Ke Aloha Aina, Volume V, Number 32, 12 August 1899 — Page 7

KE ALOHA AINA

 

HE MOOLELO WALOHIA

NO

ALANADELA

Ka Wahine Hoopaahao o ka Aahu Keokeo

A I OLE

Ka Loea Hookani Pila Hapa o ke Kulu Aumoe

            No kou hanohano au e hele nei no ka make, a aole hoi au e hookuu aku ana i kekahi kipi e hoohaahaa mai i na keiki o ka aahu ulaula. na poe i kau ia ka weli e ka honua holookoa

            I ka hooki ana iho o Bonita i kona leo i piha i ka inaina nui no Walata, me ka manao kuhihewa ana he oiaio la hoi keia mau olelo a kona haku, oia koke no ka wa i pae hope mai ai o ka leo o Magarita, i ka i ana mai;

            E kuu pukaua o ka makakila e kakua i kau pahikaua ma kou puhaka, a e ukali aku hoi mahope o ko kaua mau enemi, e lawe pu aku i ka heluna kanaka au i manao ai ua lawa ia no ka hoopio ana aku i na kipi. E wiki, o komo loa aku laua no loko o ka @pea o na lau laau.     

            A i ka hoopau ana ae o ka wahine puuwai lokoino i kona leo, aia na minoaka hoohie ke pahola la maluna o Bonita, a me keia mau huaolelo kaena i pane hope mai ai oia.

            Mai hopohopo no ka nalowale o kau mau pio e kuu aliiwahine, no ka mea, ua oi aku ka holo o na lio o kou mau kanaka i na kikiao makani e pa ikaika ana, a he manaoio hoi koʻu mamua o ke kokoke ana mai o na hora o ke kulu aumoe, e halawai no auanei au a me kou mau kanaka me na kipi maloko o kela mau ululaau.

            Nolaila, e hoi aku e hooluolu i kou mau lihilihi, oiai, ke ike aku nei au, ua makemakeia no ka hoomaha ana, me ka hookuu mai hoi ma u e ala hookahi i na mea o keia hana weliweli.

            Ma keia wahi i lalau hou aku a ua alihikaua nei i na lima o kona haku wahine a muai iho la me ke kanaenae ana ae:

            Aole, aole loa au e kipi ia oe a hiki i ke kikoo ana mai o na lima o ka make.

            Mahope iho o ka honi ana iho o ua Bonita la i ka lima o kona haku wahine, oia koke no kona wa i ku ae ai iluna a haalele iho la ia Magarita, no ke kahua heolulu o kona mau kanaka, aka, mamua ae nae o kona hiki ana aku malaila, ua anuhi koke ae la oia i kaua ulili a puhi aku la me ka hoomaha ole no kekahi mau sekona.

            A mamua ae o ke kuu ana iho o ka leo o ua ulili la, aia hoi, ua ike ia aku la na kanaka e holo ana me ka p@ahi nui no ke kahua moohoana me ke kali malie ana malaila i ka manao o keia ulili o ke ano ahiahi.

            He mea oiaio, i ka hiki ana aku o Bonita ma ua kahua la, aia kona mau kanaka ke kali mai la no ka puka aku o na manao o ka ulili kahea i poha aku he mau sekona mamua iho.

            Oiai na mea a pau e haka pono ana maluna o ko lakou ahhikaua, oia no ka wa i owaka ae ai kona mau lehelehe a pane mai la:

            E oʻu mau kanaka hoolohe, e hoike mai, o wai iwaena o oukou i aa e hele pu me aʻu malalo o kekahi kauoha ano nui mai ko kakou haku wahine mai i keia po? E pane mai ano, no ka mea, aole au e koi wale aku ana no ia oukou i na aole he makemake o kekahi mea e hele.

            O makou a pau, ua makaukau no ka ukali ana aku mahope ou, me ka nana ole ae pehea ka nui o na ehaeha e halawai mai ana me makou, oiai, o ka leo o ko kakou haku ka mea nui, wahi a na powa i poana lokahi mai ai, a ua lilo hoi keia mau olelo i mea e hoohauoli ana i ko Bonita puuwai, me ka hoohakalia ole iho, wae mai la oia he hookahi haneri o kona mau kanaka ikaika, me ka haawi ana aku i keia mau huaolelo hoomaikai i kona mau kanaka, penei:

            No oukou e na liona hae o ke kuahiwi, na hoomaikai palena ole no ko oukou hoike maopopo ana mai la, aia me oukou ke aloha welawela no ko oukou haku wahine a me ko oukou inoa i weli nui ia.

            No oukou e na hoa alo ehuehu aʻu i wae aku nei e hoi aku no ko oukou mau keena a e kahiko i ko oukou mau pono kaua me ka lawe @ ana mai i ko oukou mau ho holo loa, a mamua o ke koele ana o ka hora 8 o keia ahiahi, e haalele iho ai kakou i ko kakou mau home nei a hele aku malalo o kekahi misiona malu.

