Ke Aloha Aina, Volume III, Number 42, 16 October 1897 — Page 3

KE ALOHA AINA

POAONO, OKATOBA 16, 1897.

 

AI MANU O KOOLAU.

 

Le-le ka Uha oia Eu.

ME 24 TINI OPIUMA I LOAA AKU.

O Makai Kiu Chang Pun ka Moho Kipu

 

            Ma ka hora 12 o ka po Poalua nei, i kipuia ai kekahi haole hoopae opiuma mai luna mai o ka mokuahi Australia, a he mea aila hoi no na hao mikini oluna o ia mokuahi, e Chang Pun, kekahi o na kiu hoohalua a ka Makai Kiu David Kaapa no na hana haihai kanawai a pau a ka poe apuka i ko ke aupuni kuleana, a penei iho hoi ka moolelo i loaa mai o ko makou makamaka i ike pono i keia kipuia ana.

            Ua kukulu kiai ia o Chang Pun a me S. Kaiwi ma ka Bay View (Be Viu), e kokoke ana i ke alanui o Aala, oiai hoi na kukui uila o na pou alanui e huai pau ana i kona malamalama olinolino, malalo iho o na kaupoku lani, a aole loa hoi i kekahi mahuka ke manao oia e pakele mai ke alo aku o na maka noil o na kiu aupuni, e kiai nei me ka makaala loa, o ka maalo wahi iole ae no mamua o ke alo, paa ia i ke po@la e ka popoki.

            A oia no hoi ka wa i maalo mai ai he elua mea maluna o kekahi kaa huila-ha, e kalaiwa ia ana me ka hikiwawe loa, ma ke alahele o alanui Moi, mai Kapalama mai.

            Ma kahi kokoke loa i ke alanui o Aala, ua hoohuliia ae la ke alahele ma ia wahi alahele pouliuli, a ku iho la ma ke alahele aoao, ma o mai o ka hale hana poi.  Oia no hoi ka wa i lele aku ai o kekahi o keia mau kanaka mailuna aku o ke kaa a laua i kau mai ai me kekahi eke e paa ana ma kona lima, ao ka wa no hoi ia o kekahi o laua i hoohuli ae ai i ke kaa a hoi aku la ma ke alahele a laua i hele mai ai oia o Kapalama.

            O keia hoi ka wa a na makai kiu i holo aku ai imua o kahi a ke kanaka e lawe ana i kana ukana pahaohao o ka po, a o ka wa koke no hoi ia i iho koke iho ai kekahi o kona lima ma kona papakole, me ka hoao ana e hapai ae i kana pupanapana no ke ki ana mai i kona mau enemi.

            Aka, ua oi aku ka hikiwawe o ka ka makaikiu Chang Pun lawelawe ana i kana pu, mamua o ka hiki ana iaia ke hana a koha aku la ka leo kupinai o ka pupanapana ma ka helu kiekie o 49 iloko o 30 iwilei no elua wale no ana manawa i hoau ai me kana milimili punahele.

            I ke ki mua ana, ua kokolo aku la ka poka ma na aakoko o kona pulima, a i ka helu elua aku hoi, ua kikoni pohaia iho maluna o ke opuupuu o ka wawae hema, a hina aku la oia iluna o ka honua, me ka hiki ole ke ala hou mai iluna, mamuli o ka eha e kokolo ana iloko o kona mau aakoko.

            Ua laweia ka mea poino i ka Halewai, a malaila aku no ka Halemai Moiwahine.  O ka uha i ku ai i ka poka, ua pau kekahi mau iwi i ka haihai, a ua olelo ae ke kauka, ua oi aku ka pono ke oki ia mamua o ka waiho ana pela.

            He 24 tini opiuma helu @ Hongkong, i hookomoia iloko o kekahi eke kapolena, i humuhumuia a paa, a ua hamoia i ka aila a me ke pena.  O na tini aole i pulu i ka wai, aka, o ke eke, ua pulu a me he mea la mailoko mai o ka wai i lawe ia mai ai, a hoopaeia ae ma kekahi wahi.

