Ke Aloha Aina, Volume VII, Number 23, 8 June 1901 — Page 8

KE ALOHA AINA

 

POAONO, IUNE 8, 1901

 

MOOLELO HOONI PUUWAI

--:NO:--

Kuu Aloha i na Pua, Kuu Ipo o na Launahele!

--

Ka Makaikiu Kupaianaha!

--

MOKUNA IX.

E LALO OE NA’U E MAKEMAKE –KO’U MOOLELO AOLE LOA OE E LOHE.

            Nolaila, ma keia wahi e hoomanao iho e ka mea heluhelu, o keia Ailika Lema, o ka Haku Aulika Danekota no ia o ke Kakela Danekota, mahope iho o ka make ana o kona makuakane hanauna, ka haku Barila Danekota, a o ka moolelo hoi a ua haku opio nei i hunakele loa ai ia Silevia malalo o kela ia oa kapaka pa o ka wahahee Ailika Lema.  Aka e hiki mai ana nae ka ia ana e ike ai i kona kuhinewa nui, a mih@ho hoi me na kapuai haalulu iloko o kona mau kamaa buti, no ka mea, aia ma kona meheu ke hanu mai la he ilio hookolo meheu pololei e loaa pono ai ua Ailika Lema wahahee nei e aahu ana iaia iho iloko o kona hanohano a me ka waiwai o ka inoa Haku o Danekota Kakela.

            O ka huaolelo hope loa a ua Ailika Lema a Haku Danekota nei i hoopuka hope ae ai a haalele iho ia Palomolo Hale, oia no kona nonoi ana ae i na lani e huikala aku o Silevia iaia no kana mau hewa i hana aku ai maluna ona (Silevia) a e hoopoina hoi ua Silevia nei ana i na hoomanao ana ae no na mea i hala, no ka mea, aole oia he wahine i mare ia eia, aka, he wahine wale no ia i mili ia i ka la o ka makemake a me ka la a ka anoi i hiki mai ai, a i keia wa eia oia ke makaukau nei e komo aku iloko o ka Paredaiso nani o ka maha no ka hoohui mare malalo o ka inoa ka Haku Opio o Danekota Kakela.

 

MOKUNA X.

AWAIAULU IA E KA ALOHA—KA MAKANA

POINA OLE KA PUUWAI—KE ALOHA

POLULUHI I KE KINO—KA LA

 HOOHUIMARE O KA HAKU

 DANEKOTA.

 

            O na la liuliu makaukau o ka hoohui mare mawaena o ka Haku Opio o Danekota Kekela a me ke kauka wahine opio o Stanefila Hale ua lawe ia mai ia me ka pupuahulu nui o ka awiwi maluna o ke kahua onipaa i awaiaulu ia e ke aloha mawaena o kekahi a me kekahi, a mamua ae o ka hoea ana mai o kela la e hiki aku ai i ka minute hope loa  o ka noho lanakila ana o kela a me keia kane a wahine mai ke kipuka kaula polena paa loa mai o ka berita mare, aia hoi, ua kipa ike aku ka Haku Opio o Danekota i kana wahine hoopalau a ke aloha i awaiaulu ai, a ua hookipa ia aku ua Haku Opio ula elike ma ka hanoha no i loaa i ka aoao o ka wahine, ua panee ia mai imua o ua Haku Opio nei na mea a pau e hiki ole ai i ka naau ke hoohalahala, a o ka oi loa aku o na makani i haawi ia mai ai i ua Haku Opio aia, oia no ka muki honi lehelehe me na huaolelo meli a ke kauna wahine opio Kel@.

            Ma ka umauma o ua kauna wahi ne opio aia e paa ana he boke pua rose ulaula a me ke keokeo, ka buke pua rose hoi a ka Haku Opia i haa wi aku ai i na nana pono ana me ke kamailio pu ana aku i ka olelo mua o ka hoolauna.  Ua like ke ala waianuhea o kou hanu e kuu Silevia me ke ala onaona o keia mau pua rose, aka, --- a hoomaha koke iho la ua Haku Danekota nei, oiai ua ike a hoomaopopo iho la ia i kona kuhihewa me ka hoao ana ae e hoonaionaio i kana mea i kamailio kuhihewa ai.  Aka, na pane e mai la nae ke kauna wahine opio.

