Ke Aloha Aina, Volume III, Number 38, 18 September 1897 — E ALA E HAWAII NUI KUAULI. [ARTICLE]

E ALA E HAWAII NUI KUAULI.

Ua hala ae nei na la kiklki hahana o ke kau, a ke nee aku nei kakou e komo iloko o na mahina anu o ka Hooilo, ka wa hoi no lakou ke kapuahi hoowela mau i ka momoku ahi hoopumehana, ke kapa hoopumehana hoi o na la ino. Ua hala ae nei na la owelawela o na paio hahana ana no na mea pili i ke kakauinoa ana, a ua hoea mai nei ka ka Ahahui Aloha Aina mau palapala me na hoaka'a ana i ku i ka naauao, a ke palahalaha ae nei kona mana me ka ikaika i oi aku i kona mua i hana ai.

Ua ala mai na kane, na wahine, a eia ke laulima pu nei ma na hana e hoikeike aku ai ia Amerika Huipuia, ua ala mai o Hawaii Nui kuauli, a kue i ka Hoohui Aina, me ka manao makee o ke Aloha Aina oiaio, e hoomau loa ana i ke kupaa no ka hoomau loa ana i ke kuokoa o ko kakou aina. Nolaila, e ala e ka lahui me ka manao lokahi, e kakau iho i ko oukou mau inoa maluna o na pepa Komite o ka Ahahui Aloha Aina, me ka hopo ole.