Ke Aloha Aina, Volume IV, Number 19, 7 May 1898 — Page 1
| This text was transcribed by: | Jean Howard |
| This work is dedicated to: | Awaiaulu |
KE ALOHA AINA
BUKE IV HONOLULU, POAONO, MEI 7, 1898 HELU 19
KA NUPEPA KEALOHA AINA
--------
E hoopuka mau ia aku ana mai ka Poakahi a ka Polima o na pule a pau o kela a me keia mahina.
Ka Uku Pepa, he 20 keneta o ka pule. No ke kope hookahi, he 5 keneta.
E loaa no ka pepa maike Keena aku o KE ALOHA AINA, a mai ka lima aku o na Luna Lawe Pepa.
E pai ia no na Olelo Hoolaha, na Kanikau a me na Mele Inoa, me ke Dala kuike. Aole nupepa ma ka owili pakahi e hoouna ia ke ole e hookaa mua ia ka uku pepa.
E hoouna pololei mai i na Nuhou na Kumumanao, na Olelo Hoolaha, na Kanikau a me na Mele Inoa i ka Lunahooponopono o keia Pepa.
Aole loa e hoopuka ia a hoolaha ia kekahi manao ma na kolamu o keia Pepa, malalo o kekahi inoa kapakapa ke ole e hooike mai i ka Lunahooponopono i kona inoa ponoi.
Ka Nupepa Puka Pule
Ke - Aloha - Aina
Hookahi makahiki $ 2.00
Eono mahina 1.00
Ekolu mahina .50
Hookahi mahina .20
EMMA A NAWAHI
Puukuo
Ke - Aloha - Aina
Lunahooponopono a Hope Puuku
S. P. KANOA
Hope Lunahooponopono
O na kauoha Nupepa me na hookaa Dala, e hoona pololei mai i ka Puuku ma Honolulu
===================
Nuhou Kuwaho
-------
HOPUI HE HALEPULE MA CUBA
Havana, Apr, 18. O na Iono hope loa mai ka Alfonso Doce mai, ua pahu ae la kekahi kiana pauda maloko o ka halepule San Francisco de Paula ma ka hora 8 o ka po nei. Ma ka puka mawaena o ka luakini i loohia ai o keia ulia poino. O na poe i make o Jose Larino, Juan Growes a me Ramon Fondora, he keiki opio, a o Pedro Dago, he makai a me Luis Perez, he keiki opio, ua loaa ia la@a na palapu kukonakonu loa.
O na poe e noho kokoke ana malaila, ua holo aku lakou no ka luakini, a ua hooweliweli loa ia hoi lakou i ka wa o na kino make i laweia mai ai no waho. O na puka komo o ka luakini, ua pau aku ia i ka weluwelu, a ua pau pu i ka nanaha he mau kii pohaku.
MAKAUKAU NO KA HOOHANA ANA
St. Vincent, Cape Verde Island, Apr. 18. Ina e kukalaia ae ana ke kaua, o na aumokukaua e huipu ana o na Sepania, oia na mokukaua Cristobal Colon, Infanta Maria Teresa, na aumoku topido Terror Pluton, Rayor, Ariete a me Azor, e ku nei ma ke awa e haalele iho ana lakou me ka hakalia ole ia nei no Cuba. O na aliimoku a me na luina, ua hoohala ia e lakou he manawa uuku loa no ka hiamoe ana, @o ka mea, aole he maopopo ia lakou o ka manawa o ka hana e kaheaia mai ai. Aole he poe ae ia, no ka lele ana iuka o ka aina, oiai, ua manaoia he manawa wale no e kauohaia mai ai lakou no ka haalele ana iho ia nei.
O na mokukaua Sepania Vizcaya a me Oquendo, i haalele aku la ia Porto Rico, ua manaoia e hoea mai ana laua i anei ma ka Poakolu ae nei.
