Ke Aloha Aina, Volume V, Number 43, 28 October 1899 — Page 6

KE ALOHA AINA

POAONO, OKATOBA 28, 1899.

 

HE KAAO KAILI PUUWAI

NO KA:

UI MINEWA.

A ME NA

KAIKUNANE EIWA

 

I Hooliloia i mau Manu Nene Ahiu

a i ole na Keiki i Hoehaehaia

 

Kakauia no KE ALOHA AINA

 

            I keia wa i haule paha aku ai o ke koa opio Bo@ no lalo o ka honua, oia koke no ka wa o ka wahine opio i lele iho ai a hapai ae la i kana aloha me na lima aloha, a o kona mau waimaka hoi e hiolo makawalu ana ia mamuli o kona manao kuhihewa ana au poino ke ola o kana mea hookahi i aloha ai.

            Aka, ua hoomama iki ia mai nae kona na@ luuluu i ka wa i poha hou mai ai ka leo makona o ka luahine kilokilo i ka i ana mai:

            E ke kaikamahine opio e hoomama i kou mau kaumaha no ke kanaka opio, no ka mea, aole oia e make ana, aka, e ola hou mai ana no oia i ka wa e pau ae ai ka ikaika o kuu wai laau e hoomalule ana i kona kino.

            Aka, aole nae o Minewa i hoopau ae i ka hiolo ana o kona mau waimaka i piha me ka ehaeha, a ua like hoi oia me kekahi wahine hehena ia wa e wue kapalili ana, aka, aole nae he lohe ae o kana B@liona.

            A no kekahi mau minute ka noho hamau ana o ke kilokilo Ronio, oia no kona wa i hoopa mai ai ma na poohiwi o ka wahine opil me ka panai pu ana mai.

            Ano e ka ui Minewa, he p@ oe na`u i keia hora, a e hoihoi aku ana au ia oe no ka aina a`u i hele mai nei, a nolaila, e hoike mai, ua makaukau anei oe i ka ukali ana mai mahope o`u.

            E hoomanao pu iho hoi, wahi a ke kilokilo i panai hou mai ai.  I kou wa e lilo ai i wahine na kuu haku opio, e noho ana oe he moiwahine maluna o na miliona kanaka, a he mau tausani o na wahine a me na kanaka opio e lawelawe ana @.  O kahi e hoaumoe ai o o kou poe, aole ia maluna o na ahua pohaku elike me keia a`u e ike nei, aka maluna no ia o ua bela nolunolu i hana ia mailoko mai o na hulu hipa aeae loa o Alabiona, a o na wahi a pau o kou rumi moe, e uhipaaia ana e ke gula a me ke daimani.

            Ma keia home aohe au luhi ana, no ka mea, @ana kauwa he mau tausani e hooponopono ana hoi i na mea a pau, a e noho ana oe iloko o ka hauoli a hiki i ka hookaawale ana aku a ka make ia oe mai keia ilihonua aku.

            Nolaila, ma kea wahi e pane mai no ka manawa hope i keia ninau a`u ia oe.  Ua makaukau aku la anei oe no ka hele pu ana me a`u e na hoolo o kela Paredaisa nani?

            A no kekahi mau minute ko Minewa noho hamau ana, aia hoi, ike ia aku la kona poo i ke e@ ae a me na waimaka e hiolo makawalu ana, poha mai la kona leo i ka i ana mai me ka wiwoole.

E ka wahine puuwai lokoino, o ka nani a @ au i waiho mai la imua o`u, aole loa he hookahi iwaena oia mau mea nani au i hoike mai la imua o`u i hookomo mai i na manao hiaai iloko o`u.  Ua oi loa aku ko`u hauoli o ka hoolilo ana i keia mau ahua pohaku i wahi no ko`u poo e hoaumoe ai ina o ka`u mea i aloha ai kekahi malaila mamua o ko`u hoomoe ana aku i ko`u poo maluna o ka punee i uhi ia me ke gula a me ke daimana, ina aole ka mea a kuu puuwai i aloha ai malaila.

Nolaila, e ka wahine kilokilo e hoi aku no kou home a e hookuu mai hoi ia`u e noho hookahi me ka mea a kuu puuwai i aloha ai.

            Ma keai wahi i luliluli hou ae ai ke poo o ke kilokilo wahine a pane mai la me ka leo kuoo.

Aole, aole loa au e hookuu aku ana ia oe e ke wahine opio e noho me keia keiki o ke kulana haahaa, no ka mea, he minamina loa au i kou ui nani, he mea oiaio, ua aloha oe i keia kanaka opio, aka, no na la pokole no ia a nalohia aku no.

Maanei i hapapa iho ai ua Ronio la i kona mau pakeke a unuhi koke ae la i kekahi kii hooleleaka o kona haku opio a haawi mai la i ka wahine opio, me ka pane hou ana mai.

E Minewa, e alawa mai i keia ku a`u e malama nei iloko o kuu poli a hoike mai pehea kou manao nona?

