Ke Aloha Aina, Volume V, Number 22, 3 June 1899 — Page 7
| This text was transcribed by: | Aki Astrid Dinda |
| This work is dedicated to: | to all volunteers of the Ike Koukua mproject :)) |
KE ALOHA AINA
POAONO, IUNE 3, 1899. 7
HE KAAO KAILI PUUWAI
--:NO KA:--
UI MINEWA.
---:A ME NA:---
Kaikunane Eiwa
----
I Hooliloia i mau Manu Nene Ahiu a i ole na Keiki i Hoehaehaia
----
Kakauia no KE ALOHA AINA
----
I ka hoopau ana ae o na kauwa i ko lakou mau leo hauwalaau o ka hauoli, ioa no ka wa i keia aku ai ka elemakule puuwai lokoino i ke kukuli ana iho ma ka aoao o Minewa e waiho oni ole ae ana me ka lalau ana aku i kona lima a haha koke iho la hoi i ka pana.
No kekahi mau sekona pokole wale no kona noho hamau ana, aia hoi, ua ikeia aku la kona waha i ka hoopuka ana ae me ka leo hikilele nui i ka hooho ana ae.
Ua haalele kahiko mai ka wahine opio i keia ola ana, no ka mea, ke ike nei au i ka moe malie o kona pana me ka onioni ole, a o kona kino holookoa hoi ua hoopuni ia me ke anu e hiki ole ai ia kakou ke hoohuoi iho, eia ne he hanu oia iloko ona.
A na keia leo o ka elemakule i hoohikilele ae i na mea a pau, a i mea hoi e hoopau ia ai ko lakou kuhihewa, ua ikeia aku la ua poe kauwa nei i ke kukuli pu ana iho a haha aku la i na kino o ka kaua mau eueu a elike no me ka ike a ko lakou haku, pela no lakou i ike pu iho ai.
Ae, ua make io no ka kakou mau pio, wahi a kekahi o na kauwa i hooho ae ai, a heaha ka kakou hana pono no laua. Ua lawa anei ka kakou hoopai ana maluna o laua, a i ole e okioki liilii aku anei kakou i ko laua mau io me ka lu liilii aku ma o a maanei?
Aole, aole, wahi a ke elemakule i pane mai ai, ua lawa ko laua uku hoopai, ioai, ua hala aku la laua ma ko laua ala huli hoi ole mai, a he mau kino lepo waiwai ole hoi kena. Nolaila, e kaualako aku i ko laua mau kino puanuanu a hoomoe aku ia laua iloko o kekahi poopoo pohaku, malaila hoi laua e waiho ai a hiki i ka lilo ana o ko laua mau ki no i mau puu lehu no ka wa pau ole.
O kou makemake oia ka makou e hooko aku ai, i puana like mai ai lakou.
I keia manawa no i lalau koke iho ai na kauwa i na kino make elua me ka lawe aku no kahi kupono e waiho ia ai. A ma keia wahi hoi i kuoe malie aku ai ua mau kauwa la me ko lakou haku, no kahi o na kipapali pohaku e ku mai ana ma kahi he hapalua mile wale no ka mamao malalo o ka hoomalamalama ana a na lama ahi.
He mau minute keia o ka meha e hoalii ana maluna o na mea a pau, a ke ike pu ia aku la hoi ke poo o ka elemakule me he la he manao nui ke lauwili la iloko o kona puuwai. No kekahi mau minute pokole waie no ua hoea aku la lakou i ka pahu hope o ka lakou huakai.
A ma kekahi kipapali pohaku kiekie e ku ana, aia hoi, ua ike ia aku la ka waha o kekahi ana nui e hamama mai ana, a mailoko mai hoi ona e oili mai ana na ea polopolona no ka mea, o keia ana a kaua e ike nei e ka mea heluhelu, o kahi no ia e hoahu ia ai o na poe make a pau o loko o ka home o ka haku elemakule.
I ka hiki pono ana aku o na mea a pau no ka waha o ke ana, a malalo o ka hoomalamalama ana a na kukui ua hoahu wale ia ae la kona mau paia, a ike ia aku la hoi na iwi o na kanaka i hala mua aku i ka make e waiho mokaki ana.
Ma keia wahi i ku iho ai ka ele makule a me kana mau kauwa me ka hoomakaukau ana aku hoi e hookomo aku ia Minewa a me Simora no loko o ke ano, me ka manao kuhihewa maoli no, ua haalele io mai ka kaua mau eueu i keia ola ana, a ma ia manawa no i huli ae ai ua elemakule la a pane aku la i kana mau kauwa.
E o’u mau kanaka, ua hoaha ia mai ko’u puuwai no ka make ana o kaikamahine opio ui, oiai, ua kuko mua ko’u naau e lawe aku iaia i haku wahine no ko kakou home kakela, aka, na kela Semora lapuwale i hoopuhili i ka’u mau hoolala ana, a nona, ua hauoli loa au i kona make ana, aka no keia wahine opio ua hoopiha ai au me ke kaumaha nona.
Nolaila, e o’u mau kauwa, e hoolei aku ia Semora iwaena o na ahua iwi o kona mau hoa i make, no ka mea, ua make oia me ke kipi i kona haku, aka, no keia wahine, e halii aku i na pua o ko’u kihapai malalo ona me ke kiai pu ia hoi o kona kino i ke ao a me ka po, a i ko’u wa hoi e hiki mai ai i ko’u hopena e hoomoe ia no au ma kona aoao.
