Ke Aloha Aina, Volume III, Number 19, 8 May 1897 — Page 1
| This text was transcribed by: | Francene H Aarona |
| This work is dedicated to: | Mahalo nui for allowing us, volunteers, to kokua in this Ike Kuokoa project. |
KE ALOHA AINA
UA MAU KE EA O KA AINA I KA PONO
Hookumuia i Mei 20, 1895
BUKE III HONOLULU POAONO, MEI 8, 1897 HELU 19
KE ALOHA AINA
E hooopuka mau ia aku ana mai ka Poakahi a ka Poalima o na pule a pau o kela me keia mahina.
Ka Uku Pepa, he 20 keneta o ka pula. No ke kope hookahi, he 5 keneta.
E loaa no ka pepa mai ke Keena aku o KE ALOHA AINA, a mai ka lima aku o na Luna Lawe Pepa.
E pai ia no na Olelo Hoolaha, na Kanikau me na Mele Inoa, me ke Dala kuike. Aole nupepa ma ka owili pakahi e hoounaia ke ole e hookaa mua ia ka uku pepa.
E hoouna pololei mai i na Nuhou na Kumumanao, ma Olelo Hoolaha, naKanikau a menaMele Inoa i kaLunahooonopono o keia Pepa.
Aole loa e hoopukaia a hoolahaia kekahi manao ma na kolamu o keia Pepa, malalo o kekahi inoa kapakapa ke ole e hoike mai i ka Lunahoopoopono i kona inoa ponoi.
Ka Nupepa Puka Pule
KE - ALOHA - AINA
Hookahi Makahiki. . . . . . . . . . . . $ 2.00
Eono Mahina. . . . . . . . . . . . . . . . 1.00
Ekolu mahina. . . . . . . . . . . . . . . . .50
Hookahi Mahina. . . . . . . . . . . . . . .20
EMMA A. NAWAHI
Puuku oi
KE - ALOHA - AINA
EDWARD L. LIKE
Lunahooponopono a Hope Puuku
S. P. KANOA
Hope Lunahooponopono
O na kauoha Nupepa me na hookaa Dala, e hoouna pololei mai i ka Puuku ma Honolulu.
---
Wasinetona, Aperila 9. I kela la i hoike ae ai ke Kuhina Aumoku kaua, he hoolaha no ke kapili ana i mau mokukaua topido o ekolu ka nui, a he 30 mile ka holo i ka hora.
E hoomakaia ka wehe ana nona kohokoho ana, ma ka Poakahi, Iune la 14, a e paa hoi keia mau waa topido iloko o 18 mahina, mai ka la aku e paa ai o ka aelike:
O na koho a pau, e hoikeike mua ia mai ia me ka lakou mau hoolala ana no ke ano o ke kapiliia ana, he ekolu mahina mahope iho o ka paa ana o ka aelike, e apono ana i ka mea @hana e kapili.
O ke ano o ka moku e kapili ia ai e hookaawaleia lakou ma o na helu la, elike me keia helu 19, 20, 21.
O na koho ana a pau, e waiho koke ia mai ia mamua ae o ka manawa, oiai ka Ahaolelo Lahui e noho ana i keia wa, a i hiki ai hoi ke hookaawaleia he bila haawina o $ 800,000.
UA HOIHOI HOU IA.
Wasinetona, Aperila 9. Mamuli o ka manao o Bliss, kekahi o na hoa o ka Aha Kuhina o Makinile, ua lawe ae la oia ma kona ano kulana, he mea e hooponopono ana i ka pono o ka lehulehu, ma ka hoihoi hou ana i na poe kahiko ma ka oihana, i hoopau ia hoi e na hoa o ka Aha Kuhina mua.
I keia la, ua hoonoho hou aku oia ia Kapena Henry C Porter, o Ohio, ma kona kulana mua, he luna nui no na mahele minerala o ke keena aina, a ia Kapena George Redway o Kaleponi, i luna nui no ka helu ana i na mahele aina, iloko o ke Keena Oihana Aina Nui. Ola aku la ia mau makaainana o ka Peresidena, ma o ka hana maikai la a keia Kuhina hou, nona ka mana maluna o ia mau oihana.
RUSIA A ME KERETE.
Nu Ioka, Aperila 9. He lono kuikawa kai loaa ae i ka nupepa Herald o Nu Ioka, mai Sana Peteroboro ae, a wahi ana: Ma kekahi anaina i haawiia e ke Kuhina Noho Sepania Kauna Muranieffa, ua hoike ae oia i kekahi mau olelo koikoi a oolea loa hoi maloko o kana palapala i kakau ai.
