Ke Aloha Aina, Volume V, Number 2, 14 January 1899 — Page 1
| This text was transcribed by: | Hartwig Hermann |
| This work is dedicated to: | to akileokani :)))) |
KE ALOHA AINA
UA MAU KE EA O KA AINA I KA PONO
HOOKUMUIA I MEI 20, 1895
---
BUKE V. HONOLULU, POAONO, IANUARI 14, 1899. HELU 2.
---
KA NUPEPA KE ALOHA AINA
---
E hoopuka mau ia aku ana mai ka Poakahi a ka Polima o na pule a pau o kela a me keia mahina.
Ka Uku Pepa, he 20 keneta o ka pule. No ke kope hookahi, he 5 keneta.
E loaa no ka pepa mai ke Keena aku o KE ALOHA AINA, a mai ka lima aku o na Luna Lawe Pepa.
E pai ia no na Olelo Hoolaha, na Kanikau a me na Mele Inoa, me ke Dala kuike. Aole nupepa ma ka owili pakahi e hoouna ia ke ole e hookaa mua ia ka uku pepa.
E hoouna pololei mai i na Nuhou na Kumumanao, na Olelo Hoolaha, na Kanikau a me na Mele Inoa i ka Lunahooponopono o keia Pepa.
Aole loa e hoopuka ia a hoolaha ia kekahi manao ma na kolamu o keia Pepa, malalo o kekahi inoa kapakapa ke ole e hooike mai i ka Lunahooponopono i kona inoa ponoi.
Ka Nupepa Puka Pule
KE - ALOHA - AINA.
Hookahi makahiki ..................... $2.00
Eono mahina ............................... $1.00
Ekolu mahina ................................. .50
Hookahi mahina ............................ .20
EMMA A. NAWAHI.
Puuku o
Ke - Aloha - Aina
EDWARD L. LIKE.
Lunahooponopon o a Hope Puuku
S. P. KANOA.
Hope Lunahooponopono.
O na kauoha Nupepa me na hookaa Dala, e hoona pololei mai i ka Puuku ma Honolulu.
---
HE ULIA POINO.
---
Ua halawai iho kekahi ulia poino me kekahi poe Iapana eha, mamuli o ka hanee ana o ka hale a lakou e kamana ana, ma kekahi wahi alanui ololi mauka iho o ke alanui Vineyard, ma ka aoao ma Ewa o ke alanui Nuuanu, a he hookahi i make me ekolu i hoeha ia.
E hoao ana keia poe Iapana e hoonee i keia wahi hale kahiko ma kahi kokoke i ka hale kula Iapana. Ua hapai ae lakou i ka hale iluna a hookau iho la maluna o kekahi mau kua, a oiai, lakou e hookomo ana i na rola no ka panee ana aku, oia no ka wa i haki ai o ua mau kua la, a haule iho la ka hale maluna o lakou. He hookahi Iapana i make loa, a he ekolu e waiho nei maloko o ka haukipila Iapana me na pa@ kukonukonu loa.
Ua malama ia he aha koronero maluna o ka mea i make, a i keia la e haawi mai ai ua aha la i ka lakou olelo hooholo.
---
HOOMAHA KA HALEKEAKA OFIUMA
---
I ka po Poaono nei i hoomaha ai ke keaka ana o ka Halekeaka Ofiuma no elua pule no ka haawi ana i manawa e hoomahuahua hou ia ai o loko o ka hale, oiai, ua ikeia kona ano haiki loa. E haawi ia ana he keaka paele maloko o laila i keia po Poaono ino ke loaa ole nae he mau kuia.
E hoea mai ana maluna o ka mokuahi Garonne he puali keaka hou, a na lakou e wehe hou ana ke keaka maloko o laila.
---
LELE ILOKO O KE KAI A NALOWALE LOA.
---
Ma ke ku ana mai nei a ka mokuahi Kalaudina, ma ke kakahiaka nui Sabati nei, ua lawe mai la oia i kekahi lono no ka lele ana o kekahi haole mailuna aku ona no loko o ke kai, ma ka hora 4:45 o ke kakahiaka Poalima nei.
Ua hookuu koke ia he waapa no ka huli ana iaia, aka, aole nae i loaa kona kino make a hiki i kona hoi wale ana mai nei. Aole he maopopo o kona kumu i lawe ai i ke ola, aka, ua manao ia nae ua loohia ia eia i ka ma'i pupule kona kumu i lele ai iloko o ke kai.
Ua hoike aku oia i kekahi o na ohua o ke Kalaudina mamua o kona lawe ana i kona ola, o Charles Burke kona inoa, a maluna oia o ka mokupea Amy Turner, i hoea aku ai no Hilo, ua haawi aku oia i kaua mau dala i ka lima o kekahi ohua nona ka mea o Mr. A. Richley, me ka olelo aku e hoouna i kana mau dala ke $1,000 ia F. T. Grant.
Ua waiho ia aku ke dala a ua haole la iloko o ka lima o G. C. Beckley, a i ka houa ana mai i Honolulu nei, ua waiho ia aku ia iloko o ka lima o ke Kanikela Amerika, a nana e huli aku i ka ohana o keia kanaka poino.
HE HALE KINAIAHI HOU.
