Ke Aloha Aina, Volume III, Number 27, 3 July 1897 — Page 6

This text was transcribed by:	Kate Motoyama
This work is dedicated to:	dear deba pasquerette

KE ALOHA AINA

6 KE ALOHA AINA, POAONO, IULAI 3, 1897.

PALAPALA KUE A KA LAHUI

HAWAII.

Ma ke ku ana mai a ka Mariposa, ma ka Poaha nei, i loaa mai ai ia makou ka palapala kue a ka Lahui Hawaii i waiho ia aku ma ka Hale Senate e Joseph Heleluhe, ma ke ano he Komisina oia i koho pono ia e na Hui Aloha Aina a me ka Hui Kalaiaina, a penei ka heluhelu ana o ua palapala kue la:

Ia Hon. John Sherman, Kakauolelo o na Mokuaina o Amerika Huipuia.

Aloha oe:

Ma ka aoao o ka Hui Hawaii Aloha Aina, a ma ka aoao o ka Hui Kalaiaina, i kukulu ia e aa poe Hawaii a me Hapa Hawaii o na mokupuni o Hawaii, no ka hoihoi hou ana mai i ke aupuni kumu kanawai a me ka hoomau ana i ke kuokoa, malalo o ko lakou Moi e noho hoomalu ana ma ia mau mokupuni, a mamuli o ka hookohu ana o kela mau hui ia'u i Komisina, a me ka haawi ana mai i ka mana ma ke ano he mea i kohoia e ka poe Hawaii no ka nana i ka lakou mau pono, ma keia, ke waiho aku nei au i ka palapala kue a ka Mea Kiekie Liliuokalani, ma ke aloha o ke Akua, ka mea e noho moi ana mai ia mau mokupuni, ma ka la 17 o Ianuari M. H. 1893, a ma ia la i haawi aku ai oia i kona mau waiwai a me kona mana ma ke ano he Moiwahine i na pualikoa, i ka luna aupuni a me ka mana kaua moana o Amerika Huipuia.

Ma ka inoa o na ahahui o na kanaka i hoikeia ae la, a ma ka inoa o ka hapanui o na poe koho balota i hoopaaia ma ka la i ae ia aku ai o Amerika Huipuia, ke kokua, a ke hooiaio nei au, i na mea a pau a ka Moiwahine Liliuokalani ma kana palapala kue i kokuaia e ka palapala kue a kona lahui, ma ka hooko ana i kekahi kuikahi i oleloia, oia hoi, ma ke ano e haawi lilo ana i na mokupuni o Hawaii, ma ke ano he Panalaau no Amerika Huipuia a no ia kumu, ka palapala kue i hana ia ma ko makou aoao, e ko makou Moiwahine Liliuokalani.

Hanaia ma Wasinetona, i keia la 17 o Iune 1897.

JOSEPH HELELUHE.

Ua malamaia ae ka hoike kuia o na kula keikikane o Kamehameha, ma ka po Poaha nei, maloko o ka rumi hooikaika kino, a ua nui no hoi ka poe i hele ae malaila.

Ua loaa mai nei ia Shimamura, ke kauoha no ke kue ana i ka hoohui aina a hiki i ka wa e pau ai o na kue mawaena o ke aupuni lapana a me ke aupuni Repubalika o Hawaii.

NUHOU KUWAHO

Ma ke ku ana mai nei o ka mokuahi Mariposa i keia kakahiaka, i loaa mai ai na nuhou like ole o ka honua nei, a no ka pomaikai o ko makou poe heluhelu, ke panee awiwi aku nei makou penei:

E LAWE IA MAI ANA IMUA O KA

HALE O NA MAKAAINANA.

Ladana, Iune 23. Iloko ana o ka Hale o na Mkaainana i ka la apopo. e lawe mai ana o Ernest W. Beckett, he mau ninau i ke aupuni, no ka nana pono ana, ua kaili ia anei ka nohoalii o ka Moiwahine Liliuokalanai e kekahi poe Amerika kakaikahi, i kuleana ole e hoomalu maluna o Hawaii, a i keia wa, i mea e hoopakele ia ai mai ka inaina o na kanaka, ua noi aku la i ke aupuni o Amerika e hoohui me Hawaii, a e ae ana anei o Beritania Ni e hookuu aku ikeia wahi hoahu nanahu maikai loa no Amerika me ke kue ole aku.

