Ke Aloha Aina, Volume I, Number 3, 8 June 1895 — HE KIA HOOMANAO MABELA. [ARTICLE]

HE KIA HOOMANAO MABELA.

O ka hana a ke kanaka iloko o kona wa e ola ana, i hana ai no ka pono o kona aina a me kona lahui, he Kia Pohaku Mabela hoomanao ia nona, i na kau a me na makahiki loihi e hoea mai ana mamua aku ona. E lilo auanei kona moolelo i mea kuhikuhi iloko o ka hanauna hou mahope aku, e koi ana ia lakou, e hana like, a e kukulu i pohaku Mabela no lakou iho, i mea alakai i ka lahui hou e ulu mai ana mahope aku. Ua make he nui wale o na poe haipule, aka, eia me kakou ko lakou moolelo, me he Kia Pohaku Mabela la e ku ana i kahi Pa Ilina, e kuhikuhi ana i ke ano o ke kanaka nona ia pohaku i kukuluia ai. Pela makou e hoomanao ae nei no ke Kuhina Nui o ke Aupuni Amerika, Mr. Gresham. He kanaka oia o ke kulana noonoo makaukau, a he kakaikahi na ano kanaka i kupaa ko lakou manao a me ka lakou hana, no ka pono ku i ka oiaio a me ka poloiei e hiki ai ke hooko ia. O keia kanaka o Gresham, he Amerika ma kona hanau ana, aka, ua hanau pu ia mai oia me kela ano hoopono o ka manao lanakila. Ua ike hoi makou, aohe oia he pilikoko no ka lahui ili ulaula o Hawaii nei, aole hoi ana pomaikai pilikino mai ka lahui Hawaii aku. Aole loa! Aka, mamuli o ka hana i haawiia aku nana e nana a e hooko i ka mea oi o ka pono, ke olelo ae nei makou, oia kekahl o na kanaka i kokua nui i ka lahui Hawaii e kue ana i ka hana a ka poe pakaha aina. Ua make aku oia, aka, aia kana hana no Hawaii, ke ku nei he Kia Pohaku Mabela imua o kakou i keia la. He manao kuokoa kona, a he hooko me ka wiwo ole i kana hana i hoonohoia ai oia, he lima hooko no ka Peresidena Cleveland o Amerika Huipuia. Aole e poina ka Lahui Hawaii i ka inoa o Gresham no keia mua aku. No kekahi ulia pilikia maluna o ko makou luna lawe nupepa, oia o Halawale, nolaila, ua loaa ole aku na nupepa o ka Poakahi a me ka Poalua o keia pule. Ua hoi mai oia, a e hoomau aku ana i kana hana lawe nupepa e like me ka mea mau. Ua hoike ia ae maloko o ka halawai Aha Euanelio, no ka oihana misiona o na Aina E, he 160 paha ka nui o na poe komo hou i ka hoahanau ma Mai konisia iloko o ka makahiki i hala iho ia, oiai nae, he 60 wale no paha ka nui o na wahi hoahanau komo hou iloko o na ekalesia a pau loa ma ka Paemoku o Hawaii nei. He hoike keia o ke kuemi hope o na hana Euanelio ma Hawaii nei. O na loaa mahina hou hoi o na ekalesia, ua pau no i ka haawi ia no na hana ekalesia. Aole nui na dala no ka waihona Papa Hawaii no na Aina E.