Ke Aloha Aina, Volume IV, Number 41, 8 October 1898 — Page 8

KE ALOHA AINA

 

HE MOOLELO WALOHIA

 

NO KE

 

Keikialii Alabati

 

Ke Kaeaea o Pelekane

 

A ME KA

 

Ui Madelina.

 

Ke Kukui Uwila o Ainapo

 

oohenoia no KE ALOHA AINA

 

            A oiai hoi, eia kakou ke hoi aku nei no ko'u wahi ponoi, ke hauoli nui nei au, ma o kou lilo ana i malihini kiekie na ko'u ohana ponoi a me ko'u mau hoaloha o ka puuwai hookahi.

            Oiai nae e kamailio ia mai ana keia mau olelo e Rokekila, oia hoi ka inoa ponoi o ka hoaloha o ke keiki opio a kakou e kamailio nei.

            Oia no ka wa i ike ia aku ai o ka maaloalo mai o na koa ponoi oloko o ua Kakela ala me ka lakou mau laau ihe e wanaoa ana maluna ae o ko lakou mau poo me ka hiehie nui o ko lakou kulana.

            A i ko lakou wa i hookokoke ioa mai ai, he mau anana wale no ke kaawale mai ko lakou haku aku, aia hoi, ua haawi koke ae la lakou i na hooho hauoli ana, a ua wawalo aku la hoi ko lakou mau leo hooho hauoli me he leo la no ka hekili pamalo i ke kau.

            A o keia hoi ka wa i hoopuni ia ae ai o lakou a pau, a kaa iho la laua iwaenakonu, a pela iho la lakou i hoea aku ai mamua iho o ke alo o ke Kakela, ka home hoi i kaena mau ia e na malihini, ka punana o ka maluhia a me ka home o ka wiwo ole.

            I keia wa no hoi i kauoha koke ae ai o Rokekila i kona mau kanaka e hookuu iho i ka opio malihini mailuna iho o ka lio ana e kau ana.

            Aka mamua nae o ka hooko ana mai o kona mau kanaka e hana pela, ua lele mua aku la ka opio mai luna aku o ka lio ana e kau ana, a ku aku la kona mau kapuai iluna o ka honua me ka poino ole.

            A me keia ano hou i hoi mai la ka ikaika iloko o ka opio, ka mea nana i hoohauoli nui mai i ka manao o ka haku nona ke Kakela.

            A oia hoi ka laua i komo like aku ai mawaena o na pualikoa, noloko o ke Kakela, ka mea hoi a ka opio e nana nei mao a maanei, ua komo mai la na manao hauoli iloke ona me ka makemake pu.

            A oia hoi kana i puana ae ai me ka leo malie, e hoonani ia na lani kiekie loa, no ka hookomo ana mai i na manao aloha iloko o keia kanaka i pilikana ole mai ia'u, a i hooliloia mai hoi i hoopakele no keia kino nei i piha i na kaumaha a me na luuluu o keia noho kino ana.

 

 

KUAI HOEMI NUI O NA KINAMU, KALAKOA ME MAKALENA.

 

Na Kinamu Lilina e Kuai ia ana he 10, 12, 14 a me 16 i-a i ke 1.00

Na Makalena Laalaau hou Loa he 6, 7, 8, 10 a me 16 i-a i ke 1.00

Na Kalakoa Merimaka he 20 i-a i ke 1.00

Na Kalakoa Amerika he 25 i-a i ke 1.00

Na Oganadi ua hoemi i ia ke 20 keneta o ka i-a

 

Eia makou ke kuai hoemi loa nei i na Waiwai a pau me ka nana ole ae i ka nui o na poho.  Nolaila, e hele mai a e ike no oukou iho.

 

BF. EHLERS & Co.

 

 

            Aka, ano, ua loaa hou ia'u ka lanakila, a ke hoi hou mai ka ikaika iloko o ko'u mau laia, alaila, aole loa au e hoi hope ana mai ka hu'i ana i ka mea nana au i hoomaewaewa ma kahi e hiki ole ai i ko ke kanaka uhane ke ola elike me keia wahi a'u i hoomanawanui ai.

            E ike aku ana kakou i ka hooko ia ana oia mau olelo a ka opio ma keia hope aku, i panai hoi no kona hoopaahao hewa ia ana.

            Huli ae la kona mau maka mao a maanei o kahi a laua e hele aku nei he like wale no mai Kaena a Waialua, ka luluu o ua Kakela la i na mea hoonani o kela a me keia ano e kuuwelu mai ana.

