Ke Aloha Aina, Volume IV, Number 38, 17 September 1898 — Page 6

6  KE ALOHA AINA, POAONO SEPATEMABA, 17, 1898.

 

Mai ka aoao 5 mai.

_______

 

            Noonooia ka elele o Hilo taona i loaa ole ka hookohu mai kona Ahanui mai, ma ka noonooia ana, ua ae ia oia kekahi elele.

            Ua noi ia mai e kaheaia na elele, a ma ke noi no ua hoopaneeia ka hale a noho hou i ka hora 1:30 p.m.

            Hora 1:30, noho hou ka hale.

            Hoike mai ka Peresidena, ua hiki hou mai he elua elele, 1 no Honolulu a he 1 no Honuaula, haawiia i ke Komite mau no na hookohu.

            Hoike mai ka Lunahoomalu o ke Komite, ua apono lakou i keia mau hookohu, oia o Daniela Anekoolani no Honuaola a me Aberahama Kaleikau no Honolulu, ma ke noi ua aponoia.

            Ua hookaawale pono ia na lala o ka Ahahui Kuwaena, ka Aha Elele a me na makaikai.

            Nei mai o Makekau e ae ia na poe i akoakoa mai, aole nae lakou he mau elele, e lilo i mau hoakuka no keia aha, ae ia.

            Lawela mai ke noonoo ana i ka hana i kaheaia ai ka Aha Elele.  Noi mai o Thomas Clark e hapaiia ka noonoo ana i na Lunanui, oiai, ua loheia ua lawe ka Peresidena J. K. Kaulia a me Enoch Jahnson i ka hoohiki no Amerika.

            Rula mai ka noho, e lawe ia mai kumuhana i ke kau mau ma ka malama o Novemaba la 28, e hiki mai ana A. D. 1898.

            Ma ke noi a ke Kakauolelo Enoch Johnson, ua ae oia e waiho i kona kulana Kakauolelo a haalele iho la.  Koho ka hale ia Thomas Clark i Kakauolelo no ka manawa, ma ke noi a Palau, ua noho ke Kakauolelo Thomas Clark no ka mana wa, a ua lawe ole ka hale a noonoo i kana noi.

            Hooponoponoia ke noi e hoopau ae i ka Peresidena me ke Kakauolelo.

            Rula mai ka noho, e waihoia ia hana a ke Kau mau, ia wa e hoopii Luna Nui ia ai.

            Ua haalele ke Kakauolelo i kona noho no keia hoopii a Thos. Clark Haalele a nuha o Thos Clark no ka hoi ana o ka Peresidena ma kona noho.          

            Noi o J. N. Kamoku e koho keia Aha ia J. M. Kauhi 1 Kakauolelo.  Kue o Sam Kaiue.  Rula mai ka noho aole lawe ia ke Kakauolelo mai noloko o na hoa o na Aholelo maiwaena ae o na hoa ponoi oia Aha aka, ua koho ia he mea okoa.  Aponoia.

            Noi mai o Kanealii e heluhelu ia ka Memoriala, apono ia.

            Heluhelu ia ke poo o ka Memoriala, apono ia.

            Mahele 1.--Heluhelu ia a aponoia me ka pakui ana mai i ka pane a S. B. Dole, mahope oia mahele.

            Mahele 2.--Heluhelu ia apono ia,

                  “     3.--       “                “

                  “     4.--       “                “

                  “     5.--       “                “

            Mahele 6.--Heluhelu ia, a ma ke noi a Jno. Rikekini, e hoopau ana i na huaolelo (pono) a me aku, a e heluhelu ia, ua mahele la penei:

            Ua hoike maopopo ae ke kuahaua Amerika, ua loaa i na aupuni ko lakou mana mai ka ae ana aku o na poe e hoomalu ana.  Ninau ia a aponoia.

            Mahele 7.--Heluhelu ia a apono ia, me na hooponopono ma ka hoopau loa ana i na huaolelo hope oia mahele, oia hoi, e noho hoomalu mai o Amerika.