Elike me ka makemake o ka elemakule pela na kanaka i hooho aku ai iloko o ka pouli, a no kekahi mau minute wale no ko lakou nalo ana aku, oili hou mai la lakou a ma ko lakou mau lima pakahi e paa ana lakou he pua aala o kela a me keia ano.
A ma kahi hoi hoomoe ia aku ai ke kino o ka kaua Minewa maloko o ua ana la i lu ia aku ai ua mau pua la, a iloko o na sekona pokole ua hookupaoa ia ae la o loko o ke ana me na ala like ole, a o na ea polopolona ua ualowale aku ia.
Maluna o ua mau pua la i hoomoe ia aku ai o Minewa iloko o ka naui nui me ka elemakule e kuku ana ma kona aoao. A o ua Simora nei hoi, ua kiola ia aku la oia iwaena o na iwi kanaka.
---
KA MOKU LAWEKOA SHERMAN.
Ma ke kakahiaka Poalua nei, i hoea mai ai ka moku lawekoa Sherman, he ehiku la me ka hapa mai Kapalakiko mai. O ka mokuahi nui hookahi hoi i komo mai iloko o keia awa.
E lawe ana oia maluna ona he elua mau berigadia Kenerala, ekolu Konela, 55 mau aliikoa like ole, 1,761 koa, maloko oia huina he 1,452 koa no ka regimana Eono, puali puhiohe, puali haukipila, puali eneginia, he poe hoolako ai a me kekahi poe lawelawe no ka oihana leta ma Pilipine, a no lakou hoi ka huina a pau ma kahi o 2,000.
Mawaho ae o na koa, e lawe ana oia he 5,000 pu raifela me 2,000,000 poka. He lehulehu o keia poe e holo nei no Manila i komo iloko o na hookua kaua hahana ana me na Sepania ma Cuba i kela makahiki aku nei.
O ka Sherman, oia kekahi o na moku nani loa i helu ia iwaena o na mokuahi e holoholo nei maluna o na ohuku ale o ka moana. He moku lawe ohua oia no ka laina mokuahi Atelanika, e holoholo ana mawaena o Nu Ioka a me Ladana mamua o ke poha ana ae nei o ke kaua me Sepania, aka, ua kuai ia aku nae ia e ke aupuni o Amerika Huipuia i moku halihali koa. O kona loihi 445 kapuai, laula 49 kapuai, hohonu 34 kapuai, a nona ke kaumaha o 5,780 tona. E lawe ana hoi oia he 175 mau luina. E haalele koke iho ana oia ianei ma kona alahele no Manila, mahope koke iho o kona piha ana me ka nanahu.
Mawaena o keia mau Kenerala e holo nei no Manila, o Kenerala Fred Grant, ke keiki hoi a kekahi ahi kanana o na pualikoa o Amerika Huipuia, Kenerala U. S. Kalani. Ua hele pu oia me kona makuakane maluna o na kahua kaua o kela kaua huliamahi mawaena o ka Akau a me ka Hema, i kona wa aole i piha na makahiki he 13 me ke komo pu ana hoi iloko o elima hoouka kaua.
Ua ike oia i kekahi mau hoouka kaua hahana ma Cuba me na Sepania, a ke hoio nei hoi oia no ka halawai ana me na Pilipine.
---
E WEHE @A ANA HE KUAI NUI.
Mamuli o ka lilo ana mai o ka Halekuai o M. G. Silva i ka Hui Kuai Lole Hawaii. Nolaila, e wehe he mama ia ana ka puka ma ka la 10 o Iune, ma ka hora 7 o ke kakahiaka, a oia pu no hoi ka wa e hoomaka ia kau ke kuai hoemi loa i ike ole ia mamua. E hoomau ia aku ana ke kuai ana i mahele (share) i koe, e naue mai kakou.
O maua no me ka haahaa.
Moses Palau & Edward Ha@pi.
---
HE KUAI NUI LOA.
---
NO HOOKAKI PULE WALE NO.
---
Ua Hoemi ia he 25 pa keneta maluna o na Waiwai a pau loa.
---
Ua kuai aku au i na Waiwai o ekolu mau Hale Hana Nui Loa ma Enalani. Ua makemake lakou i ke Dala, ua makemake au i ka lakou mau Waiwai. Ua loaa mai ia’u na Waiwai no ka hapalua o ko lakou mau kumukuai, eia lakou maanei.
---
E KUAIIA AKU ANA MA KE KUMUKUAI EMI LOA I IKE MUA OLEIA.
---
E hele mai ma ko’u halekuai i keia Pule, eia an ke kuai nei i na SILIKA, a me LIHILIHI no ka 25 pa-keneta, malalo o ko lakou mau kumukuai iho. O keia wale no kahi e loaa ai na kumukuai hoemi loa no Hookahi Pule Wale No.
---
E hoomanao he mau Waiwai Hou keia.
---
HE LEHULEHU WALE NA KALAKOA LIKE OLE 30 i-a 1.00
---
L. B. KERR
Honolulu, Alanui Moiwahine.