Ke Aloha Aina, Volume I, Number 4, 15 June 1895 — KA MOKU POINO. Kau i ka Apapa ka Mokuahi Lawe Leta "Cohma" o ka Pakipika [ARTICLE]

KA MOKU POINO.

Kau i ka Apapa ka Mokuahi Lawe Leta "Colima" o ka Pakipika.

Kapalakiko, Mei 30. - Ua ili ka mokuahi lawe leta Colima oiai oia e holo ana mai keia awa aku no na kulanakauhale o Amerika Waena, ma ka po o ka la 28 o Mei. Ua ili oia ma kekahi ahua ma kahi mamao loa mai ka aina mai. O John F. Taylor kona kapena. He 200 poe ohua maluna o ka moku. He hookahi wale no mea i hoomaopopo ia no ko lakou poino, oia no ko lakou ee ana maluna o na waapa, a hookahi o ia mau waapa he 18 poe o luna i loaa pono a pakele. O na hoaloha o ka poe ohua, he manaolana ko lakou no ka pakele, aka nae, ua poino kekahi mau ola. He moku kuluma mau keia i ka loaa i na ulia poino mamua aku nei, a pela hoi keia ulia poino ana mai la. He mea oiaio no ka olelo, aia ka poino ma na wahi a pau loa, ma ka aina, a ma ka moana.