            A na keia mau ano hoi i hoololi awiwi ae i kona kulana haikea, a i ka ula makaweo o kona mau helehelena, me he mea la, ua hala aku la na la o ka noho mea ana.

            A i ko laua kaa pono ana aku hoi iwaena o ke kino, ia wa laua i huipu aku ai me na aliikoa kiekie loa o na pualikoa e ku pohai ana iwaenakonu o kekahi pakaukau poepoe iloko o ua rumi la o ka hana no ka pono o ko lakou haku, a me ka lehulehu a pau e maalo ana ma ia mau kuahiwi, i noho mana ia hoi e ua pohai la o ke aloha.

            Iwaena o keia poe aliikoa a pau e ku nei iluna, aia he hookahi wahi kanaka ano e loa iloko o keia poe a oiai, ma ka hoomaopopo maoli ana aku i kona kulana, ma o kona mau hoailona e kau ana malua o kona mau kipoohiwi, a me na kea hoohanohano e kau ana ma kela a me keia aoao o kona umauma, me he mea la, e hoike okoa mai ana ia mau luhiehu maluna ona, oia no ka alihikaua nui maluna o keia poe a pau e kuku nei iloko o ka rumi hooluolu a ua Kakela ala.

            O keia wahi kanaka kupanaha a kaua e ike la, oia no ka mea mua loa i haawi ae i kekahi hoailona no ka haawi ana aku i ko lakou aloha i ko lakou alii a haku hoi o ke Kakela.

            A iloko o ka imo anu a ka maka aia hoi, ua ike like ia aku la ka pii like ana ae o ka maka o ka lakou mau pahikaua, a hoohonua iho la mamua o ko lakou mau umauma.

           

            A o keia no hoi ko laua wa i kaalo iho ai mamua o ua poe nei a hala aku la noloko o ka rumi a kona ohana e kali mai la no kona hoi aku.

            A oiai laua e anehe aku ana e komo iloko o kahi a ka ohana e noho mai ana, ua paa aku la oia i ka lima o kona hoaloha a pane aku la oia penei:

            Ua hoopahaohao nui ia ko'u noonoo, mamuli o ko'u ike ana aku nei aia iwaena o ka pohai o kou mau aliikoi, kekahi wahi aliikoa ano e o kona kulana, a me he mea la, ma muli o kona kulana ano e, a me kana mau hana hookalakupua, i aahu ai oia i na kahiko hoohanohano he nui maluna o kona mau poohiwi a me ka umauma.

            Ua hoike mai kona ano i kana mau hana ano e maluna o kona oiwi kino, ka mea hoi a'u i koho ai, oia kou pukaua nui.

            Na keia mau olelo i hoaui ae i na kaulona ana a ka haku o ke Kakela maluna ona, me ka aui pu ana ae o kona poo, a pane mai la:

            He oiaio, ua hookomo mai nei oi i na manao hoohuoi iloko o ko'u puuwai, ka mea hoi e hiki ole ai i ko'u lunaikehala ke aua iho i ka hoike ana aku ia oe i ka mea pololei a me ka oiaio pu,

            Oia hoi, o ua wahi kanaka pahaahao au i loko mai la, he oiaio o ka pukaua iho la no ia o ko'u mau pualikaua, nana e paa nei ka maluhia ma keia uka iu ano.

            A oia hoi ka'u e hoike aku la ia oe, he lua ole ke kupanaha o kona ikaika a me ka wiwo ole o kana mau hana, ka mea a'u e hoike aku ia ia oe, aohe ona lua elike ai ma ka honua.

            A oiai hoi, e hookamaaina iho ana kaua no kekahi manawa, i loaa ai ia oe ka ikaika kupono e hiki ai ke huli a hooko aku i na hoopai kupono maluna o ka mea nana oe i kumakaia mai kou ohana mai, me ke kaumaha a walohia hoi.

            A oia hoi ka'u e kanalua ole nei i ka hoike aku ia oe, mamuli o ke aloha oiaio e paa nei iloko o kou puuwai, ke awaiaulu nei au i ko'u

 

            puuwai me kou no ka wa e mau ana ke ola iloko o kaua.

            Na keia mau oleli i hoihoi hou mai i ka ikaika iloko o kona kino me ka piha i ka hauoli, a aie hoi @ kokoia o ka manaolana iloko ona, e hoea mai ia manawa.

