Ke Aloha Aina, Volume IV, Number 4, 22 January 1898 — Page 7

KE ALOHA AINA

 

KE ALOHA AINA, POAONO, IANUARI 22, 1898       7

 

HE MOOLELO WALOHIA

- : NO : -

ALANADELA

Ka Wahine Hoopahaohao o ka  Aahu KeoKeo

- A I OLE: -

Ka Loea Hookani Pila @   ke

Kulu Aumoe.

  A pau ae lo ka hoohiki pau pele, pau mano ana o ua poi puuwai eleele nei, ia wa noi lohe ia aku ai ka leo o Violeta i ka pine hao ana aku i kana mau kauwa, penei:

  E lawe kike anu i ka mai opio mai keia wahi aku ano a o ka'u kanoha hope loa ia oukou i keia po e nalowale loa ai kona helehelena mailuna aku o keia ilihonua aku no ka wa pau ole, aka, i lohe hou nae au ma keia nona aku ua lohe hou ia kekahi mea e pili ana nona, ke hoike aku nei au imua o oukou me ka pololei loa, e anai aku no au ia oukou a pau mai keia ilihonua aku.

  Ae, ae, e ko makou haku, o ko makou ala no ka uku panai, i na e ike hou ia ana kona helehelena ma ke kulanakauhale nei o Sekotia ma keia mua aku, aka, ma ko makou manaoia no nae, o kou e hopena keia e ike ia ai o kona helehelena ma ka lepo aloha nei o Sekotia, a e nalowale loa aku ana oia elike me kakahi mea i make ka ike hou ole ia o kona helehelena, wahi a kekahi o na kauwa a ua Violeta nei i pane mai ai.

  I ke kuu ana iho o ka leo o ke kauwa, oia no ka wa a ua Violeta nei i nee mai ai imua a haawi ae la i na lulu lima pumehana ana i kana mau kauwa me ka haliu pu ana aku hoi o kana mau onohi maka no kahi a ka moi opio e waiho ana.

  A liuliu keia kilohi ana oia kona wa i mai aku ai i na huaolelo awaawa no ka wa hope loa maluna o ka moi opio, nana hoi i hookomo anu i ka menemene iloko o kekahi o na kauwa a ua Violeta nei.

  E kahi keiki a ka lahui Sekotia i kapa aku ai ia oe he moi opio no lakou, ano i keia hora, e pau ana kou ike ana i ka nani o Sekotia nei, e waiho aku ana au i kou ola na kuu poe kauwa hoolohe e hooko aku i ka lakou mea i manao ai he pono maluna ou, i na he manao ko lakou e pepehi ia oe a make, a hanai aku i kou mau io i na manu o ka lewa a me na holoholona o ke kula, ua hiki no aia ia iloko o ko lakou manao, a ma ke kakahiaka, o ka la apopo, e lilo ana kuu kane ka moi o Sekotia, a e noho ana hoi maua iluna o hauoli no ka hopena o na la o ko maua ola ana.

  I ka pau ana ae o kana kamailio ana ua ike aku la oia i na waimaka o ka moi opio e hiolo maka walu mai ana, me he lea la, aa he mea nui iloko o kona puuwai ke hana ma o ole la, noloiia, lilau iho la na lima o na wahine puuwai eleele nei i ka popo welu e pua ana ma ka waha o Walata, a wele ae la, a oia no ka wai puai ae ai o ka leo o ua moi opio nei i ka pane ana ae.

  Ke auamo nei au i ehaeha o kou mau hoomaewaewa ia'u me ko'u hoopilikia mua ole aku ia oe, aka, aia no he wa e hoea mai ana, e panai aku no au i ke ino no ka ino, a uwe kapalili ae la ua Walata nei me ka uwalo ana aku i na kauwa e hookuu ae iaia.

  I keia wa no me na kui e aaki paa ana, lele mai la ua wahine lokoino nei, a haawi ae la he mau puupuu mahanahana ma ke poo o ua Walata nei, a oiai, ua paa kona mau lima i ke kupee ia, ua hiki ole ae iaia ke pale aku i na puupuu wela a ka enemi a i ka hope loa, ua loheia aku la ka leo o ua Violeta nei i ka hooho ana ae me ka piha inaina.

  E hookaawale koke aku wahi ilio kawau hookano nui wale mai keia wahi aku ano, e wili a mai hoohakalia hou iho, no ka a ea, ua piha au i ka inaina nona, a ia wa koke no i haawi aku ai i na kaha hoomaewaewa hope loa maluna o ka moi opio, a hoi hou aku la no kahi a ka waapa e lana ana, a nalowale aku la iloko o ka pouli nui.

