Ke Aloha Aina, Volume IV, Number 42, 15 October 1898 — Page 8

KE ALOHA AINA

POAONO, OKATOBA 15, 1898

 

HE MOOLELO WALOHIA

 

––:NO EE:––

 

Keikialii Alabati

 

Ke Kaeaea o Pelekane

 

––:A ME KA:––

 

Ui Madelina.

 

Ke Kukui Uwila o Ainapo

 

@ no KE ALOHA AINA

 

Elike me ka hoi hou ana mai o ka ikaika iloko o kona mau lala, ua ike pu ia aku la hoi ke kauhola ana ae o ka ula makalapua maluna o kona oiwi kino popilikia o na la o ka ehaeha.

Hoi hou mai la na la o ke kanaka ui a kau pono iho la maluna ona, i oi palua aku hoi i ka wa mamua iho o kona hopu pio ia ana.

Na keia mau hiona ano hou e mohala nei maluna o ka kaua opio, i hoopaa loa aku i ka manao hiaai iloko o Rokekila, me ka hoike pu mai hoi i kona hilinai nui iaia ma na ano a pau.

I kekahi awakea mahope iho o ka pau ana o ka lakou paina awakea, ua hoi aku la ka opio a me ka Haku Rokekila, noloko o ka rumi hoahu o kana mau mea kaua, kahi hoi e ka-kau ana o na kapa kila o kela a me keia ano, na pahikaua, a me na laau ihe.

Ia laua nae e nanea nei maloko o keia rumi, me na olelo hoohauoli mawaena o laua pakahi iho, a ua hoomaka mai la hoi ka Haku Rokekila e kamailio mai, aka, ua hoopioo ia ae la nae laua a elua e na leo hooho mawaho mai:

Pau ke Kakela i ke ahi e!  Pau ke Kakela i ke ahi e!!

I ka wa i komo pono aku ai keia mau leo hooho iloko o ka rumi a laua e noho nei, a oiai hoi, ua lohe pono aku la no laua i ka leo hooho mawaho mai, a oia no hoi ko laua wa i ku like ae ai iluna, no ka hele ana e kinai i ke ahi e hooho ia ana e kona poe kanaka me ka manao he ahi io.

A oia no ka wa i hooho hou mai ai na mea a pau, auwe ka nani e.

Na keia mea i hoaui ae i ka nana ana maluna o kona kokoolua, a ia wa no oia i hoomaopopo iho ai, aole ka he ahi maoli keia a kona poe kanaka e noke nei i ke kahea, aka no kona hoaloha opio no ia.

A oia kana i puili ae ai i kona mau lima ma kona umauma, a pane mai la me ka leo i piha i ka hauoli, ka i ana mai:

Aole ka keia he ahi maoli e hoopau ana i ke Kakela nei, aole hoi i kona mau paia nani, aka he hooi ana aku i ka ulumahiehie oloko nei o ke Kakela.

 

 

 

KU’AI HOEMI NUI O NA KINAMU, KALAKOA ME MAKALENA.

 

Na Kinamu Lilina e Kuai ia ana he 10, 12, 14 a me 16 i-a i ke 1.00

Na Makalena Laalaau hou Loa he 6, 7, 8, 10 a me 16 i-a i ke 1.00

Na Kalakoa Merimaka he 20 i-a i ke 1.00

Na Kalakoa Amerika he 25 i-a i ke 1.00

Na Oganadi ua hoemi i ia ke 20 keneta o ka i-a

 

Eia makou ke kuai hoemi loa nei i na Waiwaia pau me ka nana ole

ae i ka nui o na poho.  Nolaila, e hele mai a e ike no oukou iho.

 

B. F. EHLERS & Co.

 

He oiaio, o kou nani i keia wa a kaua e kamailio nei.  ua pii paumi ae ia i kou wa i hoea mai ai ia nei, a’u hoi e olelo ae nei, aohe kanaka maluna o ka honua holookoa i like aku me oe ka ui, a i keia wa hoi, ke hoopau nei au i ko’u man@ manao pihoihoi, mamuli o ke kuhihewa o ko’u poe kanaka, he ahi eia iloko nei o ke Kakela.

Na keia mau olelo a kona hoaloha i kaulona pono aku i kona mau nanaina piha hauoli maluna o kona hoa, e hoike aku ana hoi, ua kulike ia mau olelo, me ka mea e loku ana iloko o kona puuwai.

A oia no hoi ko laua wa i hele holoholo aku ai mamua iho o ke alo o na koa e ku mai ana mamua o ko laua mau alo, a oia no hoi ka wa i hooho mai ai lakou me na leo o ka hauoli, i ka puana ana mai me ka leo hookahi wale no:

E ola mau loa o Rokekila ka haku aloha o ke Kakela nei, a pela koi me kona hoaloha opio, ka ui o ka hulu o ka manu Okalika.