            Ma keia wahi i hooki iho ai na Bonita la i kona leo, a elike me kona leo mana nui, pela na kanaka i hooko aku ai, a mahope o ko lakou aloha no ko lakou alihikaua nui, oia no ko lakou wa i hoi aku ai no ko lakou mau rumi pakahi, no kekahi ko ana ia lakou iho me ko lakou mau aahu kaua.

            No kekahi mau minute pokole wale no keia @hau ana iho o na poe powa la, aia hoi, ua paa ae la ko lakou mau aahu kaua, a ma ko lakou mau lima akau pakahi, e paa ana lakou he pahikaua oilua, a ma ko lakou lima hema hoi he palekaua haokila, ma ko lakou mau lua hoi e kalewa ana he mau koi kaua a ma na puhaka he mau p@hi poniaka, a ma ka nana aku i ko lakou kulana, ua makaukau piha lakou ma na ano a pau no ka halawai ana aku me ko lakou mau enemi.

            I keia wa i paa ai o ko lakou mau kahiko, ua oea koke aku la no waho o ko lakou mau keena a hele aku la hoi e wae i ko lakou mau lio holo loa, elike me ka makemake o ko lakou alihikaua nui, aka, aale no nae i loihi ko lakou wae ana. oiai ua kamaaina wale no lakou i na lio holo a pau o @o lakou home.

            Maluna oia mau lio i kau ae ai ua mau powa la a holo aku la no ke kahua hoolulu akea, kahi hoi a Bonita e kali mai ana o ko lakou hoea aku, oiai ka manawa e nee awiwi ae ana no ka hora 8, ka wa hoi o lakou i makemakeia ai no ka haalele ena iho i ka home a uhai aku mahope o ka meheu o ko lakou mau enemi.

            Iloko o na sekona pokole wale no na hoea aku la ua poe powa nei no kahi a ko lakou alakai e kali mai ana, a ia manawa no me ka hoohakalia ole iho, poha mai la kona leo kauoha, i ka i ana mai:

            E oʻu mau kauaka hoolohe, e kuupau i ka holo o ko oukou mau lio, a uhai mai mahope oʻu i keia wa ano, e unuhi pu ae hoi i ka oukou mau pahikaua a paa me ka makaukau no ka wa i makemakeia no ka mea, eia kakou malalo o kekahi hoakai ano nui no ka paio ana aku me ke kanaka opio nana i hoo@ele mai ia kakou me ka haku ole, aole wale hoi ia, @ka, o ka mea nana i hoolilo aku i kekahi o ko kakou mau hoa i poepuu na ka make ma ka ponei.

            A oia kanaka a me kona hoaloha aoo, oia ko kakou mau enemi e hele nei e paio aku no ka hanohano o ka oihana a kakou i hoohiki ai, oiai, he kipi oia i keia wa ano, a oia ka kakou misiona malu e hele nei e hooko.

            Ia mau sekona no, aia hoi, ua puia koke ae la ka lewa me na leo huro o na kanaka e haehao ana i ka meha e halii ana maluna o ko ko lakou home, me ka hooho pu ana ae me ka piha maina.

            E make ke kanaka opio a me kona hoaloha i keia no, a o ko Lua pauku kino puanuanu e hoihoi mai i ka home a laua i mahuka aku ai no ka hoike ana aku i ka oiaio i ko kakou haku aliiwahine, ua hooko pono ia kona makemake me ke paewaewa ole.

            Maanei i kuupau aku ai Eonita i ka holo o kona lio, i ukali ia hoi e kona mau kanaka he hookahi hanei, a iloko o na sekona pokole wale no, ua nalowale aku la lakou iloko o ka hihipea o na laau, a ke hoonouene ia la hoi ka hoaua e na kapuai o na lio o na powa.

            No Bonita, aole oia i maopopo i ke alahele a kona mau enemi i hele aku ai aka, ua hoomau aku la no nae oia i ka hoonee ana me ka pua h@a no hookahi hora o keia kuu pau ana o ua Bonia nei i ka holo o kona lio iloko o ka pouli, aka aole nae he mau ulia pomaikai i halawai me ia, nolaila, me ka hoomau ko@ ole aku i ka holo o kona lio, kaohi koke mai la oia me ka huli ana mai ihope a haawi ae la i ke kauoha no ka pii ana aku o kekahi mau kanaka maluna o ua kumulaau kiekie, a nana aku hoi ma o a maanei malia o loaa ia lakou he meheu o ko lakou enemi.