Elike me keia leo kono a ka luahine, pela ua Minewa nei i haliu aku ai maluna o na helehelena o ke kii hooleleaka a kona enemi e paa mai ana.

A ia wa no hoi i halawai mai ai kona mau onohi ike me kekahi kanaka opio ui e moe ana iluna o kekahi noho pulu nani ana i ike mua ole ai, a maluna o kona umauma e kau ana na hoku nani e hoike maopopo mai ana, aole oia no ke kulana heahea, aka he noi opio io oia no kekahi aupuni i malihini iaia.

A maluna ae o kahi a ke kanaka opio e @ e lohi ana e luhe iho ana na lala laau me ka lau uliuli, a e ike pu ia aku ana na paa o na ano like ole e popohe mai ana maluna o lakou.  O na manu hulu nani e lele pohai ana lakou, a e ike pu ia aku ana no hoi kekahi manu o lakou e kiko aku ana i na pua mohala, a he nani na mea a pau e hiki ole ai i ka maka ke nema aku.

Ma keia wahi i kani iho ai ka uhu a ka wahine opio me ka haalele ana aku i kona kilohi hou ana maluna o ke kii a ke kilokilo e paa ana a haule hou iho la kona lena ikemaluna o na helehelena o kana aloha, me ka puana malie ana ae, aole no oia i oi ae mamua o kuu aloha, aka, ua like no a like me ka ua kanilehua.

Aka, ua ike ia aku la nae ka li-o ana ae o na pepeiao no keia mau olelo a Minewa e hoopuka nei aole i oi ae ka ui o keia kanaka opio mamua o kana aloha, a ia wa no i haliu koke mai ai oia a pane maila me ka leo piha inaina, i ka i ana mai:

E ka wahine opio, alaila e hoole mai ana anei oe i ka ui kaili puuwai o kou haku opio?

E pane koke mai a mai hoapaapa hoi, no ka mea, aole o`u wa e kali aku ai no kau hana hoopau manawa.

Na keia leo kono a ka wahine kilokilo, ua hiki ole iaia ke noho hamau hou iho no kekahi wa okoa aku, a ia wa no i pane aku ai oia i ka ninau a kona enemi.

E ka wahine kilokilo, ua ike aku nei au i na helehelena o ko haku opio, he mea oiaio, aole au e hoole aku ana i kona nani, he ui io no oia aka, ma ko`u hookuku ana ae me ka mea a kuu puuwai i aloha ai, ua haahaa loa oia malalo o kona ui nohea.

Na keia mau olelo kaena a Minewa no kana Boliona, ua hoopiha koke ia ae la ka puuwai o na Ronio nei me ka inaina, a ike pu ia aku la hoi kona mau maka e hulali ana me ke aki ana iho i kona mau ku`i, a o kona leo kauoha hope i pae mai, ua hoopihaia la me ka weliweli i ka i ana mai:

Ano, e Minewa, e honi hope aku ia kua aloha mamua o ko`u hookaawale ana ae ia olua.  E hoolohe i keia leo, no ka mea, ua pau ko`u hoohakalia ana iho maanei, aka, e hoihoi aku ana au ia oe imua o ke alo o kuu haku me ka hoolohe ole aku he hookahi leo uwalo.

I ka hoomaopopo ana iho o Minewa, aole keia he mau olelo paani wale no, aka, e hooko io mai ana no ka luahine i kona makemake, a ia minute no, ua ike ia aku la kona kulou ana iho ilalo me na waimaka o ka ehaeha, e hilo makawalu ana ma kona mau papalina, a o kona leo uwe kapalili hoi e hoopaiakuli ana i ka lewa a haawi ihe la oia i na muki hope loa ana na kana aloha.

Aka, aia no nae ke lalawe la na manao hoololohe iloko ona me ka hooholo ana ma ka aoao ia o kana aloha e noho ai, a na ka make wale no e hookaawale i ko laua pili aloha ana.

A i ke aea ana ae o kona poo iluna oia no ka wa i lalau mai ai ka luahine i ka lima o Minewa me ka manao no ke alakai ana aku no luna o ka waapa, aka, ia wa koke no

(E nana ma ka aoao Ehiku.)

 

 

KE KEENA POO NUI O NA MEKINI HUMUHUMU.

 

MA KAHI O

L. B. KERR.

--------------------

            O keia malalo iho na MEKINI e kuaiia `aku ana ma ke kuike a i ole ma ka uku liilii ANA.

DOMESTIC                                                   SEAMSTRESS

STANDARD                                                  NORWOOD

AUTOMATIC                                                            PEARL          

ELDRIDGE B                                                            COLUMBIA

WHEELER & WILSON

STANDARD NO 10, me

na Lako Humu Pihi.

--------------

MEKINI WILI LIMA PAN-AMERICAN.

--------------

NA MEKINI I HOOHANA MUA

ia e loaa no me ka emi loa.

--------------

Na Kui a me na Lako Mekini, ua hiki pu ke hoomaemae i na Mekini.

--------------

            L. B. Kerr.

                                    Honolulu, Alanui Moiwahine