            Aole i oi aku ka waianuhea o ko lakou ala elike me ko’u aloha nou e kuu Aulika, aka, heaha ia au i hoopuka ae la i kela inoa Silevia, a oe hea oe i kap@ mai ai ia’u o Silevia.

            Pela io anei e kuu aloha, alaila, e kala mai ia’u no keia kuhihewa, aole au i manao ua hoopuka ae nei au i kela inoa, wahi a Haku Dane kota me ka maalea, a hoao maoli no hoi e huna i ka oiaio.

            Alaila, pehea i paa ai kela inoa iloko o kou mau hoomanao ana, ua ike anei oe i kekahi mea i kapa ia ma ka inoa Silevia e kou aloha?  wahi a ke kauna wahine opio.

            Aole!  Aole o’u hoomanao ua ike a halawai pu au me kekahi lede oia inoa, wahi a Danekota me ka wahahee nui, me ha hoomau hou ana aku i ke kamailio.  Aka, ke hoomaopopo a hoomanao nei nae au no kekahi moolelo a’u i heluhelu a@i ka po nei oia hoi ka mooelelo o na ipo aloha a Silevia, a me he la, oia mau hoomanao no paha o’u no ua moolelo ala, pela au i kamailio kuhihewa ae nei a kapa aku ia oe o kuu Silevia.

             Alaila, e oluolu oe e kuu Haku e hoouna mai i kela buke no ko’u heluhelu ana i kela moolelo nani, wahi a ke kauna wahine.

            Ae e kuu aloha, e hoouna mai ana au ia mea me ka hakaha ole, wahi a ka Haku Danekota me ke ano haikea ana ae o na helehelena, no ka mea, aia iloko o na hoomanao poina ole ana a kona puuwai, aia he aloha ke opiopio mau ala kona mau lau uliuli, me he la, ano koke ae la no, aka, e kaia kahiko wale nae ua makana poina ole nei a ka puuwai i ulu ai a kolo kena mau aa hiki ole ke uhuki ia ae.

            Iloko o keia makana poina ole a ke aloha e hoolamalama mau ala i ka puuwai o ka Haku Danekota, aia he aloha hou ke poluluhi iho la maluna o ke kino a me ka ikaika holookoa o ua haku nei, a o ua aloha nei e poluluhi ala i ke kino o ka Haku Danekota, o ke aloha wela ikiiki no ia o ke kauna wahine opio Kelauaia, ka ui a me ka nani iwaena o na wahine koko alii o Pelekane.

            Nolaila, iloko o na kukai olelo a me na hooheno ana a ka ipo me ka ipo, no ka awaiaulu pau ana i ko laua mau aloha e lilo i hookahi kaunu ana me ka manao, ua hooholo ia ka aelike pae loa o ka la iwakalua o ka mahina o Iune e hiki mai ana, oia ka la hope loa e loaa ai i kela a me keia o laua ka noho kuokoa ana o ka lanakila, alaila, lilo ae laua i mau mea kino hookahi malalo o ka mana o kela olelo hooholo kaulana loa o ka hoohuiaina.  O ka mea a ke Akua i hoohui ai ma ka mare, mai hookaawale ae ke kanaka.

            Aka, e ka mea heluhelu i ka nee mua ana aku o ka moolelo iloko o na au kokoia o ka manawa, alaila, e hoomanao ia aia no he la e hoea mai ai o ka anela laku o ka hoopai me kana pahikaua oilua o ka eha eha a hanau iho la maluna o kela olelo paa loa o ka mana a me ka ikaika e mokumoku hi@ ai oia i na apana weluwelu he mau tausani, no ka mea, aia mahope mai o ke kua o kela anela luk@, ke nana mai la he mau maka poni uliuli i piha me ke aloha a me ka oiaio, a he mau helehelena hoi kona a ka ui a me ka nani e hiki ai ke kapa ia aku, ka lede malihini ui o ka nani, aka, o kona kulana nae, he haahaa lalo loa ia o ke koko makaainana.

            Alaila, heaha hoi ka mana a me ka ikaika i loaa i kela lede malihini ui o ka nani a ke koko haahaa o ke kulana makaainana e holo aia iloko o kona mau aakoko e hiki ai ke wawahi a kulai i ka mana o kela berita mare paa loa mawaena o ka Haku Aulike Danekota a me kana kauna wahiine o ka nani?