NAWALIWALI NA POE CUBA.

Nu Ioka, Iune 23. Ua loaa ae he lono i ke Journal, mai Havana ae, e olelo ana: Ua loaa mai he lono mai Placetas mai, e hoike ana, ke nahaha liiliii iho la ka iwi kuamoo o ke kipi ma na apana o Santa Clara. Ua lohe pu ia hoi, he heluna nui o na poe kipi o Monegados, i hoonele ia i na mea kaua, a ke pahola la hoi ka ma'i samola poki maluna o lakou. Ke emi mauiho la ka lakou waihona ai, mamuli o ka makaala loa o na Sepania i ka hoopoino ana i na mea ulu.

E hoihoi ia aku no Sepania ma ka moku lawe koa Reina Maria Christina, he 509 a me 307 marina, ma keia mua koke iho.

A i keia kakahiaka i pephi ia ai o Isedoro Carmona a me Anthony Jordan, he mau pio mai ke kahua kaua mai, no ka hewa kipi a me ke puhi ahi.

NALOWALE KA MOKU AO KAUA.

Porsmouth, Iune 23. Ke hopophopo ia nei ka moku ao kaua o Beritania Sea Lark mamuli o kona hoea ole ana mai i ka wa o na aumokukaua i hookahakaha ai.

O ka Poaha kona manawa i manao ia ai e ku mai ana, aka, aole mae i lohe ia kekahi wahi mea nona, mai kona wa i haalele aku ai ia Davenport.

Ua manao ia ua halawai oia me kekahi ino nui ma ka moana, oiai oia e hoohana ia ana e kanahakumamakahi aliimoku a me kanawalukumamakahi keiki opiopio, a ua halawai hoi me kekahi poino.

He elua moku i hoouna ia aku no ka huli ana i ka moku naolwale, mawaena o Portmouth a me Davenport, ua huli hoi mai lauan me ka loaa ole o ka meheu o ka moku poino Sea Lark.

Ua haalele aku ka Sea Lark ia Queen's Ferry, ma ka la 12 o Iune no Portsmouth. A ma ka la 18, ua hoike ia mai oia mawaho o Grimpsby e paio ana hoi me ka makani mamua pono mai on a.

O Lutanela Tisard kona Kapena, a ma ka la iubile i hookiekie hou ia ae ai kona kulana a i ke kulana kapena.

ILI KA MOKUKAUA LAWE HAE O

NELEKONA.

Ladana, Iune 16. O ka aoao akau o Sekotia a me Enelani, ua pahola ia ae ia e kekahi ino nui, a o na wahi e kokoke aku ana i Glasgow, ua hoolana pu ia e ka wai a ua uhiia hoi na alahao.

O ka mokuakaua lawe have o Nelekoua, Fudroyant, e holo nei ma na kapakai ma ke ano he moku hoikeike, ua puhi ia aku ia i kula, a ua manaolana ia, aole oia e pakele ana.

KA MAKOU KII MAKANA O

KALANI.

E kala mai e na tausani poe heluhelu o ka Nupepa KE ALOHA AINA, no ka mea, ma kela mau helu aku nei, ua hoike aku makou i ko makou mau tausani poe heluhelu, e loaa aku ana ka makou Kii Makana o Kalani Aimoku, e paio hoomaha ole mai la no ko kaou mau pono pilipaa ma Wasinetona a me Kona mau ukali in a poe i hookaa pau mai o keia makahiki a me na poe hookaa mua o keia hapa e hele nei. Aka, mamuli oko makou hilinai i ko makou poe heluhelu, e hookaa pololei mai ana no lakou i ke ola o ka pepa, no keia hapa hope e hele nei nolaila, ke hahaki nei makou i ka makou mau olelo i hoopuka mua ai, a ke hoouna aku nei makou i ka makou Kii Makana i na poe heluhelu a pau o ka kakou hiwahiwa KE ALOHA AINA, me ka manaolana, e aloha ia mai an aoia e oukou.

