Ke Aloha Aina, Volume IV, Number 45, 5 November 1898 — Page 1

KE ALOHA AINA

UA MAU KE EIA O KA AINA I KA PONO

HOOKUMUIA I MEI 20, 1895

BUKE IV.      HONOLULU, POAONO, NOVEMABA 5, 1898.  HELU 45.

 

KA NUPEPA KE ALOHA AINA.

            E hoopuka mau ia aku ana mai ka Poakahi a ka Polima o na pule a pau o kela a me keia mahina.

            Ka Uku Pepa, he 20 keneta o ka pule. No ke kope hookahi, he 5 keneta.

            E loaa no ka pepa maike Keena aku o KE ALOHA AINA, a mai ka lima aku o na Luna Lawe Pepa.

            E pai ia no na Olelo Hoolaha, na Kanikau a me na Mele Inoa, me ke Dala kuike. Aole nupepa ma ka owili pakahi e hoouna ia ke ole e hookaa mua ia ka uku pepa

            E hoouna pololei mai i na Nuhou na Kumumanao, na Olelo Hoolaha, na Kanikau a me na Mele Inoa i ka Lunahooponopono o keia Pepa.

            Aole loa e hoopuka ia a hoolaha ia kekahi manao ma na kolamu o keia Pepa, malalo o kekahi inoa kapakapa ke ole e hooike mai i ka Lunahooponopono i kona inoa ponoi.

            Ka Nupepa Puka Pule

 

Ke – Aloha – Aina

            Hookahi makahiki...........................................$2.00

            Eono mahina...................................................$1.00

            Ekolu mahina..................................................    .50

            Hookahi mahina..............................................   .20

EMMA A. NAWAHI.

Puukuo

Ke – Aloha – Aina

EDWARD L. LIKE.

Lunahooponopono a Hope Puuku

S. P. KANOA.

Hope Lunahooponopono

O na kauoha Nupepa me na hookaa

Dala, e hoona pololei mai i ka Puuku ma Honolulu.

 

Nuhou Kuwaho.

            Ma ka Auseteralia o ke kakahiaka nui Poaono nei, i loaa hou mai ai ia makou na nuhou o na aina e, a oia iho keia:

E HOEA IO MAIN ANA ANEI KE KAUA?

            Ladana, Oct. 21. He lono kai loaa mai nei i ka Hui Exchange Telegraph mai Portsmouth mai, e olelo ana, ua hoopuka ae la ka Adimarala Berritania he kauoha i na pa kapili moku, aole e hoomaka ia ka hoomaemae ana i na aumokukaua e ku ana, koe wale no ina e hiki ana lakou ke pau i ka hoomaemae maloko o kanaha kumamawalu hora.

KE HOOMAKAUKAU LA O FARANI.

            Paris, Oct. 21. Ua hoopuka ae la ka nupepa Temps i keia la he lono mai Nantes mai e olelo ana, o ka mahele eha o na bataliona koa o ka puali Iwakalua kumamakahi e noho ana ma Nantes, ua hoolako pono ia lakou me na lako kaua. Ua hoolawa ia ke kanaka hookahi me 120 puni poka, a o na aliikoa o na regimana na hoolako ia aku lakou me na poka pu panapana. Ua makaukau keia mahele no ka nee ana aku i ka wa e loaa mai ai o na kauoha, a ua manao ia no na pale kahakai keia mau koa. Aia ke kukulu ia la na pale ana no St. Nazaire.

PII KA INAINA O NA KANAKA IA DIUWE.

            Manila, Oct. 21. Aia na kanaka iloko o ka piha inaina ia Adimarala Diuwe, no ka hopu ana i na mokuahi o Aguinaldo, a oia lakou iloko o ke kulana hooweliweli.

            Eia ke pii mahuahua nei na hana aihue maloko o Manila, a ua hoopoino ia na aliikoa a me na poe kuonoono. O ka hapanui o keia poe aihue he pake a me na kanaka.

