Ke Aloha Aina, Volume IV, Number 37, 10 September 1898 — Page 6

KE ALOHA AINA

 

Na Palapala.

 

NA PALAPALA HOOMAIKAI A

NA AHAHUI IA LILIUOKA-

LANI.

 

Palapala Hoomaikai a na Ahahui

 

            Aloha aina o Waipio, Hamakua, Hawaii, i ke 'Lii Liliuokalani, ma o J.K. Kaunamano la ke Komite Kuikawa o na Ahahui.

I KE ALII LOKOMAIKAI LILIUOKALANI:

Aloha oe,

            E ka Makuahine maikai a me ka oluolu, ka Nai Aupuni kaulana no ka huli ana i ka pono o Kou aupuni, Kou nohoalii a me kou lahuikanaka makee Alii.

            Ma o J.K. Kaunamano la ke Komite Kuikawa o na Hui Aloha Aina o Waipio, Hamakua Hawaii, e pahola aku imua Ou e ke Alii i ko makou aloha nui a me na hoomaikai ana, me ka naau ohohia i piha i ka mahalo a me ka hauoli nui o Kou lahui.  a no ka mea, he mea hauoli nui i Kou lahui ko ke Akua kiai a malama i Kou ola e ke Alii a me Kona hooponopono i ka pono o ka aina a me ka pomaikai o Kou lahui.  Ke pule nei makou o ka pono ke hanaia a haule mai na lani.  E ola ke Alii i ke Akua.

            E ke 'Lii, ke waiho ia aku nei ma o ko makou Komite la, he wahi makana no Kou la hanau e ke 'Lii, he wahi puaa, a he wahi opala limu a opae, he uuku ia me ke aloha pu no.  Ke pule nei makou i ke Akua e hooloihi i Kou ola, a e piha Kou mau la me n pono a me na pomaikai holomua o Kou aina a me Kou lahui.

            O makou iho no me ka mahalo.  T.N. Naleilehua, Peresidena o ka Hui Aloha Aina o na kane.

            T.K. Kaemoku, Peresidena o ka Hui Aloha Aina o na wahine.

            E.M. Kealoha, Kakauolelo o ka Hui Aloha Aina.

            Waipio, Hamakua, Hawaii, Augate 29, 1989.

 

Ka pane a ke 'Lii i ke Komite no ka palapala maluna ae nei.

            Ke haawi aku nei Au ma ou la i Ko'u aloha nui a me na hoomaikai ana i na Hui Aloha Aina o Waipio, Hamakua, Hawaii no ka loaa ana mai o ka lakou makana maikai, me ko lakou mau hoomaikai ana. NO'u me ko lakou aloha pumehana. Oiai, oia mau no ka pumehana o Ko'u aloha i Ko'u lahui hoomanawanui A'u i aloha ai.  Na ke Akua e malakiai a hooponopono ia kakou me kona mana.

Na ke Alii:       LILIUOKALANI.

Honolulu, Sept. 1, 1989

 

            Ua hoi hou mai ka mokuahi Iwa ma ka hora 11 o ka po Poakolu nei, mamuli o ka poino ana o kona mekini.

 

I PAA KO OUKOU MANAOIO I KE AKUA.

            He oiaio, o ko oukou mau manaoio, ko oukou m au manaolana ame ko oukou aloha aina oiaio, aole la no oukou iho, aole no ko kanaka akamai, aole, aole loa.

            Aka, no luna mai ia, no ko ke Akua mana a me kona ahonui wale aloha no hoi nona, aka, na kona aloha wale mai no, a no ka mea, he aloha ke Akua.

            E hoomanao i kou kupaa luli ole iloko o na makahiki elima a oi i kaahope ae nei, a i kaana nou iho me ke akhele.  E ike loa no oe elike me ka la i ke awakea @ me ka hoohewahewa ole, aole na ko ke kanaka akamai i hookomo aku i ke aloha aina oiaio iloko o ka puuwai o ka lahui mai Hawaii a Kauai, e kupaa lakou maluna oia kahua a hiki i ka welo ana o ka hae hoku ma na aekai aloha o kou aina hanau.

            Aka, oia a mea e ikea ai ke kupanaha o ke Akua, a me kona nani nui.  He oiaio no hoi, iloko o keia mau la, mulei wale iho no o ka welo ana o ka hae hoku maluna o kou mau kaupaku hale.

            Ala mai ia n manao ooloku o ka pihoihoi iloko o ka hapanui o ka poe i pau poo a pau hiu iloko o ke aupuni Repubalika i make kauoha ole aku la. A i mai la i ka poe aloha aina oiaio a pau e kakoo aku i ka lakou palapala e lawe hele nei iloko o keia mau la, e kakau aku ka i ko oukou mau inoa, no ke noi ana aku ka i loaa mai ona pono koho balota nou e ka lahui Hawaii hoomanawanui.

