Ke Alaula, Volume VII, Number 12, 1 March 1873 — Page 47

KE ALAULA. 47

ike i ka mea e pono nui ai oe? O ke Akua paha, ka Makua ma ka lani.
                Aka he mau makua maikai no a alakai pono no paha ka oukou, e na pokii. Ina pela, e hoomanao, ua oi ko lakou ike i ko oukou. Ua ike i ka mea e pono nui ai, a me ka mea e poino nui ai. Ina paoa lakou, mai holo oukou iloko o ke ahi, ua ike lakou, o ke ahi ka mea e poino ai ke holo oukou iloko.
                Ina paoa lakou, mai hele oukou i na hale hula, na hale lealea, na hale bia, hale rama, na wahi heihei lio; mai hui a launa pu me ka poe kolohe, ka poe aihue, wawahi hale, hehi Sabati, haalele Kula Sabati, ua ike lakou he mau mea ino keia, he mau mea e poino ai.
                E hoolohe oukou i ka papa ana a na makua. Ina hoouna na makua ia oukou, na keiki, i ke kula maoli, a i ke Kula Sabati, a i ke Kula Hanai paha, a kauoha , e imi i ka naauao, a e noho maikai ma na kula, a e pale aku i na mea ino a pau, e hoolohe oukou, a malama i ka na makua. O lakou kai ike i ka mea e pono ai oukou. Ina hookuli, a hana, e like me ko oukou makemake, e ike auanei oukou i ko oukou naaupo ma ka haule pa ana iloko o na hihia a me na pilikia o na hoa a oukou i hoolauna pu ai.
                E mau ka hoomanao ana, ua oi ka ike o na makua pono mamua o ko oukou, a e hoolohe i ka lakou.
                Ina aole o oukou mau makua pono, e lawe i ke Akua, i makua pono no oukou, a e hoolohe mau i kana.
                "E kuu keiki, ina e hoowalewale mai ka poe hewa ia oe, mai ae aku oe. Mai hele pu oe me lakou ma ke ala; e haalele kou wawae i ko lakou mau kuamoo."
                E heluhelu i ka Mokuna 1 o Solomona a pau
 

NA HOAILONA ME NA AKA.

                E na keiki, ua lohe pinepine paha oukou he mau hoailona, he mau aka kekahi mau mea, e hai mai i kekahi mau hoailona, a aka paha a oukou i lohe ai.
                Pohihihi kau i noi mai, e aho nau e hai mai ia makou. Ae, e hiki no ia'u ke hai, a ninau aku hoi.
                Ka la, ka mahina, ka hokuloa, he mau hoailona lakou. He hoailona ka la no wai? No ke Akua, a no Iesu hoi. Ae. No keaha? No ka mea, he malamalama nui ka la no keia ao, a no na ao e ae, ke kumu no ia o ka malamalama, nona iho no kona malamalama. Pela ke Akua, oia ka malamalama nui o na ao a pau, nona iho no ka malamalama. A, olelo Iesu, owau no ka rnalamalama o keia ao. Ae, maikai ia; a, i ka nana ana'ku i ka la, i ka hoailona, e hoomanao oukou i ke Akua, a ia Iesu, ka malamalama oi loa. Ke kumu o na malamalama a pau.
                Ka mahina-- He hoailona ia no keaha? No ka ekalesia, ka poe pono, na kumu, na kahu, na kahunapule. Pehea i maopopo ai? Penei, he malamalama no ka mahina, aka, aole nona iho kona malamalama, no ka la mai no. He mau malamalama no na ekalesia, na haipule, na kumu, na kahu, na kahunapule, aka, aole no lakou iho ko lakou malamalama, no ke Akua mai no ia, a no Iesu mai hoi. Maikai, a, i ka nana ana'ku i ka mahina, e hoomanao no i ka ekalesia, i ka poe haipule, i na kumu, i na kahu, a e hele ma ko lakou malamalama ke alohi mai; a, ina alohi ole, a ane pouli e hele mamuli o Iesu, ka malamalama e alohi mau ana.
                Ka hokuloa--He hoailona ia no wai? No Iesu. Ae, pololei ia. He malamalama ka hokuloa no kakou ma ke ahiahi i kekahi manawa; ma ke kakahiaka i kekahi manawa, a kapaia ka hoku ao. Pela Iesu he malamalama ia no kakou ma ke ahiahi, a ma ke kakahiaka, ma ke awakea, ma ke aumoe, a ma na manawa apau. E hoomanao iaia ke ike aku e kau ana ka hokuloa ma na ahiahi; a ka hoku ao ma na kakahiaka.
                Ekolu hoailona i hai ia a weheweheia. Owai? Ka la, ka mahina, ka hokuloa. Ua lawaia no keia manawa.

