Ke Aloha Aina, Volume V, Number 40, 7 October 1899 — Page 6
| This text was transcribed by: | Cyndi Defenbaugh |
| This work is dedicated to: | Kaelene Puanani Ahu-Rey |
KE ALOHA AINA
6 KE ALOHA AINA POAONO, OKATOBA 7, 1899
HE KAAO KAILI PUUWAI
---:NO KA:---
UI MINEWA.
KAIKUNANE EIWA
I hooliloia i mau Manu Nene Ahiu
a i ole na Keiki i Hoehaehaia
Kakauia no KE ALOHA AINA
I keia me i minute aia na leo hookikina o ka elemakule ke loheia aku la me ka weliweli nui, a e haawi ana hoi i na olelo haihili i kona mau kanaka e kuemi hope mai ana mai ka nee ana aku imua, aka, ua makehewa loa nae ia mau leo hookiua, no ka mea, aole loa he kauwa i hoao hou aku e ku hou imua o ka kaua koa opio, aka, aia lakou ke auhee la me ka weliweli no lalo o kahi a lakou i pii mai ai.
A i keia ike ana o ka elemakule i ka poino nui o kona mau kanaka, oia no kona manawa i unuhi hou ae ai i kana ulili a puhi ae l no na manawa elua, e haawi aku ana i ke hoailona i kana mau kauwa no ka hoakoakoa ana mai.
He mea oiaio, elike me ka makemake o ka elemakule, pela kona mau wahi kanaka kakaikahi i koe i hoakoakoa mai ai, a mahope o kona haawi ana aku i na olelo hai ilili me ka piha inaina no ko lakou hohe wale, me kona kino hoi i hele a naka haalulu no ka hoolohe ole ia ana o kona leo kauoha, aia hoi, ua poha mai la kona leo me he hehena la i ka hooho ana mai.
E na kanaka lapuwale, no ke aha oukou i hiki ole ai ke paio aku me kela wahi keiki hookano, ua nele anei ko oukou mau puuwai i ka wiwo ole?
Aole e ko makou kaku, aole loa makou i hoonele ia me ka ikaika, aole hoi i ka wiwo ole, aka, aole e hiki ia makou ke paio aku me ia oiai, ua loaa iaia he kulana maikai a pela oia i lanakila ai maluna o makou, aka, ina he kahua maikai ko makou, aole e hoi nele ka makoa kiina pahi, nolaila, e hoopau i kou huhu no makou.
Na keia mau olelo a na kauwa i hoomaalili mai i ka puuwai o ko lakou haku, a hoi hou mai la hoi kona mau noonoo ao kakana, a oia no kona wa i haawi hou ae ai i kana kauoha i ka ana aku.
E o’u mau kanaka, e haalele iho i keia wahi ano, a e hoi aku maloko o ke alahele huna, a i ko oukou wa e hemo ai ma kela aoao, e hookolo hou mai maluna o ka aina, no kahi a na aea haukae e kau mai la i ka pali, no ka mea, aole e na kuu inaina a hiki i ko laua make ana. E hooko i keia kauoha ano, e panai aku hoi i ka ino no ka ino.
Ma keia wahi i haawi ae ai na kauwa kakaikahi i ko lakou leo huro no ke ola o ko lakou haku, a nalo aku la noloko o ke alahe’e huna, malalo o ka hooko kauoha no ka imi hou ana i ke alahela okoa ae e poino ai ke ola o ke koa opio.
Ma keia wahi e haale’e iho ai kaua i na kauwa a me ko lakou haku puuwai lokoino, a e alawa aku hoi kaua maluna on a opio e kau mai la iluna o ka pali me e mau ao opua la i ka malie.
I keia ae hee ana aku o na kauwa mai ke koa opio aku, oia no kona wa i haalele koke iho ai i kana wahi e ku ana, a me na kapuai awiwi, hoi hou aku la oia no kahi a kaua aloha e kali mai ana.
A i kona wa i hiki aku ai imua o ka a Minewa, oia no ko laua wa i puili hou ae ai kahi i kekahi iloko o na kipona waimaka o ka hauoli, a lilo aku la iloko o na kuwili aloha ana, me ka haawi pu ana hoi i na kahoahoa i na lani, no ka hoopakole ia ana mai o ko lana mau ola.
Aka, aole nae laua i hoohakalia lea iho malaila, ua hoeu aku la ke koa opio i kona hoa no ka haalele koke ana iho i ua wahi la, oiai, ua hopohopo oia no ko laua ala.
Elike me ka makemake o Boliona, pela o Minewa i ae aku ai, a ikeia aku la na lima wikani i ka lalau hou ana aku i kana aloha a hoopili mai la i kona poli, a me kona lima hookahi a me na wawae i hoonee kou aku ai oia i kana huakai ehueku no luka o ka welelau o ka pali.
He mau minute wale no keia pii hoomanawanui ana aku o ua opio nei, aia hoi, ua hoea aku la laua no i na o ka pali, a ia wa no hoi laua i ike aku a@i ka nani o ua whai mokupuni la e waiho molale mai ana imua o ko laua mau onohi ike.