  I ka hala ana aku o ka wahine nona ka puuwai i noho ole ia e kekahi uhane aloha iloko ona, ua kuka koke iho la ua poe kanaka nei ekolu no lakou na helehelena i huna ia e kekahi mau hainaka eleele i ka lakou hana pono e hana aku ai maluna o ke kino hala ole i ka moi opio.

  No kekahi mau minute loihi ko lakou kukakuka ana, aia hoi, ua hooholo iho la he elua e pepehi a make i ka moi opio, aka, o ke kolu nae, ua hoole aku la oia i keia manao o kona mau hoa, a o kona makemake oia no ka lawe ana aku i ka moi opio a hookuu aku iaia iluna o kekahi mau mokupuni liilii kanaka ole ma ka aoao akau o Sekotia e hoopaa ai a hiki ikona wa e make ai.

  A mahope o ko lakou hoapaapaa ana, ua lohe aku la lakou i ka owe mai o ka wai o ka lokowai a me na leo hoi he lehulehu e hau walaau ana.

  He puulu kanaka ae keia e holo mai nei maluna o na waapa, a ke ole au e koho hewa o na koa ae keia o ka moi opio e huli mai ana i ko lakou haku, wahi a kekahi o lakou i hooho ae ai.

  Pela paha, aka, malia o ko kakou haku no paha keia e huli hou mai ana no ia kakou, i mea no kakou e ike maopopo ai, oia no keia, e haawi aku i ka hoailona ma ka ulili, wahi hou a kekahi i pane mai ai.

  A i ka holo ana o keia mau manao mawaena o lakou, oia no ka wa i poha koke aku ai o ka leo ka alili o ka ulili no ekolu manawa e hoopaiakuli ana hoi ia loko o na uluia au kanaka ole nei, aka, aole nae he leo ulili a panai mai ai no keia leo ulili.

  Kaahope ae la he mau minute o keia kali ana a lakou ao e he loaa mai o kekahi pane, oia no ka wa i ulu mai ai o na manao hopohopo iloko o lakou aole keia o ko lakou haku, nolaila, me ka hoohakalia hou ole iho, kau koke ae la lakou maluna o ko lakou mau lio, a o ke kanaka i makemake ole e laweia ke alo o ka moi opio, oia kai hopu iho i ua Walata la, a hapai ae la iaia me ka hoonoho ana iho i na mamua o kona ala.

  I keia mau minute no i ike aku ai lakou oe elima mau waapa e hookomo mai ana no kahi kuono a lakou e nei maluna o na lio, ia wa no i pona mai ai o kekahi leo mailuna mai o ka waapa, no ka mea, ua ahuwale mai la lakou i ka wa a ka mahina e kuupau iho ai i kona malamalama nui.

  E ku malie iho e kela poe hololio ekolu, no ka mea, he nui ka makou i make ai ia oukou a mai kue i keia kauoha o make auanei oukou mai waka aku o ka makou mau pu kau poohiwi.

  E waiho i ko oukou mau manao ana e hana pela, oiai, he makemake ko anei ko oukou e lawe i ke ola o ko oukou moi opio, wahi a kekahi o na hololio i hooho ae ai.

  Iloko no o keia wa i hoohuli ae ai o ua poe kanaka nei i ka ihu o ko lakou mau lio no na kuahiwi o Sekotia, a elike me ka olapa ana a ka uwila, pela ka hikiwawe o ka nalowale ana aku o ua poe hololio nei ekolu me ka lakou ukana makamae e hai la no ka hopena maopopo ole, a o na kapuai wawae o na lio e pohapoha ana, oia wale no ka mea nana i hoike aku, aole lakou he mau uhane lapu o ka po, aka, he mau kino kanaka maoli no lakou.

  Me ka hoohakalia ole iho, loheia aku la ka leo paapaaina, o na pu raifela e kani alapine ana, e hoolele ana hoi i na poka wela he lehulehu wale i hihio hele ana ma o a maanei aka, aole nae he hookahi o lakou i hoopoino aku i na hololio e a hai la ka pupuhi.

 

HALA IA KAMAAINA O KAUAI.

I kuu Nupepa KE ALOHA AINA.

Aloha kaua:

  Ua make o G. B. Meheula ma ke ahiahi Poaha iho nei, la 6 hora 6:30 1898.  Ua hanau ia oia ma Puumai, Hilo, Hawaii, i ka la 17 o Nov. 1837, na Kumukaa (k) a me Kawaa (w).  Ua hoonaauao ia oia ma ke Kula Hanai o Hilo, ua loaa iaia kekahi ike i hilinai ia, ua haalele aku oia i ka aina hanau mawaena o na makahiki 1840 am ne 1850, he elua manawa o kona hiki ana mai i Kauai nei, ma ke kauoha a Kanoa, he Kiaaina o ka mokupuni holookoa o Kauai nei.