O na aumoku e ku nei maanei ua makaukau loa lakou ia keia wa no ka hakaka ana, a i hakalia wale no i ke kauoha. Ua hoea mai nei ka mokuahi halihali nanahu San Francisco me ka piha nanahu no na aumokukaua.
O NA KOA MARINA KE HEHI MUA I KA LEPO O CUBA
Nu Ioka, Apr. 18. He lono kai hoea mai nei i ka nupepa Herald mai Wasinetona mai, e olelo ana. O na pualikoa Marina o Amerika Huipuia, oia ke hoao ia ana e hoolele mua iluna o ka lepo o Cuba. O na moku Venezuela, Panther a me Badger, e hoolilo ia aku ana lakou i mau moku halihali koa. O Konela Heywood, ua hai ae la oia i kona manao no ka halihali ana aku i kekahi bataliona koa maluna o ka Panther no ka huipu ana aku me na aumokukaua holomama, a o ka lua o ka batakiona maluna o ka Badger. I ka wa e loaa ai o ke kauohaia Kapena Sampson e lele kaua aku ia Havana, oia no ka wa e ukali aku ai o keia mau moku i na aumokukaua holoma ma, a ma kahi kupono i ikeia e hoolelei aku ai lakou. O ka nui o na kanaka o ka bataliona he 415 a me 15 aliikoa.
PENAIA NA AUMOKUKAUA AMERIKA ME KE PENA KAUA.
Honokaona, Apr. 19. O na mokukaua o Amerika Huipuia eia ke pena ia nei ko lakou mau kino a me na puka uwahi me kekahi waihooluu hauliuli, he mau liuliu ana hoi keia no ke kaua. Ua manao ia he pena keia i hiki ke huna i na mokukaua mai ka enemi mai. Ua hoea mai la ka mokukaua lawe kauoha Hugh McCullough, mai Amerika Huipuia mai.
HOOLE O KINA I KE KUAI ANA I KONA
MAU MOKI KAUA IA AMERIKA
Ladana, Apr. 15. O ka mea kakau o ka nupepa Times e noho ana ma Sanhai, ua olelo ae oia: Ua hoole o Kina i ke kuai ana i kona mau kokukaua ekolu e kapili ia nei ma Geremania. Ua olelo aku na agena o Amerika e paniia aku no i eha mau mokukaua no kela mau mokukaua 3 i kuai ia, aka, ua hoole ia aku no nae ia.
E LOAA AKU ANA O HAVANA HE LUAHI NA KA INAINA O SEPANIA
Hayana Apr. 19. Ua olelo ae o Senor Ramon Calban, he kanaka kalepa waiwai nui i kekahi mea kakau nupepa: O ko’u makemake loa e kaua i ka la apopo a e molia no au i ko’u ola no ka ike ana aku e lanakila ana makou maluna o na Ianaki (Amerika)
Ua olelo ae kekahi poe Sepania aole lo@ e loaa ia lakou ke kulanakauhahale o Havana, aka, ina e lanakila ana lakou e loaa aku ana ke kulanakauhale ia lakou he puu lehu.
O kekahi poe o lakou ua olelo ae e puhi ana lakou i ko lakou mau hale ponoi mamua o ka ike ana aku e lawe pio ia ana e na Amerika.
UA MANAO WALEIA NA IAPANA E HOOLAKO NEI I NA MEA KAUA
Madarida, Apr. 17. He leta kai loaa mai nei mai na mokupuni mai o Pilipine, e olelo ana, o na pualikoa Sepania a pau i hoolele ia mai nei, ua nee koke aku lakou no loko o ka aina mamuli o ka lohe ia ana mai, ua kokoke loa e puka ae ka haunaele mai na poe kipi mai. He 2,000 koa iluna o ke kahua kaua i keia manawa, a ke hakaka la hoi lakou me na enemi. Ua pau i ka luku ia he lehulehu wale o na kahuna-pule. Aohe maopopo i na poe ma Pilipine kahi i hoea mai ai o na lako kaua a na poe kipi, aka, ua manao wale ia no nae mai Iapana mai no ia.