Ua ike ia aku ia hoi na ouli nani e puapuai mai ana me he ua koko la e uhi ana maluna o ka opio, mamuli o kona noonoo ana ae, o lakou aku kona mau hoahanau ponoi nana e hooko i kana mau mea a pau i makemake ai ma keia mua aku.

Ua noho iho la laua maluna o kekahi noho loihi, malalo o kekahi kumulaau apala nani, i hele kona mau lala a luluu i ka hua ke nana aku.

O keia no hoi ka wa i ike ia aku ai o kahi kanaka peke i kona hele ana ae a ku iho la mamua o ke alo o kona haku, a elike me ka rula maa mau i na aliikoa, ua huki mua ae la oia i kana pahikaua mai kona wahi ae, e hoike aku ana imua o kona baku, i kana mau haawina i kauoha ia ai, me ka pohai o kona mau aliikoa e ku ana mahope o kona kua.

Aia hoi kana hoike hana a pau ke moe lolii ala ia imua o ke alo o ka haku Rokekila, a oiai hoi oia e nana pono ana i na mea a pau, a ma konana hoomau loa ana no elua a ekolu manawa, nana i hoohaliu pono aku i ka nanaina o kona mau aliikoa maluna ona.

A oiai oia e leha pono iho ana, ua ninau koke aku la oia me ka awiwi, i ka i ana aku:

Alaila ua ike maopopo loa oukou i ke alii powa a me kekahi wahine pio e alakai ia ana e na koa, me ka paa o kona mau lima i ka hao?

Ae, ua ide aku makou i ka maalo ana ae mamua o ko makou alahele, ia makou e hoomaha ana maluna o kekahi ahua.

Alaila, ua ike 10 anei oukou he kino wahine kekahi e lawe pu ia ana me lakou?

Ae, ua ikemaka makou, he wahine opio i like loa kona nani me ko keia opio e ku iho la ma kou aoao, a me he mea la ma ko makou aoao, o kona hoa maoli no ia e lea ai ke kaunu ana ilaila, he opio no he opio kohu ke kaunu ana.

Na keia mau olelo i puka mai la mei ka waha pakahi mai o kela a me keia aliikoa, nana i hoano e ae i na helehelena o ke kanaka opio.

A ike pu ia aku la hoi ke emi hikiwawe ana aku o ka ula ohelohelo o kona mau papalina kohu ahi i na minute mamua iho a i ke aiai i ano like me ka hau.

Na keia ano e i hookomo aku i na manao hoohuoi iloko o Rokekila a me kona mau aliikoa pu hoi, i ka loaa hou ana aku he mau mea e hoomanao hou ai no kona wa e hoopaa pio ia ana.

Huli mai la o Rokekila a pane mai la i kona hoaloha opio, me ke kunahini o kona nanaina, me he mea la, oia pu kekahi e auamo nei i ko ka opio mau ehaeha ma keia noho kino ana.

Ano, ke ike aku nei au i kou ano ua loli ae ia mai ka hauoli a i ke kaumaha kuhohonu, mamuli wale no o kou lohe ana i na hoike a ko’u mau aliikoa no ka lakou mau hana maa mau.

Aia nae iloko oia hoike hana, i hooulu hou mai i ka nawaliwali iloko ou, ka mea hoi a’u e ahewa nei ia’u iho, no ko’u lawe pu ana mai ia oe e lohe i na hana maa mau o ko makou noho ohana ana ma keia uka.

Aole ia o ke kumu nui o ka helelei ana aku la o kela mau hiona nani a oukou i ike mua iho nei, aka, aia no ia ma hahi a’u i lohe aku nei no ka mea e pili ana i ka wahine opio.

O ua mea la, aole ia he wahine i kaawale mai a’u aku, a’u hoi e hoike aku nei imua ou me ke kanalua ole o ko’u hoapili ia o keia noho kino ana, i hoohui ia ma ka materemonio o ka noho ana kane a wahine hoi, elike me ko oukou noho ana.

E kuu hoaloha opio, e uumi i kou mau manao kaumaha, eia kaua i ka wa o ka hana, ua hoea mai la.

Mamuli o na hoailona i kamaaina mau i kona mau aliikoa, a oia no hoi ka wa i ike ia aku ai o ke ku ana no o kahi aliikoa pahaahaa iluna, a hoawi koke aku la i na kauoha i kona mau ukali.

Ua lohe ia aku la ka leo kahea o ka o-le hoomakaukau no ke kaua, a ike ia aku la hoi na koa maluna o ko lakou mau lio kaua e holo pololei mai ana no ke Kakela, mai na wahi like ole mai oloko o na ululaau.  e kamoe pololei mai ana no kahi a ka leo o-le e hone nei.