            Ina he mana oikelakela loa ae kekahi maluna o na lani e hiki ai ke hoike mai i ka mea huna pohihihi iloko o ka puuwai o ka Haku Daneketa, alaila, o kela lede malihini ui a nani o ke koko makaaina-na ka hiki mua loa ma ka olelo ia ana, oia ka makana poina ole iloko o ka puuwai o ka Haku Danekota a o ka mea hoi nona ke aloha e poluluhi ala i ke kino o ua Haku ala.

            Ua manaolana kuhihewa maoli ua haku ala he kanaka lanakila oia mai na umii a kupee ana a ko ke ao nei mau ahewa ana, aka, a hiki mai la nae ka la o ka hoopai a me ka hoahewa ana ia, alaila, kaakaa ae la na maka o ua Haku ala, a ike i kona kuhihewa nui, alaila, olelo iho la ia.  Lapuwale o na lapuwale, pau loa na mea a pau i ka lapuwale.  Iloko o ka wehi o na pua i lilo ai maua i mau ipo kahi i kekahi, a mawaena o na launahele uliuli i hooko ai mana i ko maua mau aloha, aka, e ke au kokoia o ka manawa, he oiaio anei o ke aloha a’u i poina a haale le aku ai, eia oia mahope o ko’u meheu, a e @ lo ana hoi au he kanaka hoohilanila ia.  Aole loa!  Ei@ke ma kona lohe ole ana i ko’u moolelo oiai, ko’u mau la e noho pu ana me ia, pela no auanei oia e hoohewahewa mai ai ia’u a hiki aku i ka hopena.

            O keia na olelo mihi a ka Haku Danekota me ka manaolana kuhihewa o ua Haku ala nohe mana e ae malalo iho a ka lani e hiki ke hanu aku mahope o kona meheu a hoikeike ae iaia imua o ke no akea, aka, a hiki mai nae i kona la o ka haulehia ana alaila, hoomanao ao la ia ua hiki mai ka hopena o kona inoa hanohano, a o ua la ala, oia no ka la a Heneri Beleinehama, ka makai kiu kupaianaha, i hoea aku ai imua o Silevia me kana hoike pili oihana a pane i keia mau olelo o ka hooko kauoha:  O Ailika Lema kau kane mare ua haawi hou mai ko keia ao iaia iloko o ka poho o kou lima, mahope iho o kona huna ana iaia iho no keia mau makahiki loihi i hala ae nei.

            Nolaila, i ke kapae a waiho ana aku i na keaka a me ke kamailio ana no keia mau mea e pili ana i ka Haku Danekota, e huli ae na nana a makaikai ana maluna o Danekota Kakela, a e ike ia no aia kona mau paia a pau ua malamalama me na tausani ihoiho e aa ana, a no lakou noi ka malamalama ikaika e hoikeike ana i na helehelena o kela a me keia, a ma ka olelo pokole ana ae, aohe po hauoli e ae i ike ia ma Danekota elike iho la me keia.

 

--

PIHOIHOI HOU O LADANA E NA HANA A JACK THE RIPPER.

--

            Ladana, Mei 28.  He pepehikanaka mena hana hoomainoino kai iko ia ma kekahi hale hoolimalima ma ke alanui Dorest, Whitechapel, kokoke loa i kahi i lawelawe ia ai o na hana pepehikanaka a “Jack the Ripper” maluna o na wahine i ka 1888, maluna o kekahi wahine nona ka inoa o Annie Austin.  He 28 makahiki o keia wahine, a ua loaa aku oia iloko o kekahi rumi e ailiili ana ma ke kakahiaka La Pule nei, a ua make oia i ka wa i lawe ia aku ai no ka haukipila.

            Ua mahuka mua ka limakoko, a ma ke kakahiaka onehinei i hoike ia mai ai i ka oihana makai.  O lalo o ke kino o ka wahine ua hiki ole kona mainoino ke hoikeia aku.  E oia ana no ka wahine i kona wa i loaa aku ai, aka, ua make nae oia me ka puka ole ae he wahi huaolelo.  Eia ke oihana makai ke hanu nei i ka meheu o ka puuwai eleele, a ua hoala ia ae na nanaina pihoihoi i na poe e noho kokoke nei malaila.

--

            He keako no ko ka Ofiuma i keia po.

            E holo hou aku ana no o Bekele no Wasinetona mahope iho o ka hookuu ana o ka Ahaolelo maanei, pela na lono i hoike ia mai ia makou.