Ka Hoku o Hawaii, Volume XXII, Number 16, 18 September 1928 — He hoomanao aloha no Kualii Kaulukou [ARTICLE]

He hoomanao aloha no Kualii Kaulukou

I ka Lunahooponopono o Ka Hoku o Hawaii - Aloha oe. Ma ka la 1 o Iulai i hala aku nei i haalele mai ai o Kualii Kaulukou i keia ola ana ma kona home ma Waiolama, Hilo, Hawaii, kona home aloha. He keiki kupa oia no Kau a oo Honuapo kona one hanau. O Kaulukou kona makuakane a o Kaheana kona makuahine. Ua nalowale oia no na makahiki loihi mai ka aina hanau aku oiai no au e kamalii ana no o Kalua kona kaikuahine ko'u kahu hanai o lakou nei no ka poe nana i hoomanawanui i kuu mau la kalii. I kuu hoi ana mai ne me ka'u ohana e noho paa ma Hilo nei ua hiki pinepine aku no e ike iaia, e kipa aku ana no ina manawa like ole me ke aloha makua no e hiipoi ana, e ike aku i ka hulu makua i hiki aku e komo pu aku ma kana huakai hope loa ma keia ao, pela au e hoohanini nei ina kuluwaimaka o ka hoomanao poina ole nona. He kanaka oia i kamaaina i ke alo o na alii a ua hoohala ia he mau makahiki loihi o kona mau la opioo imua o ko lakou alo. Ua noho pu oia me John Baker ame kona ohana a pela paha oia i kaawale mai ai a noho ia Hilo nei. I ka make ana o John Baker ua noho no oia nona iho, e lawelawe hana ana no ke kalana i loaa ke ola o ka noho ana a hiki wale i kikoo ana mai la o na lima o ka make iaia. O ka Hoomana o na La Hope o kona hoomana no ia i ku ai a hele wale aku la me ka makaukau e hui pu me kona hanu ana no i hilinai aloha ai. Ua haalele iho oia mahope nei he wahine kanemake, he mau keiki ame na moopuna e noho kaumaha ana nona. Ua nui kuu kaumaha iau i kipa aku ai e ike no e like me ka mea maa mau, o na waimaka halo'ilo'u o ka makuahine kanemake kai hoike mai ua hala ka makua ua haalele mai ia kakou. Aloha no, I ka hoopau ana ae i keia ke komo pu aku nei maua a kaumaha pu me ka ohana i hoonele ia i ka makua ole. Na ke Akua Mana Loa e hoomama mai i ko kakou mau kaumaha. O maua iho no me ke aloha. Mrs. P. Makakaua Moses Makakaua