            Huli ae la laua a komo aku la ma kekahi rumi aku, kahi hoi a kona ohana e noho mai ana, a oia hoi kona wa i hula mai ai a hoolauna mai la i kona ohana imua oia nei.

            A me ia aho i apo mai ai lakou ia ia me ke aloha, a iloko o na kukai pokole ana, ua pahola ia mai la he papaaina i hoomakaukau mua ia no ka wa e huli hoi aku ai o ko lakou aku o ka ohana mai kana huikai hele aku.

            A o keia hoi ko lakou wa i kamau like iho a, e hoolawa ana, na mea e pono ai ko lakou noho ana.

            Me keia ano iho la i hoohala ai ke Keikialii i kona noha ana ma ke Kakela o kona hoaloha oiaio. a oiai hoi na la e omamaka hou mai ana ka ikaika iloko o kona mau lala, elike me ka wa mamua iho o kona powa malu ia ana.

 

 

HE KUAI HOOPAU NUI LOA.

 

Lihilihi, Libine a me na Lole Aahu

......MA KAHI O......

L. B. KERR

No Hookahi Pule Wale No.

 

Na Lole Huluhulu Farani, mamua 50 keneta, i keia wa 25 keneta o ka i-a.

Na Oganadi Farani Ano Hoe 5 keneta o ka i-a.

Na Kalakoa Nainsooks, 5 keneta o ka i-a.

Na Lole Keokeo o kela a me keia ano, he 5 keneta o ka i-a.

 

O Keia mau Waiwai he Emi

 

No laila, e komo mai, a e kuni no oukuo iho.

 

L.B. KERR.

Honolulu, Alanui Moiwahine. Honolulu

 

 

 

C.W. KINNEY.

 

            He Loea ma ka Hana Umeke, moe, pakaukau, a pela aku, ka hoomaikai hou i na mea nohaha, ka hoohinuhinu ana me ka maikai loa.  E hana ia no ka makemake o kela a me keia me ka emi loa o ka uku.

            E loaa no wau ma ko'u hale hana, ma ke kihi o alanui Moi a me Alapai

                                                                        sept 26 - 3m. diy*

 

E HOOLILO IA AKU ANA!

 

            He hookahi Moku Kiakahi nona ka loihi he 20 kapuai, laula o ka oneki he 7 kapuai a oi, me ke Kia a me na Pea a pau.  A i kupono loa i waa pa la wala.  E ninau ia

                                                                                    J.J. DOWER.

            Ma ka Hale Kamana o ka Hui o Waila ma.                             sept 29 - 1wk

 

HOOLAHA PAPA AINA.

 

            Ke hoikeia aku nei ka lohe i na poe a pau, e noho ano ma ka lele o Auwaiolimu, e waiho nei ma Kakaako, he aina leialii hoi i lilo mai ia'u ma ka hoolimalima no 15 makahiki mai ka Moiwahine Kanemake mai Kapiolani.  ua kapu loa ka hele ana a malama i na holoholona malua o ua aina la, o ka poe he mau holoholona ka lakou e malama nei, e hookaawale koke aku iloko o 15 la mai keia wa aku, a ina aole pale e hana no au elike me ke kuhikuhi a ke kanawai.  E hoolohe e na makamaka i keia, o poino auanei.  A ke papa pu ia nei hoi na ano kanaka a pau i ke komohewa ana maluna o na aina la, a me ka pahale a'o e noho nei, a ke hookohu nei au ia Maikui i Hope no'u e hooko ai i na hana a pau ma ko'u inoa elike me ke kanawai.  D. KAHANU.

            Kakaako, Augate 29, 1898.

 

OLELO HOOLAHA.

 

            Ke papa ia aku nei na ano lahui a pau mahope o ka napoo ana o ka la, aole e hele a komo wale maluna o ka mahi raiki o Lok Sing Wai & Co., ma Waialae, apana o Kona, mokupuni o Oahu, ke ole e lawe pu me na ipukukui, no ka mea, ua nui loa ko makou poino i ka pau o na mea hooulu i ka aihueia.  Ina e kue ana i keia hoolaha me ke kue i ko makou pono e hoopii no makou ma ke kanawai o ka aina, a ina e hoolohe ole ke kahea ia aku a holo, e kiia no i ka pu no ka aihue.  A ma keia e mau no ka mana o keia hoolaha e like me ka nui o ka manawa o ka Hui.

                                                                                                            LOK SiNG WAI & CO.

                                    Waialae, Sept 5, 1898.