            Noi o Kanealii e noho ka aha e noonoo i ke poo o ka Memoriala, apono ia.  Waiho mai o Kanealii i ke poo o ka Memoriala penei:

            Palapala Memoriala a ka Hui Hawaii Aloha Aina o ko Hawaii Paeaina, aponoia, kuu ia ka hale mai ka noonoo ana i ka Memoriala.

            Na Hope Peresidena Kaunamano i hoolauna mai imua o ka Peresidena, ua pau ka noho Komite ana o ka Hale, no ka noonoo ana i ka Memoriala.

            Mai a Jno. Rikekini, he mau olelo alakai naauao, a mai a Lilikalani he kope o na kuikahi i hana ia me kekahi mau aupuni o Europa a me Amerika.

            Ma ke noi a ka noho J. K. Kauia, i na ua apono ka Hale i ka Memoriala me na hooponopono, apono lokahi ia.

            Koho ka hale i elua lala o ke Komite, e hooponopono i na kope o ka Memoriala, oia o Kanealii a me Lilikalani, apono ia.

            Heluhelu mai ka Peresidena i ka palapala poloai a ka Hui Kalaiaina i keia Hui Aloha Aina, apono ia.

            Hoomaha ka Aha a noho hou i ka hora 8 a.m. Sept. 13, 1898.

 

La Hana Elua.

 

            Noho ka Peresidena ma ka noho, Kauhi kakanolelo.

            Pule o Kamakele, heluhelu ia ka mooolelo o ka halawai i hala, a apo noia, me na hooponopono ana a Ka iue ma ka hookomo hou ana i na huaolelo “kuokoa,” a e heluhelu ana penei:  Kuahaua kuokoa o Amerika a aponoia me na memoriala.

            Hapai ia ka hoike a ke Komite pai i ka memoriala, pane ka luna hoomalu o ke Komite, Lilikalani, ua makaukau, lawe ka hale a noonoo, ninauia a aponoia.           

            Na Palau i noi mai e hapai hou ia ka hoike a ke Komite.

Na Lilikalani i hoike mai i ka moolelo o ka hele ana o ke Komite a hiki i ke pai ia ana o ka memoriala.

            Noi mai o Makekau e heluheluia ka memoriala a ia Komite i hooponpono ai i ike ai keia Aha i ka hana a ia komite, ua haule ka huaolelo “olelo hoohui hui,” ma kahi o ka hualelo “olelo hooholo bila kanawai” ua noonoo ka hale no ka haule ana o kela mau huaolelo.

            Noi mai o Kanealii e kapae ia na rula, a e noonooia ka moolelo o ka Aha.  Ua noi mai o Kane e apono ka Aha i keia mau huaolelo, olelo hooholo hui, e like me ia ma ka memoriala i keia wa i paa ai i ke pai ia, apono loa ka hale.

            Noi mai o Kanealii e koko ia i ekolu lala o ke Komite e hele aku ai e hui me na komisina.  Hoole mai o Kaloa, i elima , aponoia.

            Kohoia o Lilikalani, Kane, Kanealii, Kaleikau a me Silva aponoia na inoa., noho ka hale a kakauinoa i ka memoriala.

            Waiho mai ka lunahoomalu o ke Komite.  Lilikalani, i ka hoike, ua launa aku oia me S. B. Dole, a o ka pane no oukou ka manawa i na hora a pau o keia la.

            Hoopaneeia ka hale ma ke noi ia ana.

            Noho hou ka hale ma ka hora 1:45, oia auina la no.  

            Peresidena ma ka noho, J. M. Kauhi , Kakauolelo no ka manawa.

            Waiho mai ka noho i ke kumuhana e noonoo ia i mea unuhi olelo, a ka Aha Elele imua o na Komisina.

            Na E. K. Lilikalani i ka inoa o Sam Kaiue a me J. M. Kauhi, noi mai o J. M. Kauhi, nona iho e kala mai ka Aha, aohe lawa loa.

            Ma ke noi a Joseph Heleluhe, e lawe keia hale a noonoo i ka inoa o Jno. Likikini, apono ka hale.

