Ke Aloha Aina, Volume VI, Number 13, 31 March 1900 — Page 1

KE ALOHA AINA

 

 

AIA O ROBATA KE LIULIU LA

NO KA NEE ANA AKU NO PRETORIA.

Pau ka Manaolana o na Boa no ka Lanakila, ke Huli Hoi la no na Home.

            Maluna mai la o ka moku koa Meade i loaa mai ai keia mau nuhou makamaka loa, a hiki iho la i ka la 17 o Maraki nei, a no ka pomaikai o ko makou poe heluhelu ke unuhi aku nei makou, penei:

            Ladana, Mar. 17. I ka wa i hoea aku ai na pualikoa o Haku Robata i Bloemfonatein, ua mahuka aku la o Peresidena Steyu no Kroonstad, ma kahi he kanahiku mile ma ka hikina akau o ke alahao no Pretoria, a malaila i kukulu iho ai oia he aupuni hou. O keia ke taona i hookahua iho ai na Boa, a ua hoakoakoa ae na Boa malaila, ua olelo ia ae, aia ma kahi he 50,000 kanaka malalo wale no o Joubert.

            Ladana, Mar. 17, hora 4:20 a. m. Oiai, ke alahao mawaena o ke Cape ua hooponopono ia, iloko o na la pokole wale no e makaukau hou ai o Robata no ka nee mua ana no Pretoria, ke kapitala o Transvaal.

            O Mafeking wale no kahi e kali ia nei me ka hopohopo, a ua hoomaopopo ia he puali kai haalele iho ia Kimberley, a o kona hoopakele ia ana ua manaoia aole ia i mamao loa aku. He mau koa kumau wale no ke kolamu koa i hoouna ia aku la no kona hoopakele ia ana.

PAU KA MANAOLANA NO KA LANAKILA

            Ladana, Mar. 17. O ka Daily Mail ua loaa mai la iaia keia mau hoike malalo iho mai Lourenzo, no ka Poalima, Mar. 16. Eia ke hoonee mua ia nei ka eli ana i na auwaha ma ka muliwai Vasl ma Vereyng. O na lono hope loa mai nei mai Pretoria mai e olelo ana, ua hoike ae na Boa ua pau ko lakou manaolana. Ua haalele o Kenerala Lucas Meyer i ka hakaka ana, a ua huli hoi aku no kona mahina ai: Ua huli hoi pu aku o Kenerala Schalkburger, a pela no hoi na Boa he mau haneri e hoi la no ko lakou mau home.

LAWEIA O BETHULIE E KENERALA GATACRE.

            Ladana, Mar. 15. Ua loaa mai nei i ke Keena Kaua he hoike mai ia Kenerala Robata mai:

            Bloemfontein, Poaha, Mar. 15, hora 7:55 p. m. Ua kau aku la o Kenerala Gatacre ma kela aoao o ka muliwai Alani a lawe ae la ia Bethulie i keia kakahiaka. O Kenerala Pole-C@rew, me 8,000 kanaka o ka puali Guards Brigade, he elua pukuniahi a me kekahi puali kaua lio, ua haalele iho la lakou ia nei maluna o na kauahi no ka halawai ana aku me na Kenerala Gatacre a me Clements. Ua kaalo ae oia ma Bethany me ka halawai ole me na kue ia ana mai, a mailoko mai o kona pualikoa, ua hoolako ia mai oia me na hookele kaaahi, paoahi, poe hoohee hao, ama@a, kamana, a pela aku.

HOOLALA E HOOPAKELE I NA BOA.

            Cape Town, Mar. 14. Ua loaa hou iho la kekahi hana no ka hoopa@le ana i na pio Boa ma Simonstown. O ka nui hewahewa o na ipu aiwaha i hoounaia ia aku la i na pio i hookomo aku i ka hoohuoi i na Beritania, i ka huli pono ia ana, ua loaa aku na leta e hoolala ana no ko lakou hoopakele ia ana. Ua hoohauoli ia nae ko onei poe ma ka ikeia ana e lawe ia aku ana keia mau pio nui hewahewa maluna o na moku lawekoa no ka mokupuni St. Helena i keia po.

            Cape Town, Mar. 14. He hiohiona ohohia nui kai ike ia maanei i ka wa i lohe ia mai ai ua laweia ae la o Bloemfontein e na Beritania. Ua kani ae ka bele o na luakini a ua paikau hookahakaha ae hoi na koa.

AOHE I MALIU IA MAI.

