Ke Aloha Aina, Volume IV, Number 36, 3 September 1898 — Page 1

KE ALOHA AINA

HILO BAY, HAWAII

“UA MAU KE EA O KA AINA I KA PONO”

HOOKUMUIA 1 MEI 20, 1895

HONOLULU, POAONO, SEPATEMABA 3, 1898.

BUKE IV.                                                                                                   HELU 36

 

-----------------------------

KA NUPEPA KE ALOHA AINA

----------

E hoopuka mau ia aku ana mai ka Poakahi a ka Polima o na pule a pau o kela a me keia mahina.

Ka Uku Pepa, he 20 keneta o ka pule.  No ke kope hookahi, he 5 keneta.

E loaa no ka pepa mai ke Keena aku o KE ALOHA AINA, a mai ka lima aku o na Luna Lawe Pepa.

E pai ia no na Olelo Hoolaha, na Kanikau a me na Mele Inoa, me ke Dala kuike. Aole nupepa ma ka owili pakahi e hoouna ia ke ole e hookaa mua ia ka uku pepa.

E hoouna pololei mai i na Nuhou na Kumumanao, na Olelo Hoolaha, na Kanikau a me na Mele Inoa i ka Lunahooponopono o keia Pepa.

Aole loa e hoopuka ia a hoolaha ia kekahi manao ma na kolamu o keia Pepa, malalo o kekahi inoa kapakapa ke ole e hooike mai i ka Lunahooponopono i kona inoa ponoi.

 

Ka Nupepa Puka Pule

Ke – Aloha – Aina

 

Hookahi makahiki………….$2.00

Eono mahina……………….$1.00

Ekolu mahina ………………  .50

Hookahi mahina…………….  .20

 

EMMA A. NAWAHI.

 

Puuku o

Ke – Aloha—Aina

 

EDWARD L. LIKE.

Lunahooponopono a Hope Puuku

 

S. P. KANOA.

Hope Lunahooponopono

 

O na kauoha Nupepa me na hookaa Dala, e hoona pololei mai i ka Puuku ma Honolulu.

--------------------

Nuhou Kuwaho.

------------

Maluna mai nei o ka mokuahi lawekoa Arizona, i loaa mai ai ia makou na mea hou o na aina mamao, a no ka pomaikai o ko makou poe heluhelu ke hoopuka aku nei makou me ka awiwi nui penei:

HAAWIPIO O MANILA.

Hongkong, Aug. 17.  Ua haawipio mai o Manila, mahope o kekahi kue iki ana mai ma ka Poaono, Augate 13.  O ka hae Amerika eia ia ke pulelo nei maluna o ke kapitala o Pilipine, a ua hana ia keia me ka nui hewahewa ole aku o na ola i poino.

O na nupepa o Manila, ma ka la 5 o Augate, ua hoopuka ae lakou i na nuhou, ua pani ia aku la ka hakahaka o Kenerala Augnati e Segunno Cabo Don Fermin Jaudemes Alvarez, me ka hoopuka ae i na manao hoowahawaha i na poe Amerika.

Ma ka la 7 o Augate, ua hoohui ae o Adimarala Diuwe a me Kenerala Merritt, i ka laua hana, me ka hoike aku ia Kenerala Jaudemes e lele kaua aku no laua i ke kulanakauhale, he kanaha kumamawalu hora mahope iho o ka loaa ana aku o ka palapala, me ka haawi pu aku hoi i manawa nona no ka hookaawale ana i na poe o ke kulanakauhale.  O keia hoike, ua lawe ia aku ia e Lutanela Armitage o ka mokukaua Beritania Immortalite.

Ua loaa aku ka palapala ia Kenerala Jaudenas ma ka hora 12:30 o ke awakea, a ua haawi mai oia i na alihikaua Amerika, aka, ua hoike mai nae oia, aole he wahi maluhia no na ma’i, hoehaia, wahine a me na opio e lawe aku ai, oiai, ua hoopuni ia ke kulanakauhale e na poe kipi.

Nolaila, ua hoouna ia kau lakou no ka hoopakele ana i ko lakou mau ola maluna o na mokukaua o na aina e, ma ke kakahiaka o ka la 9 o Augate, a nee aku la no waho o ke kaikuono.

