Ke Aloha Aina, Volume IV, Number 4, 22 January 1898 — Page 1
| This text was transcribed by: | Cyndi Defenbaugh |
| This work is dedicated to: | Kaelene Ahu Rey |
KE ALOHA AINA
(in banner...) HOOKUMUIA I MEI 20, 1895
BUKE IV HONOLULU, POAONO, IANUARI 22, 1898. HELU 4
KA NUPEPA A KE ALOHA AINA
E hooopuka mau ia aku ana mai ka Poakahi a ka Poalima o na pule a pau o kela me keia mahina.
Ka Uku Pepa, he 20 keneta o ka pule. No ke kope hookahi, he 5 keneta.
E loaa no ka pepa mai ke Keena aku o KE ALOHA AINA, a mai ka lima aku o na Luna Lawe
Pepa.
E pai ia no na Olelo Hoolaha, na Kanikau me na Mele Inoa, me ke Dala kuike. Aole nupepa ma
ka owili pakahi e hoounaia ke ole e hookaa mua ia ka uku pepa.
E hoouna pololei mai i na Nuhou na Kumumanao, na Olelo Hoolaha, na Kanikau a me na Mele
Inoa i ka Lunahooponopono o keia Pepa.
Aole loa e hoopukaia a hoolahia kekahi manao ma na kolamu o keia Pepa, malalo o kekahi inoa
kapakapa ke ole e hoike mai i ka Lunahooponopono i kona inoa ponoi.
Ka Nupepa Puka Pule
KE – ALOHA - AINA
Mookahi Makahiki ...............$2.00
Keno Mahina......................... 1.00
Ekolu mahina........................ .50
Hookahi Mahina................... .20
EMMA A . NAWAHI
Puuku o
KE -ALOHA -AINA.
EDWARD L. LIKE
Lunahooponopono a Hope Puuku
S. P. KANOA,
Hope Lunahooponopono
O na kauoha Nupepa me na hookaa Dala, e hoouna pololei mai i ka Puuku ma Honolulu.
HOOMAU O LILIUOKALANI
I KA HAKAKA I KA
HOOHUIAINA.
AOLE KE MOIWHINE E IMI ANA I UKU
HOOMAU NONA.
Wasinetona, Dec. 27. He nupepa e hoikaika nei i ka hoohuiaina me ka nana ole i ka oiaio, ua hoopuka ae oia i kekahi i moolelo, ua haalele loa aku ka Moiwahine i kona manaolana ana no ka haule pio loa o ka ninau hoohuiaina, ma ke a’o a kona mau hoaloha, a ma keia hope aku e hoao ana oia e loaa ona haawina uku makahiki nona. O keia ae la he hoopunipuni loa. He wahine naauao ka Moiwahine a ua hoomaopopo aku no hoi kona mau hoaloha iaia, o ka kuikahi hoohui aina, pela pu no hoi me ka bila hoohui aina, e haule pio ana ia.
NUHOU KUWAHO.
Ma ke ku ana mai nei o ka moku ahi Moana ma ka auwina la o ka Poaono nei i loaa mai ai ia makou na nu hou makamaka hou loa o na aina e a no ka pomaikai o ko makou poe heluhelu, ke hoopuka aku nai makou me ka hakalia ole penei:
MAKEMAKE HE KANAKA OPULEPULE E
IKE I KA PERESIDENA.
Wasinetona, Ian. 5. He kanaka ano opulepule mai Nu Ioka mai nona ka inoa o Jacob Cements, ua hopuia oia i keia la ma ka Hale Keokeo, mahope o keona hooulu ana he mau hana hoohaunaele malaila no ekolu la o kona hoao ana e ike i ka Peresidena, aka, aole nae i hooko ia kona makemake. Ma ka la inehinei, ua kakau aku oia i ka Peresidena, a i keia la i hiki kino aku ai oia, ua hoopuka ae oia na ke Akua i hoouna mai iaia ilaila no ka ike ana i ka Peresidena, ua koho wale ia no nae he manao ino kona nona.
HE EHA TAUSANI I HOONELE IA I NA
HOME.