O keia no hoi ka wa i hoaho like mai ai o na koa, me ke kahea pu ana mai, e haawi koke mai i na he manawa keia no ka hoohana ana i ka makou mau pahikaua.

 

He nui na luina Iapana i kepa aku la no ka mokupea Iolani.

Ua hoopau ia o Peahi mai ka oihana makai  aku ma ka Poaha nei, no ka lawe ana i kekahi paa kamaa mai ka hale rama aku.

He 14 mau koa ma’i huli hoi aku no ko lakou mau home, maluna o ka mokuahi Penesalevania mai ka haukipila koa aku.

Eia ka aha Kuhina ke noonoo nei no ka wehe hamama ana i na puka o na hale inu rama, a e hiki ai hoi i na poe e maalo ae ana ma ke alanui aupuni ke ike aku i na poe e inu ana maloko.

Maluna mai nei o ka mokuahi Mogul i hoea mai nei ma ke Kakahiaka o ka Poaha nei, mai Iapana mai, ua lawe hou mai la oia he mau limahana no keia awa, he 412 kane, 134 wahine a me 13 keiki, a ua laweia aku lakou no ka pa hoomalu.

 

B O R O K A,

 

$10,000                                             MA  KA                                                   $10,000

 

W A I W A I P A A

 

Ua makaukau e Hoale aku ma ka Moraki i ka poe a pau, he mau Waiwaipaa hihia ole ko lakou.

Ua makaukau e huli maloko o na Buke Aupuni, i na Aina pohihihi ma na ano a pau a me ka hooponopono ana i na Aina e paaia nei me ke kuleana ole.

Ua makaukau e hana i na Palapala Kuai, na Palapala Hoolimalima, na Palapala Moraki a me na Palapala o kela a me kela ano i ku i ke kanawai.

E ohi la no na Ale o kela a me keia ano ke waiho ia mai.  E hookoia no na kauoha me ka eleu.

Ke kono ku nei i na makamaka a pau e kipa mai ma ko maua Keena Hana, ma ka Hale ma Ewa o ka Hale pule o Kaumakapili, Alanui Beritania,

JOHN PRENDERGAST, (Kapamawaho.)

WILLIAM MOSSMAN, (Mokimana)

 

Honolulu , Mei 24, 1898                                                               3 m   dl   wk

 

HOOLAHA  PAPA  AINA.

 

Ke ho keia aku nei ka lohe i na poe a pau, e noho ano ma ka lele o Auwaiolimu, e waiho nei ma Kakaako, he aina leialii hoi i lilo mai la’u ma ka hoolimalima no 15 makahiki mai ka Moiwahine Kanemake mai Kapiolani.  Ua kapu loa ka hele ana a malama i na holoholona maluna o ua aina la, o ka poe, he mau holoholona ka lakou e malama nei, e hookaawale koke aku iloko o 15 la mai keia wa aku, a ina aole pela, e hana no au elike me ke kuhikuhi a ke kanawai.  E hoolohe o na makamaka i keia, o poino auanei.  A ke papa pu ia nei hoi na ano kanaka a pau i ke komohewa ana maluna o na aina la, a me ka pahale a’u e noho nei, a ke hookohu nei au ia Maikui i Hope no’u e hooko ai i na hana a pau ma ko’u inoa elike me ke kanawai. 

D. KAHANU.

Kakaako, Augate 29, 1898.

 

HOOLAHA  HOOPAU  HOOKOHU  HOPE.

 

Ina kanaka a pau e ike ana i keia, owau o Hooipo (w), no Kalaupapa, mokupuni o Molokai.  Ma keia ke hoike aku nei au ma ke akea, ke hoopau loa aku nei au i ko J. U. Uahinui noho hope ana no’u e hooponopono i ko’u mau Waiwai Paa a Waiwai Lew a waiho ana ma ka mokupuni o Molokai, a o ka Palapala Hookohu hope a J. U. Uahinui i hanaia ma ka la 15 o Sept. 1897, ke hoopau loa aku nei au i ka mana oia palapala.

 

HOOIPO (w).

Kalaupapa, Molokai, Aug. 25, ‘98

sept. 3—1 m

 

C.  W.  KINNEY.

 

He Loea ma ka Hana Umeke, moe, pakaukau, a pela aku, ka hoomaikai hou i na mea nohaha, ka hoohinuhinu ana me ka maikai loa.  E hana ia no ka makemake o kela a me keia me ka emi loa o ka uku.

E loaa no wau ma ko’u hale nana, ma ke kihi o alanui Moi a me Alapai.

sept. 26—3m.  dly.