Ua nee aku ke Petrel a me ka Concord no waho o ka nuku o ka Passig, no ke kue ana aku i na moku e mahuka ana, aka, aole nae he mau hana i lawelawe ia a hiki i ka la 13 o Augate, no ka haawi ana i manawa no na koa aina o Amerika e hoomakaukau ai.

Ma ka hora 9 o ke kakahiaka Poaono i komo aku ai na mokukaua Amerika me ka lawe ana ae o ka moku lawehae Olympia o Adimarala Diuwe i ke alakai ana.  Ma ka hora 9:35 i wehe mua loa ae ai oia i ka poka mua o ke kukala kaua ma ke ki ana aku i na papu ma Malate.  Ma ka hora 10:32 i ikeia aku ai ka pii ana ae o ka hae hoailona no ka hoopau ana i ke kipoka ana, a ia wa no i ikeia aku na koa mauka o ka aina e nee ae ana no kahi o na auwaha Sepania.

O kahi hahana loa o ke kaua ma ka eheu akau no ia o Malate, kahi i hiki ole aku i na pukuniahi o na mokukaua ke loaa aku.

O ka nui o na poino ma ko na Amerika aoao he eiwa i make a me kanaha i hoeha ia.  O ka nui o na poino ma ko na Sepania aoao mai ka 120 a pii aku na poe i make a hoeha ia.  Ua hopu pio ia e na Amerika he 11,000 koa a mawaena oia poe he 7,000 he mau koa kumau, 5,000 pu raifela a me 18 pukuhiahi. 

 

AIA O KENERALA AUGUSTI I HONGKONG.

 

Berlin, Aug. 18.  He lono kai loaa mai nei mai Hongkong mai no ka la 18 o Augate e olelo ana:

O ka mokukaua Kaiserin Augusta, ua haalele iho oia ia Manila me na hoike mai ia Von Diedrichs mahope iho o ka haule ana o ke kulanakauhale.  Ua lawe pu mai oia ia Kenerala Augusti me kona ohana maluna ona.  Ma ke noi a Kenerala Augusti a me ke kuka ana me ka alihikaua Amerika, ua haawi mai la o Adimarala Von Diedrichs i kona ae no ke kau ana aku maluna o ka mokukaua Geremania Kaiserin Augusta no Hongkong ma kona alahele e huli hoi ana no Sepania.

HAALELE O BLANCO I KONA KULANA.

Madarida, Aug. 15. Ua loaa mai nei i ke aupuni mai ia Kapena Kenerala Blanco he lono e hoike mai ana no kona haalele ana i kona kulana.  O ke kumu ana i haawi mai ai, mamuli no o kona makemake ole e kokua aku ma i na hana hooneoneo i na Sepania mai Cuba aku.

 

O SCHLEY KE PANI ANA MA KAHI O KE

KULANA MILA.

Nu Ioka, Aug. 19.  O ka mea kakau o ka nupepa Tribune ma Wasinetona, ua telegarapa mai nei oia: Ua lawe ae ke Keena Kaua i ke kukulu hou ana i ka puulu mokukaua o ka Atelanika Akau.  Ua manao ia ae e mahele ia aku ana lakou iloko o elua mahele, a o Adimarala Sampson ke noho mana ana maluna o na aumokukaua o ka home.  Eia ke pahola ia nei e lawe ae ana o Schley i ka noho alakai ana no na mokukaua o ka Pakipika i ka wa e pau ai ko Adimarala Mila noho ana ma ia kulana iloko ae nei o Novemaba, a e hookuu ana hoi iaia ka mana no ka noho ana, alakai ana mai Alaska a hiki i ka Lae Hao, a pela hoi ia Hawaii a me Samoa.  O keia Schley, ke kaeaea nana i hoopoino i na aumokukaua Sepania o Adminarala Cervera.

 

NUI KA POINO O NA POE KIPI.

 

Ladana, Aug. 19.  O ka mea kakau o ka Times ma Hongkong, ua olelo ae oia: O ka luku wale ana ma ka hema o Kina ke hoomau ia la.  O na kino make ke lana hele la ia maloko o ka muliwai Wuchan, ma kela a me keia la.  He elua haneri poe kipi i komo aku maloko o Taiwongkong, ua hooauhee ia aku lakou e Kenerala Mawho me hookahi haneri poe i make a me kanaha i hopu pio ia.  Ua hoouna ia aku e na poe maikai o Paklan me Wugun i kela a me keia la na poe kipi mai ka umi a ka iwakalua i ka lunakanawai no ka hookau ana mai i ka hoopai o ka make.