Port-au-Prince, Dec. 29. Eia ke kulanakauhale iloko o ka Pio-o no kekahi mau hora loihi. Ua hoomaka mai ka po nei mai, i ka wa a kekahi ahi i hoea ae ai a hooneoneo iho la, he hookahi hapakolu o ke kulanakauhale o Port-au-Prince. A i keia kakahiaka hoi, ua hopi loa ia ae ia i ka wa a kekahi olai i hoonaueue ai me ka iakika. O keia pauahi nui i ukali kokeia e ke olai, ua hooweliweli aku ia i ka lahuikanaka holookoa e noho ana maloko o ke kulanakauhale no lakou ka huina o 20,000 mamua o ka wa a na mokukaua Geremania e hopu pio ai i ke kaikuono a hoopololei mai la hoi i ka waha o ka lakou mau pukuniahi i ke kulanakauhale i makaukau hoi no ke kipoka ana mai. He nui na hale i hoolilo ia i mau puu lehu, a ua kohoia ma kahi o 800 hale i pau i ke ahi me 4,000 poe i hoonele ia i na home, a o ke poho ma kahi no ia o $1,500,000.
Ma ka hora 11 o ka po nei i hoomaka ai ke ahi e a, aka, aole nae i ike kokeia a hiki i ka wa i nui loa ai, ua hoea na kaa kinai ahi no ka hoopio ana i ke ahi, oiai, kekahi wahi oaniani makani e pa ana, ua lawe ia aku la na huna ahi ma o a maanei o ke kulanakauhale, a pela i nui loa aku ai na poino, mahope o hookahi hora o ka pauma ana o na kaa kinaiahi i ka wai o na luawai no ka hoopio ana i ke ahi, ua pau loa iho la ka wai a hookuu ia aku la hoi ke ahi e hana e like me kona makemake.
He mau tausani o na kaue, wahine a me na opio e kuku nei ma na alanui iloko o ko lakou mau aahu moe po, a o ko lakou mau aahu maoli, ua pau aku ia i ka hamu ia e ke ahi, he lehulehu wale o keia poe i hoonele ia he mau malihini.
I ka hora 7 o keia kakahiaka ua hooi ia ae ka pihoihoi o na mea a pau i ka wa o kekahi olai ikaika i hoonaueue ae ai i ke kulanakauhale a hoomau mai la i ka hoonaueue ana i kela a me keia ekolu minute. He nui na wahi o ka aina i hoonakaka ia, aka, aole nae he hale i hoohioloia.
LIULIU O IAPANA NO KE KAUA.
Ladana, Dec. 29. He lono kai hoea mai nei mai Sanahai mai, no ka Poalua nei, e olelo ana,ua hoie ia ae, aia he puulu nui o na mokukaua o Iapana e hoolulu la ma kahi kokoke i ka mokupuni o Goto, mawaho aku o Nakasaki, i lako pono me na mea kaua, ke kali la hoi no ka hoea aku o na kauoha. Iloko o keia mau aumokukaua na mokukaua hao o Iapana i kapili ia mai nei ma Enelanai, no laua na inoa o Yashima a me Fuji, a me Chen Yuen, ka mokukaua o Kina i lawe pio ia ai e Iapana. Ua hoomaopopoia, o keia mau mokukaua o Iapana, eia lakou ke kokua nei i na aumokukaua Beritania e alakai ia nei e Hope Adimarala Sir Alexander Buller, e kiai nei ma na kapakai o Kina.
E kue ana o Iapana i kalawe ana ae la o Rusia ia Port Arthur. O ke kumu o keia hana a Iapana, mamuli no ia o kona makemake e ulele hakaka.
Ke manao wale ia nei no hoi e hoao ana o Iapana e kue i ka hooeleia ana o na lako kaua a me na pualikoa no ka hoomauahua ana i ka ikaika o Rusia no ke kiai ana i ke alahao e kukuluia nei ma Manchuria.
Ladana, Dec. 28. Ua hoopuka ae ka nupepa Globe, i keia auwina la, e olelo ana, ua hoea mai nei he lono telegarapa malu i Ladana nei ma ke ahiahi o nehinei, ua hoea aku la he iwakalua mokukaua o Beritania ma Port Hamilton. He lono e ae no hoi kekahi e olelo ana, ua hoikeia ae ma Cho Foo, ua hoea pu aku la me na aumokukaua ma Port Hamilton.
O Port Hamilton, he wahi mokupuni uuku ia ma ka hema aku o Korea, aole hoi i mamao loa mailaila mai ka mokupuni o Quelport mai.
LUKUIA NA PUALIKOA O SEKEGALS.
