Ke Aloha Aina, Volume VI, Number 40, 6 October 1900 — NANI! MAIKAI! HEMOLELE! [ARTICLE]

NANI! MAIKAI! HEMOLELE!

Ma ka mokuahi Waialeale i hiki mai ai ke'lii Kawananakoa, i ka hora 2 o ka ponei. Ua hoopaa oia i kona inoa ma ka Papa Koho o kona apana koho, a ano ua huli hoi aku oia no ka hoopau ana i kana hana ma Hawaii, ma ka Mauna Loa a hui aku me kona mau hoa kalaiaina ma Kau. Mai Kau mai oia e hele mai ai a hiki i na Kona, a ma Kohala e kau ai no Maui a hoopau i kana hana malaila. Ke pau ia e hoi mai ana oia a e holo loa ana no Kauai a pau ia mokupuni e hoi mai ana no Oahu nei; a hookuonoono iho no ka hana ma keia mokupuni nei. Wahi ana, ua nani maikai a hemolele ka lahui ma ka mokupuni o Hawaii oiai aia me ia na mahimahi me na olohe kalaiaina, a aole he kanalua no kona lanakila a me ka Aoao Demokarata. Ke waiho ae nei oia i kona mahalo ia Mrs. E. A. Nawahi imua o ke akea, oiai nana na alakai a me na kokua ana e hoike ana i kona aloha aina a me kona aloha alii oiaio, e like me ia i hoike mau ia e kana kane i kaa aku ma kela huli o ka noho ana, Mr. Joseph Nawahi. Ke hana nei no ka wahine i ka hana a ke kane, a ke puana ae nei makou e kau mai ko ka lani mau hoopomaikai i kana mau hana aloha kane, aloha aina, a aloha alii, a e pomaikai hoi ka lahui ma kana mau kokua ana.