 

Aole i pau.

_______

EIA HOU NO NEI HANA HOOPOINO A NA KOA.

_______

 

            Ma ka po o ke Sabati nei, Sepatemaba 10, ua hoea aku la he 30 a oi poe koa Amerika ma Waialae, a komo aku la iloko o ka mahilaiki o Lok Sing Wai & Co.  Ua hao aku la lakou i na ipu haole a me kekahi mau mea ulu e ae, a ua like hoi me ka hue a ka waikahe nui, aohe opa la koe iho.

            Ua hele aku na Pake e papa, aka, aole nae he hooloheia mai, a aohe no hoi e hiki ke hopu aku ia lakou, oiai, ua hele pu aku no lakou me na pu panapana.

            O keia iho la paha na pomaikai o ka hoohuiaina, oia hoi, ma kahi o ka hoowawai mai i na poe o ka aina nei, ke hooilihune mai nei ia me ka hooweliweli pu i ka poe e noho ana maluna o kela apana o ka mokupuni o Oahu.

_______

UA HOLO AKU NO CANDIA.

_______

 

            Canea, Sept. 6.  He eha mokukaua i holo aku la o Candia, kahi hoi i loheia mai nei, ua make he ekolu poe Beritania, a he eha poe i hoeha, a he eono hoi Mussulman i make.  Aia na pualikoa ma Retimo ke ku makaukau la no ka hoopuka ia mai o ke kauoha.  Ua pau ka hakaka ma Candia, aka, ke mau ia no nae ka uluaoa.

_______

 

            Ua olelo o J. McComb o Kauai ua aihue ia mai kona rumi hoolimalima aku ma kahi e kokoke ana i ka hale telepona he $100 ma ka po Poakahi nei.

 

KA HAIOLELO A EDWARD K. LILIKALNI.

_______

 

            Mamuli o ke noi a na makamaka Elele Lahui, e paholaia keia haiolelo a ko makou hoaloha maikai, ma na kolamu o ka kakou pepa, a oia keia malalo iho:

E NA HOA MAKAAINANA:

            Ke mau nei keia mau mea ekolu, o ka manaoio, o ka manaolana a me ke aloha.  A o ke aloha nae ka i oi o keia mau mea.  A maluna iho o keia mau kahua nui ekolu, ua kukuluia ko kakou manaopaa, no ke aloha i ka aina.

            A mamuli no hoi o keia mau kumu, o ke aloha i ka aina, ua kukuluia na Ahahui Aloha Aina, iloko o na Apana, ma na Mokupuni a puni ko Hawaii Paeaina.  Ua mahele ia na Ahahui, i na mahele like elua:  He Ahahui Aloha Aina okoa ka na kane, a he Ahahui Aloha Aina okoa ka na wahine.

            A ma keia kahua like nohoi kakou, i akoakoa mai nei, ma keia halawai makaainana nui, no ka manaoio no, e hana ia ka pololei; a no ka manaolana no, o ka pono ke hanaia a haule mai na lani; a no ke aloha i ka aina, o ko kakou mau kupuna i eha ai ka ili a ia kakou na mamo.  “Ko kakou aina hanau e!”

            A ua hele mai nei kakou maanei, me ka lokahi, e hoolohe i na olelo alakai, kue hoohui aina, me keia mau huapalapala i kakau poepoeia iloko o ko kakou mau puuwai:

1--O makou o ka hapanui loa o na makaainana kupa ponoi, o ko Mawaii Paeaina, na kane, na wahine a me na keiki, a me na haole oiaio, i aloha ia Mawaii, ke kue loa nei makou i ka Moohui Aina me Amerika.

            Ua like hoi ka lua penei:

2--O makou o ka hapanui loa o na makaainana kupa ponoi o ko Hawaii Paeaina, o na kane, na wahine, a me na keiki, a me na haole oiaio, i aloha ia Hawaii, Ke kokua lokahi nei makou, e hoomau loa ia ke kuokoa o ko Hawaii Paeaina, Maluna o ke kahua paa luli oia, e kahiko nei maluna o kakou.  Ua mau ke Ea o ka aina i ka pono.