            Oia kauoha oia ka kekahi o kona mau kanaka i hooko aku ai, a ma luna o kekahi mau kumu laau loloa i pii aku ai lakou, a he mea oiaio, ua hoopomaikai ia ka lakou huakai pii aau, no ka mea, ua ike ia aku la he hapalua mile ma ka aoao hema o lakou, e oili mai ana kekahi wena ula ahi mailoko mai o na lau laau.

KA HALEPULE O KALIHIWAENA

            No ka mea, ua paa ka halepule koe wale no na noho a me kekahi mau mea liilii. Nolaila, ke kahea nei o Rev. Makua Kelemeneke i na hoahanau a pau loa o ia halepule a me ko lakou mau makamaka, e akoakoa ma kahi o ia halepule, ma keia dominica ae, la 18 o Aukake, hora 3 o ka auina la, i mea e kukakuka ai no na hemahema o ka halepule, no na noho a me kekahi mau mea liilii e ae, no ka la e komo ai a me na hoomakaukau no ka la komo.

            Aole e pono ke noho kekahi, aka, e hele pau loa mai ka pono.

            He pauahi nui ko kela kakahiaka Poalima, ma ka hale olopapa o Hapa, a ua nui na poino i ike ia.

            Ma ka hoike a ke Keena L@paahao o Rusia, o ka nui o na lawehala i kipakuia aku no Siberia maloko o elua makahiki he 80,056, a maloko oia huina he 894 wahine. Nui no keia poe haʻihaʻi kanawai.

            Ua loaa mai nei he lono maluna o ka mokuahi Aorangi, no ka hoohui ia ana o Miss Esther Lyman, ke kaikamahine a F. S. Lyman o Hilo, me W. G. Li@libridge he haole hanai holoholona no A@, ma Madison, Wis, ma ka la 18 iho nei o Iulai.

Nuhou Kuloko.

            Ua hookuuia mai o Lilinoe (w) i hoopii ia ai no ka lapaau laikini ole ma ka Poalua nei.

            Ua hoea mai nei mai lokohama mai a hala loa aku la no Potalana ka mokuahi Columebia.

            Ua loaa mai nei na lono ma ka walani mai nei, ua pio loa ka pele, a he wahi uwahi uuku wale no ia e pua la.

            Maluna o ka Aorangi i loaa mai ai na lono no ka powa ia ana o ka Peresidena o ka Repubalika Dominika.

            Ua hoopanee ia aku la a ma keia huli hoi ana mai a ke Kinau e hoomaha ai oia no kekahi mau pule no ka hoomaemae ana.

            Eia ke ikeia nei ka pele loa o na pualikoa Hawaii i na kanaka ole, no ka mea, o na kanaka i pau ko lakou manawa, aole lakou i komo hou iloko o ka oihana koa, a he kakaikahi loa na poe e komo nei i keia wa.

            Ma ka la 30 o Iulai i haalele aku ai ka mokuahi Kina ia Iokohama, he hookahi la ka haule o kona manawa holo, mamuli o ka makani taipuna e pahola ana ma kahi kokoke ia @, a he nui a lehulehu na moku Iapana e hopohopo ia ia ua nalowale.

            Ua olelo ia ae o ke kaa uwila o ka hui kaa hapaumi e waiho nei mauka o Kapalama, e hoao ia aku ana ia ma ke alahao kaa hapaumi ma ke alanui Moi. E hooholoia ana ke kaa e kekahi pahu uwila maluna ona, a e hoao ia ana oia ma keia @ koke iho.

            Ua holo ia mai nei e ka Mauna Loa ekahi huakai holo loa mai Lahaina mai a hiki i Honolulu nei, ma keia huakai mai nei. iloko o eono hora a o iki me ka helu la o na minute o kona ku ana ma Kaunakakai, a pela hoi mawaho o ke awa no ka hookuu ana i ka Iwalani noka p@ ana iwaho, ina aole kela mau kaulua ana, ina ua ho@ mai oia @ nei iloko o 5 hora 10 minute.

 

EGAN DRY GOODS COMPANY.

ALANUI PAPU.

HE KUAI KUIKAWA NUI NO KEIA PULE

Na Pale Pakaukau Lilina, a me na Tawele.

Na Pale Pakaukau Keokeo Damask 65 ken. mamua 45 ken o ka i-a

Na Pale Pakaukau Keokeo Damask $1.50 mamua $1.00 o ka i-a

Na Tawele Tureke 12 1/2 keneta, e loaa no 3 i ke 25 keneta.

Na Tawele Tureke 20 keneta, e loaa no 2 i ka 25 keneta.

Na Tawele Huck 25 keneta, e loaa no 3 i ka 50 keneta.

Na Tawele Damask 75 keneta, ua hoemi ia i ke 50 keneta..

Na Tawele Flaxine, 16 iniha, 3 no ka 25 keneta.

Na Tawele Flaxine, 18 iniha, i ka 10 keneta o ka i-a

ECAN DRY GOODS CO.

HONOLULU                         ALANUI PAPU.