Ke Aloha Aina, Volume IV, Number 52, 24 December 1898 — Page 7
| This text was transcribed by: | Mahealani Jones |
| This work is dedicated to: | No 'Oiwi Parker Jones, he kanaka malama i ka 'olelo. |
KE ALOHA AINA
POAONO, DEKEMABA 24, 1898.
@ PUUWAI
NO KA:
UI MINEWA.
A ME NA” KAIKUNANE EIWA
I Hooliloia i mau Manu Nene Ahiu a i ole na Keiki i Hoehaehaia
Kakauia no KE ALOHA AINA
MOKUNA IV.
O Minewa iloko o ka Ehaeha.
Na keia mau hauolelo makona i puka aku mai ka lehelehe aku o ke aliiwahine i hoohaalulu ae i na kuli o ka moi, a ikeia aku la na helehelena haikea e hekau ana maluna ona, a ua like hoi keia mau huaolelo awaawa i puai aku mai ka waha aku o ka wahine lokoino, me he pahi oilua la i hou pololei ia aku iloko o kona puuwai, ka walania.
A i keia wa no i helelei iho ai na waimaka o ka moi me ka haliu ana aku o kona mau maka maluna o kana lei aloha, a me he mea la, e hoike okoa aku ana no, he aloha no au ia oe, aka, aole nae au e hookuu aku ana i kuu nohoalii.
I ka hala ana ae he mau sekona o kona haka pono ana aku maluna o kana kaikamahine, ua
ike no oe he aloha no au ia oe, aka o ka oi loa ae nae maluna ou o kuu nohoalii no ia, a nolaila, heaha ka’u e hana aku ai no kou pono i keia wa ano.
E kuu papa aloha, ina ua oi kou aloha i kou aupuni a me kau wahine, aole au mea e hana mai ai no’u, e hoi hou aku no au no ko’u alahele i hele mai ai i piha hoi i na poino a me na po pilikia.
A mahope e ke ku@ ana iho o ka @ko o ua Minewa nei, ua ikeia aku la kona mau waimaka e hiolo ma kawalu mai ana ma kona mau papalina, a ua lilo hoi keia mau sekona ehaeha loa nona, oiai, ua halialia hou mai la iloko ona, aole oia e noho ana iloko o ka hale nani a kona makuahine i hala e aku la i ka make i heomakaukau ai no kana mau lei aloha, me ka mahui mua ole ae hoi he mea okoa aku ana ka mea nana e hehihehiku ana i kona mau papahele kapu, a e hoolilo ia ana hoi kana mau pulapula i aeahaukae e auwana hele ana maluna o ka ilihonua me ka loaa ole he wahi punana e hoomoe iho ai o ko lakou mau poo.
A hala hou ae la he mau minute o ke me@ na oloko o ua rumi ala, aia hoi, ua poha hou mai la ka leo o ka moiwahine me ka piha lokoino i ka olelo ana mai.
E kahi kaikamahine kuewa mahaoi, e nana aku i keia puka e hamama mai ia, a malaila e hemo aku ai oe i keia wa ano, a mai mahaoi hou mai ianei, o hookau no auanei au i ka maka maluna ou. Nolaila, e ku a hele koke aku iwaho.
Aole i hoolohe aku ke kaikamahine e keia leo lokoino o kona makuahine kolea, aka, aia oia ke kali ia i ka leo hope e loa o kona makuakane e pane mai ai, no ka mea, aia maluna o kona leo kona manaolana hope loa.
Kaahope hou ae la he mau minute, aia ia wa, i haliu mai ai na maka o kona luaui makuakane a ke aloha ole a pane mai la me ka leo kaumaha.
E kuu kaikamahine, aole e hiki ia’u paa aku ia oe, oiai, ua wela ko makuahine i ka inaina nou, nolaila, e ku ae a hele aku ma ke alahele au i hele mai nei, a e huli aku i kou mau kaikunane i hala pu aku mahope ou, a na lakou e hanai, a e heaahu mai ia oe, oiai, he manaolana no ko’u, e loaa aku ana no lakou ia oe.