 

KA LOAA MUA ANA O KO KAKOU KUOKOA.

 

E NA HOA MAKAAINANA:

            Ke hoike aku nei au, ia kakou a pau, i ka makaniki o ka Haku 1820 ua hiki mai na Kumu Misionari i Hawaii nei, he poe kupa Amerika ma ka hanau ana, oia no o Binamu, Kakina a me Wini.

            A i ka makahiki o ka Haku 1842 i ka la 29 o Dekemaba, loaa iho la ko kakou ikea mua loa ia ana mai e ke Aupuni Hui o Amerika, “He Aupuni Kuokoa o Hawaii.”  Oia hoi, he 22 makahiki ke kowa mai ka hiki mua loa ana mai o na misionari Amerika, a hiki i ka haawi ana mai o Amerika i ke kuokoa no ko Hawaii Paeaina.

            A hookahi makahiki mahope mai ka la 28 o Novemaba, 1843, ua ae a mai ko kakou Noho Aupuni Kuokoa ana e Beritania Nui, Farani a me ke aupuni o Belegiuma.

            A he mau makahiki pokole mai ua ikea piha ia ko kakou Noho Aupuni Kuokoa ana e na aupuni a me na Mana Nui a pau maluna o keia honua hele.

            Nolaila, ke hoike aku nei au, he 50 makahiki a oi a hiki 1 keia la o ko kakou Noho Aupuni Kuokoa ana.

 

KA MOOLELO POKOLE O KA LOAA ANA O KO KAKOU KUOKOA.

 

            Ke hoopaa nei, me ka hoomaopopo ana, o ka ae aua aku o Amerika Huipuia, a hooia piha no ko Hawaii Paeaina noho kuokoa ana, mawaena o na mana nui o ka honua nei.

            Ka mea i kau nui la ma ke kulana hohonu, no ka pono o ka Moi Kauikeaouli.  Kamehameha III, me kona noonoo naauao o ke kulana noeau a me na Alii hanau o ka aina.

            E hanaia na olelo hookolo kaulike a me ka pololei e like me ka makemake piha o ka lahuikanaka o ko Hawaii Paeaina, he aupuni kuokoa.

            Nolaila, ala lokahi mai la ka lahuikana, a ku imua o ke kahua nana he alo, hookahi umauma a hookahi puuwai me ka lokahi o ka manao.

            Aole i ku mai ka lahuikanaka o Hawaii maluna o ke kahua hana a kaena iho, no ka nui o ko lakou heluna lahui, aole hoi ma ka ikaika o na mana kaua aina, a mana kaua moana, aole loa.

            Aka, waiho mai la ka lahui Hawaii ma o ka Moi Kauikeouli ‘la he Palapala Hoopii (Memoriala) e noi mai ana.  “E loaa like aku ia Hawaii Uuku, ka noho kaulike kuokoa elike ma na mana nui o keia Poepoe Honua.”

            I kela wa o ka makahiki 1842, o ke Alii ka Moi Kauikeouli a me ke aupuni, ua hooholo iho la, e hoouna i mau Elele Aupuni Hawaii i ko na aina e, imua o na mana nui o ka honua nei, e hana a e hooholo i Olelo Kuikahi.

 

Aole i pau.

_______

 

HE HOU PAHI.

_______

 

            I ke aumoe o ka po Sabati nei, ua ulu ae la he mau hoopaapaa ana mawaeka o kekahi mau Iapana elua no ka mea e pili ana no kekahi wahine ao o ka hopena oia hoopaapaa ana, oia no ka unuhi ana ae o kekahi Iapana i kokahi pahi pelu a hou aku la no eha manawa maluna o kona enemi.

            Ua laweia aku ka lima koko a me ka Iapana i hoehaia no ka halewai a mahope o ka lapaauia ana, ua hookuuia mai ka mea i hoehaia.

_______

 

            Ua hoopaiia o H. Lewis, he makai kaulio no ka hoeha ana ia Kapena Spillner he $20, ka Poalua nei.