---
No kekahi manawa loihi ai nei ka noonoo ia ana o ke kukulu ana i hale kinaiahi mawaho o Makiki, a hiki mai la i ka Poaono nei akahi no a hooko ka Aha Kuhina ia mea, ma o kona haawi ana aku la i ke Kuhina Kalaiaina i ka mana no ka huli ana i ka mea koho haahaa no ke kukulu ana i hale kinaiahi mawaho olaila.
O ke kahua i manao ia ai o keia hale kinaiahi e kukulu ia aku ai o ma keia mua aku, ma ke kihi no ia o ke alanui Piikoi a me Waila.
ANEANE I KAU WAHI O KA HAUNAELE.
---
I ka hoea ana mai nei a ka mokuahi Maui, mai Maui mai, ua lawe mai la oia i kekahi lono penei: Ma kela Poakolu aku nei, Ianuari 4, ua hopu ia iho la he limahana Pake no ka mahiko o Spreckelsville, no ka hoeha ana ia Harry Copp, he luna, me ka ho, ma o keia hopu ia ana o keia Pake, ua haalele aku la kona mau hoa he kanaha i ka hana ana, a hoi pu aku la me ko lakou hoa no ka halepaahao o Wailuku, a ua hoopaa pu ia aku no hoi lakou.
Ia la no, ua loaa aku la he telepona ia Makai Nui Baldwin, mai a Luna Nui Low@e aku, e hoike aku ana he kanahiku Pake i lako me na ho, i hala aku no Wailuku, no ka hoopakele ana i ko lakou mau hoa kanaka. I keia wa no i ohi koke ae ai ka Makai Nui he puali kau ho a holo aku la e hui me na Pake hoohaunaele, a ma kahi hoolulu kauahi o Wailuku i hui ae ai lakou a kanoha aku ia e hoi hou aku ihope, i kinohi aole lakou i ae mai, aka i ka hooweliweli ia ana aku, ua pau nui ai i ke auhee, a ua ukali ia aku lakou a hiki i Kahului.
Ma kekahi la ae, ua hoi hou aka na poe Pake i hoopaahaoia he kanaka i ka hana, me ka uku pu ana i na koina e ko lakou haalele ana i ka hana. O ka Pake hoi i hoeha ai i ka luna, ua hoopai ia oia no ka hoeha.
HANAU MALUNA O NA ALE O KA MOANA.
---
Kapalakiko, Dec. 26. Ua hoea ae kekahi mea kupanaha maluna o ka mokuahi Weeott, i kona wa ma ka moana, e holo ana mai Kapalakilo aku no ke kaikuono o Yaquina, ma o ka hanau ana o kekahi wahine nona ka inoa o Mrs. G. W. White i kekahi bebe uuku loa i ka wa a na kikiao makani o ka akau e pa ana me ka ikaika.
Oiai, o Kapena R. J. Dungham e malama pono ana i kona moku mai na kikiao makani e pa ana me ka ikaika no lakou ka mama o 90 mile i ka hora, aia hoi, ua hoea mai la ke kupakako a hoike mai la iaia, o ka ohua wahine hookahi maluna o ka moku ua hanau oia.
Ua haawi koke aku la oia i ka hookele ana o ka moku i ka malama moku, a iho aku la oia no ka halawai ana me keia ohua o kona moku, a haawi aku la i na kokua ana i ka malihini hou.
He wahi bebe uuku loa keia nona ke kaumaha he hookahi paono me ka hapa. O kona loihi mai ka piko o kona poo a hiki i kona mau kapuai wawae he eono iniha. O ka nui o kona poo, ua like me ka nui o ke dala hookahi, a o ka nui o kona lima, ua like ia me ka manamanalima o kekahi keiki uuku.
Mamuli o ka loaa ole ana he wahi kupono nona e moe ai, ua hana iho la ke kapena i wahi nona maloko o kekahi pahu ciga, a ua houmaopopo ia iho la ua oi loa aku ka nui o ua pahu la ma o ke komo ana o ke kino holookoa o ua bebe la. He helehelena ui ko keia bebe, a o na onohi maka a me kona lauoho he uliuli.
Ua kapaia aku ka inoa o ua bebe la o Grace Dey Weeott White. Dey oia ka inoa o ke kupakako, a o Weeott ka inoa o mokuahi. O na lono hope loa i loaa mai no ka makuahine a me ka bebe he maikai no ke laua mau oia kino. Kupanaha no ka hoi na haua a ke Akua.
KUAI KARISIMAKA NUI.
---
Eia Ko Makou Ha'ekuai ke Kuai Hoemi nei i na KAMAA NANI o na WAHINE me ko na OPIO no na La Nui ma ke Kumukuai i lohe mua oleia.
NA KAMAA HAAHAA RIBINE o na Wahine Eleele a Ulaula. Kamaa Haahaa Ili Nani o na Wahine me na Kaikamahine. Kamaa Haahaa Hua Lei.
ORIENT
NA KAMAA LI ILI NANI.
Na Kaama Haahaa Lele o na ano like ole.
NA KAMAA BUTI UI MAIKAI loa, Hila Farani, o na wal@lu like ole.
---
Eia pu me makou ua Kamaa a me na Kamaa i@ u @@ o ke Kulanakauhale nei o na Kamalii me na Bebe. O keia mau Waiwai a pau e hoolilo ia aku @ ma @ kumukuai haahaa. K@ mai a makaikai i ke makou Waiwai.
---
MANUFACTURES SHOE CO
-- Limited --
ALANUI PAPU. HONOLULU.
dec 17 tf.