            Ladana, Mar. 15. Ua telegarapa aku la o Kuhina Hay i ke Kanikela ma Pretoria i keia mau hoike malalo iho nei:

            O kau kukai no ke noi a na repubalika no ke komo uwao ana o ka Peresidena e hoopa ae i ke kaua, ua hoouna koke ia aku i ke aupuni Moiwahine, me ka hoakaka aku i ka manao o ka Peresidena i @ he hana kekahi e hiki iaia @oi hou mai i ka maluhia. Ua pane mai ko kakou luna aupuni ma Ladana, ua haawi mai o Haku Salisbury i kona mau hoomaikai no ka ka Peresidena mau hana makamaka i hoike mai ai, a hoike mai la aole e hiki i ke aupuni Moiwahine ke ae aku i na aupuni mana a pau i ke komo ana mai e uwao.

AOLE E HIKI IA GEREMANIA KE UWAO AKU.

            Pretoria, Mar. 14. Ua waiho aku la ke Kanikela Geremania i keia hoike malalo iho nei ia Peresidena Krueger no kana noi:

            O ke aupuni o Geremania ame ka Emepera, ua hauoli a ua makaukau loa e kokua aku i na hana uwao hoaloha i ka wa nae e ike pono ai i ke kulana, ua makemake na aoao elu i ka aha uwao. Malia ua komo keia makemake ma ka aoao o na Beritania, ua hiki ia ke ike ia ma ka ninau ana ae o na repubalika ma Ladana, a i ole ma ka ninau ana aku a keia aupuni, ka mea hoi aole ona mau manao ano nui e noonoo ai ma Aferika Hema. O ka hoao ana a Geremani e lawelawe i keia kumuhana uwao, he hooulu ana mai ia i na manao hoohuoi. O ke noi a na repubalika e waiho aku i ke noi uwao i na aupuni o Auseturia a me Swiss ua hooko ia me ka hakalia ole.

KE NEE MUA LA NA PUALIKOA.

            Van Zyl, Mar. 15 O ka uwapo e moe ana maluna o ka muliwai Alani, ua paa ia i ka hooponopono hou ia. Ua maki aku na pualikoa Beritania maluna ona, a eia ke hoolulu nei ma ka lepo o ka Mokualua Kuokoa.

HOAKOAKOA O RUSIA I KONA MAU KOA

            Ladana, Mar. 16. Ua hoouna mai la ka mea kakau o ka Time ma Sana Peteroboro he hoike, e olelo ana: O na lono hoohikilele mai Rusia Hema mai no ka mea e pili ana i ka nee malu ana o na pualikoa. Aia he pualikoa Rukini nui ke hoakoakoa la ma Odessa, ua manaoia no kekahi paikau hookahakaha wale no nae ia.

NA LONO NO MANILA.

            Manila, Mar. 15. O Tlores, ke Kuhina Kaua o Aguinaldo, ua haawi pio aku la oia ia Kenerala MacArthur. O ka bebe uuku a Aguinaldo i hopu pio ia ai ma ka mahina o Novemaba i loaa i ka ma'i samola poki, ua make.

            Wasinetona, Mar. 15, He lono telegarapa kai loaa mai la i ke Keena Kaua mai ia Kenerala Otis mai, e hoike mai ana ua hoihoi ia aku la i keia la no Barcelona he 533 Sepania, iloko oia heluna he 84 alii a me 427 kanaka, no na pualikoa Sepania i hoopakele ia mai ka lima mai o na Pilipine, me ewalu wahine a me 14 keiki o ka ohana o na aliikoa Sepenia i hoihoi pu ia aku.

NA KA UWILA E LAWE I KANA HAIOLELO.

            Columbus, Ohio, Mar. 16. Ua haiolelo ae o Rev. H. N. Barbour ke kahunapule o ka First Baptist Church, e hoouna aku i kana haiolelo maloko o ke telepona i na poe e hiki ole mai ana i ka pule.

            Eia ke hoomoe ia nei @ uwea maloko o ka luakini e ka Hui Telepona Citizen, a i ka wa e paa ai o keia mau uwea e kau ia ana he ipu olelo ma ka paia @mua a mailoko aku ona e hoolako ia ai na uwea me ka haiolelo a Rev. Barbour, ua hoike ae ua kahunapule nei, ma ia ano, ua hiki i na hoa e noho ana ma ka h@ lohe i kana haiolelo, na mele a me na hua pule.

 

            Ma kahi o 20 mau pake i hoolilo ae i ke kapa alanui i mau kahua @ i ka lako mau waiwai ma kahi kokoke @ makou keena nei i hulipau @ no ka halewai.