E hoomanao koke mai i ke ola o ka pepa, i ike mau ai oukou i na mea hou o keia ma la e nee nei.

PAKELE MA KA APUA.

He eha mau Pake mawaena mai o na ohua i lawe ia mai e ka Pekina, i mahuka aku me ka maopopo ole o ko lakou wahi i hele ai, mahope iho o ke ku ana mai o ka moku i ka uwapo. O ka lakou nalowale, honua ana, ua hoopohihihi loa aku ia i na poe kiai o ka hale dute, aka, ua koho wale ia, ika manawa i hoohikikhiki ai o na ohua no kahi hoomalu, ia wa lakou i luu ai paha iloko o ke kai.

KE LULU KEKAHI I KA MA-

KANI, E OHI AUANEI OIA

I KA PUAHIOHIO

Pela hoi, ke hauoli kekahi me na kumu kupono ole, a i loaa ole hoi na hoiaio ana no ia mea, o kona hopena, he kaumaha, a he waimaka helelei, pela kakou e ike nei i kahi poe i hoike mai i ko lakou mau helehelena hoomahie no kela wahi lono makani i hoea mai, a nalowale aku la ma kela huli komohana o ka poepoe honua.

Ke osanna nei lakou, a ke olioli nei hoi ma na alanui hele, a iloko o ko lakou mau keena oihana pakahi iho, aka, iloko lilo aku nae o ko lakou mau puuwai, pehea, aole anei kela uhane maikai iloko o lakou ke kue ae la i na kuko a ko lakou kino e kanikaniaula nei i ka makani me ke kuhihewa nei?

Kahaha! He oiaio, ke nana wale nei lakou i ko lakou mau aka iho iloko o ke aniani me na hoomahie ana o ka minoaka hauoli ma ko lakou mau papalina, aka, ia lakou i kaawale aku ai mai ke aniani kilohi aku, he oiaio, ua poina iho la ko lakou mau helehelena ia lakou

Pela hoi, ke kiiohi aku nei lakou ia lakou iho, ma ke ano he aniani kilohi kekahi me kekahi, me na minoaka hoomahie e hoike mai ana i ko lakou mau helehelena, ma o na lono puahiohio i ahai mama ia mai e na uhane lapu o ka po, a ke hoopiha kuhihwa nei lakou i ko lakou mau opu i ka makani, a ua ike no oukou e kuu lahui aloha i ka hopena oia mea he piha makani, he puhihio manawahua mai o loko o ka opu.

Nolaila, in a no he mau lono oiaio ia a e hooko io mai ana paha o Amerika ia mau kuko ana a lakou nei ea, aole anei hoi kakou e ike aku ana i kekahi mau loli ano nui ana mawaena o nei mau mana nui elua o kue ana i kela hoohui ana aku ia Hawaii nei i panalaau no Amerika, "oiai hoi o Beritania a me Farani," no ke aha hoi! e ku nana wale mai ana anei laua i ka lakou nei mahelehele ana i na pomaikai no ko lakou mau pakeke ponoi iho?

Uhu! Ea, e kuu lahui aloha, i poni ia e ko ke Akua lokomaikai, ka lahui i hoomalamalama ia e ka olelo a ke Akua, ua ike oukou i na mea i palapala ia ma Kana olelo, a ua maalo mau aoi ia mau hopuna olelo imua o ko oukou mau maka.

Oia hoi, aia a hapai mai ke kuko, hanau mai kana keiki hiapo o Hewa, a kanaka makua iho hoi ua keiki ala o Hewa, puka mai o make loa, aohe puu-kalahala e ola ai, a no ka mea, ua kue ke kuko o ke kino i ko ka uhane, a ua kue no hoi ko ka uhane i ko ke kino, a ua kue kekahi i kekahi i hiki ole ai ia lakou ke hana i na mea a lakou i makemake ai e hoohui aku i ko kakou aina hanau me Amerika, ka aina i hoopomana ia e na hana ino pelapela loa i ake ole ia ma Hawaii nei i na mikahiki a ko kakou mau Lani Moi e noho hoomaluana i ko Hawaii Paeaina.

