Ke Alaula, Volume VII, Number 10, 1 January 1873 — Page 37

KE ALAULA.
BUKE VII. HONOLULU, IANUARI, 1873. HELU 10.

LOKOMAIKAI I KA ILIO.

                Nani keia kii! He ilio maikai paha keia, he hoa paani, a hoapili, a malama i ua keiki nei, o Robiana paha kona inoa, a o Lo ka inoa o ka ilio. Heaha la ma kona a-i? E aha ana hoi ke keiki? Me he la e hiamoe ana, a ke ku a kiai nei kana ilio uuku iaia e pale aku i na enemi ke lele mai maluna ona.
                Ua ike au he mau ilio punahele ka kekahi mau keiki Hawaii. Aole hewa ia; eia ka hewa o ka hana ino aku, a hoeha wale. E hana maikai aku, e paani oluolu. Ua lohe oukou, ua heluhelu paha ma ke ALAULA o Dekemaba, i ke ano noonoo a lokomaikai o kekahi mau ilio. Heaha ia mau kaao?
                A, eia kekahi mea hou no kekahi mau ilio: He ilio nui no Nu Fonelani, aia mahea ia wahi? a he ilio uuku hoi, nohea la? a he muliwai ino mawaena o laua, a he laau haiki hookahi ka uapo maluna. No ka ololi loa o keia laau aole hiki i na mea elua ke hele aoao pu; a ina halawai na mea elua mawaena aole hiki ke kapae iki a hele aku, a hele mai, aole hoi e hiki ke huli oe a hoi aku, a hoi mai. Nani ka pilikia. Me ka ike ole, ua hoomaka like keia mau ilio e hele maluna o keia laau ololi loa; o kekahi ma keia welau, a o kekahi ma kela welau. Ka hele no ia a hui laua mawaena. Puiwa loa ka ilio uuku i ka ike ana i ka ilio nui, kau kona mau wawae mua iluna, a aoa me ka leo makau loa. Nana ka ilio nui me ka maka oluolu a makau ole i ka ilio uuku, a hoalu, a hoohamama i kona mau wawae i loaa kahi akea e komo ai ka ilio uuku. A ike ka ilio uuku ia puka, kona komo no ia mawaena o na wawae o ka ilio nui, a hele no a hiki i kahi e pau ai ka pilikia. Nui loa kona olioli, a lelele iluna, ilalo, a oniu hoi, a nui kana mau hana i maopopo ai kona hoomaikai ana i ka ilio nui, no kona hoopakele ana iaia i ka make.
                He mau mea noonoo ka na ilio. Ae, he wahi noonoo iki a kupono i na holoholona ko na ilio. Aka, ua oi loa oe, e Ani, mamua o na ilio. Aole hiki ia lakou ke ao i ka heluhelu palapala, a me ke kakau lima; aole hiki ke pule, a himeni, a hoomaikai i ke Akua. A make kau ilio maikai a ka pau no ia ona, aole ola hou, aole he lani maikai nona.
                Pomaikai io oe, hiki ke ao palapala, kakau lima, kakau leta i na makamaka, hiki ke pule, a mele, a hoomaikai i ke Akua; a, ina he kaikamahine pono oe, a he keikikane pono hoi, aia a make oe, aole oia ka pau ana o kou ola, e ola hou no oe ma ka lani, kahi maikai loa a mau loa aku, aole oe e make hou ana.
                Mere Aana, hoopaa i keia pauku mele:
                                Mele au la ma ka lani,
                                Ma ia ao, ma ia ao,
                                Mele au la ma ka lani,
                                Ma ia ao maikai.
                                HUI - Mele mau ma ia ao, &c.

NO KA MAKAHIKI HOU.

                Ua hala aku la ka makahiki '72, me kana mau hana a pau, na hana pono, na hana hewa. Ua huipuia me na hana o na makahiki a pau mamua ae. Ua kakau pu ia ma ka buke o ke Akua, a paa loa me ka peni-kila lani, aole hiki ke holoiia. E hiki nae ke holoiia na hana hewa ke mihi oukou, e na keiki, i ka oukou hana hewa ana. E holoiia no hoi na hana pono ke hoi hou oukou ka poe pono i ka hewa, a lilo i mea ole.
                Ma ka la hope, ka la hookolokolo nui, e lawe ia ai kakou a pau imua o ka Lunakanawai Kiekie Loa, a malaila e weheia ai keia buke a ke Akua, a mailoko mai olaila e hookolokoloia'i kakou a pau, a e kau ka hoapono a me ke ola ke pono na hana i kakauia e kau nae ka hoahewa a me ka make ke hewa na hana i kakauia maloko.
                Eia ka makahiki hou, 1873, he malihini keia, akahi no kakou a ike iaia. He keiki hooilina keia na ka makua i make, oia hoi 1872. Ua lilo kona aupuni i ka hooilina, ia 1873, ma ka lokomaikai nae o ke Akua, ka Makua o kakou a pau. I oluolu keia hooilina, keia alii hou, ka 1873, heaha ka kakou e hana ai?
                Eia paha ka mua. E mihi i ka hewa i hana ia i ka makua, ia 1872. Pela i hana ai na kanaka hana hewa a kipi paha i ke alii. A make ke 'lii, a lilo ke aupuni i ke keiki, hele lakou imua o ke keiki, ke alii hou, a ae i ka hana hewa ana, i ke kipi ana i ka makua, me ka mihi, a noi aku iaia e kala mai, a e oluolu mai ia lakou. E noonoo kakou, na keiki, na makua, i na hewa, i na hana i haule iloko o '72, i na la, i na hora, i na minute i noho wale ai, a hoomaunauna ai, a hana hewa ai, na kula, na halawai, na haawina, na pule i haule, na huhu, na hoopaapaa, na hakaka, na nuku, na kolohe a pau, a e hai aku me ka mihi, aole i ka makahiki '72, aka i ke Akua nona mai ka makahiki.