  Ua loaa koke mai iaia ka oihana Luna Auhau, a malaila, i hookahua ai kona noonoo e huli i na waiwai a me kona hookahu ana i ka pono o ke Akua, a malaila oia i hookahua ai kana hana i ka pono o ka Haku.  He kanaka hooikaika pauaho ole i na pono uhane, he alakai makaukau ma kona lilo ana i Kahukula Sabati nui no Kauai.

  Ua nui ko makou aloha nona, oia hookahi paha ke kanaka o Kauai, ma ka papa ekahi o ka lokomaikai, e ike ana oia i ka poe kiekie a ka haahaa.  E hamama mau ana ka ipuka o kona home i na la a pau, no ka hookipa ana mai i ka malihini a ma ka poe e ike ana iaia, he umi a oi a laua mau keiki me Mrs. P. Meheula, a ua pau i ka hoi ma kela aoao, a koe hookahi keiki, W. Meheula, oia ke kokua ekahi o ke kumu nui o kula olelo Beritania o ka hale kula o Waihee, Maui, eia no oia me makou na makua e noho nei a ua ike iki no oia i kekahi mau hora, a haalele mai la oia ia makou na kaiku ana, na keiki, na moopuna a me na hoaloha pilipaa o ka pono o ka Haku a me na hoahanau i hui ia o ka Ekalesia Huiia o Koolau.  Anehola a hiki i Kilauea, a pela no na Kahu Eka eeia, na Elele o ka Ahahui, mokupuni o Kauai, a pela i na hoaloha a pau  o ka Ahahui nui o ka Paeaina ma Honolulu, iloko o Iune, 1898, o lakou a pau, ua kamaaina lakou iaia, ma ka hai ana i ka inoa o ka Haku Iesu Karisto.

  Ua olelo mai kana olelo; "Pomaikai ka poe make, ke u ake lakou iloko o ka Haku," ma ke ahiahi Poalima, la 7, hora 3:30, ua manele ia aku kona kino kupapau ma ka Halepule o Anahola.

J. K. MOHAU.

 

  Ua hoopaiia o David Kauhaa he $100 no ka malama banako ohe-fa, ma ke kakahiaka Poakolu nei.

 

KA HOIKE KULA SABATI.

  Ma ka la 2 o keia mahina iho nei he hoike hui ko ke Kula Sabati o ka Ekalesia Hoolepope o ke Aloha Aina o ka apana nona ka makani kaulana he Apaapaa.  He la keia i hoike mai ai na lani kona aloha a me kona lokomaikai, no ka mea, ma na la mamua ino, nui na ao hoopoluluhi me na pakaua pu, oiai, na la o ka makahiki e pau ana, a hoea mai la i ka makahiki hou, a i keia la akahi no a ike lea ia aku na lani e wehe akea ae ana i na kukuna olino malaelae maluna o na puu kaulana o na aina haaheo nei, (Pili nae Kalahikiola).

  Maikai na hana o ka la i hana ia i waena o na papa Kula Sabati i noho hoomalu ia e ke Kahu Kula Sabati Sam Kanehailua, kekahi o na keiki lalawai o ua aina nei.

  Nolaila, ua hoomaka ia na hana me ka pule a me ka himeni.  A na ke kula Sabati o na pali ku-i eiwa i ka hanohano o ka la, i noho alaka ia e ke keiki o ka moku kaulana Makaukiu o na pali hulaaoa o Pololu, mahoe iho o keia, ke Kula Sabati o ke kahua pahee o ka Na-i Aupuni, ohi hapaku ka wahie o Kapaau, i noho alakai ia e Mrs. Elena Naipo.  O ke kolu o ke Kula Sabati, mai ka waikau mai o Pahoa, Honomaka'u, i noho alakai ia e Jno. Manaole o ka ua Ukiu o Makawao.  O ka ha o ke Kula Sabati mai na keiki mai o ke kula waiole o Nailima, i alakai ia no e Jno. Manaole, o ka lima o na Kula Sabati mai ke kileo a ai o na keiki kane a me na kaikamahine o Puehuehu i ka ili o ke Kama, i alakai ia no e Mrs. Elena Naipo ke kaikamahine nona ka puuwai akea i hooholo pono i ka hapai ana i na hana ku i ka pono.

  Nailola, mai keia mau Kula Sabati mai a pau, ua lawe ia mai na loea ike Baibala a me na oea ike mele i ka nana ana a maka a ne ka loha ana o na pepeiao, he ku maoli no i ka hauoli na hana i hana a, a ke mai nei na hana pono iloko o ka ekalesia kuokoa o ke aloha aina o ka poe Aloha Aina o Kohala nei, a i ka puu ana o na Papa Kula Sabati he mau manao paipai mahope iho, mai a Mr. J. Palea, H. K. K. Ne a me Mr. Kioowea, a i ka makua J. M. Kealoha ka hookuu ana o na hana o ka la, me ke ohohia nui ia, hoopuu na hano me ka pula a me ka himeni.

