Ke Aloha Aina, Volume VI, Number 16, 21 April 1900 — KELA AU ME KEIA AU. [ARTICLE]

KELA AU ME KEIA AU.

O ke au o ka moana, e ko ana oia mamuli o ka hoopumehana ana a na kukuna mehana o ka la, i haule iho maluna o ka ilikai; a e ko ana hoi ke au o ka lewa, mamuli o ka ikaika hoonee o ke ea; a o ke au o ka aina a aupuni paha, e ko ia ana ia, e na hooponopono ana a ka poe na lakou e hoomalu ana ia aina a aupuni paha, nolaila, i ko kakou haliu ana aku i ke au o ko kakou noho aupuni ana o ka wa i hala, a hookuku ae me ke au o keia wa noho aupuni ana, e ikeia ana he au maikai a he au ino. I ke au o ka noho Aupuni Moi ana o ka wa i hala, ua ike ia no he ko ana no ke au no na hana haihai kanawai, he pepehi kanaka no ko ia au, a he pepehi kanaka no ko keia au, aka, i ko kakou lawe ana ae i ke ano o na mea i hanaia, i hoea mai ai ia mau hana haihai kanawai o ka wa i hala me ko keia wa, e loaa ana ka haina pili pono loa. O ke au o keia ano noho aupuni ana, ke au oi loa aku o ke aino o ka ke au o ka wa i hala. I olelo ae la makou i keia, mamuli o ka nui o na ino e ikeia aku nei e hoea mau mai ana i |kela a me keia pule iloko o ke au o keia noho aupuni o keia au a kakou e noho aupuni nei, ke au a na lehelehe o na mikanele i kualehelehe ae ai maloko o na hale halawai a me na huina alahui, e ao ana i na Hawaii e hoohui aina me Amerika i loaa ke aupuni maemae, hemolele loa nani loa, helu ekahi, i loaa ole i ua poe nei mai ka hookumuia ana o ka hookumu honua ana o ke Akua; a i ka lanakila ana o ua poe nei, a hooko ia ko lakou makemake aupuni hemolele, ia wa i komo nui mai ai na makamaka hou pahi a me hoaloha aihue, a moe uwapo o lakou, a lilo ke kanawai mamala hoe a Kamehameha i kau ai, "E hele ka elemakule a moe i ke ala, e hele ka luahine a moe i ke ala" i mea ole. A ma kahi o ke aupuni hemoleleo a lakou i waha nui mai ai, ke aupuni hou pahi, malama pu panapana a me na mea pepehi kanaka e ae, oiai nae ke au o ka noho Aupuni Moi ana, aole he mea o keai anao i ikeia, ka lawe ia ae o na hana hou pahi a na maka o ka Ilamuku e nana mai ana no. Nolaila, owai o keia mau au o ka noho aupuni ana ka oi o ka maikai? a owai hoi ka oi o ka ino? Ka makou e pane nei, o ke au noho Aupuni Moi ka oi o ka maluhia a me ka maikai, ao ke au o ka noho Aupuni Amerika ana e noho ia nei ka oi o ka haunaele a me ka ino.