Ke Aloha Aina, Volume V, Number 11, 18 March 1899 — HOALOHALOHA A NA AHAHUI KALAIAINA O HANAPEPE A ME WAHIAWA, MOKUPUNI O KAUAI. [ARTICLE]

HOALOHALOHA A NA AHAHUI KALAIAINA O HANAPEPE A ME WAHIAWA, MOKUPUNI O KAUAI.

Ia A. S. Cleghorn, Aloha oe: Oiai ke kiu anu o Waialeale, e iniki hu'i ana i ka ili a e mawehe ae ana ke alaula o ke kakahiaka, a oili mai la ka la ma|una ae o na kua nani oi kelakela ma na welelau o ka honua, a e hoonee ana ke sekona o ka uwati i ka manamana kuhikuhi minute i ka hora 11, a o ka manamana kuhikuhi hora i ka hora 12 o ke awakea, o ka la 8 o Maraki 1899 a oia no ka manawa i pahola mai ai o ka lono hoohikilele o ke Kama'liiwahine ka Hooilina Moi o ko Hawaii Paeaina, Vitoria Kaiulani Kalaninuiahilapalapa, ua hala ua pauaho mai la i keia ola ana, a ua moe aku la oia iloko o ka maluhia, ma ka po o ka la 5 o Maraki. Auwe! He mea-e ka mana'ona'o a me ka mokumokuahua o ka naau i keia lono pili kaumaha i hoike ia mai. Auwe! Walohia wale, a pela iho la i hooko ia ai ka olelo, "o ke kanaka Hawaii i hanau ia e ka wahine, he hapa kona mau la, a ua piha me na popilikia." Nolaila, e hoi ana ka lepo i kona wahi, a o ka uhane, e hoi no ia i kona mea nana hana Pomaikai ka poe make ke make iloko o ka Haku. Auwe! Luuluu wale, ae luuluu wale Hanalei i ka ua nui, kaumaha iho la i ka noe o Alakai i ka hale ua o Manuakepa, ua oi ku i ka nahele o Ko'ialana, ke ala ka ia a ka malihini-e mai hina, mai hina au mai pahee i ko aloha e akahi hoi la a ke aloha i hiki mai ai ke hu'ihu'i nei kuu manawa, he malihini ko ka hale ua hiki mai, uwe! aloha ino. Nolaila, e hooholoia, o makou o na makaainana e noho ana ma Hanapepe a me Wahiawa, mokupuna o Kauai, ke hoike aku nei i ko makou kaumaha, luuluu a me ka wa|ohia ia oe e A. S. Cleghorn, oiai, ua oluolu i ka Haku Mana Loa, ka lawe ana aku i kau lei aloha he kaikamahine, a ua ili iho la maluna ou ka haawe luuluu o ke kaumaha, a me makou ka lahui. E hooholoia ke noi nei ka leo o ka makou pule i ka Mea Mana Loa, e hoomama ae i ka luuluu, kaumaha a me ka ehaeha o kou naau, a me makou pu kekahi. E hooholoia i hookahi kope ia A. S. Cleghorn, i hookahi i ka nupepa KE ALOHA AINA, hookahi I Ka Loea Kalaiaina, hookaki i ke Kuokoa. Ma o na Komite la, J. R. Leleiwi, S. P. Kamauleule, J. L. K. Pahulama, M. K. Luahine, J. K. Palama, R. Kulakauka, W. H. K. Kapihenui, B. Kakuiapoiwa a me I. K. Maliekai.