Ke Aloha Aina, Volume V, Number 29, 22 July 1899 — Page 6
| This text was transcribed by: | Cyndi Defenbaugh |
| This work is dedicated to: | Kaelene Puanani Ahu-Rey |
KE ALOHA AINA
6 KE ALOHA AINA, POAONO, IULAI 22, 1899.
HE MOOLELO WALOHIA
--:NO:--
ALANADELA
Ka Wahine Hoopahaohao o ka Aahu
Keokeo.
---A I OLE---
Ka Loea Hookanai Pila Hapa o ke
Kulu Aumoe.
Mahope iho o ke kanaenae ana ae o ka kaua Walata i keia mau huaolelo, oia koke no kona wa i oili aku ai no waho o ke kahua akea, a ia wa no hoi i hala wai hou aku ai oia me ka wahine lokoino Magarita.
I keia wa ona i ike mai ai i keia mau kahiko bele kuahiwi e kau ana maluna o ke koa opio, oia koke no ka wa i loli ae ai na hiohiona hauoli e hekau ana maluna ona, me ka pahola ae hoi o k ahelehela haikea maluna ona, a me ka leo maalea, pane mai la oia me ka uwalo ana mai i ke koa opio e noho iki hou aku me ia.
E Walata, e haalele koke mai ana anei oe ia’u e noho hookahi ilo ko o keia mau paia mehameha, a ukali aku mahope o ka moa i hana lokoino mai ia oe, a i puehu aku la hoi me me kana mea i aloha ai.
Nolaila, e kuu Walata maikai aole anei e hoohakalia hou iho oe i kau huakai a no kekahi mau la okoa aku, oiai, aole wale no o oe hookahi ka mea e ake nei e hooko aku i keia mea, aka, awau pu no kekahi i ka wa nae e pau ae ai ka mauluulu o ka kakou huakai loihi i hiki mai ma ka po nei.
Ma heia wahi i huli aku ai na onohi maka poniponi o Walata a leha pono aku la hoi maluna o ka helehelena o ka wahine ana e paulele kuhihewa nei he hoaloha oiaio la oia nona me ka pane pu ana aku me ka leo kaumaha.
O, e kuu hoaloha maikai, aele he hookahi mea nana e kaohi ia’u e noho iho maloko o keia mau paia, ina aole o ka mea a kuu puuwai i anoi ai maloko o kona mau paia.
Ina na haalele io mai kuu ipo i ke aloha ana no’u, e hoopiha ia no ko’u puuwai me ka iili, a ma kona wahi e loaa aku ai e make no oia malaila, aka hoi, ina e hoololi ae ana oia i kona manao a hoi nou mai me a’u, e huikala aku no au i kana mau hana hewa a pau i hana mai ai, nolaila, e hookuu mai ia’u e hele mahope ona, oiai e kokoia ia ana ko’u noonoo mahope ona.
A ia wa no i huli ae ai o Walata a kauoha aku la i kekahi powa no ke kii ana aku i kona hoaloha aoo Kisa, no ka hele ana mai me ka hakalia ole imoa ona.
Iloko o na minute pokole wale no, ua hoea mai la o Kaisa imua o ke alo o kona hoaloha opio, a me ka leo hikilele, ua ninau mai la oia:
Heaha ka manao o ke akuoha ana ae nei e kuu hoaloha opio, e kuewa hou aku ana anei kaua iloko o keia mau ululaau, no ka huli hou ana i kau mea i aloha ai, elike me na la i kaahope aku la?
Ae, wahi a ke koa opio i panai aku ai me ka leao ehaeha, aka, aole nae au e koi wale aku ana ia oe e hele pu mai me a’u, ina aole i komohia na manao hoihoi iloko ou no ka hele pu ana mai me a’u.
E kuu hoaloha opio, wahi a Kaisa ke kanaka aoo i pane aku ai, me ka leo olu waipahe, elike me ka makua i kana keiki, mai hopohopo no’u, oiai, ua lohe mua no oe i ko’u manao, oia hoi, ma kou wahi e hele ai, owau pu no kekahi me oe, a ma kou wahi hoi e poino ai, o kaua lika no ke ike pu ana. Nolaila, e hoike mai, e haalele iho ana anei kaua i keia wahi i keia wa ano?
No keia mau huaolelo a ke kanaka aoo i hoopiha mai i ko Walata puuwai me ka hauoli, a me ka leo malie pane mai la oia:
Nou e kuu hooloha aoo, ko’u aie nui e hiki ole ai ia’u ke hookaa aku elike me ka loihi o ko’u ola ana, e hiki ole ai i ke daimana, ke gula a me na pohaku makamae e ae ke hoihoi aku i kuu aie ia oe.
Ae, i keia manawa no au i manao ai, no ka haalele ana iho i keia wahi mamua hoi o ka uhi ana mai o ke kana eleele o ka pouli. Nolaila, e huli hoi aku noloko o kou rumi a hoomakaukau iho ia oe i keia wa me ka hookaulua ole. E hoolako pono hoi ia oe me na mea kaua, oiai, aole kaua i maopopo i na poino e halawai mai ana ma ko kaua alahele.
I ka hoopau ana ae o Walata i kona leo, oia koke no ka wa a Kaisa i kunoi haahaa mai ai, a huli ae la no ka hoi ana aku noloko o kona rumi no ke kahiko aua i kona aahu hele kuahiwi me ka panai pu ana mai.
E Walata, e hoomama i kou mau noonoo, aoloe oe i aie ia’u, aka, owau kai aie aku ia oe, no ka mea, ma ou la au i pakele mai ai mai na hana maemaewa mai a kuu haku lokoino.
