Ke Aloha Aina, Volume III, Number 37, 11 September 1897 — NA UKU O KEKAHI MAU LUNA AUPUNI KIEKIE. [ARTICLE]

NA UKU O KEKAHI MAU LUNA AUPUNI KIEKIE.

O ka Haku Lutaneia o Ire lani, ua loa iaia he $100,000 o ka makahiki, no kona uku a me kona mau hoolilo. O ke Keikialii o Wale he $200,000 wale no ona o ka makahiki. I ka wa e hoea aku ai ka Moi opio o Sepania i kona kulana kanaka makua, oia kekahi o na Moi waiwai loa iloko o Europa, no ka mea, he 1,400, 000 a ke aupuni e haawi nei iaia, no kona uku makahiki, me $600,000 mawaho ae no na hoolilo o ka ohana.

O ka Peresidena o Farani he uku makahiki kona o $240, 000 no kona uku a me na hoolilo, he huina dala nui hewahewa ka ia lahui e auamo nei no kona aie lahui nona ka huina o $6,000,000,000 he popilikia nui hoi i halawai ole me kekahi mau lahui e ae o ka honua nei. Eia ke aupuni o Beritania ke uku nei i ka ohana alii he $3,000000 o ka makahiki, mailoko ae o huina he $2,000,000 e loaa nei i ka Moiwahine Vitoria, he mau waiwai e ae no hoi kekahi o na a ka Duke o Lancaster e uku nei, nona ka huina o hapaha miliona dala. He $3,600,000 a Italia e uku nei i kona Moi i na makahiki a pau. A he $4,000,000 hoi a Geremania e uku nei i kona Emepera, a mawaho ae he mau loaa e ae no hoi kekahi ona mai kona mau waiwai paa mai. O ka Za o Rusia, he ona oia maluna o 1,000,000 mile kuea o na aina i mahiai ia, a ua loaa hoi he $12,000,000 loaa makahiki mai keia mau apana aina mai.