I ka hooki ana o ka moi i haalele i ke aloha ana i kana kaikamahine i kana kamailio ana, oia no ka wa i loheia aku ai ka leo o ka kaua Minewa i ka puana hope ana ae me ka walohio, a o na omaka waimaka o ka ehaeha e puapuai mai ana ia mai kona mau lihiliihi, i ka i ana aku, penei:
E kuu papa aloha e imi aku ana i ko’u mau kaikunane i hala e alu ma ke alahele o ka ehaeha ina i o ka poino a i ole no ka lanakila paha, a aohe hoi he mau keakea nana e hookuemi hope, na ka wale no e hooko ole i ko’u ini. Eia au ke haalele nei ia oe e kuu papa ka mea a’u i aloha ai, mamuli o ka makemake o kau wahine, a hele kohana aku maluna o keia ili honua, he hookahi wale no mea nana i h@ino oia hoi ka pokole loa o ka manawa o ko’u kilohi ana aku i kou mau helehelena, a nalohia hou aku no ka wa pau ole, i like hoi me kekahi akaku i hoea mai a nalowale koke aku no, aka, aole nae he hiki ia’u ke hoohakilia hou iho no hookahi minute, oiai, ko’u makuahine lokoino e kipaku nei ia’u, a e papa o ke ahola no kou, a o ka’u pule hope e haawi mai na Lani i na hoopomaikai ana he nui ia oe a me kau mamo hou aku.
Ia manawa no i lalau iho ai o Minewa i kona aahu a komo iho la a ka luahine i haawi mai ai, a o kona papale ooma kau ae la oia ma kona poo, a i ka paa ana o kona mau hemahema, oia no kona waikukuli iho a muki aloha aku la no ka wa hope loa i na lima o kona makuakane.
I ka pau ana ae o kona muki ana i na lima o kona papa, oia no kona wa i ku koke ae ai a hemo aku la iwaho o ka halealii, me he wahi luahine kamaole ole la ke kuoe i ke alahele me ka waimaka.
A i ka hoea ana aku o Minewa mawaho o ka pa alii, ua huli hou aku la kona mau maka ihope me ke kilohi ana aku e ku mai ana me kona nani nui, a o kona mau puoa kiekie i hanaia mailoko mai o na pohaku hihiu loa e oni haaheo ana lakou iloko o ke aouli, me he mea la, he mau lio la e heihei ana me na ao kalelewa o la lani.
A na keia nau hiohiona nani o ka halealii ana i holoholo ai i na la opio me ka mahui mua ole ae e maalo ae ana ia me he moeuhane la a nalo aku, a e hoolilo ia aku ana ka hoi oia i kaikamahine ilihune e makilo hele ana i na ipuka hale o kona lahui ponoi, i hoopiha i kona puuwai me ke kaumaha, a ikeia aku la kona mau waimaka e hiolo makawalu mai ana mai kona mau lihilihi maka a ia wa i lohe ia aku ai oia i ka puana ana me ka walohia penei:
U! Aloha no ka home a kuu makuahine i hala aku i ke ala hoi ole mai, ana hoi i hooikaika no makou kana mau keiki, aka, aole nae i hooko ia kana olelo kauoha e kuu papa e malama oia ia makou no ka mea, ua hanaino mai ko makou makuahine ia makou, aka aole nae oia i komo mai e uwwao ae. Nolaila, o ka’u e puana ae nei i ke aloha o na lani e hoihoi hou ia aku au iloko o kuu halealii i holoholo ai i na la opio.
I ka hooki ana ae o Minewa i kana kalokalo ana oia no kona wa i noonoo iho ai i kana alahele e hele aku ai, no ka mea, aole oia i makemake e hoi aku iloko o na ululaau ana i hele mai ai, a no kekahi mau minute kona noonoo ana, ua komo mai la ka manao iloko ona, he mea pono kona huli mua ana i kona mau kaikunane mamua o kona haalele ana iho i ke kulanakauhale.