            Kupaianaha o na kupaianaha, o ka hapanui no o keia poe kai hoohiki kue ino loa i ko kaou MOiwahine i ka wa o kahi aupuni Repubalika e mauliawa ana i kona aho hope loa, a o lakou nei no kai olelo mai ia kaou ke lilo kakou i Panalaau no Amerika, e helelei wale mai ana ke dala me ke gula, ku ka paila hana ka haawe.

            He oiaio, iloko o keia mau la pokeo o ka ehu kakahiaka nui wale; ma kahi o ka helelei nui wale mai o ke dala me ke gula, aia he mau hana powa hilahila ole mauka o ke awaawa o Manoa e kekahi mau koa Amerika, ke kii wale ana i na halakahiki ma kahi oia awaawa, a ua powa pu aku la hoi i kekahi halekuai o kekahi Pake olaila, a he 5.75 i laweia mai e lakou.  E hoomanao ia hoi, aole kakou i hoea aku i ke awakea o ka hoohui aina, ke okupukupu e mai nei no na hua o ka hoohuiain, aiwaiwa loa aku paha a kaa pono ae kakou mawaho ae o ka lae o Kalaau ea, pau ka pono a Kakina. Aloha wale.

            O ke kahua o ka'u i makemake ai e hoaiai aku i o'u mau hoa makaainana oia no nei pepa e nihi hele mai nei ma na pipa alanui o ke kulanakauhale nei, a malia o hoea aku ia ano pepa ma na wahi au kanaka a pau, a imua ponoi hoi ou mau hoa aloha aina a pau.  E oluolu no e hoomaopopo iho i ko kaou poo manao i keia la, a e lilo ia i kukui nou e hoomalamalam ana ia oe mailuna a lalo o kou mau kapuai hoomanawanui, a e like no me kou kupaa luli ole iloko o na makahiki he elima a oi i kaahope aku la, pela no oe e kupaa hou ai a hiki i ka la a ke Akua e hooponopono hou mai ai i kou kuleana oiaio no kou aina hanau.

            O ka mahina a Dekemaba e hiki mai ana ke kau mau ia o ko Amerika Ahaolelo e noho ai, a ke manaoio nei au, oia a wa a ka poli wai lani e hoomau iho ai i na papalin aloha o kou aina hanau, a e ike ai o'u mau hoa makaainna i ka nani o ke Akua e pahola iho ana maluna o na kaiaulu o Hawaii nei.

            Umia ka hanu i nui ke aho e na haipule mai Hawaii a Kauai, he oiaio ua lohe ke Akua i ka oukou  mau leo pule, aole Oia e haalele ia oukou a nele.  Nona ka hoonani mau loa ia mai ke ao kumu ole a i ke ao pau ole. Amene.

            S.K. KAMAKAIA.

 

I kuu lahui aloha,

Aloha oukou:

            Ke poloai aloha aku nei au ia oukou me keia mau wahi manao pokole malalo iho nei:

            AKAHI. Mai pihoihoi oukou no keia mau hana hoopahaohao a ke aupuni Hawaii i hana mai nei no kakou, ka hana hoi i kue maopopo loa i kona kahua hookumu aupuni ana, a i kue no hoi i ke kaulike, ka pono, ka pololei a me ka oiaio mau.

            He hana hoi a ua aupuni nui la, i kue loa i ke ano oiaio maoli o kela mau olelo maikai loa a lakou i kakia ai a paa loa maluna ae o ka lae o ka manu aeko iloko o ke dala Amerika o ka A.D. 1898, e olelo ana: "In God we trust," a o kona ano hoi "Iloko o ke Akua kakou e hilinai ai."

            O keia hana hewa nui a Amerika ia kakou, aole ia malalo o ke alakai a ia mau olelo, aka, malalo no o ke diabolo.  Nolaila, aole loa ke akua e kokua mai ana ia lakou ma keia hana hewa nui loa a lakou.  Ia kakou Oia e kokua mai ai, i ka lahui liilii nawaliwali i hana hewa ole aku ia Amerika nui manoanoa.

            ALUA: Mai pihoihoi oukou no na olelo a na Komisina Amerika i hoike aku ai ma kekahi mau wahi o na mokupuni o kakou i na la i hla ae, oiai aia no ka lakou mau olelo maluna oia alahele kekee, a ko lakou aupuni i hoouna mai ai.

            AKOLU: Mai puni wale mai oukou i na olelo hoohiluhilu a na poe naauao o kakou i kahuli a kalole aku la mahope oia mau hana kekee a Amerika.  E pani i na pepeiao, a lhui ae mai a lakou mai.

            AHA: O ka poe aloha aina a pau mai Hawaii a Kauai, e kau i na Hae Hawaii ma ko oukou mau ahu a ma na home o oukou.  Mai hopohopo aole hoi e wiwo, oia, aole kakou ka lahui Hawaii ponoi i hana hewa aku ia Amerika, aka, o ka Amerika kai hawahawa na lima ia Hawaii uuku, a i hapala haukae iaia iho me kana mau hana karaima kiekie,.

