Ke Alaula, Volume VII, Number 10, 1 January 1873 — Page 39
KE ALAULA. 39
A lilo anei lakou ekolu i hookahi wale no Akua? Ae pela no.
Na kaikamahine - Hana ke Akua i ka lani, i ka honua i ka manawa hea?
Ehia lani? Ekolu paha; I ka lani mua, kahi o ke Akua, o na anela, o na haipule; ka lani elua, kahi o na hoku, o ka la, o ka mahina; ka lani ekolu, oia ka lewa. Ae maikai.
Ua ike oe e Ani i ka lani ekolu, kahi o na ao, na makani, na ua, hekili, uila, hokulele, anuenue. Ua ike hoi i ka lani elua, i ka la, ka mahina, na hoku. Owai ka lani au i ike ole ai? Ka lani mua, kahi o ke Akua, a o na anela. Ae, makemake anei oe e ike ia lani? Ae.
Pehea e hiki ai? Ma ka lilo ana i kaikamahine pono, a hoopili aku ia Iesu, a nana no au e kaikai aku ilaila i ka wa e make ai kuu kino. Maikai, e hana oe pela.
Ke kula a pau - E hai like mai a himeni hoi i keia himeni: Leo: "Hosana Kamalii."
1 Na ke Akua i hana
Ka lani me ke ao,
Na aina, wai, moana,
Na kula, ai, laau;
Ka la olinolino,
I lama no ke ao,
Mahina, hoku imo,
I lama no ka po.
2 Na ia la hoi i hana
Na ia o ke kai,
Na manu o ka lewa,
Na mea kolo nei;
Na bipi, lio, hipa,
Na kamahao a pau;
Ka aka ke pookela,
Ke 'lii o keia ao.
3 He nani, hanohano
Ke Akua ka Moi;
He nui, manomano
O kana hana nei,
Hoonani i kona mana,
Na kamalii a pau,
Noonoo i kana hana,
Mahalo a makau.
Helu 2 - Ianuari 12.
Kumuhana - NA HANA A KE AKUA A ME EDENA.
Pauku Baibala - KINOHI 1:2.
Ke kula a pau - Hai paanaau mai Kinohi 1:1. "I kinohi hana ke Akua i ka lani a me ka honua."
Na keikikane - Hai mai i na mea a ke Akua i hana'i. Ma ka la imua ka malamalama; ma ka la elua ke aouli; ma ka la ekolu, na mea ulu; ma ka la eha, ka la, ka mahina, na hoku; ma ka la elima, na ia, na manu; ma ka la eono, na holoholona, na mea kolo, me ke kanaka. Maikai hoopaa pono.
Na kaikamahine - Aohe mea mamua, noloko mai o ke aha i hana'i ke Akua i ka honua? No loko mai paha o ka ole.
Kupanaha e? Ma ke aha ke Akua i hana'i i na mea a pau? Ma ka mana o kana olelo, a o kona manao.
Pehea ia? Penei: "I iho la ke Akua i honua, i malamalama, a he honua no, a he malamalama no."
Mana loa ka ke Akua olelo. A ina olelo oia e pau ka makani, pau no anei? Ae, pela Iesu ma Mareko 4:39.
Iloko o na la ehia i hana ai ke Akua i na mea a pau? Iloko o na la eono.
Na keikikane - Owai ke kanaka mua?
Owai ka wahine mua?
Noloko mai o ke aha o Adamu?
Noloko mai o ke aha o Ewa?
Hanu anei o Adamu mamua? Aole.
Nohea kona hanu a me kona uhane?
He lole anei ko laua mamua?
Nawai laua i mare?
Heaha ke kanawai mare? Kinohi 2:24.
Na kaikamahine - Hana ke Akua i na mea pau, ua maikai anei ia mau mea? Ae, maikai loa i kinohi.
Owai ke alii o na mea ulu a me na ia, a me na holoholona? Ke kanaka.
Hoomaha ke Akua ma ka la ehia? Ma ka la ehiku. Kinohi 2:2.
He la aha ia? He la Sabati.
Heaha ke kanawai no ka la Sabati?
E hoopaanaau.
Ke kula a pau - Mahea i hoonohoia ai o Adamu a me Ewa? Ma Edena. Kinohi 2:8.
Heaha ka laua hana malaila? He mahiai.
He muliwai anei maloko? Ae, me na manamana eha.
Owai kekahi manamana? Euperate.
Mahea ia?
He wahi maikai no keia Edena, mahea ka Edena maikai loa? Ma ka lani.
Hiki anei ia oukou ke komo ma ia Edena? Ae, ke noho pono makou.
Mele - Leo: "The land of Eden." Fresh Laurels.