Parisa, Ian. 5 Ua loaa mai nei he leta mai kekahi aliikoa mai o ka pualikoa Marchanad, ua luku a e na kanaka o ka muliwai. Ubanghi, he iwakalu kanaka me hookahi aliikoa o loko oia puali i make, ua hoopai ia aku na kanaka e kekahi mokukaua Farani.
MAKE O DURRANT MA KA AMANA LI
KANAKA.
Kapalakiko, Ian. 7. I keia kakahiaka ili ia ai o T. H. Durrant, ke kanaka opio puuwai eleele, nana i lawe i ke ola o kekahi mau kaikamahine maloko o ka halepule Emanuela, iloko o aperila, 1895, ka pepehikanaka kaulana hoi nana i kaahele na aha hookolokolo a pau o Amerika Huipuia, mai Kapalakiko aku a hiki i Wasinetona, ma ka imi pauaho ole ana o kona loio i kona wahi i pakele ai. Aole oia i hoike ae i kona hewa a hiki i kona make ana aku la.
KUE KA HUI HOOMAEMAE O
MASEKUSETA I KA
HOOHUI AINA.
[Mai ka Nupepa S. F. Call mai.]
Bosetona, Dec. 18. Ma ka halawai ana a me ka paina i malama ia e Hui Hoomaemae o Masekuseta ia ka po nei, ma ka Hotele Young, o ke kumuhana i laweia mai oia no ka noonoo ana i ka “Hoohuiaina o Hawaii.” O na haiolelo oia no Konela Horace, M. Fisher, Dr. A. C. Coolidge o ke kulanui o Havard, Rev. Geo. L. Cahney, Kapena Julius Palmer a me Hon. Moorfield Story, (ka peresidena o ka ahahui). O ka olelo hooholo malalo iho i hoomakaukau ia e Moorfield Story ma kela hui ana aku nei, a i waiho ia aku iloko o ke komite hooko, no ka heluhelu ana, ua kokua ia e ka hapanui o na lala, a ua heluhelu ia penei:
E hooholoia, o ka manao o ka hoohui ana i na mokupuni o Hawaii he naauao ole a me kupono ole, he hana kupono ole, no k amea, he hoonele ana aku ia i kekahi lahuikanaka nawaliwali i ko lakou kuokoa me ko lakou ae ole ana, a he hahai ana i ka manao oia aupuni i makemake ai; he naauao ole, no ka mea, he lawe ana mai ia i keia lahui i kekahi lahuikanaka i makemake ole mai e noho ana ma kekahi wahi mamao mai ko kakou mau kapakai aku, aole no hoi e hiki ia kakou ke hoomalu aku ma ke ano he apana, a aole no hoi lakou i ae ia e hoomalu no lakou iho i ko lakou wa e lilo ai i mokuaina.
NAWALIWALI KE KULANA O
NA HOOHUIAINA.
(Mai ka S. F. Call mai.)
Wasinetona, Dec. 22. O Senate Davis o Minesota, ka lunahoomalu o ke Komite o na aina E he kakoo ikaika i ka hoohuiaina, ua hoike ia ae i keia po, ua olelo ae oia o keia wale no ka wa pono i hiki ke loaa he elua hapakolu e kokua ana i ke kuikahi. Ua manaoia he hoike oiaio ana mai meia ona i ka nawaliwali o kona kulana. Ua maopopo no iaia, aole he wahi lihi iki e hooholoia ai o ke kuikahi, a ua hoopoho io ia hoi kona manaolana no kela kumu e lawe ia mai ana ka oila, e hooholoia ana e ka hapanui o na poe koho.
AOHE KAMAILIO NUI IA O KA
HOOHUI AINA.
(Mai ka S. F. Call mai.)
Astoria, Dec. 18. Ma ka po nei i hoea mai ai ka mokupea Beritania Ethelbert he iwakaluakumamakahi la holo mai Honolulu mai. Ua olelo ae kona kapena he maikai ka hapa mua o na la o kana huakai i holo mai ai a mahope mai, ua halawai oia me kekahi kikiao makani ikaika, e holo aku ana oia no Aferika Hema no ka hooili huita a me palaoa. Wahi hou ana maloko oia mau mokupuni, aohe kamailio nui ia o ka hoohui aina, ka mea hoi a na kanaka Hawaii i kue nui loa ai.