KUE KA LAHUI FARANI IA AMERIKA HUIPUIA
Parisa, Apr. 17. O ka manao o na nupepa a me na kanaka maanei he kue loa lakou ia Amerika Huipuia, o ka oi loa nae mahope iho nei o ka hoopuka ia ana ae nei o ka Palapala a Peresidena Maikinile. Ua hoohalike ia o Peresidena Makinile me Pilato, a o ka ahaolelo o Amerika Huipuia ua like me kekahi powa a ua manao ia, aole wale no ia Sepania oia e hana aku ai pela, aka, i kekahi mau lahui e ae.
Eia ke aupuni o Farani ke liuliu mai nei i kona mau mokukaua a ke pahonohono mai nei me ka hoolako ana ia lakou me na lako kaua.
------------------
UA HULI HOI AKU LA KA MOKUKAUA MOHIKANA
-----------
He nui ka pioo iwaena o na luna aupuni o Amerika i keia mau la i ka wa i maopopo Ioa mai nei e huai pau ae ana ia aupuni me ke aupuni o Sepania i na ai a ka ui ma keia mua koke iho.
Ua haalele iho ka mokukaua Mohikana i ka mo-ku ana i ke awa ma@ka hora 6:30 o keia kakahiaka Poalima, aia kona ihu ke palau la i na ale hanupanupa o ka moana, ma kona alahele huli hoi ana aku no ka home, ma Kapalakiko.
Aole he maopopo o keia hoi awiwiana aku la ona, oiai, aole pau kona manawa i hoouna ia mai ai no ke a’o ana i na keiki opio i ke kula kaua moana, aka, ua kauoha ia mai nae oia e hoi koke aku me ka hakalia ole.
Maluna o ka mokuahi Kulana kauhale o Pekina e hoi aku ai ka Adimarala Mila, a haalele iho hoi i kona noho e kiai i na pono o Amerika Huipuia maanei.
Akahi no a ikeia ka manao hakaka maoli mawaena o na aupuni a elua i keia wa, e haalele pupuahulu nei o na luna aupuni o Amerika i ko lakou mau kahua i hoonoho ia mai ai no ka hana, a hoi aku la no Amerika.
O ka Beninetona wale ana no ka mokukaua e kiai ana i keia mau mokupuni, malia o kauoha hou ia mai no e kona aupuni e hoi aku, aka, ke hauwawa wale mai nei no naie ina e poha io mai ana ke kaua. E hoea mai ana he mau mokukaua o Beritania a me Iapana i anei, no ke kiai ana i ke ola o ko laua mau kupa.
=====================
KA HALEKUAI O NA MEA AI
-0-
LEWIS & Co.
E loaa no na Kamano Paakai Momona ma ke kuai liilii a me ke kuai Pahu. Na Palena o na ano a pau a me na Lako mea-ai o keia a me keia ano. E hele mai e hoao no oukou iho. Telepona 210.
Alanui Papu, Helu 111
----------------
KA HALEKUAI O NA MEA AI
-0-
HENRY MAY & Co.
E loaa no malaila ka Ti, ke Kope i hoomoa ia a me na lako mea ai a pau. E hoolawa ia no na ohana, @ mahiko a me na moku me na lako ai o Europa a me Amerika e hoea mau mai nei maluna o na mokuahi.
Alanui Papu, Helu 515.
--------------------------------
KA HALEKUAI O NA MEA AI
-0-
H E McIntyre & Bro
Ua makaukau maua e hoolako aku i na ano mea ai a pau a ka poe e kipa mai ana ma ke kumukuai huahaa loa, a makepono no hoi.
Aole wahi oi ae o ka makepono o na mea- ai ma Honolulu nei e like me maua. Aia ko maua Halekuai mea-ai ma ke kihi o na Alanui a me Papu. E kipa ae malaila.