Ke Aloha Aina, Volume I, Number 3, 8 June 1895 — Ka La-Haonau O Vitoria. KULAIA NUI MA LADANA. He La Hauoli Piha no na Beritania. [ARTICLE]

Ka La-Hanau O Vitoria.

KULAIA NUI MA LADANA.

He La Hauoli Piha no na Beritania.

Uluwehiwehi ke Kulanakauhale i na hae me na Hoohiwahiwa Palena ole o na Puuwai Aloha Moi. Mai ka Buletina mai o ka la 24 o Mei. Ladana, Mei 24, -O ke kanahikukumamaono o na la hanau o ka Moiwahine Vitoria, ua hoea mai ia me ka ulumahiehie nui ia, a ua hiaai nui ia aku hoi na hiohiona o na aumoku kaua a me na puali koa, me ka lakou mau hana hookelakela o ka la hanau. O ke kau ana o na hae he lehulehu, o ka luhiehu o na kahakahana e lawe ana i na aheahe laumakani, ua palena ole mai ia. I ka la apopo, Mei 25, e hoike piha ai ko loko nei o ke kulanakauhale o Ladana, ke kulanakauhale pookela o ke ao nei, e noho ana e aneane he 6,000,000 kanaka ka nui. Ma ka Halealii Windsor, ua haawi ia ae he kipu aloha ana no ka Moiwahine, me na laina koa loihi. Ua hoonani ia ke kakela Alii me na kahiko ana o ke kulana ulumahiehie nui. Iloko nei o keia kulanakauhale, e like me ka maamau o na hana hoohiwahiwa ana, o ka puali kinai Sekotia; ua maki mai lakou mai ka halekoa Chelsea a i ka Hyde Park, a hoohele pololei aku la mawaena o ka puali hoohiwahiwa o na hae i hookuuweluia. O na hoohiwahiwa pili aupuni, aia i ka la apopo, ka la e paniku ia ai na keena oihana aupuni a me na ahahookolokolo a pau loa, a e haawi ana hoi o Haku Rosebery kuhina nui, a me na hoa e ae o ka aha kuhina i ahaaina nui kulaia. E hiki kino mai ana ke keikialii o Wale i ka ahaaina e haawi ia ana e Haku Rosebery. Ua paina pu o Haku Rosebery me ka Moiwahine i ke ahiahi nei, a e hoomoe ana oia ma ke kakela Windsor i keia po. Ua haawi ia he anaina ike me ka Moiwahine i keia kakahiaka. Ua apono ka Moiwahine i ka papa hoonohonoho makana la hanau i waihoia aku iaia e ke kuhina nui. Ma ke kakahiakanui poniponi wale o keia la, ua hoike ae ka poe o ka lahui puuwai Beritania i ko lakou hauoli, no ka la hanau o ko lakou Moiwahine i aloha nui ia, i ka malama ia ana o ka ahaaina ma kela a me keia wahi like ole, ua hoike ia ae ka lokahi o na manaoio mahalo no ka Moiwahine kaulana o Enelani.