 

HOPU IA NO KA HOHEWALE.

 

Arroyo, Porto Rico, Aug. 12.  Eia o Kapena Biddle o ka puali C, o ka mahele Eha o na pualikoa o Ohio, maanei kahi i kali ai no kona hookolokolo koa ia no ka hewa hohewale i ka wa i hooili ia ai o kekahi kaua me na Sepania he mau mile mawaho aku o Arroy.  O kapena Biddle a me kona puali, ua auhee aku lakou i ko lakou wa i hoea aku ai i ka laina kaua, mamuli o ko lakou ki ia ana mai e na koa ki pololei o Sepania, ua ku makaukau aku na koa me ka manao ana e paio aku me ka enemi, aka, ia wa no i haawi ae ai ua kapena la i kana kauoha no ka holo ana aku i ko lakou wahi e pakele ai.  Ua loaa aku ua kapena la e pee ana iloko o kekahi lua ma ka aoao o ke alanui.

 

KA MANAWA HOLO LOA O KE KAA BAI-

KIKALA.

Spokane, Aug. 17. He elua manawa holo loa i ikeia maanei, a ua manao ia no ka honua holookoa ma na heihei kaa baikikala i malama ia maanei.  Ua lilo ia Wilson ka eo o ka heihei hookahi mile i loko o 2 01 1-5, he 1-5 sekona ka oi ae i ko Eddie Bald manawa holo loa.  A ua lilo hoi ka manawa holo loa o ka 1-3 mile ia Carl Hozei iloko o 35:3-5 sekona, he hookahi sekona ka oi ae i ka manawa holo loa o ka honua nui.

 

-----------------------

Ma ka Poakahi ae nei e hoomaka hou ai na kula o Kamehameha.

 

HE KUAHAUA AHA ELELE

KUIKAWA.

----------

Ma ka halawai ana a na Aha Hooko Kuwaena o na Ahahui Aloha Aina o ko Hawaii Paeaina, ma ka la 29 o Augate, 1898, ua hooholoia e kahea ia ka Aha Elele Kuikawa o na Ahahui Aloha Aina a puni ka Paeaina.  Nolaila ke kuahaua ia aku nei ma ke kauaha a ka Peresidena Nui o na Ahahui e noho ana ka halawai Kuikawa a ka Aha Elele ma Honolulu, ma ka Poakahi, Sept. 12, 1898, hora 10 a. m. no ka noonoo hou ana i kekahi mau kumuhana pili i ko kakou noho aupuni ana no keia mua aku.  Nolaila, ke kauoha ia aku nei i na Ahahui ala a puni ka Paeaina, e hoouna mai i hookahi Elele mai kela a me keia Ahahui mai a puni ka Paeaina e hoouna mai iaia me kona hookohu i kakauinoa ia e na Peresidena o kona Ahahui.

Ma ke kauoha,

ENOCH JOHNSON,

Kakauolelo Nui o na Ahahui Aloha Aina o ko Hawaii Paeaina,

Honolulu, Aug. 30, 1898.

-------------------

HE ELIMA MAKAHIKI HOO

PAAHAO.

--------------

Ma ke kakahiaka o ka Poakolu nei, Augate 24, i haawi mai ai na kiure i ka lakou olelo hoahewa no ka hihia o W. D. Hamilton ma ke degere elua o ka lawe ola a waiho aku la na ka Lunakanawai Stanley e hookau mai i ka hoopai.  Ua haawi koke mai oia i ka mea i hoahewaia he elima makahiki e noho ai ma Kawa, a ua ae aku ka mea i hoopai ia e lawe lawe ia mau koikoi me ke kue ole aku.

O ka hewa o keia Hamilton oia no kona kipu ana aku ia Davis a make, maloko o ka mahina aku nei i Iune, iloko o ko laua wa ona.

------------------

Ua lohe mai makou, ua komo aku la o Keoni Rikekini i ke anapuni a Limaloa, i lala no ka Hui a Ka-ne ma e malama mai nei.  O ko makou lohe keia o ka oiaio koe a hoea ao.