A oia ano hana pelapela ino nae ke ake ia aku nei e hoolaha mai maluna o ka lepo aloha o kou makuahine honua. Ka@ E kuu io a me kuu iwi, nou nei oiaio hoolana a ae kau mamo ma keia mua aku, i aui ke aho, umia ka hanu, a e @ia iho i kela mau olelo iloko o kou puuwai, oia hoi, "Ua mau ke ea o ka aina i ka pono," a o ka pono ke hana ia a haule mai na lani, a pela ke aloha o ke Akua e lokomaikai mai ai i ka lahui Hawaii, ka aina a me ka nohoalii o Liliuokalani, Nona a no Kona mau hooilina mai ke ao kumu ole a i ke ao pau ole. Amene.

I ka hoopau ana i ka'u episetole imua ou e ka lahui oiwi, ke waiho aku nei i keia e ka manaolana no e awaiaulu pu mai ana no kakou iloko o ka manaoio, ka manaolana a me ke aloha hookahi, no ka nonoi pauahe ole ana ma ka kakou mau leo pule, me ka oiaio, a me ka hookeai ana, a Nana no e kaupaona mai i ka kakou mea e noi aku nei, ma ka inoa hookahi wale iho no nai o Iesu Karisto ko kakou hoola. Amene.

SAMUELA K. KAMAKAIA.

AA KA MARIONA E HEIHEI

ME KA PILEDELEPIA.

E hoomanao ia mahope iho o ka heihei waapa ana o eono hoe mawaena o na keiki o ka uwapo a me ka Mariona a lilo ka lanakila i ka poe mua ma kela Poakolu aku nei, ua haawi mai la na kanaka o luna o ka mokukaua Pilekelepia i na leo huo no ka waapa lanakila, aka, o keia mau leo huro, ua lilo ia i mea e hoano e ia ai ka manao o na poe o ka Mariona, a aa koke aku aku la e heihei me ka poe o luna o ka mokukaua Piledelepia.

Ua ae ia aku ka lakou noi e na poe o luna o ka mokukaua, a mahope o ka ae ana o ka Adimarala e heihei laua, nolaila e malama io ia ana keia heihei ma ka hora 10 o ke kakahiaka Poaono ma ke kahua heihei o ke'a Poakolu aku nei.

KUE KA HAPANUI I KA HOO-

HUI AINA.

New Haven, Conn., Iune 7. O ka pepa Yale Shingle, o ke kula ae kanawai o Yale o ka poe kahiko, ua hoopukaia ae ia i keia kakahiaka, he 44 Repubalika, 35 Demokarata a me 12 poe e ae o loko o ka papa. Ua kokua ae lakou i ke kumuhana a Kalivalana no cuba, aka, ua kue loa nae ka hapanui o lakou i ka hoohui aina, he 35 poe kue i ka hoohui aina a he 29 poe kokua. A maiwaena mai hoi oia poe he 59 poe kokua i ke dala gula, a he 14 hoi no ke dala.

KA HUI MAHIKO OAHU.

Mamuli o ka manao o na On a o keia Hui Mahiko e ku la maluna o ke kahua palahalaha o ka lepo waiwai nui o Ewa, ua hooholo lakou, e hana ia i kukui uila ma na wahi hana oia mahiko, i hiki ai ke hana i ka po a me ke ao, me ka hoomaha ole, i na wa a pau e makemake ia ai e hana pela.

Mamuli o keia mau hoolala ana, ua hele kino maoli aku ka Luna Hoohana Nui o ka hale kukui uila o ke aupuni. THeodore Hoffman, ma ua kahua la o ua mahiko la e ku nei, ma ka Poakahi mea, a ua hoola ia ua hana e pili ana no ka hoomoe ana i na uewa kukui uila, e komo ana iloko o na malako, na wahi hana paa, ka hale wili, a pela aku.

A ke pau pono ua hana a pau i ka kukulu ia, a e hoi na kukui elike me ko na alanui o Honolulu nei, he moa maopopo loa, e hahai aku ana kekahi mau mahiko mahope o keia maheu hookahi, a he mea hoi e hooi aku ai i ka holomua o na hana kana ko ma kela a me keia wahi o ka Paeaina.