NA KOA HOOHAUNAELE.

            Kapalaakiko, Oct. 21. He puulu nui o na koa hoohaunaele Tenesi a me Iowa, no lakou ka huina o kanalima, i komo aku iloko o ka hale hulahula Eureka, ma ke alanui Kearney, ma ka po nei, a wawahi aku la i na mea oloko. O kahi mua a lakou i kipa aku ai oia no kahi kuai rama, a iloko o na minute pokole, ua pau iho la na mea oia wahi i ka hoopoino ia a mahope iho oia manawa, ua nee aku la ka lakou hoopoino ana i na mea hoonani o ua hale la. He umi oia poe hoohaunaele i paa i ka hopu ia.

            E kipa mai ana keia mau koa Tenesi a me Iowa maanei ma ko lakou alahele no Manila, a me he mea la, aole no e nele ko lakou oalaala ae maanei, oiai, he ano kuee lakou i na koa Nu Ioka pela mai ka hoike mai a kekahi koa Oregona ia makou.

            Ua hoopaiia o Moses Kalua no ka hoao ana e apuka he $10 mai ka Hui Kaa Hapaumi, he eono mahina hoopaahao.

 

KA HOME HOU O KA ONA MILIONA, JAMES CAMPBELL.

(Mai ke Cali mai.)

            San Jose, Oct. 21. O ka hooliloia ana aku o Hotele St. James ia James Campbell, ke kanaka waiwai nui o Honolulu, ua hoolala ia i keia wa, a o ka hooliloia ana aku oia waiwai, e hana ia maloko o hookahi mahipa. I keia manawa aia o Campbell i na mokupuni, aka, e huli hoi koke mai ana no oia, a oia ka manawa e hooko ia ai. O keia lono ua hoike ia ae ia ma ka hotele i keia ahiahi. Aole nae e hoikeia ana ke kumukuai i keia wa i ke akea.

            O keia hotele i keia wa he waiwai ia no na kahu o ke Kula Nui o Kaleponi, i lilo ia lakou ma ke kuai akea ia ana, he mau mahina i hala ae nei no ka hooluolu ana aku i kekahi moraki o $75,000 i hanaia me ka hui hoaie Lick.

            Ua hoohala ae o Campbell a me kona ohana i kekahi mau manawa maanei no kekahi mau makahiki i hala ae nei, a ua oleloia ae e hoolilo aku ana laua i keia wahi i home no laua ma keia mua aku. O ke kuai ia ana o keia hotele, ua manao ia, o keia ka mua loa o ko keia kanaka waiwai kuai ana i kekahi waiwai paa ma San Jose.

            He mea hauoli no makou ka ike ana iho i kekahi kanaka waiwai o ka aina nei, e like ae la me James Campbell, ka hoomohala ana aku i kona noho’na ulakolako ana ma na aina e.

 

NA MOKUKAUA OREGON A ME IOWA.

            Nu Ioka, Oct. 12. I keia la i haalele iho ai na mokukaua Oregona a me Iowa malalo o kekahi kauoha i sila ia mai. Wasinetona mai. He nui na kohokoho no ke alahele a na makukaua i holo aku ai. Ua olelo mua ia ae o holo pololei aku ana laua no Manila, aka, ua kanaina ia nae keia mau hoike, a no Honolulu ka laua huakai i manao ia ai, a malaila i manao ia ai e holo aku  ai no Manila, no ka hoomahuahua ana ae i ke kulana ikaika o Adimarala Diuwe. O Kapena A. S. Barker, ke kapena o ka Oregona, a o Kapena Silas Terry hoi ko ka Iowa. Ua ukali aku la na moku lawe nanahu Scindia a me Ciltic i na mokukaua no waho o ka moana.

 

PAA KA LIMAKOKO I KA HOPU IA.