O kekahi mahele o kana mau olelo i kakau ai, o ia namea e pili ana i na hoike a Balfour, no na mea e pili ana i ke kulana kaua o na aupuni hakaka o ka honua.
He lehulehu aku kana mau olelo i hoopuka ai no na hana i lawelaweia e na poe loea o Pelekane a me Farani, mawaena o Haku Salisbury, ko Enelani pukaua nui, a kaeaea hoi ma na mea pili kalai aupuni, a me M. @Hanataux, ko Farani keiki hanu meheu pohihihi ma na mea e pili ana i ka ninau o Aigupita.
Eia hoi o Rusia ke haka nono mai nei kona mau onohi maka maluna o kahi mokupuni o Kerete, ka mea hoi a ka poe Tureke e olelo nei, ua hooulu ia ae ka hookumuia ana o ke kaua mawaena o Helene a me Tureke, mailuna mai o keia wahi mokupuni, nona na kohokoho ana a Rusia a me Tureke ua hana poholalo mua ka lahui kanaka o luna o keia wahi mokupuni me ka poe Helene, a oia ke kumu i ikaika loa ai ko lakou manao e hoohui mai ia lakou malalo o ka Moi Kini Keoki o Helene.
KE KOHO ANA NO KE KUIKAHI UWAO.
Wasinetona, Aperila, 19. Eia ka Ahaolelo Senate o Amerika ke liuliu mai nei no ke koho ana i ka lakou la i hookaawale ai, no ka apono ana i ke Kuikahi Uwao, mawaena o kekahi mau aupuni hoopaapaa palena aina, a me ka hoopau ana i ke kaua, elike me Venezuela ia Beritania Nui, a me Sepania ia Cuba.
O ka keia Ahaolelo Senate wale no koe, alaila, akaka ka hoike manao o ka Lunahoomalu o keia Aha Uwao, oia hoi ka Moi Oscar o Suedena a me Norewai, a ua hookaawaleia o ka Poakolu, la 5 o Mei, oia ka la e koho ai na hoa o ke Senate, a me he mea la, e lokahi ana no ko lakou manao, elike me ka Peresidena Kalivilana i hana ai i kona mau la, alia nae hoi, e nana aku no hoi kakou i ka @hopera o ka lakou hana.
MAKEMAKE O RUSIA I KE AO HOLOOKOA.
Iloko o kekahi nupepa a ka poe Rukini, nona ka inoa o Sviet, ua hoike ae kekahi Kenerala kaulana loa o ia aupuni, nona ka inoa o Romaroff, i kekahi manao hookelakela, a e heluhelu ia penei:
" O ka Hikina, me kona mau aupuni a pau e hoopuni ana aia, elike me Kina, Peresia, Hulesitana a me Inia, ua noho waleia no lakou e na kanaka i like me ka Rukini, a he poe kanaka ponoi hoi lakou no Rukini.
Mai keia wa, a i ole ma keia hope aku paha, e pau holookoa no ka hikina no kakou. A malalo hoi o ka kakou mau kauoha e kukulu aku no kakou i ko kakou mau pualikaua ma ke komohana, a e paa iho iloko o ko kakou mau poholima no ka wa mau loa; pela hoi ka Akau a me ka Hema, a ke puni, o ka pau holookoa no ia o ka honua malalo o ko kakou mana. "
O ke kuko keia a Keinohoomanawanui, aohe wa e hooko ia ai oia mau upu ana, a hiki i ka pau ana o ka honua i ke ahi pele.
---
HE MAU SELA MAHUKA A PAA NO
---
Ma ka hora 9:45 o ke kakahiaka Poaono nei, oiai o Keola he mea lawelawe no loko o ka Halewai, ua holo koke aku la oia iluna nana aku la maluna o ka pa-pohaku o ka Halewa kahi a kekahi mau sela moku o luna o ke C. D. Bryant, i mahuka ai, mamuli o ka paa ana paha o ko laua mau lima ma ka hakahaka pohaku e hiki ai ia laua ke pinana maluna a pakele mai ka lima aku o na kiai o ka hale hoopaa lawehala o ke aupuni.