KA PULE A KE KEIKI LIILII.

                He makuakane kuai, a lilo ma kana oihana kuai ma na la noa; uuku kona noho, ana me kona ohana. He keikikane uuku kana, nona na makahiki ekolu. Aloha nui ka makuakane iaia A makemake oia e hiki mai ka Sabati, aole no na hana maikai o ia la, aka, i paani pu oia me kana keiki, a olioli i ka ike ana i, kana mau hana hoolealea kamalii.
                Ma ke ahiahi o kekahi la Sabati, e noho ana ke keiki ma ka uha o kona papa me ka lelele ana iluna, ilalo; olelo mai kona mama, e Kalee ka wa moe keia. Aloha no ke keiki i kona papa; a, iaia e hoi ana e moe, huli oia a olelo: E papa, o oe kekahi , e hele pu kaua, i hoolohe oe i ka'u pule ana.
                Hele pu no oia, a, ma ka nana ana i ke keiki e kukuli pu ana me ka makuawahine me ka paa ana o na lima ma ke ano pule, hu nui ae kona aloha iaia.
                E kukuli pu oe, e papa, me maua, wahi a ke keiki. Kukuli iho la oia. A hoolohe oia i ka pule a ke keiki nona--" E ke Akua, e hoomaikai mai oe i kuu papa, ka mea a'u i aloha nui ai." O oe kekahi, e papa, e pule pu oe. Ka'u pule mua keia--" E hoomaikai mai ke Akua ia'u." E pule oe pela. A pule ka makuakane--"E hoomaikai mai ke Akua ia'u. No ka pono o Iesu. Amene," wahi a ke keiki.
                Mahope iho, hoowalewale kekahi hoa i ka makuakane e inu rama pu. Ninau ka hoa, no keaha kou hoole? No ke aloha i ka'u keiki liilii, e pule mau ana no'u i kela po; i keia po, i hoomaikai mai ke Akua ia'u. Pono loa oe, wahi a ka hoa, kaua pu no ke haalele loa i ka rama mai keia wa aku.

NO KA UA.