  Komite hoopuka,

                          MRS. E. M. KAIMANA.

  Hononaka'u , Ian. 10, 1898.

 

HE KOKUA ALOHA.

  Ma ke ku ana mai nei a ka Mauna Loa, ua loaa pono mai ma ka lima o ka Peresidena Kuaihelani Campbell, ka Peresidena o ka Hui Aloha Aina o na wahine he $10.50, ma a G. F. Kelii mai o Kainaliu, Kona Waena, ka Hope Peresidena o ka Hui Aloha Aina o Keauhou, he kokua aloha i lulu ia e ko laila poe aloha aina no ka waihona o na Elele aka Lahui Mahalo nui, owai hou ae.

 

OLELO HOOLAHA.

  Owai o Kekaula Keokio Omokaa, Kona @m, Hawaii, ka mea i hookohu puni a mai e Ielemia Kiekie i kahu malama @  ana no Omokaa @  olelo ia maluna.  Nolaila, ke kue oa nei au i ka hoolaha liliu a Kaku hao i hoike ae nei ma ka Helu 1 o ka nupepa KE ALOHA AINA, 1898, nona ka ka kina Omokaa.  He lalau wale no ia i kaki e no na makahiki 42, aole i ka aina nei.

  Ko'u oiaio.

                                    MRS. KEKAULA KEOKI,

  Omokaa, S. Kona, Hawaii, Jan. 17, 1898.                                       jan. 17.      tf.

 

Nuhou Kuloko

Inka nei o ka aina na keik

aukai o ka mokukaua Beninetona

kahi i puikau hoomaamaa ai.

  Ua lohe ia mai ua kaawe ae kekahi Iapana i kona ola ma Sprecksville ma ke kakahiaka o ka Poaono nei.

  He nui na hui e hoomakaukau mai nei no ka holo ana i Alaska kahi o ke gula e hu Ia ma keia kau kupulau ae nei.

  Ma kela Poakahi aku nei, Ian. 10 i laweia mai ai ka noonoo ana no ka hopena o ke kuikahi hoohui aina malalo o ke Senate.

  O ke kumo o ka Moana i ulolohi oa o ke ku ana mai, mamuli no ia o ke kali ana i na eke leta o ka Hikina mai.

  He lono kai loaa mai nei ia makou, ua haalele mai i keia oia ana ka wahine a ko makou hoaloha Charles Molteno.

  Ua haawi ae kekahi lio o ka hui kaa 290 i kekahi peku mahanahana a hiki i ka weluwelu liilii ana o ke kaa, ma ke ahiahi la Sabati nei.

  He elua Pake i hopu ia no ke kue i na kanawai o ka la Sabati, a me ekolu poe no ka ona rama, na lawehala i hului pau ia ae no ka Halewai.

  Ma ka Poaono nei, i hoihoi ia aku ai o Pua, no ka Halemai Pupule o Kalaepohaku, mahope o ka nanaia ana e Kauka Emekona.

  Ua hoea mai ka mokukaua Amerika Concord i Honolulu nei, ma kona alahele e holo ana no na kapakai o Kina, i ke awakea Poakahi.

  He kuai hoemi nui o na papale ma kahi o N, S. Sachs i keia pule wale no, nolaila, mai hoohakalia i ke kipa ana ae malaila o nene auanei.

  Maluna mai nei o ka mokuahi Coutic i hoea mai i keia awa he 8 ohua kapena, 31 poe no ka hui keaka, 31 Pake a me 2 Iapana, ua awe pu mai no hoi oia he 700 tona ukana no keia awa.

  He paka elemakule e noho hana nei ma Kawa, ua noi mai nei oia i ka Aha Hooko e hookuu ia oia mai ka halepaahao mai, a e haalele no oia i keia aupuni.

  Ma Kakaako ae nei, ma ke ahiahi o ka Poakolu nei, ua haawi ae o Hokai (w) me kana kane, he paina luau ko ka hoomanao ana i ka piha elua makahiki o ka laua milimili.

  Ma ka po o ka la Sabati nei, ua laweia ae ke kanaka e hoomaemae pa nei maloko o ke kula o Kawaiahao i ka luakini o Kaukeano Hou me kekahi ipu kukui helepo.

  Ma ka po o ka Poaono nei, i haawi ia ai ka ahamele nui a ka Hui Himeni Kawaihau maloko o ka luakini o Kaumakapili, ua nui na poe makaikai i akoakoa ae malaila, no ka hoolohe ana i na puukani oia po, a na hoohauoliia na poe a pau i hiki ae malaila.