            Ua laweia ae na poe o luna o ka Australia e nana pono i keia kupueu, a ua hooia ia ae no luna no o ka Australia.

------------------

UA LOAA KA INOA PONOI O UA EUEU LA.

-----------------

            O kela haole i kipuia ai i ka po Poalua nei, e Makai Kiu Chang Pun, no ka hoao ana e kue i ka hana a ka makai, ua hoike ae nei oia i kona inoa ponoi, oia hoi o Jack Gavin, he mea hana kake mahu no luna o ka mokumahu Australia.

            Mahoe koke iho o ka wa i hoea aku ai o ka mea poino i ka Halewai Moiwahine, ua hoea koke aku la o Kauka Wahie, no ka hooponopono ana i kona mau palapu a pau, a me ke noi pu aku hoi i ka inoa o ka mea i kipuia, i hiki ai ke oki i kahi i pilikia o kona uha.

            Mamuli o ko ke kauka ake nui e loaa ka inoa o keia eueu o ka po, nolaila, ua hoomau aku la oia i ka huli ana a me ka niele ana, a hiki i ka puka ana mai o kona inoa o Jack Gavin he mea hana kake no luna o ka Australia.

------------------

HE KUAHAUA I NA KOMITE KAKAUINOA I NA PALAPALA

HOOPII KUE HOOHUI AINA.

------------------

            Ke kauohaia aku nei na Komite a me na poe a pau e paa ana i na Palapala Kakauinoa me ke poo palapala Hoopii Kue i ka Hoohui Aina, i kakauinoaia e James Keauiluna Kaulia, Peresidena o ka Ahahui Hawaii Aloha Aina.

           E hoihoi a e hoounaia mai ua palapala la ma ka inoa o Peresidena Kaulia, a me kona Keena Loio ma Honolulu.  E paniia ka manawa kakauinoa ke hiki aku i ka la 30 o Okatoba.  A o na palapala a pau e hoihoi ia mai ia mamua ae oia manawa.

                        Me ke kauoha,

                                    Jas. L. A@olo,

            Hope Kakauolelo, Hui Aloha aina.

            Honolulu, Oct. 13, 1897.

 

NUHOU KUWWAHO

-----------------

            Ma ke ku ana mai nei a ka mokuahi Auseteralia, i loaa mai ai na mea hou like ole e na aina mamao, a no ka pomaikai o ko makou poe heluhelu, ke hoopuka aku nei makou penei:

PAKELE MAI KA MAKE MAI.

            Bombey, Oct. 3.  O Henry Savage Lanpor, he kanaka kaahele i ike nui ia, me ke kakau a he moopuna na Walter Savage Landor, ua huli hoi mai nei oia i loia, mahope o kona halawai ana me kekehi hiohiona weliweli.  Ua hele aku oia ma ke ano huli i ka naele o Tibeta, aka, ua haalele ia oia e kona mau hoa a pau, a koe elua o kona mau kanaka lawelawe.

            Mahope iho ua hopuia oia e na poe Tibeta, ma ke ano he kipi, me ke kau ana aku i ka hoopai o ka make maluna ona, a mahope o kona kuhikuhi ia ana i ka hao wela, ua lawe ia aku e pepehi a make, aka, i ka minute hope loa e laweia ai o kona ola, ua hoolo@ hou ia ae la kona hoopai e ke Grand Lama, ma ka hoehaeha ana iaia, no ewalu la o kona hoopaa a ana ua hookuu ia mai la oia.

            Ma kahi iwakalua mau palapu i loaa ia Landor mai kona mau hoeheha ia ana.

AUHEEIA NA PUALIKOA SEPANIA.

            Tacoma, Oct. 3.  Ma ke ku ana mai a ka mokuahi Vitoria i keia la, ua loaa mai la na lono aia no ke hoomau la ka hakaka ma ka mokupuni Pilipina.

            He puulu kanaka nui kai lele kaua aku maluna o na Sepania ma Paomborg, a mahope o kekahi kaua hahana ana, ua auhee aku na Sepania me ka haalele ana iho he iwakalua i make.

