Ke Alakai o Hawaii, Volume II, Number 32, 5 December 1929 — HE MELE NO KAMEHAMEHA V. [ARTICLE]

HE MELE NO KAMEHAMEHA V.

E na hoa uhai a holo o ka nupepa Ke Alakai o Hawaii, o ke mele, 'Aia i Honolulu kuu pohaku,' he mele hoolauna ia i haku ia e Luka Keelikolani ia ia i holo mai ai i Honolulu nei mai Hilo mai e hui pu me ka Moi Kamehameha V.

Mamuli o na mea i hoomaopopo ia, ua manao ia ua haku no oia i keia mele oiai oia ma Hilo mamua o kona holo ana mai i Oahu nei.

Aia iloko o keia mele na mea huna e pili ana i ke kulana o ke aupuni i ke kau o ke alii Loka Kapuaiwa Kamakaiouli (Kamehameha V), ke paonioni mawaena o na haole ame ke Alii, na imi epa a na enemi o ke alii, ame ko lakou hoao ana e hoopuhili i na hoolala ana a ke alii ame kona mau aialo e lilo o Pauahi i wahine hoao nana.

Ke noi aku nei ka Hale Hoonaauao Hawaii i na keiki oiwi o ka aina, na hapauea i kamaaina i ka moolelo o ke alii Kamehameha V, ame na olohe hoi e ola mai nei, e heluhelu me ka hialaai nui i na wehewehe ana o keia mele elike me ia i loaa mai ai i ka Hale Hoonaauao Hawaii, mai kekahi mai o na keiki hanau o ka aina, ma o na kokua ana a Theodore Kelsey.

E haawi makana ana ka Hale Hoonaauao Hawaii i ka nupepa Ke Alakai o Hawaii, no hookahi makahiki, i ka mea e hoouna mai ana i ka leka helu ekahi o na wehewehe ana maluna o keia mele. E hoouna ia mai na leka i ke keeha o ke Alakai o Hawaii iloko o elua pule mahope o ka hoopuka ana aku o na mea apau i hoomakaukau ia.

Eia mai ua mele nei ame na wehewehe ana a na loea no lakou keia mau inoa: Pauloa Kealaikahiki Kapanookalani mai ia

ia i loaa mai ai keia mele, Kapula (Prof. Fred Beckley) i a'o ma ke kula kiekie o Hawaii, Kawika Malo Kupihea i a'o pu

me ka loea J. M. Poepoe no na makahiki umikumamalima, James Anania Iokepa, i hanau ia ma Honomu, Hawaii, Rev. H. B. Nalimu i hanau ia ma Papaaloa, Hawaii, 1835, ame J. P. Kuluwaimaka ka olohe oli i ke alo o ka Moi Kalakaua.