-------------------
I ke kakahiaka Poakoli hoea mai ai ka mokukaua Beninetona mai kana huakai aku nei i Hawaii.
Eia ma ke Keena nei o ka nupepa KE ALOHA AINA he pine niho puaa, kaekae wa gula, i loaa ma ke kakahiaka la Sabati nei, Dekemaba 4, mawaena o ke Alanui Papu me Beritania. E loaa no i ka mea nona keia pine, ke hele mai oia me na hoolaio, ka uku hoolaha, a me ka luhi o ka malama ana. E wiki, o hala e na ia he 15, lilo loa i ka mea i loaa ai. dec7 3tsd.
HALEKEAKA OHANA
THE ORPHEUM.
---------
Keaka i na Po a pau
NA POE AKAMAI HANA KEAKA O KA PAPA EKAHI.
---------
E himeni ia ana he mau Mele Hou.
He mau Hulahula Ano Hou.
Na Hookakeaka e ae.
------------------
Eia na Noho Mua ke kuai ia nei ma
ka Halekaa Baikikala Pacific Cycle & Co’s.
----------------
E hamama ana ka puka hora 7:30,
Hoomaka ma ka hora 8:00.
Na Noho Mua, 50 keneta, uku komo 25 keneta.
---------------
E HOOLOLIIA ANA NA HANA I KA POAKOLU A ME POAONO.
---------------
T. V. KING, LUNA NUI.
T. McCANTS STEWARD.
(No na Aha Hookolokolo o Nu Ioka)
LOIO A KOKUA MA KE KANAWAI
Keena Hana: Ma ka Hale o Spreckles, Rumi Helu 5, Alanui Papu, Honolulu.
dec 12—3m dly
KUAI MOEMI KUIKAWA NUI. KUAI HOIMI KUIKAWA NUI.
MA KAHI O
K ISOSHIMA
E HOOMAKA ANA, POALIMA, DEC. 13, 1898.
NA PAPALE WAHINE [ki’i papale] KANE me na KAMALII,
“ “ O LAHAI NA, OHE, HAHEI, KUKUI
KEPANI, HAINAKA, SI LIKA, LEI AI, HINAIOHE
E malama ana ke Kuai Hoemi Kuikawa Nui no Elua Pule Wale No. E loaa pu ana maanei na KII PAANI o ka La Karisimaka a me na MOENA KEPANI. No laila, e hele koke mai e kuai i mau Papale no oukou no na La Kulaia e kokoke mai nei, oiai, oiaia, aohe wa emi loa i ikeia e like me keia manawa.
KUAI KARISIMAKA NUI.
Eia Ko Makou Halekuai ke Kuai Hoemi nei i na KAMAA NANI o na WAHINE me ko na OPIO no na La Nui ma ke Kumukuai i lohe mua oleia.
[ ki’i kama’a]
Na kamaa haahaa bibino o na Wahine Eleele a Ulaula. Kamaa Haahaa Ili Nani o na Wahine me na Kaikamahine. Kamaa Haahaa Hua Lei.
[ki’i kama’a]
ORIENT
na kamaa l@ili nani. Me Kamaa Haahaa Lole o na ano like ole.
[ki’i kama’a]
Na kamaa buti li maikai loa, Hila Farani, o na waihoolu like ole.
-----------------
Eia pu me makou na Kamaa a me na Kamaa Haahaa nani loa o ke ku@ makauhale nei o na Kamalii me na Bebe. O keia mau Waiwai a pau e hoolilo ia aku ana ma ke kumu kuai haahaa. E kipa mai a makaikai i ko makou Waiwai.
----------------
MANUFACTURES SHOE CO
--Limited--
ALANUI PAPU, HONOLULU.
dec 17 tf.