Ke Aloha Aina, Volume V, Number 51, 23 December 1899 — Page 4
| This text was transcribed by: | Jean Howard |
| This work is dedicated to: | Awaiaulu |
KE ALOHA AINA
4 KE ALOHA AINA POAONO DEKEMABA 18, 1899,
=================================================================
Ke – Aloha – Aina
Hookumuia no ka
Pomaikai o ka Lehulehu, a he Nupepa no ka Lahui Hawaii.
=======================
EDWARD L. LIKE.
Lunahoononopono.
EMMA A NAWAHI
Puuku o Ke ALOHA AINA.
==================
HONOLULU.....DEC 23, 1899
===============
OIAI, aia aku la ka ninau o Hawaii iloko o na Hale Ahaolelo elua o Amerika kahi i mili lima ia ai, no ka haawi ana o na puuiu loea o ko laila poe kau kanawai no ke kulana aupuni maoli o Hawaii e kukulu ia aku ai ma keia hope aku, he kulana aupuni paha ia i ku i ko kakou makemake, aole paha, a i ole, he kulana aupuni ia i omilo ia na hai e hooponopono mai, he noho pu wale aku no ka kakou.
-------------------
AKA, no makou iho, he haawi mau aku nei no makou i na manao hoolana i ko makou mau makemake heluhelu, e nana aku imua me ke kuemi ihope ole, a malia, aia no ko ke Akua ahonui ke hookokoke la ma ka puuwai o na hoa oloko o keia mau Hale Ahaolelo no ka haawi ana i ka lakou olelo hooholo kaulike maluna o ke kahua o ka pono a me ke kaulike.
-------------
HE wa kupono loa keia i ko makou lanui aloha e lawe nui ai i ka nupepa, ke kahua hoi o ka makaala e hiki ai i na makamaka ke ike iho i na mea i hana ia mao a oiai hoi, o ko oukou hoopalaleha ana ma na hana maikai, he kumu hoopilikia no ia i ko kakou kulana noho ana naanao a me ka holomua, a oia hoi ka makou e paipai aku nei ia oukou, e hapai like kakou i na hana e hiki ai ia oukou ke ike pono iho i ke au-nui a me ke au iki o ka ninau o Hawaii.
----------------
HE hookahi wale no pule okoa i koe a hoea mai ka La Karisimaka, ka la hanau hoi o ko kakou Hoola i kohoia e kekahi mau aoao hoomana ma ka honua nei, a pela aku no hoi ka La Makahiki Hou, nolaila, ke hoomau aku nei no makou i ka nonoi ana i na makamaka e noho aie nei, @ hookaa koke mai i ko lakou mau wahi aie mamua o ka pau ana o keia makahiki. O keia ka leo o ke ola, a o ke kuli no ka make.
----------------------------
EIA ka Hui Pai Nupepa Hawaii-Kekake ke liuliu mai nei e hoopuka i nupepa pukala no ia hui pai nupepa, a ua manao ia, o ka pule mua ae nei o ka malama o Ianuari ae nei ka wa mua loa e puka mai ai koua helu mua, a ia wa e maopopo ai ke kahua konane o keia hooulu hoopuka nupepa a keia poe, i upu ai e kakele hou mai ma keia alahele no a lakou i hookamaaina @na ai.
----------------
AOHE a makou kamailio ana no ke alahele a ka makamaka @ k@kiwi mai ai, no ka mea, aole oia he malihini e hiki ai ke kukai olelo pu aku me ia ma ke ano o ke alanui e hele mai ai, aka, o ka makou wale no e ike nei, he wahaolelo oia na kekahi hui pohaku nui oloko nei o ke kulanakauhale, i manao hoi e kakele maluna o ke kahua hana no na mea e pili ana i ke kulana aupuni o Hawaii.
-----------------------
A OIAI, he kulana ka makou nupepa no ka haawi ana aku i ka makana o ke aloha, i ka makamaka e puka ae an, a mamua hoi o kona oili hou ana ae i ke ao malamalama, ke haawi e aku nei KE ALOHA AINA i kona aloha Hapenuia nona.
----------------------
UA hoomaopopo loa ia ma keia hoomalu ia ana iho nei o kakou, mamuli hoi o ka loaa ana o ka manao maikai i kekahi poe, na hiki no ke koho ia ke ano maoli o keia hoomalu malalo o keia mau hoikeika ana, oia hoi na mea e pili ana i ke komo pu ana o na kiai a me na koa ma na wahi ponoi maoli o na kino i hoolilo a i manao ia hoi e ka Papa Ula, ma o ke alakai ana o na Kauka he ma’i fiva eleele keia, aole keia o na kupuino ia o Asia, aka, he ma’i fiva eleele keia no na pakeke o na Kauka, na kiai a me na poe a pau i apono ia e uku ia lakou mailoko mai o ka waihona o ka lehulehu.