Me keia mau huaolelo, nalo aku la oia noloko o kona rumi, a i keia wa hoi i ike ia aku ai na waimaka o Magarita, e hiolo makawalu mai ana ma kona mau papalina, a i ka wa ana i ike ae ai o laua wale no keia me ke kanaka ui opio e ku nei oia koke no ka wa i haule iho ai na kuli o ua Magarita nei, mamua o ke alo o Walata, a me ka leo o ka mea i hoopiha ia me ke kaumaha puana ae la oia me ka malie.
E Walata, ke koa opio wiwo ole a’u i ike ole ai i kou lua ma ke ana pahikaua, me ka puuwai e pana kap@lili nei, mamua o kou haalele ana iho ia’u e noho hookahi maanei, e hoike aku au ia oe me ka oia o loa ua aloha au ia oe.
Nu hou Kuwaho.
Maluna o ka Mariposa i loaa hou mai ai ia makou na lono makamaka oa penei:
UA MOAKAKA LOA KO BERITANIA MANAO
KAUA.
Ladana, Iulai 11. O ka Batari Pukaa Kanahiku kumamakolu, ua haawi ia aku la ke kauoha no Aferi ka Hema, a pela pu hoi me ka Batari Pukaa Elima, eia lakou malalo o ke kauoha no ke Cape. O na kaa pu a pau o keia mau batari ua pena ia aku lakou.
He kanakolu puwili i hoouna ia aku la i Transvaal i keia la.
Brisbane, Queensland, Auseteralia, Iulai 11. O ke qupuni o Queensland, ua telegarapa mai nei oia i ke Kuhina Nui o na Panalaau, Mr. Chamberlain, e haawi mai ana he 250 koa kaua lio me hookahi puwili no ka hoohana ana ma Aferika Hema, ina e ulu io mai ana he kaua mawaena o Beritania Nui a me Transvaal.
HE HOOKUI WELIWELI.
Newman, Iulai 10. He elua mau wahine ohua i make a me umiku mamakolu i hoehaia ma ka hookui o ka hora 2:30 o keia wanaao ma ke alahao o ke Southern Pacific ma kahi he 300 ia mai kahi hoolulu mai o keia wahi.
He kaa kuikawa o hookahi kaa ahi a me ewalu kaa ohua e lawe ana i na elele o ka Ahahui Hoonaauao no Los Angeles, e holo ana he 40 miles i ka hora, ua hookui aku oia me hope o kekahi kaa ukana e ku ana. He elua mau ohua i make loa ia manawa oia o Mrs. Thomas ua haki pu kona ai a me Miss Harris, ua make oia mamuli o ka lele ana o kona hauli.
HOEMI O SPANIA I KONA IKAIKA KAUA
Madarida, Iulai 2. O ke Kuhina Kaua, Kenerala Polavieja, mahope o kekahi kuka loihi ana i keia la me ke Kuhina Nui Senor Silvela, ua ae aku la oia i ka hoemi ana i ka ikaika o na pualikoa mai ka 107,000 kanaka a ke 80,000 kanaka.
NA KAUKA NO KA REGIMANA.
Wasinetona, Iulai 7. Ua pau aku la ka hana a ka Peresidena ma ka wae ana i mau kauka no na regmana koa kuikawa e kukulu ia aku ana no ka holo ana ma Pilipine. He 23 ka nui o na kauka i koho ia.
PUALI ENEGINIA NO MANILA.
Nu Ioka, Iulai 5. Ua haalele aku la ka puali E, o na Eneginia ia Willetts Points i keia la no Manila, me ke kipa ae ma Kapalakiko. O keia kekahi o na puali makaukau loa maloko o ka oihana, a he nui hoi kona mau kanaka i noho mai ka iwakalua a kanakolu makahiki. O kekahi o na kanaka e hele ana ma ke ano ke koa, he lutanela oia no loko o na puali kuikawa. Maloko o keia heluna o Kakiana Carroll, kekahi o na mea akamai loa ma ka mea pili maina, i ke ano o ka hoomoe ano a me ka lawe ana mai i na maina hoopahu i ka wa o ke kaua. O ka nui o na kanaka o keia puali he 150 kanaka.
NA WAIWAI NANI ME
NA PAIKINI HOU LOA.
Ua loaa mai nei ia’u ma kela pule aku nei he heluna nui o na Waiwai mai Europa pololemai. I wae ponoi ia e ko’u mau Agena ma Ladana. A i loaa mai hoi ia lakou ma ke kumukuai emi loa o na mai keke malaila.
KA HOPENA
Ua hiki ia’u ke kuai hoemi loa aku i keia mau Waiwai ma ke kumukuai haahaa loa, nana e hoohikilele ina kanaka, a e wahiho koke no lakou i ka hookomo i na dala.
ILOKO O NA MAHELE KOPAA.
He nui loa e hiki ai ke loaa i na mea a pau, a e hoolako ai hoi i ko lakou mau hemahema, no ka waiho malie ana a hiki i ka wa i makemake ia, no ka mea, o na waiwai elike me keia aole e loaa hou ana no keia kumukuai, a i ko lakou wa e pau ai, aole e hiki ke hoopiha hou ia mai.
PAPALE, HOOWEHWEHEIA A I HOOWEHIWEHI OLE IA.
O na ano like ole, me na waihooluu like ole, a i ko lakou wa e hoohalike ai me he wai anuenue ahiehie.
L. B. KERR.
Honolulu, Alanui Moiwahine