Ua @hoopaa koke ia o Kimo Kapihea a me Conley, no ka huli ana, a loaa aku ia i ka pa papa o Alani me Robikana, a hoihoi hou ia mai la no ka Halewai. Kiekie no ka @hoi ka maka ʻ u ole o ka pinana ana ma kela wahi.
---
UA HALA O S. W. K. KAWEHENA.
---
Ma ka hora 1:30 o ke ahiahi Poaono nei, Mei 1, 1897, ua haalele mai la i keia oia ana o S.W. Kalama ma Kauluwela Honolulu, ua hanau ia oia ma Kapaliiuka, Kohala Akau, Hawaii, mai ka puhake mai o @Naliielua ( k ) a me Kawaipipili ( w ) i ka A. D. 1836, o ke 61, keia o kona mau makahiki o ka hanu ana i na ea aala o keia mau mokupuni anuenue.
Ua mare oia ekolu mau wahine, o ka wahine hope oia kana i haalele iho la e @paiauma nei i ke aloha kane.
Iloko o na makahiki eha a oi o ka noho aialii ana o ka ma ʻ i ma kona kinolahilahi. O kona ini nui i na makahiki i hala ae nei, o ka ike pono i ka mea oiaio no ka hoihoi aupuni moi, he maikai kana olelo mamua o kona make ana.
Minamina na kanaka aloha aina e ko ia nei e ka make, he hoaloha oiaio ia no makou. J. @KEALOALII, Kauluwela, May 1, @1897.
Na Palapala
---
Aole e ili maluna o makou ke koikoi o na ahewa ana no keia mau manao i hoopukaia malalo o keia poo, aka, e ili no ia maluna i na poe na lakou i kakau mai.
---
KA MANAO O KA ENEMI.
---
MR. LUNAHOOPONOPONO : Aloha oe :
He wahi manao ka ʻ u e hooili aku nei a nau hoi ia e hoomaikeike wale ae no hoi i ko kaua mau hoa lahui, a oia iho keia malalo :
Ianei iho nei o Bila Aila o Lahaina kahi i kaahele ai, malalo o ka hoohulihuli ana i na kane, na wahine a me na keiki o ka apana o Ualapue nei, Molokai, iloko o ka Hui Kalaiaina, me ka hoikeike pu aku i kekahi kina ʻ una ʻ u a ka Peresidena Nui o ka Hui Aloha Aina, a puni ka Paeaina, a i kue hoi i na olelo o ka pauku o ke Kumukanawai mua.
Malalo o keia mau mali leo, @na punihei io aku la ka hapanui o na lala o ka Hui Aloha Aina o ka apana o Ualapue ei, i na olelo waimeli a ua wahi Bila Aila nei o Lahaina.
Ua hele aku oia e hooikaika e hoohuli mai i ka Peresidena o ka Hui Aloha Aina oia wahi, me ke koi pu aku, e lilo oia kekahi lala o ka Hui Kalaiaina, aka, ua hoole mai oia me ka hoopuka pu mai i keia mau olelo.
" O ka 5 keia o ko ʻ u makahiki o ka noho ana i Peresidena no keia Hui aka, aole loa au i @ike, heaha la ka hewa o ʻ u e waiho ai no keia Hui, a komo hou aku loko o ka Hui Kalaiaina, aka, aole nae ia he mea no ʻ u e waiho ai i ka hana i paa iloko o ko ʻ u lima me ka hewa ole. "
Eia no hoi oia ke koi nei i ko makou Luna Lawe Pepa o KE ALOHA AINA, e lilo i Luna no ka nupepa a ka Hui Kalaiaina, oia paha " Ke Aloha Aina Oiaio, " i make iho la ma ka hana ana a @Wilikoki.
He mau hana hilahila ole loa keia a kekahi kanaka i manaoia, o kona kahua, oia no ke Aloha i ka Aina, hapai pu i na hana me ka wahine nana ka nupepa o lawelawe ia mai nei e kekahi mau Lunahooponopono opio, a no laua hoi ka ike e hiki ole ai i ka aila kohoia o Lahaina ke hoohoa aku i ke kukui uwila o ko laua mau manao kalaiaina @kuliʻu.
Ke hooki nei au maanei, @aole ke aloha no auanei. KUPA O KA AINA. Molokai, Aperila 18, 1897
---
MA KA POAONO nei i make ai o Mrs. Hanere Walakahauki iloko o ke @ kona mau makahiki.
Ma ke kakahiaka Poakahi nei i make ai o George Wood, kela keiki @hou @popo o ka @Regimana mamua ma @Lunalilo Home.