            Ma Sana Rafela he puulu kipi malalo o Kenerala Nativaded,  ua hui aku lakou me kekahi regimana koa Sepapia, a ua hoomaka kekahi kaua hahana no kekahi mau hora loihi a ua auhee aku la na kipi me ka haalele ana iho i na mea kaua.  He 400 ka nui o na Sepania i make a hoehaia.

HE KENETURIA KA LOIHI KONA OLA ANA.

            San Jose, Cal. Oct 3.  I keia la i piha ai na makahiki o Mrs. Fanny Slikard i ka 100, a ua hoomanaoia ae hoi ia maloko o ka home o kana moopuna Mrs. F. c. Bierwell, e kokoke ana ma Agnews ma keia apana aina.  He 5 ana mau hanauna i puipu ae meia ma ka hauoli pu ana, a oia hoi ka mea nona ka hanohano e malamaia nei, he oia mau no iona mau helehelena puupuu e-o, a o kona nanaina hoi, me he mea la, aia mai no ilalo loa kona mau makahiki.  Mawaena o na poe i hoea ae malaila, o kana mau keiki, na moopuna, na kualua, a pela aku, mai na mokuaina like ole mai.

            Ua hanauia oia i ka makahiki 1797, a he eha ona manawa i mare ai i ke kane.  Ua hoea mai oia i Kaleponi i ka wa o ke gula e hu ana, mai ka hikina mai.  He 13 ka nui o kana mau keiki, he 6 hoi o lakou e ola nei, he 56 ana mau moopuna, a he 38 e ola nei, he 92 ana mau moopuna kualua, a he 20 mau moopuna kuakolu.  O kana kaikamahine ekolu, he 78 ona mau makahiki i keia wa, he ola mau no kona ikaika, nana no e hooponopono i kona hale, e uwi i ka waiu o ka bipi, a pela aku.

            I ke 45 o kona mau makahiki i hanau ai oia i kana keiki kane hope loa, he lala oia no ka hoomana Bapetizo mai kona wa 15 makahiki wale no.

 

--------------------

UA MAKE A OLA HOU.

--------------------

Ike i Kela Ao he nani Lua Ole.

--------------------

            Los Angeles, Cal. Sept. 23.  Me na maka hakahaka a me ke kino nawaliwali e waiho nei o William Graham ma kona home ma ke kapa kahakai o Sana Monica, ma ke kae o ka lua kupapau, mamuli o ka loaa ana i ka ma’i akepau.

            Aole he hopohopo iloko ona no ka make, no ka mea, ua ike mua oia ia wahi, a ua haawi mai hoi ia iaia i ka maluhia, a ua hauoli hoi kona uhane i ka hele hou aku ma ke alahele ana i ike mua ai.

            Oiai, o Graham e waiho ana ma ke kulana nawaliwali, ua lalau mai la na lima palanehe o ka make a lawe aku la iaia i kela ao nani mao, me kona mahui mua ole e make ana oia.

            “O, nawai i hoihoi hou mai ia’u?  No ke aha oe i hana ai ia’u pela?  He nani na mea a pau,” wahi ana i puana ae ai me ka leo palupalu, i kona wa i ohala hou mai ai.  “Ua ike aku nei au ia oe e papa, iloko o ka lani me a’u pu, aka, aole nae au i ike i kuu wahine, e kuu ana kaua maluna o kekahi aina, aka, ua haalele koke mai no oe e papa ia’u,” a waiho maule hou aku la oia.

            Ma ka hora 6 o ke ahiahi Poaono, Sepatemaba 12, i ka wa o na mea a pau e ku ana ma ka aoao o ka moe o Graham opio, ua ike iho la lakou ua kokoke loa kona hopena.  U hoomaka maila kona hanu paupauaho ana a hiki i ka pau loa.  Ua lohe lakou i ka nunulu o kona puu, a o ka hou make hoi e puapuai ana ia ma kona lae.  Ua hookaawale koke ia aku kana wahine i kekahi rumi okoa aku, o kona ma uakane hoi ua haha koke iho la oia i ka pana me ka manao ana eia no ke ola nei, aka, ua loaa aku la ia e moe malie ona.  O Graham hoi, ua hala aku la kona uhane no kela ao nani mao.