Edena e, ka aina lai
Maluna na lilo, ma o ae
O na mea eha, hoouwe
I pili i ke ola nei,
Edena, aina pomaikai,
O kahi pono e maha'i,
Edena e, iini au
E lilo no'u kou malu mau.
Aia iloko o ke Kuokoa, Helu 47, 48, paha na pauku a pau.
Helu 3 - Ianuari 19.
Kumuhana - KA HAULE ANA. - Pauku Baibala
KINOHI III.
Ke kula a pau - Nawai i haawi i na inoa i na holoholona, i na mea kolo, na manu? Na Adamu. Kinohi 2:20.
Akamai ka o Adamu, ea, nohea kona ike?
Nawai i kapa i kou inoa o Mere?
Owai ka inoa o kekahi mau holoholona, a manu a oukou i ike ai a lohe ai?
Owai ka inoa o kekahi mea kolo ma ka mala o Edena? Ka nahesa. Kinohi 3:1.
Mahea kona oi ana? Ma ka maalea.
Na keikikane - Heaha kekahi laau ma Edena? He laau i hookapuia. Oia ka laau e ikeia'i ka pono a me ka hewa.
Heaha ka uku ke aiia ka hua oia laau? Ka make.
Hai mai i ke kanawai ma Kinohi 2:17.
Na kaikamahine - Papa ke Akua ia Adamu laua o Ewa, "mai ai olua i ka laau kapu o make olua," pehea, kupaa anei laua? Aole, hookuli a ai no.
Kahaha! no ke aha ko laua hookuli ana? No hoowalewaleia.
Nawai i hoowalewale? Na ka nahesa.
Ae, komo ka diabolo, Satana, iloko o ka nahesa, a hoowalewale ia Ewa, a hoowalewale o Ewa ia Adamu, a ai laua i ka hua kapu, a haule iloko o ka hewa, a kau mai ka make maluna o laua.
Ke kula a pau - Hookuli anei oukou i ke Akua, i na makua, i na kumu? Ae, hookuli pinepine.
Nawai i hoowalewale e hookuli a e hana hewa?
Ua hookuli a hana hewa anei na kanaka, na kamalii a pau? Ae, ua hookuli lakou a pau me na kupuna, me Adamu laua me Ewa.
Heaha ka uku o ka hewa? Ka make.
Heaha ke ano o ka make? Ka make o ke kino ma keia ao; ka make o ka uhane ma ke ahi pio ole.
Hai mai ia Kinohi 3:4, 6, 19; Hoikeana 12:9; Roma 5:12; Roma 6:23.
Ua hewa na kanaka a pau, a ua kau ka make maluna o na mea a pau, eia ka ninau, aole anei he mea e pakele ai i ka make? Ae, he wahi wanana ma Kinohi 3:15; e heluhelu ia pauku.
Owai kela hua a ka wahine nana e paopao i ke poo o ka nahesa? O Iesu ia; ma ona la e pakele ai ka poe manaoio i ka make a loaa ke ola mau loa.
Mele - "Make Iesu no'u." Hoopaa a himeni ekolu pauku.
Helu 4 - Ianuari 26.
Kumuhana - KAINA A ME ABELA - Pauku Baibala - KINOHI IV.
Ke kula a pau - Ua hookuli o Adamu a me Ewa, heaha ka ke Akua hoopai mua ia laua? Kona kipaku ana ia laua iwaho o ka mala o Edena. Kinohi 3:23; e heluhelu.
A hana hewa oukou me ka mihi ole e kipakuia ana oukou iwaho o ka Edena hea? Ka Edena oluna, ka lani.
Ae, pela io no. Nolaila mai hana hewa, a i hana hewa e mihi koke no.
Na keikikane - Heaha ke kauoha ia Adamu ma, ma Kinohi 1:28; e heluhelu.
O laua anei na makua o kanaka a pau? Ae, aole he mau makua mamua aku o laua.
He mau keiki anei ka laua ma ka mala o Edena? Aole paha.
Owai na keiki mua i kakauia? Kaina me Abela. Kinohi 4:1, 2.
Heaha ka laua oihana? He kanaka mahiai o Kaina, a he kahuhipa o Abela.
Maikai no ia mau oihana elua. He haumana kula oe e Pita, i keia wa, heaha kau oihana ma keia hope aku?
Ina he kahuhipa heaha ka pono?
Mai lilo oe i na hipa a haalele i ke Akua. Ina he kanaka mahiai, e mahiai no me ka malama i ke Akua. Pomaikai io oe ke lilo i kahunapule, i misionari paha.
Owai ke Kahuhipa maikai? Ioane 10:11. Hoopaanaau.
Na kaikamahine - Owai ke keiki maikai o laua? Abela.