o ke kanaka eha, lawe lakou iaia i kahi e lapaauia'i i ola. He ilio lokomaikai hoi keia.
He mau ilio elua i hoonohoia i mau kiai no ka waiwai o na haku elua. A no ka maopopo ole o ka palena o ka waiwai o kekahi a me kekahi, aumeume a hakaka ikaika na ilio kiai i ko laua kiai ana. A ma kekahi hakaka ana, haule laua a elua iloko o ke kai hohonu; akamai kekahi ilio i ka au ana a pakele koke i ka pilikia; hawawa loa nae kekahi ilio aole hiki ke au, a ike kona hoa hakaka e make ana ia ma kahi hohonu, ka lele no ia ona iloko o ke kai a kii a hoopaa a huki iaia iwaho o ke kai; ka pau no ia o ko laua hakaka ana a noho a kiai oluolu pu laua mahope iho, aole hakaka hou. Noonoo paha laua no ke ino a me ka hope o ka hakaka ana a haalele.
He kanaka e hele ana e auau, a wehe a waiho i kona lole, kona wati gula, a me kona eke dala me kana ilio me ke kauoha iaia e kiai a malama pono i ole e lilo ia hai. Auau no ua kanaka nei a i ka pii ana mai mailoko mai o ka wai, aole i ike ka ilio i kona kahu, hoohewahewa iaia no ka olohelohe o kona kino, a aua loa i ka lole, a mai lele maluna ona a nahu ino iaia. Hoao ke kahu e onou e hooluolu i ka ilio, a i ka waiho iki ana o ka ilio i ka lole e pale i ke kahu, hoea malu mai he powa a kaili aku i ka lole me ka wati a me ka eke dala. Ka pilikia loa iho la no ia o ke kahu, a hoihou oia iloko o ka wai, a liuliu hooa mai he mau makamaka a haawi i kekahi lole e hoi aku ai i ka hale. Aloha ino ke kahu.
Ua lawa paha keia mau kaao no na ilio. Ma kekahi mau mea pono ke hoohalike, ma kekahi mea nae aole pono ke hoohalike. Ma 2 Petero, 2:22, ua hoohalikeia ke keiki i haalele i ka hewa a mahope hoi hou ilaila, me ka ilio i luai i kana ai, a hoi hou i kona luai iho. Mai hoi hou kekahi i ka hewa.
ALIA.
E nana'e oukou e na kamalii i keia poolelo pokole. Ehia la hua? Eha, wahi a Kahananui. Pela, eha wale no, a-l-i-a, Uuku no, aole no i nui loa, aka, he pahikaua nae o alia e luku nei i na uhane. He nui na kamalii i make iaia.
Kauoha mai ke Akua, "E kuu keiki e haawi mai i kou naau." I aku ke keiki, "alia." Ao mai ke kahuna iaia e mihi i ka hewa, a e mamanaoio i ka Haku. "Alia," wahi a ke keiki, aole i pau kuu makemake i na hana lealea. Ninau mai na hoahanau, e, ahea oe a huli i ka pono? Pane hou mai ke keiki, "alia" aia a lilo au i kanaka makua. Kuhihewa.
He kumu alakai hewa o "alia." Aole pono ke hoolohe aku i kona leo. Ma kana alakai ana ua hookoia ka olelo: "Ina he makapo e alakai i ka makapo, e haule pu laua iloko o ka lua."
Nolaila, e na kamalii mai alia oukou i ka pono, mai hoopanee i ka manawa e haawi ai i ka naau no ka Haku, o hiki e mai ka make a nele oukou i ke ola ma ka lani.
"Ano ka manawa e maliu mai ai, ano ka la e olai."