-----------------
UA lohe a na ikemaka hoi kakou maloko o na nupepa mai Iapana a me Kina mai, e olelo ana, ma kahi @ poha ai keia ma’i, pomaikai e loaa hookahi ahailono malaila, a e make ana i ka la he maa haneri e hookokoke aku ana ma kahi o na tausani, a ua hiki ole loa ke ku kiai ia elike me keia a kakou e ikemaka nei i na poe koa a me na kiai e holoholo ana iuka a i kai o na wahi i hoomalu ia, e hoohaukae pu ana me ka poe i manao ia, he kahua ko lakou mau wahi noho no na ma’i lele.
-------------------
A I ka wa e huli mai ai na ku kiai ana a keia poe, i haumia i na ea ma’i o keia mau wahi i hoomalu ia, ua maalo ae la lakou mamua o ke alo o ka lehulehu, me he poe lanakila la, me he mea la, e hoike okoa mai ana no ka lakou mau hana i ka mea oiaio maoli, aole keia he mailele, aka, i wahi mohai no na poe nana i hoopuoho ae nei keia wahi anoano ipu awaawa, i mea hoopomaikai no ia lakou iho aole i kekahi poe e ae.
----------------------
EIA iloko o ka lima o na Kauka haole oloko o keia kulanakauhale, he mau haneri dala no na palapala ae holo o na ohua holo piliaina maluna o na mokuahi, mamuli o ke kauoha a ka Papa Ola, e kii i mau palapala, no ke hoikeike ana i ke ano ma’i o ua poe ohua la i akenui e hoi no ko lakou mau home ponoi ma ka $1 00 o ka palapala hookahi, a ua nui na palapla i hana ia pala i ka auina la o ka Pualua, Dec. 12
---------------------
EIA na mau palapala la a na Kauka i ka Papa Ola kahi i paa ia ai, a o ka ka Papa Ola hoi, oia ia iloko o ka lima o na ohua e paa ia nei me ka maopopo ole o kona waiwai, he kupono loa ia ke aupuni ma o ka Papa Ola Ia, @ kauoha aku i na ohua eemoku e kii hou aku i kela mau dala, a na ke aupuni hoi e kaana pono heaha la ka uku kupono no ko lakou nana wale ana no i ke kapalili o ke alelo a me ka pana o ka lima.
-----------------------
O KO makou manao kuokoa loa keia mawaho ae o na mea a makou i ike ai he hana pono ole ia, a ke ake nei hoi ko makou lunaikehala a hana maoli ka, Papa Ola i na mea e hoopilikia wale ai i kela poe, i upu mua ole, e halawai ana lakou me keia hana hao wale o ka hilahila ole, maloko ponoi nei o ke kulanakauhale o Honolulu.
---------------------
O KA ulu ana ae nei o ka hoopaapaa ma na ike a na Kauka no keia ano ma’i bubonika, o Asia, maluna o ke kino o kekahi wahine Hawaii, i pahi ia i ke ahi, he hoike ia no ka lawa ole o ka ike o kekahi poe Kauka, e hale ai @ hookohukohu, me he mea la, @e ike a he loaa ma ia hana, elike @ ka hoike koikoi a Kauka Holemana, nana i hoopahua ka ike o kekahi mau Kauka, i olelo ai he babonika maopopo ia, ma o ka loaa ana o kekahi mau palahele ma ka poaoae, a me kekahi mau moano ma ka lima, a o ka puka koke ae la no ia he fiva eleele, eia nae hoi a ua pau aku ko ia la kino i ke ahi, o ka wa ia e hoole hou ae ai, aole ia he fiva eleele, he ma’i ino paha, a pela aku. Hu i kula i ka auwaa panana ka ike o ua poe Kauka nei.
--------------
AOLE noi i loihi loa ae nei na mahina o ke kamailio ia ana no na mea e pili ana i na ilina kupapau, no ke kanu ana i na kino make, e olelo ana kekahi poe, i Puowaina, i Kapukaki, i Kahauiki, a pela aku, a o ka kekahi poe hoi, e puhi ahi ia na kino make aka ua hoike aku Ka Aloha Aina i ka manaonao oia hana a he mea hoi e hooulu mai ai i ka haunaele iwaena o na ohana o ka poe i make a me ke aupuni pu hoi. A no ia mea, ua hoopau wale ia ka noonoo ana o ke aupuni no ia ano hana hooweliweli.