            Na kakou e lawe i ka moto a lakou i kea ae ai, "In God we trust."

            E kau i ka hae ma Ziona! E hai aku i ka lono i ko na aina e, he lahui aloha a pela aku.

            Na'u me ke aloha ia oukou,

            EDWARD KEKOA.

Honolulu, Sept. 1, 1898

 

AOLE HE OIAIO.

            Owau o ka mea nona ka inoa malalo iho nei ke hooiaio nei ma keia. owau no ka mea nana i hoopuka na manao a pau e pili ana no Kauka Atcherley malalo o ke poo manao, "He hana ku i ka hoomainoino," i hoopukaia ma ka aoao 7 o ka Nupepa KE ALOHA AINA o ka la 3 o Sepatemaba, 1898.

            A ke hooiaio pu aku nei au ma ke akea, ua kuhihewa loa a me ka lalau pu oia hoolaha ana a'u: a ke noi pu nei au i ka oluolu o ka mea nona ka inoa a'u i hoopuka ai, e hoihoi ia mai ka'u mau olelo a pau me a'u.

            S.P. PUA.

(Hoike)            Thomas Aiu,

            Notari no ka Lehulehu.

Kahaluu, Kona, Hawaii, Sept 8, '98

            O keia leta malunaae o ka hoiaio o ka mea a keia S.P. Pua hoolaha mua aku ai e mihi ana i ka oiaio ole.  Mai hana hou pela, o poino auanei.

 

MAKE I ALOHA NUI IA.

            Ma ka hora 3 o ka wanaao Poaha, Augate 25 mawaho ae nei o Kalia, Waikiki-kai, ua kikoo mai la na lima palanehe o ka make, a lawe aku la no ka manawa pau ole ma kela aoao o ke awaawa o ka make i ka hanu ola o Mrs. Kekuewa Wood, mahope o kona kaa loihi ana i ka ma'i no hookahi makahiki a oi.

            Ua haawi ia aku na lapaau ana a na kauka o ke kulanakauhale maluna ona, aka, ua ikaika no na lima o ka make i ka puliki ana iaia a hiki i kona hala ana aku la, a ma a hora 2 o ka auina la Poalima i malamaia ai kona anaina hoolewa mai ka home noho aku a hiki i ka luakini o Waikiki a na Rev. H.H. Pareka i kokuaia e H. Waterhouse i malama ae i na hana haipule hope loa maluna ona.

            Ua haalele iho oia he kane mare a me na keiki elua, a he mau moopuna ewalu a me na ohana he lehulehu e kumakena aku ana nona ma keia aoao.

            G.W. AINA.

 

            I ka hora 3 o keia wanaao Poalima i pauaho mai ai o Akoni Rosa i kona ola ana. Aloha no.

 

KA BUKE MOOLELO HAWAII

I HAKUIA E KA

Moiwahine Liliuokalani,

ma Wasinetona.

Pai a hoopukaia e Li ame Shepord

o Bosetona, Amerika Huipuia

 

Unuhiia no ka  pomaikai o na poe helu

helu o KE ALOHA AINA)

MOKUNA X

KO'U KIPA MUA ANA I AMERIKA HUIPUIA

 

            O na inoa o keia poe oia no o Hou a me Mrs. Aholo, Mr a me Mrs. Hayselden, Mr. A Fornander, Mr a me Mrs. Nahaolelua, Hon aam Kaukau, Mr a me Mrs Everett, Mr W H Cornwell a me ka ohana, Mr a me Mrs. W H Daniels, Mr a me Mrs James Makee, Mr a me Mrs Turton, Mr a me Mrs Uuna a me na ohana misionari o Alexander a me Bailey

            O na mea e pili ana no keia huakai a makou, ua like loa no ia me ka'u i kakau ai ma ka'u huakai kaapuni i ka mokupuni o Oahu, nolaila, o ka'u wale no e kamailio ae ai no na ohana maluna ae a me kekahi poe i hoike oleia ko lakou inoa, ua haawi mai lakou i na hookipa kiekie ana me ke ohohia nui.  O ka inoa o keia poe a'u i hoike ae la, ua hoike moakaka mai lakuo i ko lakou mau manao aloha no makou a ua huipu ae hoi na Hawaii a me na poe i hanau ma na aina e, ma ka hana ana mai i namea no makou e hauoli nui ai.

 

MOKUNA IX

KA HUAKAI NO MAUNA LOA.

            Iloko o ka makahiki 1880 ua kipa mai la imua o'u o Miss Helen Aldrich o Berkeley.  He kaikamahine oia na W.A. Aldrich, he kanaka banako, i mare i ka hoahanau mua o ka'u kane, Elizabeth, ke kaikamahine hoi a R.W. Holt.

            A mahope koke iho o kona hoea ana mai, ua holo aku la makou no ka mokupuni nui o Hawaii, a maluluna hoi ona e ku ana ka luaopele, kekahi o na mea kupanaha o keia au hou.