                Nui loa ka ua, wahi a Ema, hiki ole ia'u ke paani mawaho, a hele a ike i kuu hoa, Meri, a paani pu. Ua paa au iloko o ka hale, me he pio la. Heaha ka'u hana e oli ai? Aole o'a makemake i keia mau mea paani o'u.
                Heaha la kou makemake, e Ema, wahi a ka makuwahine? Pane koke oia: "E lilo au i kumukula, a o oe ka'u haumana. Makemake au e ninau ia oe i kekahi mau ninau pohihihi, a nau e wehewehe mai."
                Ka ae no ia o ka makuwahine. Kupanaha ea ! Ke kaikamahine ke kumu, ka makuwahine ka haumana.
                Eia ka ninau mua. Nohea mai ka ua? Ka haina o ka makua. No na ao mai ka ua. Pehea la i komo aku ai ka ua iloko o na ao? ahi a Ema.
                I akaka ia, e hai e aku au i ke ano o ke ao. E hele oe i ka halekuke, a e nana i ka baila ana o ka iputi. Heaha kau i ike e puka mai ana mailoko mai o kona nuku?
                He uahi paha, wahi a Ema. Aole ia he uahi, he mahu ia. E wehe oe i ke poi o ka iputi e baila ana ; heaha ia mea e pili ana i ka aoao oloko, a e kulu ana hoi? He mau kulu wai no. Nohea na kulu wai? No ka wai o ka iputi i pii ma ke ano mahu, a na ke poi anu i hoomaalili i ka mahu, a lilo hou i wai, a kahe iloko o ka iputi.
                He mahu anei ke ao? Ae, he ano mahu no, Nohea ka mahu? No na iputi no kekahi, a no na ipuhao, a no ka hau, a no na kahawai, na muliwai, na moana.
                Pehea la keia? E wehewehe mai oe, e ka makuwahine. Penei paha : Na ke ahi i hoolilo i ka wai o ka iputi a me ka ipuhao i mahu, a pii ia iluna i ka lewa ; na ka wela o ka la i hoolilo i kekahi hapa o ka wai o na kahawai, a muliwai, a moana i mahu, a pii ia iluna i ka lewa a hui pu me ka mahu o ka iputi, &c., a lilo ia i ao. Ua ike paha oe i na ao e kaalelewa ana maluna, e Ema.
                Ae, ua ike au, a mahalo i ko lakou mau ano eleele, ulaula, onionio, ano puu, ano moku, a ano kanaka me na poo nui, a papale nui. A, pehea la e lilo ai na ao i ua a haule mai?
                Penei; Na ke anu maluna i hoomaalili i ka mahu a lilo ka mahu i wai; a, no kona kaumaha, haule mai ka wai, oia hoi ka ua.
                Akahi no a maopopo ia'u ke ano o ka ua, wahi a Ema. Akamai oe, e kuu mama. I ke kula nui paha oe. E hoopaa pono au.
                Mai na ao mai ka ua. Mai ka honua aku na ao. Pii ka mahu mai na iputi ipuhao, hau, kahawai, muliwai, moana aku, no ka wela o ke ahi, a no ka wela o ka la, a hui na mahu he nui wale, a lilo i mau ao, a hoomaalili ia e ke anu, a lilo i wai, a haule mai he ua. Pela anei? Ae, ua naauao oe, e Ema.
                A, i naauao io oe, e hoomanao oe, na ke Akua i hana i ka ua, me na mea apau, ma kona mana, a ma kona akamai. A no kona lokomaikai ua loaa mai keia mea maikai, oia hoi ka ua.
                Pehea na kanaka, na holoholona, na aina, ke haule ole mai ka ua?
                "E oli aku ia lehova, ka mea i hoomakaukau i ka ua no ka honua. Ke haawi mai nei ke Akua i ka ua mai ka lani mai."
 

ALOHA INO ATA.

                Aloha ole ke Akua i ke kii ana mai i ka'u keiki, ia Ata, a lawe aku, wahi a kekahi makuwahine. Uwe, a na ole oia iwaena o na malihini.
                Alia, kuhihewa paha oe, e ka makuwahine---ua make no kau keiki, o Ata, ua nalo hoi kona kino liiliii iloko o ka lua pouli. Aka, o kona uhane, aole la e noho ana iwaena o na malihini.
                Ua ike e ke Akua i kau keiki mamua o kou ike ana iaia. Ua aloha e ke Akua iaia mamua o kou aloha ana iaia. Aloha nui ke Akua iaia, a hoouna mai i kana keiki hiwahiwa iloko o keia ao e hoola iaia—ua make hoi Iesu nona, i loaa ke ola. Lua ole ko Iesu aloha iaia! Aole me na malihini o Ata. Ua hele e aku Iesu e hoomakaukau i wahi keena liilii nona ma ka hale nani o kona Makua. Ua kii mai a lawe aku iaia i ka lani a hoonoho pu iaia me na hoa kahiko, a maikai, a aloha wale. Aia no oia ma