            Ua loaa mai nei ka lohe maluna o ka mokuahi Kinau, ua loaa aku la ka limakoko nana i lawe i ke ola o kekahi luna o na limahana mahiko o Waiakea, Hilo. He elua pake i hopu ia, a me he mea la, e hookau ia aku ana ka hoopai o ke degei e ekahi o ka pepehikanaka maluna o laua. He $100 dala makana i haawi ia ae o ka mea e paa ai o ka lawehala, a he makai kanaka ka mea nana i hopu i ka puuwai eleele.

            O keia luna o na limahana mahiko, he haole Sekotia oia, nona ka inoa o Duguil. A o kona hiki ana aku la no hoi ia ia hui mahiko, no kekahi mau la pokole ae nei. A o ke kumu i ulu mai ai o keia hana manaonao, mamuli no ia o ka hoea ana ae o kekahi mokuahana mawaena ona a me na limahana pake malalo ona.

 

LELE ILOKO O KE KAI A NALOWALE.

            He lono kai loaa mai nei maluna o ke Kinau, ua lele aku mailuna aku ona he pake lawehala no loko o ke kai, a nalowale loa, nona ka inoa o Ah Hoi, i hoahewa ia no ka malama opiuma ma ka ahahookolokolo o Kohala, a e hoihoi ia mai ana oia i Honolulu nei. Aole i hoike koke aku ka makai e kiai ana i ka paahao i na limahana o ka moku i ka lele ana o ka paahao iloko o ke kai a hiki i ke kaawale loa ana mai o ka moku ma kahi a ka pake i lele ai.

            Ua huli hoi hou aku ka moku i ka pake paahao, aka, o ka papale wale no kai loaa aku e lana ana iluna o ka ilikai, me kekalu mano nui e holoholo ana malaila, a ua manao wale ia, ua pau oia i ka alapoho ia e keia a’a nui. Ua hoopau ia aku ka makai i hoouna pu ia mai ai me ka paahao, mamuli o kona kiai pono ole i kana lawehala. O ka wa i hana ia ai o keia hana, i ka manawa no ia o ke Kinau he mau mile ka mamao mai ka aina mai.

 

LOAA O ALDRICH MAKAI O IWILEI.

            Ma ka hora 1:30 o keia wanaao Poakahi, ua paa iho la i ka hopu ia o Ed. Aldrich, maloko o kekahi rumi holoi lole ma Iwilei iho ae nei, mahope hoi o kona pee ana iho nei no aneane umi la.

            O keia ka haole a ke aupuni i huli houmaha ole iho nei i keia mau la iho nei, ka mea hoi nana i hana i kekahi mau pepa, dala apuka i ike ia ai maloko o kekahi hanako a maloko o kekahi mau halekuai pake, a i hooiaio loa ia hoi nana i hana keia mau hana kolohe, i ka wa i loaa aku ai o kekahi mau lako peahana a me na dala pepa apuka maloko o kona rumi.

            I keia manawa eia oia ke paa nei maloko o ka halewai me ke kali ana no ka wa e hoolohe ia ai o kona hiahia, a ua hoole ae oia i kona hewa imua o na makai. He eha ka nui o na makai i hele pu aku malalo o ke alakai ana a Charles Chillingworth a hopu iho la i ka lawehala.

 

E HOLO AKU ANA NO HILO.

            Eia ke lohe ia mai nei, e haalele ho ana kekahi mau mahele koa Nui loka, oia hoi na puali Kame Meia Honolulu nei no Hilo, no ka hoohala ana he mau la malaila ma keia mua koke iho.

            Mahope o ko lakou hoomaha iki ana malaila, e pii loa aku ai lakou no ka luaopele, no ka hoomaamaa raikai ana a me ka makaikai pu ana i ke kulana oia aina a lakou i lohe nui ai. E hoolako ia ana lakou me na lako kaahele mama, a ina e holo io aku ana keia mau puali i Hilo, alaila, ua lilo ia Hawaii ka ike mua ana i na koa Amerika, mamua o kekahi mau mokupuni e ae mawaho aku o Oahu nei.