------------------
AKA, i ka wa nae i poha ae la o keia ma’i, na Iawe koke ae la ke aupuni i ke kulana hana o kaawiwi, ma ka hoolilo ana i na kino o na poe i koho ia na loaa i keia ma’i weliweli, iloko o ke kapuahi hoohehee hao o Ulakoheo, me ka hookaawale ole ia aku mai ke aluka aku a ka lehulehu e hele ana io a ia nei, oiai hoi ka nahi hohono o keia poe make e puhi lehu ia ana.
----------------
AOLE he wa maloko o ka moolelo o ko Hawaii hooponopono aupuni ana elike me keia, ka uwai ia mai o ka manaonao a imua pono o ke ale, a ilaila e hana ai, me ka hunahuna ole aku. Nui ka weliweli, oiai, ke hapuku nei lakou nei i na poe e make ma’i iho ana ma ke ano mau, ma ke puhi pr@ ko lakou mau kino ma keia wahi o na kino o na poe @ puhi ia nei i keia mau po.
HE mea oi loa aku o ka pono i ke aupuni ka hookaawale loa ana aku i keia i@ u ahi e hoopilikia hou ai i ke ola o ka lehulehu, ma o na ea hohono uahi kanaka la e kokolo malie ana ma kahi a me kanaka e hele ana io a ia nei, a oiai, he akenui ko makou i ke ola, ke nonoi nei makou i ka Papa Ola, e hookaawale koke ia keia hana ma ka hoohakalia ole, a o ka hooko ia ana oia hana, o ka kakou ia e mahalo aku.
------------------------
Ua hopu la he koa puhi o-le no ka olelo pelapela i kona alii
WAIHO IA KA BILA ILOKO O KA HALE
--------------------
Wasinetona, Dec. 8. O Lunamakaainana Hitt o Ilinoi, ua lawe mai la oia i keia la he bila no ka noolako ana aku ia Hawaii me ona aupuni teritori, a ua like hoi me ka mea i hoike ia aku i ka Hale i kela makahiki aku nei, a e hoolako ia i Kiaaina teritori @ koho ia e ka Peresidena me ona Ahaolelo elua hale.
Na Sherman o NuIoka he bila e kanoha ana i ka Luna Leta Nui e hana ia i aelike me kekahi hui telegarapa Amerika e hoouna ia na hoike pili aupuni i Hawaii, Pilipine, Iapana a me Kina no iwakalua makahiki, no ka uku aole e oi aku maluna o $400,000 o ka makahiki.
---------------
Ua loaa mai la na lone hope loa o ka bila o Hawaii nei i lawe aku e Senatoa Cullom iloko o ke Benute, ua waiho ia aku la i ke Koimte @ na Aina E.
---------------------
UA HOEHA IA
-----------
Ua lawe ia mai la i ko makou nei keena ka lono no ka hoeha kukonukonu loa ia na o J. Keau ma ke poo, ma ka po Sabati nei, ma o kona kulai ia ana mai luna o ka lanai o kona hale ma Kunawai ae nei e Kawika he kanaka i oluhia ia me ka wai hoomalule kino. Ua lohe mai makou he ano kupilikii kona ola, a oia ke paa nei ka limakoko ma ka Halewai.
----------------------
Ua pii ae ke kumukuai o na io bipi i keia mau la, a ka elua paona i ka 25 keneta.
Ua hopu hou ia no o Keoki Hapakela no ke kuai rama me ka laikiui ole e Ilamuku Baraunu ma ka po Sabati nei.
THE HUB
HALEKUAI NANI O KE TAONA
-------------------------------
Ua loaa mai la ia makou mai ka hikina na Iole huluhulu aleele i hana noeauia o na paikini hou. O ka waiwai io he $18.00, aka, mamuli o na La Nui, e loaa no ma
Ka Hub, ua hoemiia 10.50
--------------
He 150 Paa Lele Hui hulu Bolu a me Eleele o ka loaa ana mai @ no ia mai ka hikina, he nani ko lakou mau nanaina, me ke akahele e pili pono ai i na mea a pau. O ka $15, aka, no na La Nui e loaa no ma
Ka Hub, ua hoemiia 8.50
----------------
E hoomanaoia o ka makou waiwai o na Lole Aahu, Kamalii a ma Opio, a pela pu hoi me na Papale, Papale Kapu, me na Lako Aaha @ ea he hou loa.
E kipa mai a e ike; ou iho mamua o kou kuai ana, a e hookoeia no kekahi o kau mau dala. E hamama aku ana ko makou halekuai i na po a pau a hiki i ke Karisimaka.
J. S. SPITZER
ALANUI HOTELE KOKOKE I KE ALANUI PAPU