            “I ko’u wa i haalele iho ia i kea honua,” wahi a Graham i hoike aku ai i kekahi hoaloha mahope iho.  “Ua puoho ae la au, a ike iho la eia au iloko o kekahi aina nani loa, he aina maemae, nona nei ka ea, lewa a me na mea he nani wale no a’u i ike ole ai mamua.  

            Me he mea la, e ku ana au ma kekahi alanui akea, me na laau loloa e ulu ana.  O ka nani o ko lakou mau lau aole e hiki ia’u ke hoohalike ae.  Ua ike aku au i kekahi mau alanui e ae e like me keia na nani.  He makani aheahe malie ke pa kolonahe ana e hooni ana i na lau laau me ka malie.  E hoopuni ana hoi i keia ululaau kekahi kula mauu uliuli.

            A i ko’u wa e kilohi ana a puni, ua hoohuiia ka hikilele me ka hauoli.  Ua hoola ia au mai ko’u mau ehaeha ae, a me he mea la no, aole au i halawai me a’u.  Ua lohe pu aku au i ka leo nahenahe o na mea kani e poha mai ana mai ka lewa mai he nani ia mau leo a ko’u mau pepeiao hoi e luhi ole ai ke hoolalike ae.   A oiai au e nanea ana i ka hoolohe ia mau leo nani, ua ike iho la au aole o wau wale no keia e ku nei.

            Ua ike aku la au i kuu makuakane e hele mai ana imua o’u, ua hele aku la au a halawai me ia, a hele like aku la maua me ke kamailio ana no keia aina nani hou me ka hauoli, aka, aole i hoomau loa aku kuu makuakane i ka hele pu ana me au, aka, ua emi aku la oia a hiki i kona nalowale ana mawaena o na laau.  O keia wale no ko’u ohana ua ike au i ke Akua.  Maanei i hooki iho ai oia i kana kamailio ana.

            Ua ike aku au i kekahi poe kanaka e ola ana, aole nae i loihi ko’u hauoli ana.  Me ke ano nawaliwali ua lohe aku la au i kekahi leo, kahea mahope o’u, i kinohi aole e hiki ia’u ke lohe pono, aka, ua moakaka loa nae mahope mai, a lohe iho la au o ka leo o ka’u wahine, aole no o’u manao e haalele i kela aina nani, aka, o kona leo kahea, i kono mai ia’u e haalele aku, a ike aku ia au i na laau e emi aku ana i hope a hiki i ka nalowale ana, a i ko’u wa i puoho hou ae ai e waiho ana no au maluna o ko’u wahi moe.”  Eia ka o Graham ke waiho nei iloko o ke kulana kupilikii, he manawa wale no nona e make ai.

 

--------------------

KE KAHUA HEIHEI O KEWALO

--------------------

            Ma ka la 23 o keia mahina e weheia ai ke kahua heihei kaa hehiwawae o Kewalo, ina nae aole he mau kuia.  Eia ke kahua heihei ke hanaia nei me ka puahi nui, no ka makemakeia hoi e pau na hemahema mamua o ka hiki ana mai o ia la.

            E hoea mai ana o Chas. S. Desky, ka luna nui o ke kahua heihei ma ka Poaha o keia pule ae maluna o ka Moana, me kekahi mau keiki haole heihei kaa hehiwawae holo loa o Amerika, no ke komo pu ana ma ha heihei o ia la e weheia ai o keia kakua heihei.

            E malama pu ia ana he mau heihei i ka po, me ka hoomalamalamaia o ke kahua heihei me na kukui uwila.  eia ke kukuluia nei he 23 mau pou kukui uwila a puni ke kahua heihei.

---------------------

 

            Aia no na uluaoa haunaele ma Barizila ke hoomauia la mawaena e na poe kipi a me na koa aupuni, a he heluna nui o na koa o na aoao a elua e make la.