Mahope iho o ko laua hanai ana i ko laua mau ike me ka nani o ka aina, aia hoi, ua huli ae la laua a kilohi aku la i na ale kupikipikio o ka moana, a ia wa no hoi i hooikilleia ia ae ai laua i ka ike ana aku he wahi waapa e auku mai ana i ka moana, a mamuli o kona mamao loa, ua hiki ole ia laua ke ike aku i kona hoe waapa.
HOOKUUIA O DREYFUS MAI
KA HOOPAAHAO IA
ANA.
Rennes, Farani, Sept. 20. O kapena Alfred Dreyfus ma ka hora 3 o keia kakahiaka i haalele iho ai oia i ka hale paahao maanei, kahi ona i hoopaa ia ai mai kona wa i huli hoi mai ai mai ka mokupuni Devil mai a holo aku la no Veru, kahi ana i kau aku ai maluna o kekahi kaaahi a holo aku la no Nautes. O kona haalele ana iho, aole he poe i ike, ua hoea mai o M. Viguer, ke poo o ka oihana malu a me Dureault i ka halepaahao ma ke aumoe, e lawe mai ana i ke kauoha a ke Kuhina Kaua Dreyfus.
O keia iho la ka hopena o kekahi o na hihia ano nui nana i hoopioo ia Farani no kekahi mau makahiki i hala ae nei, mamuli o ka manao ia ana ua kuai malu aku o Dreyfus i na papa kuhikuhi o Farani i ke aupuni o Geremania, aka, ua hoole mau aku nae o Dreyfus a hiki i kona lilo ana he kanaka lanakila.
Nuhou Kuloko.
E makaala e ka lehulehu i ke kuai hoemi nui o na Silika Eleele ma kahi o Painapa.
Ua hoea mai ka moku haukipila koa Relief mai Kapalakiko mai, a e holo loa aka ana oia no Manila.
Eia ke malamaia nei he kuai hoopau nui o na Waiwei a pau ma ka halekuai Pacific Import Co.
Ua hala aku la ka mokuahi Kinau ma kana huakai o eono manawa iloko o ka mahina ma kona mau awa o Maui a me Hawaii.
He puhiohe ke haawi ia ana e ka bana o na koa o ka regimana 26 ma ka Hotele Hawaii i ke ahiahi Poakolu nei.
Ua loaa aku he eke kopaa ma ke alanui Moiwahine i ka wanaao Poakolu, a ua lawe ia aku i ka halewai no ke kali ana i ka ona nona ia waiwai.
Ua hoi mai nei ko kakou Kilokilo Hawaii Ben Namakaokeahi mai kona huakai aku nei i Kauai, a i kona manawa malaila, ua puhi ia eio he kalai pahoa i ke ahi. He keu no a ka hopo ole.
E nana i ka hoolaha a ka Heiau o na Paikini, e haawi manauahi ia aku ana na Sopa Aala, Papale, a pela aku, ma keia Pakahi iho, Okatoba 9. Nolaila, e hele koke mai
O ka nui o na kanaka a me na Hui i loaa na aina aupuni mai ke aupuni aku mahope mai noi o ka hoohui ia ana me Amerika Huipuia he 120. Nui no,
Ua malamaia ae he hakaka ma ka po Sabati nei ma kekahi hale inu saaipa ma Kakaako mawaena na koa Amerika a me na kanaka, a he hookahi koa i hopaai no ka hoeha ia David Aea.
OLELO HOOLAHA.
Ke papa loa aku nei au i na poe waiwai a puni keia Paeaina, mai hoaie mai oukou i kuu wahine mare, ia Kalai Heaerona, olai, ua haalele mai oia ia’u a me ka maua keiki opiopio loa, ua lilo i ke au a na wawae, i ke kai anapanapa o Mamala. Ina o ka poe e malama ana i na wahine ala, e hoopii no au ma ke kanawai, e ili no na poho a pau na koina a’u e hoopii ai maluna oia poe.
GEO. HAEBRONA KINILAU.
Honolulu, Sept. 26, 1899.
KUAI HOEMI NUI O
NA LOLE KOENA.
MA KAHIO
L.B. KERR.
ALANUI MOIWAHINE
NO HOOKAHI PULE WALE NO.
A I OLE PELA
E LIKE ME KA LOIHA O KE KOE
ANA O KEIA MAU WAIWAI.
SWISS LAALAAU, LAWNS,
OGANDI, KINAMU, PERCALES,
ZYPHER, DIMITI, KASIMIA a me
CREPONS.
Ua kupono loa ko lakou loihi no ka hana ana i mau Palule Wahine Palekoki o na Lede a me na Lole o na Opio.
Na Uhi Moe Keokeo o na ano, a pau i hana noeau ia.
NOLAILA, E HELE KOKE MAI, E LOAA
NO KEIA MAU WAIWAI MA KE KUIKE WALE NO.
Aole e loihi keia kuai hoemi nui o na Lole Koena.
L. B. KERR.